Corinto tá ke ag mỹ carta ũ 4:1-18
4 Topẽ tỹ inh mỹ vẽnh rãnhrãj nĩm jan hã vẽ. Kỹ tóg inh jagãgtãn mũ gé, isỹ ti rãnhrãj to krónh ke tũ nĩ jé.
2 Hỹ, ũ ag tóg nén tỹ ẽg mỹꞌãg han tĩ ẽn han tĩ, kuty tá, ũ tỹ ag vég tũ nĩn jé. Vẽjykre tỹ ge tovãnh kãn inh huri. Ón kỹ sóg: “Topẽ vỹ tag tó ja nĩ,” he tũ nĩgtĩ gé. Ki hã sóg tó tĩ. Ũ tỹ isugnỹm mũ ẽn vỹ ki kanhrãn kãn ke mũ, inh jykre ki.
3 Kỹ ũ tóg kejẽn isỹ Jesus kãme sér tó mũ ẽn ki kagtĩg nỹtĩ. Ag mỹ tóg nén ũ péju kỹ nĩ ri ke nĩ. Ũ tỹ vãgfor kỹ nỹtĩ ag vẽ, hã kỹ ag tóg ki kanhrãn tũ nĩgtĩ.
4 Kyvó ag nỹtĩ. Krĩ tũ ag nỹtĩ. Jesus ki ge sór tũ ag nỹtĩ, Satanás tỹ ag kyvó han ti kỹ. Ẽprã pãꞌi ag kri ke vỹ tỹ ti nĩ, Satanás ti. Ti tỹ ag kyvó han kỹ ag tóg Cristo kãme tag to jykrén tũ nĩgtĩ. Ti jẽngrẽ vég tũ ag tóg nĩgtĩ, ti sĩnvĩ ti. Cristo hã vỹ tỹ Topẽ kãnhvég ri ke nĩ, ti ve ri ke.
5 Inh pijé inh jykre kãmén tĩꞌ. Jesus Cristo hã kãmén sóg tĩ, ti tỹ tỹ ẽg Senhor nĩ ti. Jãvo sóg tỹ ãjag camarada ri ke nĩ, isỹ Jesus to há nĩn kỹ.
6 Ha vé, ũ tỹ kutyg mũ ra kurãg han mũ ẽn tóg ẽg ki kurã han mũ gé sir, hã vỹ: Topẽ he mũ. Ẽg tỹ Cristo ve kỹ ẽg tóg Topẽ ki kanhrãn tĩ. Topẽ ve hã pẽ ti nĩ. Ẽg ki kurã to ken hã vẽ, hã vỹ: Topẽ ki kanhró, he mũ.
7 Ẽg tỹ tỹ ẽprã ke nỹtĩ hã ra tóg ẽg kanhrãn sór tĩ. Kỹ tóg ẽg tỹ goꞌor tỹ kukrũ kã ki jãnkamy e vin ẽn ri ke nĩ. Ẽg hã vỹ tỹ goꞌor tỹ kukrũ ẽn ri ke nỹtĩ. Krój ẽg nỹtĩ, inh ke gé. Ẽg pijé tar nỹtĩꞌ. Ũ tỹ ẽg tar han mũ vỹ tỹ Topẽ ti nĩ.
8 Inh krój nĩ ra Topẽ tóg isar han tĩ. Nén kar tóg inh kutãn tĩ, hã ra inh pijé to krĩ kufy han tĩꞌ. Kejẽn tóg inh jykre tũ tĩgtĩ, kỹ tóg isỹ: hỹ mỹ vỹ? he ja há tĩgtĩ. Hã ra inh pijé to krónh ke tĩꞌ.
9 Inh vóg kónãn ag tóg tĩ, hã ra Topẽ pijé isovãnh tĩꞌ. Inh rỹnh ag tóg tĩ, hã ra ag pijé isén tĩꞌ.
10 Kurã kar ki sóg Jesus vẽsỹrénh ẽn ri ke han tĩgtĩ. Hã tugrĩn vẽnh kar tóg Jesus rĩr nĩ tag venh ke mũ gé, inh vẽsỹrénh tugrĩn.
11 Kurã kar ki sóg ter kren tĩ, Jesus tugrĩn. Hã ki Jesus rĩr nĩ tóg inh ki ve há tĩ, inh fár vag ke mũ ra.
12 Iser kren mũ ra ãjag tóg tar nỹtĩ jãvo. Rĩnrĩr ãjag nỹtĩ.
13 Tag vỹ Topẽ vĩ ki rán kỹ nĩ, ha mẽ: “Topẽ vĩ kri nĩm inh, hã kỹ sóg tó,” he ja tóg nĩgtĩ. Topẽ vĩ tag hã vỹ inh jykre han tĩ, hã kỹ sóg tó tĩ gé.
14 Topẽ tóg ẽg Senhor tỹ Jesus rĩn mãn ja nĩꞌ. Ẽn vỹ inh rĩn mãn ke mũ gé, ki kanhró sóg nĩ. Kurã ẽn kã tóg ãjag mré inh jé prẽr ke mũ, ẽg tỹ ti mỹ vẽnh ven jé.
15 Ãjag tugrĩn sóg ti jagy tag ve kãn tĩ. Kỹ komẽr hã ũn e tóg Topẽ tỹ ag jagãgtãn tag mẽnh ke mũ. Vẽnh grun jé ẽg tóg ke mũ. Kỹ ũn e tóg sir ti mỹ vĩ há han ke mũ. Topẽ tỹ tỹ ũn mág nĩn hã vẽ.
Ẽg krenkren ke
16 Hã kỹ sóg to krónh ke jãvãnh nĩ. Ha vé, inh fár tag tóg krój nĩ. Komẽr hã tóg ter sór mũ, ti vag jé. Hã ra inh kuprĩg tóg tar nĩ jãvo. Kurã kar ki sóg vẽnh han mãn tĩ, Topẽ tỹ isar han kỹ.
17 Tag ki sóg ti jagy vég tĩ, hã ra tóg inh mỹ kãnhvy nĩ. Tũꞌ he jé tóg ke mũ. Tá ẽg tóg nén ũ há tãvĩ venh ke mũ, ẽg tỹ tag ki ti jagy ve ja tugrĩn. Ki kagtĩg ẽg nĩ ver, hã ra tóg há tãvĩ nĩnh mũ.
18 Hã ve sór inh nĩ, hã mĩ sóg ẽkrég tĩ. Hã kỹ sóg ẽg tỹ nén ũ vég mũ tag to jykrén sór tũ nĩgtĩ. Tũꞌ he jé tóg ke mũ. Ẽg tỹ ũri nén ũ vég tũ ẽn hã vỹ tũꞌ henh ke tũ nĩ.
