Corinto tá ke ag mỹ carta ũ 13:1-14
13 Sỹ ãjag ve tãgtũnh ke vẽ ha. Kỹ sóg ãjag jykre venh ke mũ. Ũ tỹ ẽg mré ke tỹ vẽjykre kórég han vég mũ vỹ tónh ke mũ. Ũn régre vỹ tónh ke mũ, ke tũ nĩ kỹ ũn tãgtũ.
2 Sỹ ãjag mré nĩ mãn ja nĩn kỹ sóg ãjag mỹ tag tó huri, kỹ sóg ũri ãjag mỹ rán mũ sir, ha mẽ. Vãsỹ sóg komẽr hã vĩ ja nĩ, ũ tỹ Topẽ vĩ mranh ja ẽn ag mỹ. Inh jun kỹ inh pijé, komẽr hã vĩ mãn mũꞌ, ha vem nĩ. Vĩ tar han jé sóg ke mũ mỹr.
3 Cristo vĩ mẽ sór ãjag mũ, inh ki. Mẽ jé ãjag tóg ke mũ. Ti pijé krój nĩꞌ. Tar ti nĩ, hã kỹ sóg vĩ tar han ke mũ gé.
4 Krój nĩ ve ja ti nĩ, ti tỹ krunh to sa kỹ. Hã ra tóg rĩr mãn, Topẽ tỹ ti rĩn mãn kỹ. Topẽ tar nĩn hã vẽ. Kỹ sóg krój nĩ gé, sỹ ti ki rã kỹ jẽn kỹ. Hã ra sóg, ti mré rĩr kỹ jẽ gé. Topẽ tar ve jé ãjag ke mũ, ha vem nĩ.
5 Ãjag jykre tugnỹm nĩ. “Inh mỹ Jesus ki rã há han mũ vỹ?“ hem nĩ, vẽso jykrén kỹ. “Inh mỹ tỹ Jesus Cristo mré ke nĩ?“ hem nĩ. Ãjag tỹ tag to: “hỹ, hã vẽ,” he tũ nĩn kỹ ãjag pijé tỹ ti tũ nỹtĩꞌ. Ẽn kã ãjag tóg ti tovãnh kỹ mũ nĩ sir.
6 Hã ra sóg ti tovãnh ja tũ nĩ. Ãjag tỹ tag ki kanhrãn kỹn há tĩ.
7 Ãjag to sóg Topẽ mré vẽmén tĩ, ãjag tỹ vẽjykre kórég han tũ nĩ jé. Kỹ inh rãnhrãj tóg Topẽ mỹ há nĩ sir, vẽnh kar mỹ ke gé. Ũ ag tỹ ge ra iso é he mũ ra ag jãvo nén ũ há tãvĩ han sórm nĩ. Ãjag tỹ Jesus tũ hã han ke mũ tag ne há tãvĩ nĩnh mũꞌ.
8 Inh pijé, ũ tỹ ki hã tó mũ kato tẽ sór mũꞌ. Ũ tỹ ki hã tó mũ tag ve sór inh nĩ mỹr.
9 Inh mỹ tóg sér tĩ, inh krój nĩn kỹ. Kỹ tóg inh mỹ sér tĩ gé, ãjag tar nỹtĩn kỹ, inh jãvo. Hã jé sóg Topẽ mré vĩ tĩ, ti tỹ ãjag mỹ vẽjykre há ẽn nĩm jé, ãjag tỹ hapẽ nỹtĩ jé.
10 Hã kỹ sóg, ãjag mỹ carta tag rán, sỹ ãjag vég tũ nĩn kỹ. Kỹ sóg, sỹ ãjag mré nĩnh ken kỹ, komẽr hã vĩnh ke mũ gé. Inh pijé vĩ tar han sór mũꞌ. Inh pijé inh vĩ tar tỹ ãjag kókén sór mũꞌ. Ãjag tar han sór inh mũ mỹr.
11 Inh kanhkãꞌ, sỹ ãjag mỹ rán kãn hã vẽ. Hã ra sóg ver tag tó sór mũ, ha mẽ: vẽnh ki ẽmẽm nĩ, ãjag tỹ kygnẽg tũ nĩ jé. Inh vĩ jẽmẽm nĩ. Vẽjykre pir han nĩ. Krĩ kuprã nỹtĩm nĩ. Topẽ ne ẽg to há nĩꞌ. Ti ne ẽg krĩ kuprãg tĩꞌ. Ti ne ãjag ki rĩr mũꞌ, ãjag tỹ ti jykre há han kỹ.
12 Jagnẽ ki nhun ke ri ke han nĩ, Jesus mré ke kar ki, ãjag tỹ jagnẽ nĩgé kãgmĩ kỹ. Topẽ tũ ki ge kỹ nỹtĩ kar vỹ ãjag mỹ: “ãjag mỹ há?“ he sór mũ.
13 Ẽg Senhor tỹ Jesus Cristo jé ãjag tar han. Topẽ vỹ ãjag to há nĩ. Ti kuprĩg vỹ tỹ ãjag jagrẽ nĩ. Ti jykre hã mĩ mũm nĩ.
Hã vẽ.
14 Ha vé 13:13
