Corinto tá ke ag mỹ carta ũ 2:1-17
2 Hã kỹ sóg tag to jykrén ja nĩ, ha mẽ: “ag kanẽ jun mãn sór tũ inh nĩ,” he sóg, “hã kỹ sóg ag venh tĩg ke tũ nĩ ver,” he sóg ãjag to.
2 Ha mẽ, isỹ ãjag kanẽ jun kỹ ũ nỹ hỹn inh fe tỹ mrin kenh mũꞌ? Tũ ti tĩ.
3 Hã kỹ sóg ãjag mỹ vẽnh rá ẽn jẽnẽ gé, ãjag tỹ inh kanẽ jun tũ nĩn jé gé, sỹ ãjag ki jun kỹ. Inh mỹ tóg há tĩnh mũ, ãjag tỹ inh fe tỹ mrin ken kỹ. “Ag tỹ inh fe tỹ mrin ke kỹ tóg ag mỹ sér tĩ gé,” he sóg tĩ, ãjag to.
4 Sỹ ãjag mỹ carta ẽn rán mũn kã sóg fỹ. Ãjag tugrĩn sóg kanẽ jur, ãjag tugrĩn sóg vẽnh mỹ en. Inh pijé ãjag kanẽ jun sór ja nĩꞌ. Isỹ ãjag to ha pẽ nĩn kỹ sóg ãjag mỹ vẽnh rá ẽn han ja nĩgtĩ, ãjag tỹ isỹ ãjag to há nĩ tag ki kanhró nỹtĩn jé.
Ẽg tỹ jagnẽ mỹ vẽnh pãte fón ke
5 Ha mẽ, ãjag kã mĩ ũ tóg ãjag kanẽ jun ja nĩ. Ti pijé isavĩn kanẽ jun ja nĩꞌ. Ãjag kar kanẽ jun ja tóg nĩ. Hẽn ri ke mũn sóg tó há han ja tũ nĩ, isỹ: “ãjag kar,” he kỹ. Ãjag kã mĩ ũn e kanẽ jun tóg hã ra, ti tỹ Topẽ vĩ mranh tugrĩn.
6 Kỹ ãjag tóg hur ti mỹ vĩ kónãn. Ha ti tovãnh, gen kỹ.
7 Vãhã ti mỹ vẽnh pãte fón nĩ. Ti mỹ vẽnh vĩ há hã tóm nĩ. Ke tũ nĩ mũ ra ti fe kaj tóg ti tén ke mũ, ha vem nĩ.
8 Hã kỹ sóg ãjag mỹ: ti mỹ ven nĩ, ãjag tỹ ti to há nỹtĩ ti, he mũ ha.
9 Isỹ ãjag tỹ inh vĩ kri fig mũ ẽn ve sór ja vẽ, hã jé sóg ãjag mỹ vẽnh rá ẽn jẽnẽ ja nĩ, mỹr, ha mẽ.
10 Ãjag tỹ ũ mỹ vẽnh pãte fón kỹ sóg ti mỹ vẽnh pãte fón ke mũ gé. Kỹ sóg Cristo rĩnve ti mỹ vẽnh pãte fón mũ, ãjag jagãgtãn kỹ.
11 Satanás tỹ ẽg tỹ hẽ ri ke tũ nĩ jé sóg vẽnh pãte fón mũ. Nén kórég tỹ ẽg kókén sór mũ ẽn ki kanhró ẽg tóg nỹtĩ.
Paulo krĩ kufy
12 Ha vé, isỹ ẽmã tỹ Trôade tá jun kỹ sóg tá ke ag mỹ Cristo kãme sér ẽn tó ja nĩgtĩ. Kỹ ag tóg jẽmẽ há han ja nĩgtĩ, ẽg Senhor tỹ ag krĩn kỹ.
13 Hã ra sóg ẽg mré ke tỹ Tito ve ja tũ nĩ, tá. Isỹ tá ti venh ke vẽ vẽ. Hã ra tóg ki tũ nĩ, isỹ tá jun mũ ra. Hã kỹ sóg ti to krĩ kufy nĩ ja nĩgtĩ. Hã kỹ sóg ag mỹ: “isĩg ke vẽ,” he kỹ tĩg ja nĩ sir, ga tỹ Macedônia ra, ti nón.
Jesus vĩ tỹ nén ger há ri ke nĩ
14 Hã ra sóg Topẽ hã mỹ vĩ há han tĩ. Ti hã ne inh jẽnẽꞌ, isỹ ẽmã kar mĩ tĩg jé, Cristo tugrĩn. Kỹ vẽnh kar tóg ti tỹ tỹ ũn mág pẽ nĩ hã vég tĩ, ag tỹ inh jykre jagma ẽvãnh kỹ. Hã kỹ vẽnh kar tóg ti ki kanhrãn mũ sir, isỹ ag mỹ ti tón kỹ. Kỹ tóg ag mỹ nén ger há kãfór nĩ, ti vĩ ti.
15 Nén ger há tóg vẽnh kar kri rũm ke tĩ. Cristo kãme vỹ ge nĩ. Topẽ ki kanhrãn vỹ ge nĩ. Vẽnh kar mỹ sóg ti vĩ tó tĩ, ũn krenkren mũ ag mỹ, ũn vãgfor kỹ nỹtĩ ag mỹ ke gé.
16 Ũn vãgfor kỹ nỹtĩ ag tỹ mẽg mũ ra kri fig tũ nĩn kỹ ag tóg nũgme ki vár ke mũ. Kỹ inh vĩ tóg ag mỹ nén ũ ter ger gy ẽn ri ke nĩ. Ag jãvo ũn krenkren mũ ag vỹ kri fi kỹ rĩnrĩr ke mũ. Kỹ tóg ẽg tỹ nén ger há mẽ kỹ ẽg fe tỹ mrin ke ẽn kãfór nĩ. Hã ra ẽg pijé vẽsóg ki vẽnh rãnhrãj tag han há nỹtĩgtĩꞌ.
17 Ha vé, ũ ag tóg Topẽ vĩ kãmén to jãnkamy ve sór tĩ, ke tũ nĩ kỹ ag tóg vẽsỹ ũn mág han tĩ. Ag jãvo inh pijé ti kaja ve sór tĩꞌ. Inh pijé vẽsỹ ũn mág han mũꞌ. Cristo ki rã kỹ sóg Topẽ rĩnve ti kãmén tĩ. Jykre pir han sóg tĩ mỹr. Ũ tỹ inh jẽnẽg mũ vỹ tỹ Topẽ ti nĩ.
