Han kãme 16:1-40
16 Kỹ Paulo ag tóg ẽmã tỹ Derbe tá junjun mũ, ẽmã tỹ Listra tá ke gé. Hã ra ũ tóg tá nĩ nĩ, Jesus mré ke ũ, ti jiji hã vỹ: Timóteo, he mũ. Ti mỹnh fi tóg tỹ Judeu nĩꞌ, hã ra fi tóg Jesus ki rã ja nĩgtĩ. Ti panh tóg tỹ fóg nĩ.
2 Kỹ Listra tá Jesus mré ke ag tóg Timóteo to vĩ há han mũ, Icônio tá ke ag ke gé.
3 Kỹ Paulo tóg ti pére tĩg sór mũ, kỹ tóg ti gré fár junun kym mũ. Ag mũnh ke tá Judeu kar ag tóg ti panh tỹ tỹ fóg nĩ ki kanhró nỹtĩ. Hã kỹ Paulo tóg ti fár kym mũ sir.
4 Kỹ ag tóg ẽmã ẽn mĩ mũ mũ. Kỹ ag tóg ag mỹ Jesus tỹ ũn vin mũ ag tỹ rá kãmén mũ sir, igreja to kófa ag tỹ Jerusalém tá nén rán ja ti.
5 Hã kỹ Jesus ki ge kỹ nỹtĩ ag tóg tar nỹtĩ sir. Vẽnh mãn ag tóg tĩ, ag tỹ Topẽ vĩ mẽ jé. Komẽr hã ag tóg e nỹtĩ sir.
Paulo tỹ nén nẽ vég mũ
6 Kỹ Paulo ag tóg ga tỹ Frígia mĩ pa mũ, ga tỹ Galácia mĩ ke gé. Kỹ ag tóg ga tỹ Ásia tá Topẽ vĩ tó sór mũ, hã ra Topẽ kuprĩg tóg ag mỹ nenh mũ.
7 Kỹ ag tóg ga tỹ Mísia tá junjun mũ. Kỹ ag tóg ga tỹ Bitínia ra mũ sór mũ, hã ra Topẽ kuprĩg tóg ag mỹ nenh mũ gé.
8 Kỹ ag tóg Mísia rã mũ kỹ ẽmã tỹ Trôade tá junjun mũ.
9 Kỹ kuty ẽn kã Paulo tóg nén nẽ vég mũ, ti vẽnhpéti ki. Ga tỹ Macedônia tá ke vég tóg mũ. Ti jo tóg jẽ nĩ. Kỹ tóg ti mỹ: “Macedônia to kãtĩg, ẽg kanhrãn jé,” he mũ. Kỹ tóg rĩr mũ sir.
10 Ti tỹ nén nẽ ẽn ve kar kỹ ẽg tóg vẽsỹmér Macedônia ra mũ sór mũ sir. “Jesus hỹn ẽg mỹ: ha mũ jẽg, hé. Ag mỹ inh vĩ tó, he ti hỹn,” he ẽg tóg.
11 Kỹ ẽg tóg ẽmã tỹ Trôade ki pa mũ. Vẽsỹmér ẽg tóg goj vãso tỹ Samotrácia ra mũ mũ. Tỹ vaj kỹ ẽg tóg ẽmã tỹ Neápolis ra mũ mũ.
12 Tá pa kỹ ẽg tóg ẽmã tỹ Filipos ra mũ mũ. Ga tỹ Macedônia ki ẽmã ve vẽ. Ẽg tỹ tá junjun vén jan hã vẽ. Fóg tỹ Romano ag jamã ũ vẽ. Tá ẽg tóg kurã tỹ hẽn ri ke han mũ.
Lídia fi tỹ Jesus ki rã
13 Vẽnh kán ke kurã ki ẽg tóg ẽmã to ró mãra mũ mũ, goj ra. “Tán hỹn Topẽ mré vĩ jafã nĩ,” he ẽg tóg. Tá ẽg tóg nĩgnĩ mũ sir. Hã ra ũn tỹtá fag tóg tá nỹtĩ nĩ, kỹ ẽg tóg fag mré vĩ mũ.
14 Tá ũ fi tóg nĩ nĩ, fi jiji hã vỹ: Lídia, he mũ. Kur kósóg vẽne he fi tóg nĩ nĩ. Tỹ fi tóg ẽmã tỹ Tiatira tá ke nĩ. Topẽ kamẽg fi tóg tĩ. Ẽn fi vỹ Paulo vĩ mẽg mũ sir. Kỹ Topẽ tóg fi mỹ krĩ há nĩm mũ, kỹ fi tóg Paulo vĩ jẽmẽ kỹ Jesus ki rã mũ.
15 Kỹ ẽg tóg fi kypég mũ, fi mré ke kar fag mré hã. Kỹ fi tóg ẽg mỹ: “inh mré inh ĩn ki nỹtĩm nĩ, sỹ ãjag ki rĩr jé,” he mũ. Vĩ ki fi tóg ẽg kutãn mũ. Kỹ ẽg tóg fi mỹ: “he,” he mũ.
Paulo ag tỹ Filipos tá sigse kỹ nỹtĩ
16 Ẽg tỹ kejẽn Topẽ mré vĩ jafã ra mũ mãn kỹ ũ fi tóg ẽg kato tẽ mũ. Ũ mỹ rãnhrãj tĩ fi vẽ. Hã ra fi tóg jagrẽ kórég nĩ, kỹ fi jagrẽ tóg vẽnh kar mỹ ag tỹ nén venh ke mũ tó tĩ. Fi tỹ ũn mỹ rãnhrãj tĩ ag tóg fi tugnĩn jãnkamy mág vég tĩ.
17 Ẽn fi vỹ ẽg nón tĩ mũ, kỹ fi tóg jamã hára: “Topẽ pẽ mré rãnhrãj mũ ag vẽ mỹr,” he mũ. “Vẽnh kar kãfór mré rãnhrãj mũ ag vẽ mỹr. Ag hã ne tóg ãjag mỹ vẽnh vĩ há tó tĩꞌ, ãjag tỹ to krenkren jéꞌ,” he fi tóg ẽg to.
18 Kurã tỹ hẽn ri ke han fi tóg. Kỹ tóg Paulo mỹ ũ nỹ, kỹ tóg kyrã kỹ fi jagrẽ mỹ: “Jesus Cristo jiji tỹ sóg ã mỹ tó mũ, ã tỹ fi tovãnh jé,” he mũ. Kỹ tóg vẽsỹmér fi tovãnh mũ sir.
19 Hã ra tóg fi tỹ ũn mỹ rãnhrãj tĩ ag mỹ ũ nỹ, ag tỹ fi tugrĩn gỹjỹ ve mãn tũ nĩn kỹ. Kỹ ag tóg Paulo ség mũ, Silas ke gé. Pãꞌi ag mỹ ag tóg ag ven mũ, ẽmã kuju ki.
20 Kỹ ag tóg pãꞌi ag mỹ: “Judeu tag ag ve ra ha,” he mũ. “Vẽnh kar jũgjũ han ag tóg mũ nĩ mỹr, ẽg jamã tag mĩ.
21 Vẽjykre vẽnh mỹ tó ag tóg mũ, ẽg tỹ nén han ke tũ tó ag tóg mũ. Tỹ ẽg tóg Romano nỹtĩ, kỹ ag jykre tóg ẽg mỹ ũ nỹ,” he ag tóg.
22 Tá ke kar ẽn tóg ag to kórég nỹtĩ, kỹ ag tóg ag kato vĩ mũ gé.
Kỹ pãꞌi ag tóg porisa ag mỹ: “ag kur nũnh kỹ ag mrãnmrãn,” he mũ.
23 Ag mrãnmrãn tỹ hẽn ri ke han ag tóg mũ, ka téj tỹ. Kar ag tóg vẽse ja kã ki ag vãm mũ. Vẽse ja ki rĩr tĩ mỹ ag tóg: “ag nĩgfénh há han nĩ, ag tỹ kãpa tũ nĩ jé,” he mũ.
24 Kỹ tóg vẽse ja kuju tá ag vãm mũ. Ka tỹ tóg ag sigség mũ sir.
25 Kuty kuju ki Paulo tóg Silas mré Topẽ mré vĩ mũ. Ti mỹ ag tóg jãnjãn mũ. Kỹ vẽsigse ag kar vỹ jẽmẽg mũ sir.
26 Kỹ vãhã ga tóg jũrũn ke mũ. Vẽse ja krẽm tóg jũrũn ke mũ. Kỹ vẽsỹmér jãnkã kar vỹ nognor kr kãn mũ. (Rómróm kãn tóg mũ.) Kỹ vẽsigse ag kar se ja tỹ ferro ẽn tóg kygvarꞌ he kãn mũ.
27 Kỹ vẽse ja ki rĩr tĩ ẽn tóg rĩr mũ. Hã ra vẽse ja jãnkã kar vỹ nognor kỹ nỹtĩ nĩ. (Rómróm kỹ tóg nỹtĩ nĩ.) Kỹ tóg ti rógro ẽn kunũnh kỹ vẽnh kusón sór mũ. “Vẽsigse kar ag hỹn vẽnh pigju kãn,” he tóg.
28 Hã ra Paulo tóg jamã há ra: “ker vẽnh vóg kónãn hẽꞌ. Ẽg kar vỹ ki nỹtĩ,” he mũ.
29 Kỹ tóg néj gru to vĩ mũ, ũ tỹ ag ki rĩr tĩ ẽn ti. Kỹ tóg vẽse ja kã ra Paulo to vẽnhvãg rã mũ, jũrũn ke kỹ. Paulo jo tóg mũg ke mũ, Silas jo ke gé, ag tỹ ti mỹ ti kãfór nỹtĩn kỹ.
30 Ag gé(g) tóg tĩ mũ, vẽse ja kã tá kãkutẽ kỹ, kỹ tóg ag mỹ: “inh hỹn hẽ ri kenh mũ?“ he mũ. “Topẽ vĩ mranh sóg, hã ra tóg ti tỹ inh kren han há tĩ,” he tóg.
31 Kỹ Paulo ag tóg ti mỹ: “ã tỹ Jesus Cristo ki rã kỹ ã tóg kren mũ, ã mré ke kar ag mré hã,” he mũ.
32 Kỹ ag tóg ti mỹ Jesus vĩ kãmén mũ, ti mré nỹtĩ ag mỹ ke gé.
33 Kỹ tóg ag ki rĩr mũ vẽsỹmér, kuty ke nỹ ra. Ag tỹ ag mrãnmrãn ja ẽn kupég tóg mũ, ag mỹ. Kỹ ag tóg vẽnh kaja jé ti kypég mũ gé, ti mré nỹtĩ ag mré, ag tỹ Jesus ki ge kỹ.
34 Kỹ tóg ti ĩn ra ag tatĩn tĩ mũ. Ag jẽn tóg mũ. Ti mỹ tóg sér tĩ, ti tỹ Jesus ki rã kỹ. Ti mré nỹtĩ kar ag mỹ tóg sér tĩ gé sir, fag ke gé.
35 Tỹ vaj kỹ pãꞌi ag tóg porisa ag mỹ vẽnh vĩ nĩm kỹ ag jẽgnẽg mũ. “Ẽn ag mỹ: ha mũ jẽg, hem nĩ,” he ag tóg, ũ tỹ vẽse ja ki rĩr tĩ ẽn mỹ.
36 Kỹ tóg Paulo ag mỹ: “pãꞌi ag vỹ inh mỹ vẽnh vĩ jẽnẽ, isỹ ãjag mỹ: ha mũ jẽg, he jé. Hã kỹ jatun mỹ mũ jẽg,” he mũ.
37 Kỹ Paulo tóg ti mỹ: “tỹ ẽg Romano nỹtĩ, ag mré, hã ra ag tóg vẽnh ó to ẽg mrãnmrãn ja nĩ,” he mũ. “Kỹ vẽnh kar vỹ ve kãn. Ẽg ki jẽmẽg mẽ kã ag tóg vẽse ja kã ki ẽg vãm. Jó ag tóg vẽnh kar vatánh tá ẽg mỹ: hã mũ jẽg, he sór mũ. Mũnh ke tũ ẽg nĩ. Ag hã tóg kãmũ kỹ ẽg tatĩ mũnh mũ, pãꞌi ag,” he tóg.
38 Kỹ porisa ag tóg pãꞌi ag mỹ tag tó mũ sir. Kỹ tóg ag mỹ e tĩ. Ag tỹ Romano ũ vóg kónãn ke tũ vẽ vẽ, hã kỹ pãꞌi ag fe tóg jũrũn ke mũ.
39 “Ẽg mỹ vẽnh pãte fón nĩ, ẽg tỹ ãjag sigse ja ti,” he ag tóg mũ. Kỹ ag tóg ag tatĩ mũ mũ. “Ãjag tỹ ẽg jamã ki pa kỹ tóg há tĩ,” he ag tóg mũ sir ag mỹ.
40 Ag tỹ vẽse ja ki pa kỹ ag tóg Lídia fi ĩn ra mũ mũ sir. Jesus mré ke ag vég ag tóg mũ. Kỹ ag tóg ag jyvẽn mũ. Kar kỹ ag tóg ẽmã ẽn ki pa mũ sir.
