Corinto tá ke ag mỹ carta ũ 9:1-15
9 Kỹ ãjag tóg, ẽg tỹ Jerusalém tá Topẽ ki ge kỹ nỹtĩ ag mỹ nén jẽgnẽnh ke tag ki kanhró nỹtĩ, hã kỹ sóg tó mãn sór tũ nĩ.
2 Ag jagãgtãn sór ãjag tóg mũ, ki kanhró sóg nĩ. Hã kỹ sóg Macedônia tá ke ag mỹ tó tĩ. Ag mỹ sóg: “Grécia tá ke ag ne Jerusalém tá ke ag mỹ nén ũ jẽnẽ sór tĩꞌ,” he tĩ. “Kri prỹg tóg nỹ ha,” he sóg tĩ, ãjag to. Kỹ ag tóg ke sór mũ gé sir, ãjag kóm.
3 Hã kỹ sóg ãjag mỹ ẽg régre ag jẽgnẽg mũ, ãjag tỹ inh vĩ ki kanhrãn jé. Kỹ ãjag tỹ nén ũ nĩm sór mũ ẽn vin kãn nĩ, ũri, kỹ sóg fagrĩnh mỹ vĩ ja tũ nĩnh mũ.
4 Hẽn ri ke mũn Macedônia tá ke ũ ag tóg, inh mré kãmũ sór mũ. Kỹ tóg, ãjag tỹ nén vin ja tũ nĩ kỹ inh mỹꞌa tĩnh mũ, isỹ ón kỹ vĩ ja nĩn kỹ. Kỹ tóg ãjag mỹꞌa tĩnh mũ gé sir.
5 Hã kỹ sóg to jykrén, sỹ ãjag mỹ ẽg régre tag ag jẽgnẽ jé. Vãsỹ ãjag tóg tó ja nĩ, ãjag tỹ nén vin sór mũ ẽn ti. Kỹ ha ké. Kỹ tóg e nĩnh mũ, jãnkamy ti. Kỹ tóg ve há tĩ, ti tỹ ãjag mỹ sér nĩ ti. Kỹ ũ tóg ãjag to: “ti mỹ ag mỹ há tũ ja? Hã kỹ ag mỹ nĩm sĩ han ja nĩ?” henh ke tũ nĩ.
6 Kỹ sóg: “ũ tỹ nén fy pir krãn kỹ tóg pin kỹ génh ke mũ gé. Ũ tỹ krãn mág mũ ẽn hã tóg génh mág han ke mũ gé sir,” he tĩ.
7 Kỹ ãjag tỹ nén to jykrén mũ ẽn hã vin nĩ, ãjag tỹ Jerusalém ra jẽnẽ jé. Mỹ sér nỹtĩm nĩ, ãjag tỹ ẽg mré ke ag jagãgtãn to. Kỹ tóg Topẽ mỹ há tĩnh mũ sir. Ũ tỹ ge to tóg há tãvĩ nĩ.
8 Kỹ Topẽ tóg ãjag mỹ nén vin mág han ke mũ gé, kurã kar ki, nén ũ tỹ ãjag mỹ tũꞌ he tũ nĩ jé. Kỹ ãjag tóg, ãjag tũ mág nĩn kỹ ũ jagãgtãnꞌ, ũ jagãgtãnꞌ henh ke mũ sir.
9 Tag vỹ rán kỹ nĩ, ha mẽ: “ũn jagãgtar ag mỹ tóg vin mág han tĩ, kurã kar ki,” he tóg.
10 Ha vé, Topẽ ne ẽg mỹ nén ũ kar fy vin mũꞌ, ẽg tỹ krãn jé. Kỹ tóg ẽg mỹ ẽmĩ han jafã nĩm mũ gé, ẽg tỹ ko jé. Kỹ tóg ãjag mỹ ãjag tỹ tỹ ũ jagãgtãn ke mũ ẽn ven mũ gé. Kỹ tóg nén ũ fy ri ke nĩ. Kanẽ há ri ke han jé tóg ke mũ gé, ãjag tỹ vẽjykre kuryj tag han kỹ, hã vỹ: jagnẽ jagãgtãn, he mũ.
11 Tag ki ãjag tóg riko nỹtĩnh ke mũ, ãjag tỹ vẽnh kar jagãgtãn kỹ. Kỹ ũn e ag tóg ẽg tugrĩn Topẽ to vĩ há han ke mũ.
12 Kỹ tóg ge nĩ. Ẽg tỹ Topẽ ki ge kỹ nỹtĩ ag jagãgtãn kỹ ẽg tóg ag jagtar tỹ tũꞌ he mũ. Tag tóg há tĩ. Kỹ ag tóg ẽg tỹ ag jagãgtãn tugrĩn Topẽ mỹ vĩ há han ke mũ gé sir.
13 Hã ki ag tóg ãjag tỹ Topẽ vĩ kri fig mũ vég mũ. Kỹ ag tóg tag to Topẽ to vĩ há han ke mũ gé sir, ha vem nĩ, ãjag tỹ ag jagãgtãn mág kỹ.
14 Kỹ ag tóg ãjag to Topẽ mré vẽmén ke mũ gé sir, ãjag to há tãvĩ nỹtĩn kỹ. Topẽ tỹ ãjag jagãgtãn hapẽ han mũ ẽn ve jé ag tóg ke mũ. Hã kỹ ag tóg ãjag ve sór ke mũ gé sir.
15 Topẽ ne ẽg mỹ nén ũ há tãvĩ vin tĩ mỹrꞌ. Pijé kaja nĩꞌ. Ẽg jé ti mỹ to vĩ há han.
