Corinto tá ke ag mỹ carta ũ 6:1-18
6 Topẽ mré sóg rãnhrãj tĩgtĩ. Hã kỹ sóg ãjag jyvẽn mũ, ãjag tỹ Topẽ vĩ ki króm jé. Ãjag tỹ ti vĩ ki króm tũ nĩn kỹ tóg fagrĩnh mỹ ãjag jagãgtãn mũ.
2 Ti hã ne tóg: “sỹ ãjag jagãgtan ke kurã ki sóg ãjag tỹ inh mỹ nén to vĩ mũ ẽn han ke mũ,” he mũ. “Ãjag krenkren ke kurã ki sóg ãjag krenkren han ke mũ,” he ja tóg nĩ, Topẽ ti. Ũri ke vẽ.
3 Kỹ sóg nén ũ vẽnh mỹ han tũ nĩgtĩ sir, ũ tỹ inh rãnhrãj to vĩ tũ nĩ jé.
4 Vẽjykre há mĩ sóg tĩ mỹr, isỹ tỹ Topẽ camarada jẽn kỹ. Kỹ inh jykre tóg vẽnh kar mỹ ve há tĩ. Isỹ nén ũ jagy vég mũ ra sóg ti to krónh ke tũ nĩgtĩ, ijagtar nĩ ra, inh kanẽ jur mũ ra.
5 Kejẽn ag tóg inh mrãnmrãn tĩ. Vẽseja kã tá ag tóg inh fón tĩ. Vẽnh kar tóg kejẽn inh kri rũm ke tĩ. Kejẽn sóg inh rãnhrãj tỹ inh kutãn to jagtar tĩ. Kejẽn sóg nũr tũ nĩgtĩ. Kejẽn sóg vẽjẽn vég tũ nĩgtĩ.
6 Isỹ ti jagy vég mũ hã ra ijykre tóg tỹ ũn há nỹ. Topẽ vĩ ki kanhró mág sóg nĩ. Vẽnh kar to sóg fe nĩ. Vẽnh kar mỹ sóg komẽr hã vĩ tĩ, vẽnh kar tỹ isỹ tỹ Topẽ camarada jẽ tag ki kanhrãn jé. Topẽ kuprĩg vỹ tỹ inh jagrẽ nĩ. Hã kỹ sóg vẽjykre kuryj to tar nĩ.
7 Topẽ hã ne isar hanꞌ. Ti hã ne inh mỹ ti jykre kuryj nĩmꞌ. Kỹ tóg tỹ isỹ tỹ rárá jafã nĩ, Topẽ jykre há ẽn ti. Inh kren han tóg, ti tỹ inh mỹ vẽjykre kuryj nĩm ti kỹ. Kỹ ag tóg, ti jykre hã tugrĩn ag jykre kórég vég tĩ gé.
8 Kejẽn ag tóg inh mỹ vĩ há han tĩ. Kejẽn ag tóg iso é he tĩ. Kejẽn ag tóg iso ti kórég kar tó tĩ. Kejẽn ag tóg iso nén ũ há tó tĩ. Kejẽn ag tóg iso: “ti ón nẽ,” he tĩ. Hã ra sóg ón vãnh nĩgtĩ.
9 Ũ tóg ag kã mĩ inh ki kagtĩg nỹtĩ ve nĩ. Hã ra vẽnh kar tóg inh ki kanhró nỹtĩ. Ter kren tỹ hẽn ri ke han sóg tĩgtĩ. Hã ra sóg rĩr tĩ nĩ ver. Inh vóg kónãn ag tóg tĩ. Hã ra ag tóg isén ja tũ nĩ.
10 Inh fe kaj tóg tĩ. Ge ra tóg inh mỹ sér tĩ. Jagtar sóg tĩ. Hã ra sóg ũ tỹ hẽn ri ke ag jagãgtãn tĩ, ag mỹ Topẽ vĩ tón kỹ. Nén ũ tỹ isóg tũ tũ nĩ. Hã ra Topẽ tỹ ẽg mỹ nén nĩm mũ ẽn kar vỹ tỹ isũ nỹtĩ.
11 Ãjag hã mỹ sóg ijagtar tag kãmén mũ. Tó kãn sóg mũ, isỹ ãjag to há tãvĩ nĩn kỹ. Ãjag hã to sóg fen mág kỹ nĩ.
12 Inh pijé ãjag to kórég nĩꞌ. Ãjag hã ne iso há tũ nỹtĩ ve nĩꞌ.
13 Inh krẽ ri ke ãjag nỹtĩ. Hã kỹ sóg ãjag mỹ: “isỹ ãjag to há kóm iso há nỹtĩm nĩ, iso fe mág nỹtĩm nĩ,” he mũ.
Ũ tỹ ẽg mré ke tũ ag
14 Ũ tỹ Jesus ki rã tũ mré jykrén sór tũg nĩ. Tỹ ti ẽg mré ke tũ nĩ. Kỹ ũn jykre pãno ag mré jykrén sór tũg nĩ gé. Kurã pijé tỹ kuty mré ke nĩꞌ.
15 Cristo pijé Japo mré jykrén tĩꞌ. Kỹ ũ tỹ ti ki rã kỹ jẽ pijé ũ tỹ ti ki rã tũ mré jykrén há nĩnh mũꞌ.
16 Kỹ Topẽ ĩn pijé tỹ ón kỹ topẽ ĩn nĩꞌ. Ha vé, Topẽ ĩn vỹ tỹ ẽg nỹtĩ, ũn rĩr nĩ ẽn ĩn. Ti hã ne: “ag ki sóg ijamã han ke mũ,” he ja nĩgtĩ.
17 Kỹ tóg: “ag ré kỹ mũm nĩ, vyr mỹ nỹtĩm nĩ. Vẽjykre kavéj han tũg nĩ, kỹ sóg tỹ ãjag mré ke nĩnh mũ,” he mũ gé.
18 “Ãjag jóg vỹ tỹ inh nĩnh mũ, kỹ ãjag tóg tỹ inh krẽ nỹtĩnh mũ, he tóg, ẽg Senhor ti, ũ tỹ nén ũ kar han ki kanhró ẽn ti,” he ja tóg nĩgtĩ, Topẽ vĩ rán ki.
