Corinto tá ke ag mỹ carta ũ 3:1-18
3 Kỹ inh mỹ: tỹ sóg ũn há nĩ, he mũꞌ? Vó. Inh pijé ãjag mỹ carta to vĩ mũꞌ, ãjag tỹ iso: “ũn há vỹ tỹ ti nĩ,” he jé.
2 Ãjag hã vỹ tỹ iso carta há tag ri ke nỹtĩ. Ãjag mĩ sóg ẽkrég tĩ, kỹ sóg vẽnh kar mỹ ãjag kãmén tĩ. Inh hã ki ag tóg ãjag jykre há vég tĩ. Kỹ ag tóg isỹ tỹ ũn há nĩ ẽn ki kanhrãn mũ sir. Hã ki ãjag tóg iso carta ri ke nỹtĩ.
3 Ãjag mỹ sóg Cristo jykre kãmén ja nĩ, kỹ ãjag tóg mĩ mũgtĩ. Kỹ vẽnh kar tóg ãjag jykre há vég mũ sir. Kỹ ãjag tóg tỹ Cristo tỹ carta rá ri ke nỹtĩ. Hã ra ti pijé caneta tỹ rán kỹ nĩꞌ. Ti pijé pó kri rán kỹ nĩꞌ. Topẽ kuprĩg tỹ tóg rán kỹ nĩ, ũn rĩr nĩ ẽn kuprĩg tỹ.
4 Topẽ hã vỹ Cristo tỹ isar han mũ.
5 Inh pijé vẽsóg ki nén ũ há to jykrén ki kanhró nĩꞌ. Inh pijé vẽsóg ki nén ũ há han ki kanhró nĩ géꞌ.
6 Ti hã ne inh krĩn tĩꞌ, isỹ ti jykre tãg kãmén jé. Vãhã tóg ẽg mỹ ti kuprĩg jẽnẽg mũ. Vẽjykre tãg to ken hã vẽ, hã vỹ: Topẽ kuprĩg tỹ ẽg krĩn mũ, he mũ. Ha vé, Topẽ kuprĩg vỹ ẽg rĩn tĩ. Jãvo vãsỹ Topẽ jykre si vỹ ẽg tén ke ja nĩgtĩ, ẽg tỹ mranh kỹ.
7 Moisés vỹ Topẽ jykre si ẽn tỹ pó kri rán ja nĩ, ũ tỹ ẽg tén mũ ẽn ti. Ti tỹ rán kar kỹ ti kakã tóg jẽngrẽ nĩ ja nĩ. Kỹ tóg Judeu ag tỹ ki ẽvanh sór mũ ra vẽnh mỹ tĩ ja nĩ. Hã ra tóg kejẽn tũꞌ he ja nĩgtĩ gé, ti kakã jẽngrẽ ẽn ti.
8 Kỹ ũ tỹ ũri Topẽ kuprĩg kãmén mũ ẽn hỹn tóg Moisés kakã jẽngrẽ kãfór nĩ.
9 Moisés jãvo sóg Topẽ tỹ ẽg mỹ vẽnh pãte fón ke ẽn hã tó tĩ. Hã kỹ inh sĩnvĩ tóg Moisés sĩnvĩ kãfór pẽ nĩ.
10 Kỹ vãsỹ nén sĩnvĩ ẽn tóg vãhã ẽg mỹ sĩnvĩ tũ nĩ ha, ẽg tỹ ũ tãg tag sĩnvĩ ve kỹ, ũ tãg jẽngrẽ tag ti.
11 Vãsỹ rán kỹ nĩ ja ẽn tóg tũꞌ he ja nĩ. Ti jãvo isỹ vẽjykre tó mũ tag vỹ tũꞌ henh ke tũ pẽ nĩ. Hã kỹ tóg ũn si sĩnvĩ ẽn kãfór nĩ.
12 Ẽg tỹ tag venh ke jãvãnh sóg mũ mỹr. Hã kỹ sóg vẽnh kar mỹ jamã há ra tó mũ. Inh pijé to mỹꞌãg mũꞌ.
13 Moisés tóg kur tỹ vẽnh pugrĩn ja nĩ, Israel ag tỹ ti kakã jẽngrẽ tỹ komẽr hã tũꞌ he mũ tag vég tũ nĩ jé.
14 Hã ra ag tóg ũri ki kagtĩg nỹtĩ gé ver. Kyvó ri ke ag nỹtĩ, kutu, Israel ag. Ag tỹ vãsỹ rán kỹ nĩ ẽn to ke mũ ra tóg ag mỹ Moisés vẽnh pugrĩn kỹ nĩ ẽn ri ke nĩ. Ki kagtĩg ag nỹtĩ. Ũri ẽg tóg Cristo hã tugrĩn vãsỹ nén rán kỹ nĩ ẽn to jykrén há han mũ ha, ag jãvo.
15 Ag tỹ Moisés tỹ rá ẽn to ke mũ ra ag tóg to jykrén tũ nĩgtĩ.
16 Kejẽn ũ tóg ẽg Senhor ki rã mũ, ag kã mĩ ũ. Kỹ tóg vãhã ag tỹ ti vẽnh pugrĩ vym ri ke nĩ.
17 Hã kỹ tag tóg rán kỹ nĩ, ha mẽ: “Moisés tỹ ẽg Senhor mré vẽmén kỹ tóg ti vẽnh pugrĩ tỹ vym ke ja nĩgtĩ,” he ja tóg nĩ. Topẽ kuprĩg to ken hã vẽ, ẽg Senhor kuprĩg hã vẽ. Ti hã ne ẽg kygvãn ke mũꞌ, ẽg tỹ ti vĩ ki króm há han ke to.
18 Kỹ ẽg tóg ẽg Senhor jẽngrẽ sĩnvĩ ẽn ve há han mũ. Ẽg tỹ ẽg Senhor ki ẽvãnh kỹ ẽg tóg ti ri ke nỹtĩnh ke mũ gé. Komẽr hã ẽg tóg ve ũ han ke mũ, ti ve sĩnvĩ ẽn ri ke, ti jykre sĩnvĩ ẽn ri ke.
