Galácia tá ke ag mỹ carta 4:1-31
4 Sỹ ãjag mỹ kãmén mãn ke vẽ, sỹ nén tó ja tag ti. Ũn riko kósin vỹ ti tũ mãn kãn ke mũ, ti mog kỹ. Ti sĩ nĩn kỹ tóg nén ũ venh ke tũ nĩ ver. Ti panh camarada ri ke tóg nĩ ver. Hã ra ti panh tỹ nén kar vỹ tỹ ti tũ nỹtĩnh ke mũ.
2 Ti sĩ nĩn kỹ ag tóg ver ti kanhrãn tĩ. Kejẽn tóg ti panh tỹ ti mỹ kurã nĩm ja ẽn pétẽm ke mũ. Ẽn kã tóg ti tũ mãn kãn ke mũ sir.
3 Ge ti nĩgtĩ ẽg mré, ẽg tỹ tỹ Topẽ krẽ nỹtĩn kỹ. Jesus mur ke to hã ẽg tóg gĩr ri ke nỹtĩ ja nĩgtĩ. Nén kar tãn kamẽg ja ẽg tóg nĩgtĩ, nẽn tãn mré hã. Ẽg sigse ri ke han ja ag nĩgtĩ, misu tãn ag.
4 Ti kurã tá krỹg kỹ Topẽ tóg ti kósin jẽnẽ. Ẽprã ke fi ki tóg mur. Moisés tỹ ẽg jyvẽn ja ẽn ki króm kãn ja tóg nĩgtĩ.
5 Ẽg kren han jé tóg mur, ti tỹ nén kar tãn ẽn to ẽg kygvãn jé sir, ẽg tỹ vãhã tỹ Topẽ krẽ pẽ nỹtĩ jé sir. Tỹ ẽg ti krẽ tũ ja nỹtĩgtĩ vẽ, hã ra Topẽ tóg ẽg jẽꞌỹn sór mũ ha sir.
6 Kỹ ẽg tóg tỹ ti krẽ nỹtĩ sir. Hã kỹ tóg ẽg mỹ ti kuprĩg jẽnẽg mũ sir, ti tỹ tỹ ẽg jagrẽ nĩ jé. Ti kósin kuprĩg ri ke ti nĩ, Topẽ kuprĩg ti. Ẽg jagrẽ tag tỹ ẽg tóg sir Topẽ to: “ẽg jóg mág,” he tĩ.
7 Hã kỹ ẽg tóg tỹ nén ũ tãn krẽm ke tũ nỹtĩ ha. Topẽ krẽ vỹ tỹ ẽg nỹtĩ ha. Kỹ, ẽg tỹ tỹ ti krẽ nỹtĩn kỹ ẽg tóg ti tỹ nén mãn ke mũ gé sir, Topẽ tỹ ẽg mỹ nén nĩm ke mũ ti.
Paulo tỹ krĩ kufy nĩ
8 Vãsỹ ãjag tóg Topẽ ki kagtĩg ja nỹtĩgtĩ. Kỹ ãjag tóg ón kỹ vẽnh kãgrá hã to: “ẽg Topẽ vẽꞌ,” he ja nĩgtĩ. Vẽnh kãgrá pijé tỹ Topẽ nĩꞌ. Vẽnh kãgrá hã nón mũn kỹ ãjag tóg sigse kỹ nỹtĩ ja nĩgtĩ.
9 Ũri ãjag tóg Topẽ ki kanhró nỹtĩ jãvo. Hã ra tóg vãsỹ ãjag ki kanhró nĩ ja nĩ vẽ, Topẽ ti, ha mẽ. Kỹ ãjag tỹ ne jé tỹ nén kar tãn ag mré ke nỹtĩ mãn sór nẽ? Krój ti nỹtĩ, nén kar tãn ti. To ẽg jagtarꞌ he ja nĩgtĩ. Sigse kỹ ẽg nỹtĩ ja nĩgtĩ, ẽg tỹ tỹ ag mré ke ja nỹtĩn kỹ. Ãjag mỹ sigse kỹ nỹtĩ mãn sór mũꞌ?
10 Kurã to ãjag tóg jykrén sór mũ, kurã kórég to, kar kỹ kysã kórég to ke gé, prỹg kórég to ke gé.
11 Kỹ sóg kanẽ jur tĩ, sỹ tag mẽ kỹ. Inh hỹn fagrĩnh mỹ ag mỹ Jesus kãmén, he sóg tĩ, mỹr.
12 Inh kanhkã, inh ri ke nỹtĩ sórm nĩ. Ãjag mré ke vỹ tỹ inh nĩ, kỹ inh ri ke han sórm nĩ. Tag hã to sóg vĩ mũ, ãjag mỹ. Ãjag pijé inh jũ hanꞌ.
13 Sỹ ãjag ki jun vén mũ ẽn mĩ ẽkré, sỹ ãjag mỹ Topẽ vĩ tó vén mũ ẽn mĩ. Ẽn kã sóg kaga nỹ ja nĩgtĩ.
14 Kỹ tóg ãjag mỹ e tĩ ja nĩgtĩ, ãjag tỹ inh kaga ven kỹ. Ge ra ãjag tóg iso é he ja tũ nĩgtĩ. Ti pijé ãjag tỹ jẽgry ja nĩgtĩꞌ, inh kaga ti. Inh mỹ ãjag tóg vĩ há han ja nĩgtĩ, sỹ tỹ Topẽ tỹ jẽnẽ jafã nĩn kỹ. Ãjag tỹ Jesus Cristo ki rĩr mũ ẽn ri ke han ja ãjag tóg nĩgtĩ, isỹ.
15 Ẽn kã tóg ãjag mỹ sér pẽ ja nĩgtĩ. Hã kỹ ãjag tóg inh jagãgtãn ja nĩgtĩ. Isỹ ãjag mỹ ãjag kanẽ to vĩ ra ãjag hỹn inh mỹ vin ke mũ vẽ. Hã ra ti tỹ ne jé ãjag mỹ sér tũ tĩ nẽ, ũri?
16 Ãjag mỹ sóg ki hã tó mũ. Inh mỹ tag tugrĩn ãjag mỹ kórég nĩ haꞌ? Inh mỹ tóg e tĩ, tag ti.
17 Ũ ag tóg ón kỹ ãjag mỹ vĩ há han sór mũ. Ag tỹ ãjag tỹ inh kato tẽ han sór vẽ, ãjag tỹ ag hã nón mũ jé sir, isovãnh kỹ.
18 Há ti nĩ vẽ, nén ũ há tỹ ãjag mỹ sér nĩn kỹ. Isỹ ãjag mré nĩn kỹ nén ũ há ẽn tóg ãjag mỹ sér nĩ ja nĩgtĩ. Kỹ ãjag tỹ tag tovãnh tũ nĩn kỹ tóg há tĩ, inh mỹ. Kỹ nén ũ há hã to tar nỹtĩm nĩ.
19 Inh krẽꞌ, ãjag mỹnh ri ke vỹ tỹ inh nĩ. Ẽg mỹnh fi ne kaga tĩꞌ, ẽg tỹ fi ki mur ken kỹ. Fi kaga tag ri ke han mãn inh nĩ nĩ, ãjag to. Ãjag tỹ Cristo hã ri ke nỹtĩn kỹ tóg há tĩ, sỹ tag hã ve sór vẽ. Hã jé sóg ẽg mỹnh fi kaga ẽn ri ke han mãn mũ, ãjag tugrĩn.
20 Sỹ ãjag mré nĩnh há tóg tĩ, sỹ ãjag mré vẽmén jé, sỹ ãjag mỹ kãmén há han jé sir. Sỹ komẽr hã ãjag mỹ kãmén há tóg tĩ. Hã ra sóg kanẽ jur mũ, ãjag to, hã kỹ sóg rán mũ.
Agar fi mré Sara fag to vẽjykre
21 Ãjag kã mĩ ũ tóg Moisés tỹ vãsỹ ẽg jyvẽn ja ẽn han sór mũ. Ãjag hỹn mẽ kãn ja tũ nĩ, hã kỹ ãjag tóg han sór mũ. Ãjag tỹ mẽ há han kãn ja nĩ ra ãjag hỹn han sór ke tũ nĩ vẽ. Vãsỹ vẽjykre vẽ.
22 Tag vỹ rán kỹ nĩ, ha mẽ. Abraão vỹ kósin régre nĩ ja nĩgtĩ. Ũ mỹnh fi vỹ tỹ ti camarada fi nĩ, kỹ ũ mỹnh fi vỹ tỹ ti prũ pẽ fi nĩ.
23 Kỹ Abraão tóg ti camarada fi mré nỹ ja nĩ, ti tỹ ver kófa tũ ra. Kỹ ti kósin tóg fi ki mur mũ sir. Hã ra tóg ti prũ pẽ fi ki ti kófa ra kósin mũ gé sir. Topẽ tỹ ti mỹ: “ã kófa ra ã tóg kósin ke mũ,” he jan hã vẽ.
24 Topẽ tóg tag han, ẽg tỹ ti jykre ki kanhrãn jé, ha mẽ. Topẽ tỹ ẽg mré jykrén mũ ri ke fag nỹtĩ, Abraão prũ fag. Agar fi vỹ tỹ Abraão camarada ja nĩgtĩ. Ti mré ke pẽ tũ fi vẽ. Topẽ tỹ krĩ tỹ Sinai tá Moisés mỹ ti tỹ ẽg jyvẽn ke ẽn tó ja ẽn ri ke fi nĩ. Ũ tỹ vẽjykre ẽn han mũ vỹ tỹ ũ camarada ri ke nỹtĩ, fi kóm. Tỹ ag tóg sir Topẽ mré ke tũ nỹtĩ, ũ tỹ Judeu jykre han mũ ag.
25 Kỹ Agar fi vỹ krĩ tỹ Sinai ri ke nĩ, ga tỹ Arábia tá, hã vỹ Jerusalém he mũ, ũri. Ũ tỹ Judeu jykre han mũ to ken hã vẽ. Tag pijé ag tỹ Topẽ mré ke han mũꞌ.
26 Hã ra ẽg jamã vỹ kanhkã tá nĩ. Jerusalém tãg to ken hã vẽ, hã vỹ: kanhkã, he mũ. Ẽg mỹnh ri ke vẽ sir. Abraão prũ pẽ fi ri ke vẽ sir, Jerusalém tãg he mũ tag ti.
27 “Kurĩ ã tóg nĩ, krẽg vãnh ã tóg nĩ. Ge ra mỹ sér tĩm nĩ. Jamã há ra prẽrm nĩ, ã mỹ sér tĩn kỹ. Ã krẽ vỹ e tãvĩ nỹtĩnh mũ. Ũn krẽg mũ fi krẽ e kãfór ti nỹtĩnh mũ, ã krẽ ti,” he ja tóg nĩ, ẽg mỹnh tag fi to, Topẽ vĩ tỹ rán kỹ nĩ ki.
28 Kỹ ẽg tóg Isaque ri ke nỹtĩ. Topẽ tóg ti to Abraão mỹ: “ã kófa nĩ ra ã tóg kósin ke mũ,” he ja nĩ. Kỹ ẽg tóg Cristo ki ge kỹ tỹ Topẽ krẽ nỹtĩ, Topẽ tỹ ẽg to: “inh krẽ vỹ tỹ ãjag nỹtĩnh mũ,” hen kỹ.
29 Kỹ Abraão kósin ve vỹ ti prũ pẽ fi kósin vóg kónãn ja nĩgtĩ. Ti kófa tũ ra tóg ti kósin ve ẽn han. Hã ra tóg Topẽ kuprĩg tugrĩn ti prũ pẽ fi ki ti kósin han. Kỹ ti kósin ve vỹ ẽgno vóg kónãn mũ. Hã kỹ ẽg tóg tag vég tĩ gé, ũri. Ũ tỹ Judeu jykre han mũ ag vỹ ẽg vóg kónãn sór tĩ gé ver.
30 Kỹ Abraão krẽ ag to tag vỹ rán kỹ nĩ, ha mẽ: “ã camarada fi fón nĩ, fi kósin mré,” he ja tóg nĩ. “Ã camarada fi kósin pijé ã prũ pẽ fi kósin mré ã tũ mãn ke mũꞌ. Ti pir mỹ ti mãn ke mũ, ã prũ pẽ fi kósin ti,” he ja tóg nĩgtĩ.
31 Kỹ ẽg tóg tỹ ti prũ pẽ fi kósin ri ke nỹtĩ, ẽg tỹ Jesus ki ge kỹ nỹtĩn kỹ.
