João tỹ ẽg tỹ nén venh ke mũ rá 11:1-19
11 Kỹ ag tóg inh mỹ vãn jun mũ, vãn tỹ nén ũ kãmun jafã ti. Kỹ ũ tóg inh mỹ: “tágꞌ,” he mũ. “Topẽ ĩn kãmun nĩ, Topẽ mỹ nén ũ pũn jafã mré hã. Ũ tỹ krẽm Topẽ mré vẽmén nỹtĩ ẽn ag nĩgkrén nĩ gé.
2 Topẽ ĩn vãso ẽn kãmun tũg nĩ hã ra. Fóg ag tũ vẽ, kỹ kãmun tũg nĩ. Kysã tỹ 42 (ke) ki fóg ag tóg ẽmã ẽn kókén ke mũ, Topẽ tỹ ẽmã to: “isũ vẽ,” he mũ ẽn ti.
3 Ũ tỹ inh vĩ tó tĩ régre ag jẽgnẽ jé sóg ke mũ. Kur kórég rĩnh kỹ ag tóg isỹ ag mỹ nén tónh ke mũ ẽn tónh ke mũ, kurã tỹ 1260 (ke) ẽn ki,” he tóg inh mỹ, ag kã mĩ ũ ti.
4 Topẽ vĩ tó tĩ régre ẽn ag vỹ Topẽ vĩ to tar nỹtĩ, ka tỹ oliveira tar ẽn ri ke. Kỹ ag tóg néj gru ri ke nỹtĩ, néj tỹ kri fẽg jafã kri nỹtĩg kỹ. Ũ tỹ tỹ ẽprã ke ag kri ke ẽn rã hã ti nỹtĩ, néj tỹ kri fẽg jafã régre ẽn ti. Tag ri ke ag nỹtĩ, Topẽ vĩ tó tĩ régre ẽn ag.
5 Ũ tỹ ag kato vãsãn kỹ ag tóg pĩ tỹ ag jẽnkã tá kãkutẽ mũ ẽn tỹ ag tỹ tũꞌ he tĩ, ũ tỹ ag kato vãsãnsãn mũ ag tỹ. Hã kỹ ag kãgter kãnꞌ he tĩ, ũ tỹ ag vóg kónãn sór mũ ag.
6 Ag tỹ Topẽ vĩ tón kỹ ag tóg, ag tỹ ta kutẽ kamẽg sór kỹ ti kutẽ kamẽg tĩ, kỹ tóg kutẽ tũ nĩgtĩ. Ag tỹ goj tỹ vẽnh kyvénh ri ke han sór kỹ ag tóg tỹ han tĩ gé. Ag tỹ ga kri ke ag vóg kónãn sór kỹ ag tóg ag vóg kónãn tĩ gé. Nén ũ jagy tỹ hẽn ri ke hynhan ag tóg tĩ, Topẽ vĩ tó tĩ régre ẽn ag.
7 Kejẽn ag tóg kãmén kãn mũ sir, Topẽ tỹ ag mỹ nén tó mũ ẽn ti. Kỹ nũgme tá mĩg tóg kãkutẽ mũ, kỹ tóg ag to rárá kỹ ag kãgtén mũ.
8 Ag kãgter kỹ ag tóg ẽmã kuju tá vár kỹ nỹtĩ nĩ, ẽg Senhor tỹ ẽmã tá ka to sa ja ẽn tá. Ẽmã ẽn tá ke ag jykre tóg ẽmã tỹ Sodoma tá ke ag jykre ri ke nĩ, ga tỹ Egito tá ke ag jykre ri ke ti nĩ gé.
9 Kurã tãgtũ mré kurã kuju ki ag tóg vẽser ẽn vigvég mũ. Vẽnh kar ag vỹ ag vigvég mũ, povo kar ag, pãꞌi krẽm ke kar ag, vẽnh vĩ kar tó tĩ ag kar ke gé. Ag pijé ga krẽm ag pigju mũꞌ, vẽser ẽn ag.
10 Ẽprã ke kar ag mỹ tóg sér tĩ, ag kãgter ti. Fénhta mág han ag tóg mũ. Jagnẽ mỹ ag tóg presente jẽgnẽg mũ. Topẽ vĩ tó tĩ tag ag vỹ ẽprã ke ag vóg kónãn jagy han ja nĩgtĩ, hã kỹ tóg ag kãgter kỹ vẽnh kar mỹ sér gy tĩ sir.
11 Kurã tãgtũ kri kurã kuju tũg kỹ Topẽ tóg hã ra ag rĩn mãn mũ sir, ti kuprĩg tỹ. Kỹ vẽnh kar ag tóg jũrũn ke jagy han mũ sir.
12 Kỹ kanhkã tá vẽnh vĩ tóg ag mỹ mẽ há tĩ. Kỹ tóg Topẽ vĩ tó tĩ régre tag ag mỹ: “kunĩg,” he mũ. Kỹ ag kato vãsãnsãn mũ ag vỹ ag tỹ kanhkã ra jãpry vég mũ sir, kanhkã góg kã mĩ.
13 Kỹ ga tóg jũrũn ke mũ sir. Ẽmã tá tóg ĩn vẽnh kãpóv tỹ 10 (ke) ag kã ũn pir kókén kãn mũ, ga tỹ jũrũn ke ti. Ẽprã ke tỹ 7 mil (ke) vỹ kãgter mũ, ẽn kã. Ũn kãgter tũ ag tóg kanẽ jur mũ. Ag mũmẽg vỹ ag kãgtén kren mũ. Kỹ ag tóg Topẽ to: “ũn mág vỹ tỹ ti nĩ,” he mũ vãhã.
14 Nén jagy ũ vỹ hur tũꞌ hé. Nén jagy ũ tóg ver kã nĩ nĩ.
Trombeta tỹ ẽgno kyr
15 Kỹ Topẽ tỹ jẽgnẽ jafã tỹ 7 (ke) ẽn ag kã ũ tóg trombeta kyn mũ gé sir. Trombeta tỹ 7 (ke) vẽ sir. Kỹ kanhkã tá vẽnh vĩ tỹ hẽn ri ke tóg mẽ há tĩ. “Vãhã tóg ẽprã ke kar ag kri tỹ ũn mág jẽ, Topẽ ti, ẽg Senhor ti ke gé,” he ag tóg. “Vãhã ag tóg nén ũ kar ki rĩr nỹtĩ ha. Kỹ tóg tũꞌ henh ke tũ nĩ, ag rãnhrãj ti,” he ag tóg.
16 Kỹ kófa tỹ 24 (ke) ẽn ag, ũ tỹ Topẽ mré ag nĩgja kri nĩgnĩ kỹ nỹtĩ ẽn ag vỹ ti krẽm mũgmũg ke kãn mũ sir. Kỹ ag tóg ti mỹ: “Topẽ vỹ tỹ ã nĩ,” he mũ sir.
17 Jãnjãn ag tóg mũ gé sir, ha mẽ. “Topẽ, pãꞌi mág, nén ũ kar han há ã tóg nĩ,” he ag tóg mũ. “Vãsỹ ã tóg nĩ nĩ, kỹ ã tóg ũri nĩ gé. Ẽg mỹ tóg sér tĩ, ã tỹ tỹ pãꞌi mág nĩn kỹ. Ã tar nĩ kỹ ã tóg pãꞌi ũ ag pan kãn.
18 Ag to jũ jé ã tóg ke mũ ha. Ũn kãgter mũ ag jykre tugnỹm kãn jé ã tóg ke mũ ha. Ã kurã vỹ hur jun, kỹ ã tóg ã rãnhrãj han tĩ ag mỹ ag rãnhrãj kaja ti ven ke mũ, ã vĩ tó tĩ ag mỹ ke gé, ã tũ kar ag mỹ, ũn mág ag mỹ, ũn kãsir ag mỹ. Kỹ ã tóg ũ tỹ ẽprã ke ag kókén ja ẽn ag kókén kãn ke mũ ha, vẽnh kaja jé,” he ag tóg mũ, kófa tỹ 24 (ke) ẽn ag.
19 Kỹ ũ tóg Topẽ ĩn nón mũ, ĩn tỹ kanhkã tá jẽ ẽn. Kỹ Topẽ caixa ẽn tóg ve háꞌ he kỹ nỹ nĩ, Topẽ tỹ ti tũ ag mré jykrén kỹ ag mỹ caixa fig mũ ẽn ri ke. Kỹ ta tóg kómkóm ke kỹ tỹrỹr he mũ. Ga vỹ ragra ke jagy han mũ sir. Kỹ nãfy vỹ vár mũ gé sir, nãfy mág.
