Pedro tỹ carta han vén 5:1-14
5 Vãhã sóg igreja to kófa ag jyvẽn sór mũ, ha mẽ. Ãjag ri ke inh nĩ, isỹ tỹ ãjag kóm igreja to kófa jẽn kỹ. Cristo jagtar ve ja inh nĩ gé, hã ra. Ti vẽnh ven mãn ke kurã ẽn kã sóg tỹ ũn mág jẽnh ke mũ gé.
2 Kỹ sóg ãjag mỹ tag tó sór mũ, ha mẽ. Ãjag krẽm ke ag ki rĩr há han nĩ. Ũ tỹ carneiro ki rĩr tĩ ẽn tỹ ti mẽg ki rĩr há han ẽn ri ke han nĩ. Topẽ tỹ ãjag mỹ vẽnh rãnhrãj nĩm jan hã vẽ. Kỹ ãjag gỹj mĩ ẽkrén sór tũg nĩ gé. Topẽ tũ vẽ, ãjag rãnhrãj ti, hã kỹ ki rĩr há han sórm nĩ.
3 Kỹ ãjag krẽm ke ag ki rĩrm nĩ. Ag mỹ komẽr hã vĩm nĩ. Ag rĩnve vẽjykre há hã han kỹ nỹtĩm nĩ, ag tỹ ãjag jykre há ve kỹ ãjag kóm han sór jé.
4 Kãnhmar ti kãtĩg mãn ke mũ, ẽg pãꞌi mág ti, ẽg ki rĩr tĩ ti. Kỹ tóg ãjag tỹ ũn mág han ke mũ. Ãjag mỹ tóg krĩ tógfĩ ri ke vin ke mũ, ãjag tỹ tỹ ũn mág nỹtĩn kỹ. Hã ra tóg kórég vãnh nĩ, kanhkã tá ẽg krĩ tógfĩ ẽn ti.
5 Kỹ sóg kyrũ ag jyvẽn kỹ: “ũn sanh tỹ ãjag mỹ nén tó mũ ẽn han nĩ,” he mũ.
Kỹ sóg vẽnh kar jyvẽn kỹ: “jagnẽ to é he tũg nĩ. Jagnẽ ki rĩr há han nĩ,” he mũ. Tag vỹ rán kỹ nĩ, ha mẽ. “Topẽ vỹ ũ tỹ jagnẽ to é he mũ ag kato tẽ tĩ. Hã ra tóg ũ tỹ: “ũn sĩ vỹ tỹ inh nĩ,” he mũ ẽn to há nĩ,” he tóg. Hã kỹ vẽsỹ ũn mág han sór tũg nĩ.
6 Topẽ vỹ tar nĩ, kỹ tóg kejẽn ẽg mỹ nén ũ jagy jẽnẽg tĩ. Ti kato tẽ tũg nĩ hã ra. Ti tovãnh sór tũg nĩ gé. Kỹ tóg ti kurã ki ãjag tỹ ũn mág han ke mũ, ha vem nĩ.
7 Ãjag krĩ kufy nĩn kỹ ti hã mỹ tóm nĩ. Kỹ tóg ãjag mỹ ãjag krĩ kuprãg ke mũ. Ti hã vỹ ẽg ki rĩr nĩgtĩ.
8 Vẽnh ki rĩrm nĩ. Nũr ri ke han tũg nĩ. Ha vé, ẽg kato vãsãn tĩ ẽn, Japo ẽn tóg ẽg to vãjig tĩgtĩ. Mĩg kókĩr ri ke ti nĩ, ti tỹ ẽg mãn sór kỹ.
9 Hã kỹ ti kato vãsãnsãn nĩ. Jesus Cristo ki rã tovãnh tũg nĩ gé, ũ tỹ ãjag tỹ ti tovãnh han sór mũ ra. Ha vé, ẽg kanhkã kar ag vỹ jagtar tĩ, ãjag kóm, ga kri ke kar ag. Ag mĩ ẽkrén kỹ tar nỹtĩm nĩ.
10 Kurã pipir ki ãjag tóg jagtar tĩ. Kar kỹ Topẽ vỹ ãjag tỹ ũn há tãvĩ han ke mũ, ãjag tỹ kygnẽ mãn tũ nĩ jé. Ti hã vỹ ẽg tar han tĩ, ẽg tỹ ti to krónh ke tũ nĩ jé. Ẽg kuprẽg tóg mỹr, ẽg tỹ Cristo tugrĩn kanhkã ve jé, ẽmã sĩnvĩ pẽ ẽn ti, ũ tũg vãnh ẽn ti.
11 Topẽ hã vỹ ti pir mỹ tar nĩꞌ. Ti hã vỹ tũꞌ henh ke tũ nĩꞌ. Hã vẽ.
Pedro tỹ ag mĩ ẽkrén
12 Tó sĩ han sóg ãjag mỹ. Kỹ Silas tóg inh mỹ ãjag mỹ rán mũ, inh vĩ ti. Ẽg kanhkã vỹ tỹ ti nĩ. Jesus tovãnh jãvãnh ti nĩgtĩ. Kỹ tóg iso há nĩ gé. Isỹ ãjag tar han sór vẽ. Hã kỹ sóg ãjag mỹ inh vĩ jẽnẽg mũ. Topẽ vỹ ẽg tar han ke mũ mỹr. Hã kỹ ti to krónh ke tũg nĩ.
13 Ẽmã tỹ Babilônia ki ẽg nỹtĩ. Kỹ tag ki ũ tỹ ãjag mré Jesus ki ge kỹ nỹtĩ ag vỹ ãjag mĩ ẽkrég tĩ. Ãjag mré tóg ẽg kuprẽg, Topẽ ti. Kỹ inh kósin tỹ Marcos vỹ ãjag mĩ ẽkrég tĩ gé.
14 Jagnẽ ki nhun ke ri ke han nĩ, jagnẽ nĩgé kãgmĩ kỹ, ãjag tỹ tỹ jagnẽ mré ke nỹtĩn kỹ.
Cristo mré ke vỹ tỹ ãjag nỹtĩ. Topẽ jé ãjag krĩ tỹ kãnhvyꞌ hé. Hã vẽ.
