Corinto tá ke ag mỹ carta ũ 7:1-16
7 Inh kanhkãꞌ, inh fe vỹ tỹ ãjag nỹtĩ. Topẽ tóg ẽg hã mỹ tó mũ, ti tỹ tỹ ẽg jóg mág nĩ tag ti. Ti ve jé ẽg tóg ke mũ. Hã kỹ ẽg nén ũ kavéj han ke tũ nĩ. To jykrén ke tũ ẽg nĩ gé. Topẽ tũ vỹ tỹ ẽg nỹtĩ, kỹ ẽg ti hã kamẽg ke mũ. Ti jykre kuryj ẽn mĩ mũm nĩ.
Paulo fe tỹ mrin ke
2 Iso fe mág han mãn nĩ, ha mẽ. Inh pijé, ũ mỹ vẽjykre pãno han sór tĩꞌ. Inh pijé, ũ krĩn kónãn sór tĩꞌ. Inh pijé, ũ tỹ nén ũ péju sór tĩꞌ.
3 Isỹ ãjag mỹ tag tó kỹ inh pijé ãjag to kórég nĩꞌ. Ãjag mré ke vỹ tỹ inh nĩ. Kỹ ẽg tóg jatun mỹ jagnẽ mré mũ mũ. Jagnẽ mré ẽg tóg kãgter ke mũ gé, hẽn ri ke mũn.
4 “Inh mỹ ag tóg vẽnh vĩ há tónh ke mũ,” he sóg tĩ ãjag to. Kỹ sóg vẽnh kar mỹ ãjag to: “há ag nỹtĩ,” he tĩ. Tag ki sóg ti jagy pẽ vég mũ. Hã ra sóg ãjag to krĩ kãnhvy nĩ ha, Tito tỹ inh mỹ ãjag tó tugrĩn. Kỹ tóg sir inh mỹ sér pẽ tĩ.
5 Ha vé, isỹ ga tỹ Macedônia tá jun kỹ sóg nén ũ tỹ inh krĩ kuprãg ke ve ja tũ nĩ. Tá sóg ti jagy ve mãn gé. Iso ag tóg rárá, kỹ sóg vẽnh mỹ en mãn gé sir.
6 Hã ra Topẽ tóg inh mỹ Tito jẽnẽ. Kỹ ti hã tóg inh krĩ tỹ kãnhvyꞌ hé. Ũn vẽsỹrénh mũ ẽn mỹ tóg vĩ há han tĩ, hã kỹ tóg inh mỹ Tito jẽnẽ, ẽn kã.
7 Ti tỹ inh ki jun kỹ tóg inh mỹ vĩ há han. Kỹ tóg inh mỹ ãjag tỹ iso vĩ há han ja tag tó mũ gé sir. Ãjag tỹ inh ve sór mũ tag tó tóg mũ. Ãjag tỹ vẽjykre kórég to vẽnh mỹ en ẽn kãmén tóg mũ. Ãjag tỹ inh jagfy vẽnh vĩ tó sór mũ tó tóg mũ gé sir. Kỹ tóg inh mỹ sér pẽ tĩ sir.
8 Inh carta ẽn tỹ ãjag ki jun kỹ tóg ãjag fe kaj han. Ge ra tóg há nĩ. Kurã pir ki tóg ãjag fe kaj han. Kỹ ãjag tóg ãjag jykre kórég ẽn tovãnh ja nĩ. Hã kỹ tóg inh mỹ sér tĩ, ũri.
9 Hẽ ri ken kỹ? Ãjag fe kaj mỹ inh mỹ sér tĩ? Vó. Ãjag tỹ Topẽ mỹ vẽnh fẽg kỹ tóg inh mỹ sér tĩ. Kỹ inh carta tóg ãjag mỹ nén ũ kórég kãmén ja tũ nĩ.
10 Ẽg tỹ ẽg fe kaj tugrĩn Topẽ mỹ vẽnh fẽg kỹ ẽg tóg ẽg jykre kórég tovãnh kãn ke mũ. Kỹ ẽg kren ke mũ. Tag vỹ ẽg mỹ sér tĩ. Jãvo ẽg tỹ fe kaj ra ẽg jykre kórég tovãnh tũ nĩn kỹ ẽg ter pẽ han ke mũ sir.
11 Ha vé. Ãjag fe kaj tĩn kỹ ãjag tóg ãjag jykre tugnỹm mũ, Topẽ tỹ ãjag krĩn kỹ. Vẽjykre kórég ẽn to ãjag tóg jũ mũ. Ũn tỹ vẽjykre kórég han mũ ẽn mỹ ãjag tóg vĩ tar han. Há kar ti nĩ.
12 Isỹ ãjag mỹ carta ẽn rán kỹ sóg, ũ tỹ vẽjykre kórég han mũ ẽn tó ja nĩ. Hã ra sóg: “isỹ Corinto tá ke ag tỹ iso há nỹtĩ venh há tóg tĩ, Topẽ rĩnve,” he ja nĩ.
13 Hã kỹ inh krĩ tóg kãnhvyꞌ he mũ sir, ũri, isỹ ãjag tỹ iso há nỹtĩ mẽn kỹ. Tito tóg ãjag to vĩ há han. Ti krĩ tỹ kuprãꞌ he ja ãjag tóg nĩ. Kỹ tóg ti mỹ há tĩ.
14 Ti tĩg ke to hã sóg ãjag kãmén kãn ja nĩ. Hã ra ãjag tóg ti mỹ ki hã han ja nĩ. Inh kavénh ja tũ ãjag tóg nĩ. Kỹ Tito tóg ãjag jykre há ve ja nĩ gé.
15 Kỹ tóg kurã kar ki ãjag mĩ ẽkrég tĩ. Ãjag to tóg há tãvĩ nĩ. Ãjag tỹ inh vĩ kri nĩm mũ ẽn mĩ tóg ẽkrég tĩ. Kỹ ãjag nẽji ti kamẽg ja nĩ gé, isỹ ti jẽnẽn kỹ. Hã tó ja ti nĩ.
16 Kỹ tóg inh mỹ sér tĩ gé sir, ãjag tỹ inh vĩ ki króm kỹ.
