Galácia tá ke ag mỹ carta 2:1-21
2 Tag pãte 14 (ke) anos tũg kar sóg Jerusalém ra tĩg mãn gé, Barnabé mré. Kỹ Tito tóg ẽg mré vyr gé.
2 Topẽ tỹ inh mỹ: “ha ra tĩg,” he ja vẽ. Tá jun kỹ sóg, ag mỹ isỹ nén tó tĩ ẽn kãmén kãn ja nĩ sir, sỹ fóg ag mỹ nén kãmén tĩ ẽn ti. Vyr mỹ sóg igreja to kófa ag mré vẽmén. Sỹ ag mỹ: “mỹ há, fóg ag tỹ Moisés jykre han tũ ra, kanhgág ag ke gé?“ he vẽ. Isỹ fagrĩnh mỹ rãnhrãj jãvãnh tóg tĩ, hã kỹ sóg ag ki jẽmẽnh vyr.
3 Kỹ tóg ag mỹ há tĩ, sỹ fóg ag mỹ, kanhgág ag mỹ Jesus hã tó mũ ti, sỹ ag mỹ Moisés tó tũ ra, sỹ ag mỹ: “ha ãjag gré fár junun kym,” he tũ ra. Hã kỹ ag tóg Tito mỹ: “ha kym,” he ja tũ nĩ gé. Fóg tỹ Grego vẽ, Tito ti. Inh mré tóg Jerusalém ra vyr.
4 Hã ra ón kỹ Jesus ki ge kỹ nỹtĩ ag tóg ti kym sór ja nĩ. “Paulo mỹ Moisés jykre tovãnh tũꞌ?“ he ag tóg iso. Ag tỹ ẽg tỹ Moisés jykre han mãn ẽn han sór ja vẽ.
5 Hã ra sóg ag kato tẽ. Inh pijé ag mỹ: hỹ, hé. Ãjag jagfy sóg ag kato tẽ mág, ãjag tỹ vẽnh vĩ há hã kri fi jé, Jesus kãme hã tỹ ãjag mỹ sér tĩ jé.
6 Kỹ kófa ag tóg inh mỹ: “tó kãn ja tũ ã nĩ,” he ja tũ nĩ gé. Vãsỹ ag tóg tỹ kófa tũ ja nỹtĩgtĩ, ge ra sóg ag vĩ jẽmẽ sór tĩ, ha mẽ. Topẽ mỹ ti tỹ nén ũ tũ nĩ, ẽg tỹ ẽprã ke ag mỹ tỹ ũn mág nỹtĩ ti, tỹ ũn kãsir nỹtĩ ti ke gé.
7 Kỹ tóg kófa tag ag mỹ há tĩ, sỹ fóg ag mỹ, sỹ kanhgág ag mỹ Topẽ vĩ tónh ke ti, Topẽ tỹ inh mỹ: “povo ũ ag mỹ tónh tĩg,” hen kỹ.
8 Topẽ ne Pedro tar han, ti tỹ tỹ Judeu ag apóstolo jẽ jé. Kỹ tóg isar han, isỹ tỹ ũ ag apóstolo jẽ jé, ũn tỹ Judeu ag jykre han tũ kar ag.
9 Tag ve ag, Tiago ti, Pedro ti, João ti ke gé. Igreja to kófa vỹ tỹ ag nỹtĩ. Ẽn ag ne inh nĩgé mẽꞌ, Barnabé nĩgé ke gé: “há ti nĩ, ãjag rãnhrãj ti,” hen kỹ. “Ha fóg ag mỹ tónh mũjẽg, kanhgág ag mỹ, jãvo ẽg tóg ũ tỹ Judeu jykre han mũ ag hã mỹ tónh ke mũ,” he ag tóg mũ, kófa ag.
10 Kỹ ag tóg ẽg mỹ to vĩ, ẽg tỹ ag kã mĩ ũn jagtar ag jagãgtãn jé, ẽg tỹ ag mỹ nén ũ jẽnẽ jé, fag mỹ ke gé. Tag han sóg tĩ mỹr. Inh pijé kã jatun tĩꞌ.
Fóg ag tỹ Judeu ag ri ke nỹtĩ
11 Kỹ kejẽn Pedro tóg ẽmã tỹ Antioquia tá jun ja nĩgtĩ. Hã ra tóg tá kygnẽ, kỹ sóg ti kato tẽ. Ti mỹ sóg ti tỹ kygnẽ ẽn tó.
12 Kỹ Tiago tóg kejẽn ti mré ke ũ ag jẽgnẽ ja nĩgtĩ. Ag tỹ junjun tũg ki Pedro tóg fóg ag mré nĩ kỹ jẽn ja nĩgtĩ. Hã ra tóg Tiago ag tỹ tá junjun kỹ vyr mỹ jẽg mũ sir. Ti tỹ Judeu ag kamẽg vẽ.
13 Kỹ ti mré Judeu ũ ag tóg ke mũ gé sir. Kỹ vãhã Barnabé tóg ke mũ gé sir. Ki kanhró ti nĩ vẽ, Barnabé ti, ẽg tỹ jatun mỹ fóg mré jẽn ke ti, ẽg tỹ tỹ Judeu nỹtĩ ra.
14 Ag kar vỹ kygnẽ kãn, Pedro nón. Jesus jykre pijéꞌ, vẽnh vĩ sér pijéꞌ.
Sỹ ag tỹ kygnẽ tag ve kỹ sóg vẽnh kar rĩnve Pedro mỹ: “ha vé, Judeu vỹ tỹ ã nĩ,” he mũ. “Ã tỹ tỹ Judeu nĩ ra ã tóg fóg jykre han ja nĩgtĩ. Kỹ ã tỹ ne jé ũri Judeu jykre han mãn sór nẽ? Ã tỹ ne jé fóg ag mỹ: Judeu ag jykre han nĩ, he sór nẽ?“ he sóg ti mỹ.
Jesus ki ge kỹ ẽg jagnẽ ri ke nỹtĩ
15 “Judeu krẽ vỹ tỹ ẽg nỹtĩ, kỹ ẽg tóg fóg tỹ Topẽ vĩ mranh tĩ ẽn ri ke tũ nỹtĩ.
16 Hã kỹ ẽg tóg Topẽ tỹ vãsỹ ẽg jyvẽn tĩ ẽn ki kanhró nỹtĩ. Hã ra ẽg pijé tag tugrĩn Topẽ mỹ há nỹtĩꞌ. Ẽg tỹ Jesus Cristo ki ge kỹ ẽg ti mỹ há nỹtĩ. Ti tỹ ẽg tỹ ti ki ge kỹ nỹtĩ tag tugrĩn ẽg mỹ vẽnh pãte fón vẽ sir. Topẽ pijé, Moisés tỹ ẽg mỹ vẽjykre nĩm ja ẽn tugrĩn ẽg mỹ vẽnh pãte fón ke mũꞌ. Jesus Cristo tugrĩn ke vẽ,” he sóg, Pedro mỹ.
17 Kỹ tóg ge nĩ. Ẽg tỹ Cristo ki ge tugrĩn ẽg tóg Topẽ mỹ tỹ ũn há nỹtĩ. Hã kỹ tóg ẽg tỹ ti vĩ mranh kỹ ẽg mỹ vẽnh pãte fón mũ, ẽg tỹ tỹ Judeu nỹtĩn kỹ. Kỹ tóg fóg ag mỹ vẽnh pãte fón mũ gé, kanhgág ag mỹ ke gé.
18 Ẽg tỹ hã ra Topẽ jykre to: vẽjykre tag han mãn ke tũ ẽg nĩ ha, he kar kỹ han mãn kỹ tóg vẽnh mỹ tĩ sir. Vẽjykre régre vẽ sir.
19 Topẽ tỹ vãsỹ ẽg jyvẽn ja ẽn ki kanhró ẽg tóg nỹtĩ. Ge ra ẽg tóg ki króm ki kagtĩg nỹtĩ, ẽg tỹ ki króm sór mũ ra. Hã ra Cristo vỹ ẽg jykre si tỹ tũꞌ he ja nĩ. Ti mré tóg krunh to sa ja nĩ, ẽg jykre si ti. Kỹ tóg ẽg mỹ vẽjykre tãg nĩm mũ sir, ẽg tỹ tỹ Topẽ tũ nỹtĩ jé.
20 Ẽg jykre si vỹ tũꞌ hé. Hã kỹ ẽg tóg ti tũ hã han tĩ, ẽg tỹ ver ga kri mũn kỹ. Topẽ kósin ki ge tugrĩn ẽg tóg sir rĩnrĩr nỹtĩ. Ti fe vỹ tỹ ẽg nỹtĩ, ẽg kar. Kỹ tóg ẽg jagfy vẽnh fẽg kỹ ter ja nĩ.
21 Ti ki ge kỹ nỹtĩ tugrĩn ẽg tóg Topẽ mỹ há nỹtĩ. Topẽ tỹ ẽg jagãgtãn hã vẽ. Ẽg tỹ: “Topẽ jykre si ki króm kỹ inh hỹn Topẽ mỹ tỹ ũn há nĩ,” hen kỹ Cristo vỹ fagrĩnh mỹ ter ja nĩ. Kỹ ẽg tóg Topẽ tỹ ẽg jagãgtãn tag tỹ tũꞌ he mũ. Hã tũ vẽ mỹr.
