Han kãme 20:1-38
20 Vẽnh kar tỹ jatu hen kỹ Paulo tóg Jesus ki ge kỹ nỹtĩ ag jé prẽr mũ, ag jyvẽn jé. Kỹ tóg ag mỹ: “sỹ tĩg ke nẽ ha,” he mũ. Kỹ tóg ga tỹ Macedônia ra tĩ mũ sir.
2 Kỹ tóg ga ẽn mĩ tĩg kỹ fĩn rãm mũ. Jesus ki ge kỹ nỹtĩ kar ag jyvẽn tóg mũ. Kỹ tóg tĩg mãn kỹ ga tỹ Grécia tá jun mũ.
3 Tá tóg kysã tãgtũ tũg mũ. Kỹ tóg canoa mág kã mĩ ga tỹ Síria ra vỹn ke sór mũ. Hã ra tóg Judeu ag tỹ canoa tỹ krỹgꞌ he ja tá ti vóg kónãn sór mũ mẽg mũ. Kỹ tóg ga tỹ Macedônia mĩ kutẽ mũ, ga tỹ Síria ra vỹn ken jé.
4 Ti mré ũ ag tóg mũ mũ, hã vỹ: Sópatro, he mũ, Pirro kósin tag ti. Beréia tá ke vẽ. Kỹ Tessalônica tá Artistarco tóg ti mré tĩ mũ, Segundo ke gé. Derbe tá Gaio tóg ti mré tĩ mũ, Timóteo ke gé. Ásia tá Tíquico tóg ti mré tĩ mũ, Trófimo ke gé.
5 Ẽn ag kar vỹ ẽg jo mũ mũ, ẽmã tỹ Trôade ra. Tá ag tóg ẽg jãvãnh mũ sir.
6 Jãvo ẽg tóg ẽmã tỹ Filipos tá fénhta tỹ pũ jẽgja tũ ko kar kỹ mũ mũ. Kỹ ẽg tóg kurã tỹ 5 (ke) tũg kỹ ẽg jo mũ mũ ag nón Trôade tá junjun mũ. Tá ẽg tóg kurã tỹ 7 (ke) tũg mũ sir.
Ẽmã tỹ Trôade tá
7 Semana tỹ kurã ve ki ẽg tóg vẽnh mãn mũ sir, Domingo kã, Jesus jamĩ kó jé. Kỹ Paulo tóg tỹ vaj kỹ tĩg sór mũ, hã kỹ tóg ag mré vẽmén mág mũ. Kỹ ẽg tóg meia noite pétẽm mũ, vẽmén nỹtĩ ki.
8 Ðn to jãpry jafã tá ẽg nỹtĩ, kỹ néj tỹ hẽn ri ke vỹ tá grugrug kỹ nỹtĩ nĩ.
9 Kỹ kyrũ tóg tá nĩ nĩ, ti jiji hã vỹ: Êutico, he mũ. Jãnkã ror kã tóg nĩ nĩ, janẽra kã. Jó Paulo tóg vẽmén jẽ nĩ. Hã ra kyrũ tóg nũr mũ sir. Kỹ tóg janẽra ki kutẽ mũ. Ag tỹ re kỹ ti vég mũ ra tóg ter ja nĩ sir.
10 Kỹ Paulo tóg tére mũ gé sir. Ti kri tóg pãnh ke mũ. Kỹ tóg ti kãgũg mũ, ti nĩgnó tỹ. Kỹ tóg ag mỹ: “fe kaj tũg ra,” he mũ. “Ti kuprĩg vỹ ti kã kã nĩ nĩ,” he tóg.
11 Kỹ tóg tãpry mũ. Jesus jamĩ kãnhkrég tóg mũ sir, kỹ tóg ko mũ gé. Ag mỹ tóg vẽmén mág han mãn mũ gé. Hã tóg kurãg mũ sir. Kỹ tóg ẽmã ẽn ki kutẽ kỹ tĩ mũ.
12 Hã ra ag tóg kyrũ ẽn pére kãmũ mũ. Rĩr tóg nĩ nĩ, kỹ ag fe tóg háꞌ he mũ sir.
Ẽmã tỹ Mileto ra
13 Kỹ ẽg tóg ti jo canoa mág kã ra ge kỹ ẽmã tỹ Assôs ra mũ mũ. Tá Paulo tóg ẽg mré canoa kã ra rã sór mũ gé, ti tỹ ẽg mré tĩg jé. “Ijo ra mũ jẽg, jãvo sóg inh pẽn kã ra tĩg mũ,” he ja tóg nĩ.
14 Ẽg tỹ ẽmã tỹ tá pa kỹ tóg ẽg mré, canoa ẽn ki rã mũ. Kỹ ẽg tóg ẽmã tỹ Mitilene tá junjun mũ sir.
15 Tá pa kỹ ẽg tóg tỹ vaj kỹ goj vãso tỹ Quios kakãm krỹg mũ. Tỹ vaj kỹ ẽg tóg goj vãso tỹ Samos to hã nũgnũr mũ, kỹ ẽg tóg tỹ vaj kỹ ẽmã tỹ Mileto tá junjun mũ sir, goj tãvĩ kã mĩ mũn kỹ.
16 Paulo tóg: “Éfeso ra ẽg mũnh ke tũ nĩ,” he ja nĩgtĩ. “Ẽg tỹ Jerusalém kukãm mũnh ke vẽ. Hã kỹ ẽg tóg Ásia ki nỹtĩnh ke tũ nĩ. Fénhta tỹ Pentecostes ki tóg sỹ Jerusalém tá nĩnh há tĩ,” he ja tóg nĩgtĩ,.
Paulo tỹ Jesus mré ke ag mré vĩ
17 Mileto tá nĩ kỹ Paulo tóg Éfeso ra vẽnh vĩ jẽnẽg mũ, igreja to kófa ag mỹ, Jesus ki ge kỹ nỹtĩ kar ag tỹ ti venh kãmũ jé, fag mré hã.
18 Ag tỹ tá junjun kỹ tóg ag mỹ: “Inh kãtĩg ven kã ãjag tóg inh vé, isỹ ga tỹ Ásia tá jun vén mũn kã,” he mũ.
19 “Ẽg Senhor tỹ Jesus tỹ inh mỹ nén nĩm ja han isóg tĩ. Vẽsỹ ũn mág han tũ sóg nĩ. Kejẽn sóg fỹ tĩ gé, sỹ vẽjykre pãno ven kỹ. Judeu ag tóg iso jũgjũ tĩ gé, kỹ sóg vẽsỹrénh tĩ gé,” he tóg.
20 “Nén há kar tó sóg tĩ. Inh pijé ãjag mỹ tó tũ nĩgtĩꞌ. Ẽg vẽnh mãn ki sóg tó ja nĩgtĩ, ãjag ĩn krẽm ke gé.
21 Judeu ag mỹ sóg tó ja nĩgtĩ, inh mré ke ag mỹ, fóg ag mỹ ke gé, ag tỹ ag jykre pãno tovãnh jé, Topẽ jykre han jé, ẽg Senhor tỹ Jesus Cristo ki ge jé,” he tóg.
22 “Ha vé, Jerusalém ra sóg tĩg mũ ha, Topẽ kuprĩg tỹ inh mỹ: ha tĩg, hen kỹ. Isỹ tá nén venh ke mũ ki kagtĩg sóg nĩ ver.
23 “Hã ra Topẽ kuprĩg tóg inh mỹ: ã se jé ag tóg ke mũ, ã vóg kónãn jé ag tóg ke mũ, he tĩ. Isỹ hẽ tá jun kỹ tóg inh mỹ inh vẽsỹrénh ke tó tĩ.
24 Hã ra tóg inh mỹ tỹ nén ũ tũ nĩ, ag tỹ isén ke mũ ra. Sỹ inh rãnhrãj kãn há tóg tĩ, Jesus Cristo tỹ inh mỹ vẽnh rãnhrãj nĩm ja ẽn ti, hã vỹ: sỹ vẽnh kar mỹ Jesus kãme sér ẽn tó jé, he mũ,” he tóg.
25 “Ha vé, inh ve mãn ke tũ ãjag tóg nĩ ha, ki kanhró sóg nĩ. Ũ tỹ hẽn ri ke ag mỹ sóg Topẽ tỹ tỹ ẽg pãꞌi nĩ tó ja nĩgtĩ. Hã ra ag kar ẽn tóg inh ve mãn ke tũ nĩ ha.
26 Hã kỹ sóg ãjag mỹ tó mũ. Ũ tỹ Jesus ki rã tũ nĩn kỹ tóg iso: inh mỹ tóg tó ja tũ nĩ, henh ke tũ nĩ.
27 Ãjag mỹ sóg tó kãn. Topẽ jykre kar ti. Inh pijé ãjag mỹ nén ũ tó tũg ja nĩ.
28 Vẽnh ki rĩrm nĩ, vẽso jykrén kỹ. Kỹ Jesus ki ge mũ kar ag ki rĩrm nĩ gé. Topẽ kuprĩg vỹ ãjag tỹ ag to pãꞌi hynhan, kỹ ag ki rĩr há han nĩ. Ti kyvénh tỹ tóg ãjag kygjãm mỹr, Jesus ti. Ti mỹ ãjag tóg tỹ ti mẽg ri ke nỹtĩ. Kỹ ti mẽg ẽn jẽn nĩ.
29 Isĩg kỹ ũ ag tóg ãjag ki junjun ke mũ, kỹ ag tóg mĩg ri ke nỹtĩ, ti mẽg mãn sór kỹ, hã vỹ: Jesus ki ge kỹ nỹtĩ ag kókén sór mũ, he mũ.
30 Ãjag kã mĩ ũ tóg vẽnh ó tónh ke mũ gé, Jesus mré mũ ag tỹ ag mré mũ kónãn han jé.
31 Hã kỹ vẽnh ki rĩr. Iso jykrén. Prỹg tãgtũ ki sóg ãjag jyvẽn, kurã ki, kuty ki ke gé. Ãjag kar jyvẽn sóg. Ãjag jyvẽn kỹ sóg fỹ tĩ gé, kejẽn.
32 Hã ra sóg Topẽ mỹ: ag ki rĩr, he mũ, ãjag to. Topẽ vỹ ti vĩ tỹ ãjag ki rĩr ke mũ gé, ti tỹ ãjag jagãgtãn kỹ. Ti hã vỹ ãjag tar han ke mũ. Ãjag mỹ tóg ẽmã há tãvĩ nĩm ke mũ gé, kar kỹ, ti tũ kar ag mré hã,” he tóg.
33 “Inh pijé ãjag mỹ: inh mỹ jãnkamy nĩm, inh mỹ kur nĩm, he mũꞌ.
34 Isỹ nén ũ génh jé sóg rãnhrãj tĩ, inh nĩgé tỹ. Kỹ inh rãnhrãj ki inh mré ke ag vỹ ag tũ ti vigvég tĩ gé, inh kóm.
35 Hã ki sóg ãjag mỹ Jesus jykre ti ven mũ. Ẽg tỹ ẽg rãnhrãj ki ẽg tũ ven kỹ ẽg tóg ũn krónhkrój ag mỹ nén ũ vin ke mũ gé, ẽg tỹ ti jykre han kỹ. Ẽg Senhor tỹ Jesus vĩ mĩ sóg ẽkrég tĩ. Ti hã tóg ẽg mỹ tag tó ja nĩgtĩ, kỹ tóg: “ũ tỹ ẽg mỹ nén ũ nĩm kỹ tóg pãgsĩ nĩ. Ẽg tỹ ũ mỹ ẽg tũ nĩm kỹ tóg hã ra há nĩ,” he ja nĩgtĩ, Jesus ti,” he tóg, Paulo ti.
36 Ti tỹ tó kãn kỹ tóg ti jakrĩ tỹ jẽ mũ, kỹ tóg Topẽ mré vĩ mũ, vẽnh kar to.
37 Kỹ ag tóg kygfỹ mũ. Paulo nunh jãgmỹ ag tóg ag nĩgnó fón mũ. Ti ki ag tóg nhun ke mũ.
38 Ag mỹ tóg e tĩ, ti tỹ ag mỹ: “inh ve mãn ke tũ ãjag nĩ ha,” hen kỹ. Kỹ ag tóg canoa mág ra ti mré mũ mũ sir.
