João tỹ ẽg tỹ nén venh ke mũ rá 10:1-11
10 Kỹ sóg Topẽ tỹ jẽnẽ jafã tar ũ vég mũ. Kanhkã tá tóg kãtére mũ. Kanhkã góg vỹ ti kri rũm ke kỹ nỹ nĩ. Ti krĩ kri ta no tóg vẽnh ven mũ. Ti kakã vỹ rã ri ke nĩ. Ti fa vỹ pĩ gru ri ke nỹtĩ.
2 Livro sĩ tỹ tóg jén ke kỹ mãn kỹ jẽ nĩ. Ti pẽgja tỹ tóg goj kafã tũ sãn mũ. Kỹ tóg ti jakãnh tỹ ga sãn mũ.
3 Prẽr tóg mũ sir, jamã há ra. Kỹ tóg tỹ mĩg kyr mẽ tĩ, ti prẽr ti. Kỹ ta tỹ tỹrỹr he tỹ 7 (ke) vỹ ti vĩ kafãn mũ, jamã há ra.
4 Kỹ sóg ta tỹ tỹrỹr he mũ ẽn vĩ rán sór mũ. Hã ra ũ tỹ kanhkã tá vĩ mũ tóg inh mỹ: “rán tũg nĩ,” he mũ. “Ta tỹ tỹrỹr he mũ ẽn vĩ tó sór tũg nĩ, ũ mỹ,” he tóg.
5 Kỹ Topẽ tỹ jẽnẽ jafã ẽn, ũ tỹ goj mré ga kri jẽ mũ ẽn tóg ti nĩgé tỹ kanhkã ki ven mũ, ti pẽgja tỹ.
6 Kỹ tóg: “sỹ ki hã tónh ke vẽ,” he mũ. “Topẽ vỹ ki kanhró nĩ,” he tóg. “Ũn rĩr nĩ ẽn vỹ ki kanhró nĩ, ũn ter vãnh ẽn. Ũ tỹ kanhkã mré, ga han mũ ẽn vỹ ki kanhró nĩ, ũ tỹ goj han mũ ẽn ti, ũ tỹ ũn rĩnrĩr nỹtĩ kar ag hynhan mũ ẽn ti,” he tóg. “Ha vé, ti tỹ nén han ke mũ ẽn tovãnh mãn ke tũ ti nĩ ha, Topẽ ti.
7 Ti tỹ jẽgnẽ jafã tỹ 7 (ke) ẽn ag kã ũ vỹ trombeta kyn ke mũ. Kỹ tóg ũ tỹ 7 (ke) tá krỹg ke mũ. Ti tỹ kyn kỹ Topẽ vỹ ti tỹ nén han sór mũ ẽn han ke mũ ha, ti tỹ vãsỹ to jykrén mũ ẽn ti. Hã tó ja ti nĩ, ti rãnhrãj han tĩ ag mỹ, ti vĩ tó tĩ ag mỹ ke gé, Topẽ ti,” he tóg, Topẽ tỹ jẽnẽ jafã ti.
8 Kỹ kanhkã tá ke ũ tóg inh mré vẽmén mãn mũ. Inh mỹ tóg: “ha tĩg,” he mũ. “Livro sĩ tỹ jén ke kỹ nĩ ẽn mãn tĩg,” he tóg. “Ũ tỹ goj mré ga sãn kỹ jẽ ẽn ki livro mãn tĩg,” he tóg.
9 Kỹ sóg tĩg kỹ ti mỹ livro to vĩ mũ. Kỹ tóg inh mỹ: “té, ko ra,” he mũ. “Mỹg ri ke ti nĩ, ã tỹ kon kỹ. Kar kỹ tóg hã ra fa nĩnh mũ, ha vem nĩ,” he tóg.
10 Kỹ sóg livro sĩ ẽn mãn kỹ ko mũ. Kỹ tóg mỹg ri ke nĩ. Isỹ ko kar kỹ tóg fa nĩ sir.
11 Kỹ ũ tóg inh mỹ: “Topẽ tỹ nén hynhan ke mũ tó mãn jé ã tóg ke mũ,” he mũ. “Ti tỹ povo kar, nação kar, pãꞌi krẽm ke kar, pãꞌi kar ag tỹ nén hynhan ke mũ tó jé ã tóg ke mũ,” he tóg, vẽnh vĩ ti.
