Tessalônica tá ke ag mỹ carta ũ 2:1-17
2 Inh kanhkãꞌ, sỹ ãjag jyvẽn há tóg tĩ sir. Kãnhmar ti kãtĩg mũ, ẽg Senhor tỹ Jesus Cristo ti. Kỹ ẽg tóg vẽnh mãn mũ, ti tỹ ẽg gé tĩg jé sir. Kỹ ẽg tóg ti mré nỹtĩnh mũ.
2 Ha ra tóg ver kór gy sĩ tĩ. Kỹ ũ tỹ ãjag mỹ: “Topẽ kuprĩg tóg inh mỹ: ũri ke vẽ, hé,” he mũ ra kri fi tũg nĩ. Ãjag fe tỹ jũrũn ke tũg nĩ. Ũ tỹ ãjag mỹ: “Paulo vỹ inh mỹ tó, kỹ tóg: ũri ke vẽ, hé,” he mũ ra kri nĩm tũg nĩ gé.
3 Ag jykre tugnỹm ra, ũ tỹ ãjag krĩn kónãn sór mũ ag. Ũri ke tũ vẽ ver. Ti kãtĩg ke to hã ũ tỹ hẽn ri ke ag vỹ ti tovãnh ke mũ ver. Ti kato tẽgtẽ jé ag tóg ke mũ ver. Kỹ ũ tóg ver vẽnh ven ke mũ gé, hã vỹ: “ũ tỹ Topẽ vĩ mranh tĩ ẽn,” he mũ, “ũ tỹ nũgme ki kutẽnh ke mũ ẽn ti,” he mũ.
4 Topẽ vĩ mranh tĩ pẽ vẽ. Hã kỹ Topẽ vỹ nũgme ki ti fón ke mũ. Ẽn vỹ tóg Topẽ kato tẽnh ke mũ ver, vẽnh kãgrá tỹ topẽ kato ke gé. Kỹ tóg vãhã sir Jerusalem tá Topẽ ĩn krẽm rãnh mũ, Topẽ nĩg ja ẽn tá tóg nĩnh mũ. Kỹ tóg vẽso: “tỹ sóg Topẽ nĩ,” henh ke mũ, ón kỹ.
5 Isỹ ãjag mré nĩn kỹ sóg ãjag mỹ tag tó ja nĩ. Kỹ mĩ ẽkrén nĩ.
6 Ũ tỹ ver ti ki rĩr nĩ ẽn tỹ ti ki rĩr nĩn kỹ tóg ver vẽnh ven tũ nĩ. Kỹ tóg ón kỹ: “tỹ sóg Topẽ nĩ,” he tũ nĩ ver. Ti kurã ki tóg vẽnh ven ke mũ sir vãhã.
7 Ũri ũ tỹ hẽn ri ke ag tóg vẽjykre pãno han mũgtĩ, Topẽ vĩ mranh kỹ. Hã ra ag tóg ver vẽnh pigju kỹ han tĩ. Kỹ ẽg tóg ve há han tũ nĩ, ag jykre pãno ti. Kỹ ũ tỹ ón kỹ: “tỹ sóg Topẽ nĩ,” he mũ ẽn tóg vẽnh ven tũ nĩ gé ver.
8 Ti tỹ ti ki rĩr tovãnh kỹ tóg vẽnh ven ke mũ sir vãhã, ũn jykre pãno ẽn ti. Hã ra ẽg Senhor tỹ Jesus vỹ ti tén ke mũ, ti jẽnger tỹ.
9 Hã ra ũn jykre pãno ẽn vỹ tóg Satanás jykre han mũ, Nén-Kórég tỹ ti krĩn kỹ. Kỹ tóg ón kỹ vẽjykre tar hynhan mũ, ẽg tỹ nén han vãnh ẽn mỹr. Kujá ag jykre ri ke han jé tóg ke mũ.
10 Vẽnh kar lograr he jé tóg ke mũ gé. Jykre kuryj nĩ ve tóg nĩnh mũ, hã ra tóg pãno nỹ. Kỹ ũ tỹ nũgme ki vár ke mũ ag vỹ ti vĩ kri fi kãn ke mũ, ag tỹ Topẽ vĩ kri nĩm tũ hã ra. Vẽnh vĩ há to ag tóg há tũ nỹtĩ, hã kỹ ag tóg krenkren ke tũ nĩ.
11 Hã jé Topẽ tóg ag mỹ vẽnh ó jẽnẽnh ke mũ, ag tỹ ón kỹ vẽjykre ẽn kri fi jé, ag tỹ kri nĩm sór kỹ.
12 Topẽ tỹ ag jykre tugnỹm kỹ tóg nũgme ki ag vãm ke mũ. Vẽnh vĩ há kri fi jãvãnh ag tóg nỹtĩ mỹr. Vẽjykre pãno hã to ag tóg há tãvĩ nỹtĩ mỹr. Hã kỹ tóg ag vãm ke mũ, nũgme ki.
Topẽ tỹ ẽg kuprẽg
13 Jãvo sóg ãjag to Topẽ mré vĩ há han tĩ, kurã kar ki mỹr. Tỹ ãjag tóg Jesus mré ke nỹtĩ, ẽg Senhor mré. Kỹ tóg ãjag to há tãvĩ nĩ. Topẽ vỹ ãjag kuprẽg. Ti kuprĩg tỹ tóg ãjag tỹ tỹ ti tũ nỹtĩ han, ãjag krenkren jé. Kỹ ãjag tóg ti vĩ kri fig mũ, vẽnh vĩ há ẽn kri.
14 Isỹ ãjag mỹ Jesus vĩ tón kỹ Topẽ vỹ ãjag kuprẽg, ãjag tỹ ẽg Senhor tỹ Jesus Cristo mré tỹ ũn mág nỹtĩ jé.
15 Inh kanhkãꞌ, tar nỹtĩm nĩ, sỹ ãjag kanhrãn to, ãjag tỹ ki króm jé. Isỹ ãjag mỹ Jesus jykre tó mũ ẽn to tar nỹtĩm nĩ, sỹ ãjag mỹ nén rán mũ tag to ke gé.
16 Ẽg Senhor tỹ Jesus Cristo hã vỹ ẽg to há tãvĩ nĩ, ẽg jóg tỹ Topẽ ke gé. Kỹ tóg ẽg krĩ kuprãg mũ sir, ẽg tỹ to krónh ke tũ nĩn jé. Ti hã ne tóg ẽg mỹ ti tỹ nén ũ há ẽn ven ke mũ. Hã ve sór ẽg tóg mũ.
17 Ti mỹ sóg to vĩ tĩ, ti tỹ ãjag fe tỹ háꞌ he jé, ti tỹ ãjag tỹ nén ũ há han jé, ãjag tỹ ki hã kãmén jé gé.
