Corinto tá ke ag mỹ carta ũ 12:1-21
12 Kỹ sóg ãjag mỹ ẽg Senhor tỹ inh mỹ nén ven mũ ẽn tó sór mũ gé ver. Sỹ ãjag mỹ tónh ke tũ vẽ vẽ, hã ra ãjag tóg mẽ sór mũ.
2 Ha vé, ũ ki kanhró sóg nĩ, Jesus ki rã ũ. Kanhkã ra tóg vyr, kanhkã tãgtũ he mũ ẽn ra. 14 (ke) anos ti nĩ ha, sỹ tag ve kri. Hẽn ri ke mũn sóg inh rĩr há ra vyr, hẽn ri ke mũn inh kuprĩg tóg ra vyr, inh pijé ki kanhró nĩꞌ. Topẽ hã ne ki kanhró nĩꞌ.
3 Hã ra sóg ra vyr.
4 Kỹ sóg ẽg tỹ hẽ tá Topẽ mré nỹtĩnh ke mũ ẽn tá jun, Paraíso he mũ ẽn tá. Tá sóg vẽnh vĩ jẽmẽ. Ẽprã ke tỹ nén tónh ke tũ ẽn mẽ sóg tá, kanhkã tá vẽjykre sĩnvĩ pẽ ẽn, ẽg tỹ tag ki nén ki kagtĩg ẽn.
5 Ẽn hã to sóg: ũn mág vỹ tỹ inh nĩ, he sór mũ. Isỹ vẽsóg ki kanhkã ra tĩg pijéꞌ. Isỹ ẽg tỹ ẽprã vég tĩ ẽn tó kỹ sóg inh krój nĩ hã tó sór mũ.
6 Isỹ ũn mág nĩ tag tó kỹ sóg ki hã tó tĩ. Vẽnh ó pijéꞌ. Inh jykre vég ãjag tóg mũgtĩ. Inh vĩ mẽg ãjag tóg mũgtĩ. Kỹ tag hã to jykrén nĩ. Tag hã to ãjag tóg inh jykre ki kanhrãn ke mũ.
7 Kỹ Topẽ tóg, ti tỹ inh mỹ kanhkã ven kar kỹ to jykrén gé, sỹ vẽsỹ ũn mág han sór tũ nĩ jé. Hã jé tóg inh ki nén ũ jagy han tĩ gé. Kỹ tóg sónh tỹ inh ki já ri ke nĩ. Satanás krẽm ke ũ vẽ, kỹ tóg isãnh tĩ, isỹ vẽsỹ ũn mág han tũ nĩ jé.
8 Kỹ sóg ẽg Senhor mỹ to vĩ tãgtũ han, ti tỹ inh mỹ tỹ tũꞌ hen jé.
9 Hã ra tóg ke jãvãnh nĩ. Kỹ tóg inh mỹ: “ã jagãgtãn sóg tĩ,” he ja nĩ. “Kỹ tóg há tĩ,” he ja tóg nĩ. “Ã krój nĩ hã ki isỹ tỹ ũn tar nĩ vỹ ve há tĩ,” he ja tóg nĩ inh mỹ. Hã kỹ inh krój nĩ tag tóg inh mỹ há tĩ. Inh krój nĩn kỹ sóg Cristo tar hã tỹ tar nĩ nĩ. Tag hã ne há tĩꞌ.
10 Hã kỹ inh krój nĩ tóg inh mỹ sér tĩ, ag tỹ iso vĩ kónãn ti ke gé, inh jagtar nĩ ti ke gé, ag tỹ inh vóg kónãn ti ke gé, inh kanẽ jur ti ke gé. Inh mỹ tóg sér kar tĩ, sỹ Cristo hã tỹ fe nĩn kỹ. Inh krój nĩ ẽn kã sóg tar nĩ, mỹr, ha mẽ.
Paulo tỹ ag to há nĩ
11 Ha vé ha, vẽsỹ ũn krĩ tũ nĩ ẽn ri ke han sóg, ãjag tỹ inh kutãn kỹ. Ãjag tỹ iso vĩ há han ke vẽ vẽ. Inh pijé tỹ ũ tỹ vẽsỹ apóstolo han mũ ẽn ag krẽm ke nĩꞌ, isỹ tỹ nén ũ tũ hã ra, mỹr, ha mẽ.
12 Ãjag mỹ sóg sỹ tỹ apóstolo jẽ ven huri. Isỹ nén ũ jagy vég mũ ra sóg to krónh ke tũ nĩgtĩ. Ẽg tỹ nén han vãnh hynhan ja inh nĩgtĩ, ãjag rĩnve, Topẽ jykre ti ke gé.
13 Inh ãjag mỹ ne han ja tũ nĩ? Hã kỹ ãjag tóg ẽmã ũ tá Jesus to vẽnhmãn tĩ ag to: “ẽg kãfór ag nỹtĩ,” he mũ? Nén pir hã han tũ inh nĩ, hã vỹ: ãjag jẽn ko ja tũ inh nĩ. Kỹ tóg ãjag mỹ jagy nĩ ja tũ nĩ. Tag mỹ kórég nĩ? Kỹ inh mỹ vẽnh pãte fón nĩ.
14 Ãjag ve régre han inh huri. Sỹ ãjag ve mãn sór vẽ, mỹr. Kỹ sóg, inh jun kỹ ãjag mỹ ti jagy han sór tũ nĩ gé, ũri. Inh pijé ãjag tũ mãn sór mũꞌ. Sỹ ãjag venh kãtĩg ke vẽ. Ẽg krẽ pijé ẽg riko han tĩꞌ, ẽg tỹ ag jẽꞌỹn mũ ra. Ẽg hã ne ẽg krẽ mỹ nén ũ há nĩm tĩꞌ.
15 Hã kỹ sóg isũ fón kãn ke mũ, ãjag tugrĩn. Vẽnh fẽg jé sóg ke mũ gé, sỹ ãjag krenkren han jé. Ãjag to sóg há tãvĩ nĩ. Hã kỹ tóg inh mỹ e tĩ, ãjag tỹ iso há tũ nỹtĩ ti.
16 Isỹ ãjag mré nĩn kỹ sóg ãjag mỹ: inh ki rĩr, he ja tũ nĩ.
Hã ra sóg nẽji ãjag vatánh tá ãjag krĩn tĩ. Ãjag mỹ sóg nẽji ón tĩ.
17 Kỹ inh mỹ ãjag vatánh tá ãjag tũ mãg tĩꞌ, sỹ ãjag mỹ inh mré ke ag jẽgnẽn kỹꞌ? Vó.
18 Tito mỹ sóg to vĩ, ti tỹ ẽg régre ũ ẽn mré ãjag venh tĩg jé. Kỹ Tito mỹ inh mỹ ãjag tũ ma kãtĩg ja nĩꞌ? Ke tũ tóg nĩ, ki kanhró ãjag tóg nỹtĩ. Inh jykre hã han tóg tĩ gé, Tito ti.
19 Ãjag hỹn iso: “ón kỹ tóg vẽnh jagfy vĩ mũ. Ti tỹ ẽg krĩn vẽ, ẽg tỹ ti to há nỹtĩ jé,” he mũ. Hã tũ vẽ, kỹ Cristo vỹ ki kanhró nĩ, Topẽ ti ke gé. Ãjag to sóg hapẽ nĩ, hã kỹ sóg vĩ mũ, ãjag tỹ inh vĩ tugrĩn ti hã to tar nỹtĩ jé.
20 Tag hã to sóg jykrén mũ, ha mẽ: hẽn ri ke mũn ẽg tóg jagnẽ tỹ ũn mũ, sỹ ãjag ki jun kỹ. Hẽn ri ke mũn ãjag tóg jagnẽ to jũ mũ. Hẽn ri ke mũn ãjag tóg jagnẽ tũ ki vẽꞌĩ mũ. Hẽn ri ke mũn ãjag tóg jagnẽ to vĩ kónãn mũ. Hẽn ri ke mũn ãjag tóg jagnẽ to vĩ vĩ henh mũ. Hẽn ri ke mũn ãjag tóg jagnẽ kãfór nỹtĩ sór mũ. Hẽn ri ke mũn ãjag tóg vẽjykre e han sór mũ.
21 Kỹ tóg inh mỹꞌa tĩnh mũ, sỹ ãjag ki jun kỹ. Topẽ tỹ isỹ ũn sĩ han ri ke vẽ sir. Inh fỹnh ke vẽ, ãjag tỹ ãjag jykre pãno si ẽn tovãnh tũ nĩn kỹ, nén ũ kavéj ẽn ti, ti prũ tũ fi mré nỹ, fi mén tũ mré nỹ, fag to én tĩ ẽn mỹr. Ke mãn tũg nĩ.
