Tessalônica tá ke ag mỹ carta ũ 3:1-18
3 Inh kanhkãꞌ, vãhã sóg ãjag mỹ nén ũ to vĩ mũ gé. Iso Topẽ mré vĩm nĩ, ẽg Senhor vĩ tỹ kãnhmar vẽnh kar kri rũm ke jé, vẽnh kar tỹ ti vĩ to há nỹtĩ jé, ti mỹ vĩ há han jé, ag tỹ ãjag ri ke nỹtĩ jé.
2 Ti mỹ to vĩm nĩ, ti tỹ ijy nĩgãn jé, vẽjykre pãno han mũ ag jo, ũn jykre pãno ag jo ke gé. Ũ ag tóg Jesus ki ge jãvãnh nỹtĩ, hã kỹ ag tóg iso kórég nỹtĩ sir.
3 Hã ra ẽg Senhor vỹ ti tỹ nén tó ja ẽn han ke mũ. Ãjag tar han jé tóg ke mũ. Ãjag jy nĩgãn jé tóg ke mũ gé, Japo jo, Nén-Kórég ẽn jo.
4 Ãjag hỹn inh vĩ han ke mũ, kỹ tóg inh mỹ há tĩ. Topẽ vỹ ãjag krĩn ke mũ, ãjag tỹ sỹ ãjag mỹ nén tó mũ ẽn ki króm jé. Kỹ ãjag tóg to krónh kenh ke tũ nĩ sir.
5 Ẽg Senhor jé ãjag krĩn, ãjag tỹ ti to há nỹtĩ jé, ti tỹ ẽg to há ri ke. Ti jé ãjag krĩn, ãjag tar nỹtĩ jé, ãjag jagtar hã ra. Cristo vỹ ge ja nĩ gé. Kỹ ti nón gem nĩ.
Ẽg tỹ rãnhrãj ke
6 Inh kanhkãꞌ, vãhã sóg ãjag jyvẽn mũ gé sir. Ãjag jyvẽn tar han sóg mũ gé. Ẽg Senhor tỹ Jesus Cristo jykre tỹ sóg ãjag mỹ: “Jesus mré ke ũ ag tóg vẽnhmỹ mẽ nỹtĩ,” he mũ. Inh vĩ mranh sór ag nỹtĩ. Ẽn ag mré vĩ mãn tũg nĩ.
7 Sỹ ãjag mré nĩn kỹ sóg vẽnhmỹ mẽ han ja tũ nĩ. Tag ve ãjag mỹr. Kỹ ãjag tóg inh kóm han ki kanhrãn ke mũ.
8 Fagrĩnh mỹ sóg ãjag rãgró ko ja tũ nĩgtĩ mỹr. Kajãm ja sóg nĩgtĩ mỹr, sỹ ãjag mré nén ko ja ti. Kuty mré kurã ki sóg rãnhrãj ja nĩgtĩ. Kỹ sóg inh rãnhrãj to ron mág ja nĩgtĩ, sỹ ãjag tũ kagrãg tũ nĩ jé. Hã ve ãjag mỹr.
9 Sỹ ãjag tũ konh ke vẽ vẽ, hã ra sóg ãjag tỹ nén han ke mũ ẽn han sór ja nĩgtĩ, ãjag tỹ to ki kanhrãn jé, ãjag tỹ inh kóm han jé sir.
10 Isỹ ver ãjag mré nĩn kỹ sóg ãjag mỹ: “ũn rãnhrãj vãnh ẽn vỹ ne konh ke tũ nĩ,” he ja nĩ.
11 Ãjag kã mĩ ũ ag nẽji tag han vãnh nỹtĩ. Rãnhrãj vãnh ag nẽji nỹtĩ. Hã ra ag nẽji vẽnh kar to vĩ vĩ he tĩ.
12 Ẽn jyvẽn sór sóg nĩ, ẽg Senhor tỹ Jesus Cristo jykre tỹ. Ag jyvẽn tar han kỹ sóg: “rãnhrãj ra, jatun mỹ,” he mũ. “Ãjag tũ hã ko ra, ãjag rãgró ti. Ũ jẽn ko tũg ra,” he sóg mũ sir.
13 Inh kanhkãꞌ, nén ũ há tãvĩ han kãn sórm nĩ. To krónh ke tũg nĩ.
14 Hẽn ri ke mũn ũ tóg isỹ rá tag kri finh ke tũ nĩ. Ẽn jykre vég nĩm nĩ. Ti mré vẽmén tũg nĩ, ti mỹꞌãg jé sir, ti tỹ to jykrén mãn jé.
15 Hã ra ti kato vãsãn tũg nĩ, ti to kry nĩ tũg nĩ. Jesus mré ke vẽ mỹr. Kỹ ti jyvẽn nĩ, ti tỹ to jykrén mãn jé.
16 Ha mẽ, ẽg Senhor mỹ sóg to vĩ tĩ, ti tỹ ãjag krĩ kuprãg jé, ãjag jagtar hã ra. Ti hã ne tóg ẽg krĩ kuprãg tĩꞌ. Ẽg Senhor jé ãjag mré nĩgtĩ.
17 Sỹ vãhã vẽsóg ki ãjag mỹ rán vẽ, ũ tỹ inh vĩ rán ja pãte. Inh hã vỹ tỹ Paulo nĩ. Isỹ rán mũn hã vẽ. Ge inh nĩgtĩ, isỹ ũ mỹ vẽnh rá jẽnẽn kỹ.
18 Ẽg Senhor tỹ Jesus Cristo mỹ sóg to vĩ tĩ, ti tỹ ãjag tar han jé.
Hã vẽ.
