Corinto tá ke ag mỹ carta ũ 8:1-24
8 Kỹ sóg ãjag mỹ Topẽ tỹ ga tỹ Macedônia tá ke ag tar han mũ tó sór mũ gé. Ag jagãgtar hã ra ag tóg Jerusalém tá ke ag jagãgtãn sór mũ, ag mỹ jãnkamy jẽnẽn kỹ.
2 Ha vé, Macedônia tá ag tóg ti jagy pẽ hã ve ja nĩgtĩ. Ge ra tóg ag mỹ sér tĩ. Jagãgtar ag nỹtĩ gé. Tỹ nén ũ mág tũ ag nỹtĩ. Hã ra ag tóg, ag mỹ sér nĩn kỹ vin mág pẽ han ja nĩgtĩ. Ag tỹ ra jãnkamy jẽnẽ sór vẽ.
3 Ha vé, ag jykre ve inh. Ag tỹ nén ũ tỹ vẽnh kãpãm ag tóg, ag jẽn mré hã.
4 Inh mỹ ag tóg: “ẽg tỹ ag mỹ jãnkamy jẽnẽ sór vẽ,” he mũ. “Ãjag tũ vỹ sĩ nĩ, kỹ tỹ vẽnh kãpãm tũg nĩ, he tũg nĩ ẽg mỹ,” he ag tóg. Ag tỹ Topẽ tũ ag mỹ nén ũ há han sór vẽ.
5 Kỹ ag tóg isỹ ag ki vẽjykre há ve sór mũ ẽn kãfór han. Ẽg Senhor mỹ ag tóg vẽnh vin. Kỹ ag tóg vãhã ẽg mỹ nén ũ há tãvĩ han mũ gé.
6 Kỹ Tito tóg ãjag ki jãnkamy sĩ vé huri, ti tỹ Jerusalém tá ke ag mỹ jẽnẽ jé. Kỹ sóg ti mỹ: “Corinto tá ke ag mỹ tó mãn nĩ, ag tỹ ag mỹ ag tũ vẽnh kãpãm jé, ẽg tỹ ũn jagtar ag mỹ ma mũ jé,” he mũ.
7 Ha vé, Jesus ki ge kỹ ãjag nỹtĩ. Vĩ há ãjag nỹtĩ. Ki kanhró mág ãjag nỹtĩ. Ũ jagãgtãn sór ãjag nỹtĩ. Jagnẽ to há ãjag nỹtĩ. Tag kar ki ãjag tóg ũn riko ri ke nỹtĩ. Kỹ nén ũ há tag han sórm nĩ gé, Tito tỹ ãjag ki nén venh ke mũ tag ti.
8 Ãjag tỹ nén vin sór mũ ẽn hã vin nĩ, ẽg tỹ ãjag jykre há ve jé. Inh pijé ãjag mỹ: “ker ag jagãgtãn tũg hẽꞌ,” he mũ.
9 Ha vé, ẽg Senhor tỹ Jesus Cristo vỹ ẽg jagãgtãn ja nĩ gé. Kanhkã tá ti riko nĩ ja nĩgtĩ, hã ra tóg ti tỹ nén ũ ẽn tovãnh kãn. Ti tỹ ẽg jagfy jagtar tĩ jé tóg kãtĩg. Kỹ ẽg tóg ti jagtar tugrĩn riko nỹtĩ sir.
10 Kỹ sóg tag to jykrén, ha mẽ. Prỹg ti nĩ ha, ãjag tỹ ag mỹ jẽnẽnh ke tỹ vyrmỹ vin han vén kri. Ãjag hã ne to jykrén vén ja nĩgtĩ géꞌ.
11 Kỹ ãjag tỹ nén han vén ja ẽn han kãn nĩ, ũri. Ãjag tỹ vyrmỹ nén vin ja ẽn kri vin mãn nĩ, ag mỹ jẽnẽn jé.
12 Kỹ tóg Topẽ mỹ há tĩnh mũ. Ũ tỹ nén ũ mág vỹ nĩm mág han ke mũ. Ũ tỹ nén ũ sĩ vỹ sĩn kỹ nĩm ke mũ. Topẽ pijé ũ tỹ nén ũ sĩ nĩm mág han mũ ve sór mũꞌ.
13 Ti tỹ ãjag tỹ ũ jagãgtãn tugrĩn ãjag mỹ tũ tĩn kỹ tóg Topẽ mỹ ũ tĩ sir. Vẽnh kar tỹ nén ũ sĩ ve kỹ tóg há tĩ.
14 Ũri ãjag tũ tóg e nĩ, hã kỹ tóg ãjag tỹ ũn jagãgtar ag mỹ vẽnh kãpãm há tĩ. Kejẽn tóg ãjag mỹ tũꞌ henh ke mũ gé, kỹ ag tóg sir ãjag mỹ nén ũ vin ke mũ gé, vẽnh kato. Kỹ vẽnh kar vỹ jagnẽ ri ke nỹtĩ sir. Tag hã vỹ há nĩꞌ.
15 Hã kỹ tag tóg rán kỹ nĩ, ha mẽ: “ũ tóg vẽjẽn génh mág han ja nĩgtĩ, ũ tóg génh pir han ja nĩgtĩ gé. Hã ra tóg ũ tỹ génh pir han mũ ẽn mỹ tũꞌ he ja tũ nĩgtĩ gé,” he tóg mũ. Jagnẽ ri ke ag tóg nỹtĩ ja nĩgtĩ, vãsỹ.
Tito to vẽme
16 Topẽ hã ne Tito krĩn, ti tỹ ãjag venh tĩg sór jé.
17 Kỹ tóg kãnhmar inh mỹ: “he,” hé, sỹ ti mỹ: “ha Corinto ra tĩg,” hen kỹ.
18 Kỹ sóg ti mré ẽg régre ũ jẽnẽ sór mũ gé. Jesus kãmén há han ti tĩ gé. Kỹ vẽnh kar ag tóg ti to vĩ há han tĩ gé.
19 Igreja krẽm ke kar vỹ ti hã kuprẽg, ti tỹ inh mré ẽg tỹ ũn jagãgtar ag mỹ nén jẽnẽnh ke mũ tag ki rĩr jé. Ẽg Senhor jykre há tỹ vẽnh ven hã jé ẽg tóg tag ki rĩr há han sór mũ. Kỹ tóg inh mỹ há tĩ gé, sỹ inh pir mỹ ki rĩr tũ nĩn kỹ.
20 Jãnkamy e vẽ, ẽg tỹ ma mũnh ke ti, kỹ tóg inh mỹ ũ tỹ tag to iso jykrén kónãn ha mẽ tĩ, isỹ inh pir mỹ ma tĩ mũ ra. Kỹ tóg inh mỹ há tĩ, ũ ag tỹ inh mré ki rĩr mũn kỹ.
21 Ẽg Senhor ne inh jykre há ki kanhró nĩꞌ. Kỹ tóg há tĩ gé, ãjag tỹ inh jykre há tag vég mũn kỹ.
22 Tito mré tóg ãjag ki jun ke mũ, ũ ẽn ti. Kar kỹ ẽg régre ũ vỹ tĩg ke mũ gé. Ẽg Senhor tũ ki rĩr há han tóg tĩ gé. Tag ve tỹ hẽn ri ke han inh huri. Kỹ tóg ãjag kãme mẽ kỹ ãjag ve sór mũ gé. Ãjag to tóg há tãvĩ nĩ gé.
23 Kỹ Tito ne, ãjag venh kãtĩg ke mũꞌ. Inh mré rãnhrãj tĩ vẽ. Kỹ tóg inh mré ãjag to vãsãn tĩ. Ti mré kãmũ tag ag vỹ tỹ ũn há nỹtĩ gé. Ũ tỹ igreja krẽm vẽnhmãn tĩ ag vỹ ag jẽgnẽ ja nĩ, ãjag to.
24 Ag tỹ ãjag ki junjun kỹ ag ki rĩr há han nĩ, ẽg mré ke kar tỹ ãjag jykre há ve jé. Vẽnh kar mỹ sóg ãjag to: “vĩ há tãvĩ han ag tóg tĩ,” he tĩ. Kỹ tóg há tĩ, ãjag tỹ inh vĩ tag to: hã vẽ, hen kỹ.
