Corinto tá ke ag mỹ carta ũ 5:1-21
5 Ẽg fár vỹ ẽg pãjó ri ke nĩ. Tũꞌ he jé tóg ke mũ. Hã ra Topẽ ne ẽg mỹ ĩn tãg ri ke han ke mũꞌ, kanhkã táꞌ. Hã ra tóg ẽg tỹ tag ki ĩn han ri ke tũ nĩ. Tũꞌ henh ke tũ tóg nĩ.
2 Tag ki ẽg tóg vẽsỹrénh tĩ. Kỹ tóg ẽg tỹ kanhkã tá ẽg jamã tãg ẽn venh há tĩ. Kỹ tóg ẽg tỹ kur tãg tu ri ke nĩ.
3 Ẽg tỹ kur tu kỹ ẽg kator tũ nỹtĩ. Kanhkã tá ẽg jamã vỹ ẽg mỹ kur ri ke nĩ, ẽg tỹ ẽg fár tãg tun kỹ.
4 Ha vé, tag ki ẽg tóg vẽsỹrénh tĩ, ẽg ter jãvãnh nỹtĩn kỹ. Ẽg mỹ tóg ẽg rĩr tag hã tỹ kanhkã tá jun há tĩ vẽ. Ẽg tỹ ẽg fár tãg ve kỹ ẽg fár si tóg tũꞌ henh mũ, ẽg ter tũ ra.
5 Ẽg tỹ kanhkã tá ẽg fár tãg ve jé Topẽ tóg ẽg mỹ vẽjykre nĩm. Hã jé tóg ẽg mỹ ti kuprĩg jẽnẽ gé.
6 Hã kỹ tóg inh mỹ sér tĩ. Ẽg tỹ ga kri mũn kỹ ẽg tóg ẽg Senhor vég tũ nĩgtĩ ver.
7 Ẽg tỹ ti vég tũ ra ẽg tóg ti vĩ kri fig tĩ.
8 Kỹ sóg kanẽ jur mãn tũ nĩ ha. Isỹ inh fár tỹ pãjó ri ke tag tovãnh há tóg tĩ, isỹ ẽg Senhor mré nĩ jé, inh jamã pẽ tá.
9 Hã kỹ sóg vãsãn tĩ, inh jykre tỹ ti mỹ há nĩ jé, tag ki, tá ke gé.
10 Ha vé, ẽg kar vỹ Cristo mỹ vẽnh ven ke mũ, ti tỹ ẽg jykre tugnỹm jé. Kỹ tóg ẽg mỹ ẽg kaja ti nĩm ke mũ. Ũ tỹ tag ki nén (ũ) há han mũ ẽn tóg ti tũ kaja venh ke mũ gé, kỹ ũ tỹ tag ki nén ũ kórég han mũ ẽn ag tóg ag vẽsỹrénh venh ke mũ gé sir.
Cristo tỹ ẽg jykre pãno tỹ tũꞌ he
11 Ha vé, ẽg Senhor kamẽg sóg tĩ, hã kỹ sóg ẽprã ke ag mỹ ki hã tó tĩ, ag tỹ ti ki ge jé. Topẽ hã ne inh ki kanhró kar nĩꞌ. Kỹ ãjag hỹn inh jykre ki kanhró nỹtĩnh ke mũ gé, ãjag tỹ sỹ nén han mũ tugnỹm kỹ.
12 Inh pijé ãjag mỹ: “ũn mág vỹ tỹ inh nĩ,” he sór tĩꞌ. Hã ra sóg ãjag mỹ vẽnh kãmén mũ, ti tỹ ãjag mỹ sér tĩ jé, ãjag tỹ iso: “jykre há tãvĩ ti nĩ,” he jé. Tag tóm nĩ, ũ tỹ vẽsỹ ũn mág han sór mũ ag mỹ. Ũ tỹ ge jykre vỹ sĩnvĩ nĩ ve nĩ. Hã ra tóg ẽg tỹ ve há han kỹ kórég nĩ.
13 Ha vé, krĩ tũ inh nẽji nĩ. Topẽ jykre han tugrĩn sóg krĩ tũ nĩ ve nĩ. Kejẽn sóg krĩ há han tĩ gé. Ãjag tugrĩn ke vẽ, inh krĩ há ti.
14 Cristo hã vỹ tỹ inh fe nĩ, hã kỹ sóg vẽnh kar to há nĩ. Tag to sóg jykrén mũ, ha mẽ: vẽnh kar jagfy tóg ter ja nĩ, Cristo ti, kỹ ẽg kar jykre pãno vỹ tũꞌ he mũ sir.
15 Ti hã ne vẽnh kar jagfy ter ja nĩꞌ. Hã kỹ ẽg pijé tỹ vẽsũ nỹtĩꞌ, ũriꞌ. Ti tũ vỹ tỹ ẽg nỹtĩ. Ẽg jagfy tóg rĩr mãn ja nĩ gé. Kỹ ti hã ne ẽg mỹ ẽg tỹ nén han ke mũ ẽn tó tĩꞌ, ũriꞌ.
16 Vãsỹ ẽg tóg, ẽg tỹ vẽsóg ki nén ũ to jykrén kỹ ẽprã ke jykre to: “tag vỹ há nĩ, tag vỹ kórég nĩ,” he ja nĩgtĩ. Ũri ẽg tóg, vẽsóg ki tag to jykrén mãn ke tũ nĩ ha. Cristo to ẽg vẽsóg ki jykrén mãn ke tũ nĩ gé.
17 Hẽ ri ken kỹ? Cristo tỹ ẽg han mãn kỹ mỹr. Ti ki ge kỹ ẽg nỹtĩ, hã kỹ tóg ẽg han mãn ja nĩ. Ẽg jykre pãno tóg tũ tĩ ha. Ũri ẽg tóg tỹ ũn tãg nỹtĩ ha, ẽg krĩ, ẽg jykre ti ke gé.
18 Topẽ tỹ nén han mũn hã vẽ. Topẽ kato vãsãn ja ẽg nĩgtĩ vẽ, hã ra ẽg tóg ũri tỹ Cristo mré ke nỹtĩ ha. Kỹ tóg ẽg mỹ vẽnh rãnhrãj tag nĩm mũ gé sir, ẽg tỹ vẽnh kar mỹ: tỹ Cristo mré ke nỹtĩm nĩ, he jé.
19 Ha vé, Topẽ vỹ Cristo jẽnẽ, ẽg tỹ ti ki ge jé. Kỹ tóg ẽg tỹ ti vĩ mranh tỹ tũꞌ he mũ gé sir, ẽg tỹ ti kaja kórég vég tũ nĩ jé. Kỹ tóg ẽg mỹ: “ha vẽnh kar mỹ tó, isỹ ag to há nĩ sór mũ ti,” he ja nĩ gé.
20 Cristo hã ne inh jẽnẽg mũꞌ, isỹ ti jiji tó jé. Kỹ Topẽ tóg vẽnh kar jyvẽn tĩ. Hã kỹ sóg, Cristo jiji tó kỹ ãjag mỹ: “Topẽ to há nỹtĩm nĩ, ti kato vãsãn mãn sór tũg nĩ,” he mũ.
21 Jesus pijé Topẽ vĩ mranh ja nĩgtĩꞌ. Hã ra tóg ẽg tỹ ti vĩ mranh ja ẽn kajãm kãn. Kỹ tóg ẽg mỹ Topẽ jykre kuryj ẽn nĩm mũ sir, ẽg jagfy kajãm kar kỹ.
