João tỹ ẽg tỹ nén venh ke mũ rá 16:1-21
16 Kỹ sóg vẽnh vĩ ũ mẽg mũ, Topẽ ĩn ẽn kã tá. Topẽ tỹ jẽgnẽ jafã tỹ 7 (ke) ẽn ag mỹ tóg: “pénky ki nỹtĩ ẽn tỹ ga kri kugjẽn mũjẽg,” he mũ.
2 Kỹ Topẽ tỹ jẽnẽ jafã ũ tóg tĩ mũ, ti pénky ki nĩ ẽn tỹ ga kri kujẽn jé. Kỹ ũ tỹ mĩg ẽn jiji tỹ ránrán kỹ nỹtĩ ẽn ag kar vỹ vẽnh kaga fugfo jagy han mũ. Ũ tỹ mĩg kãgrá to: “Topẽ vỹ tỹ ti nĩ,” he mũ ag kar vỹ fugfóm kãn ke mũ.
3 Kỹ Topẽ tỹ jẽnẽ jafã ũ tóg goj kafã tũ ki ti pénky ki nĩ ẽn kujẽg mũ gé. Kỹ goj tóg vẽnh kyvénh ri ke nĩ, ag tỹ ũ tãnh mũ kyvénh ẽn ri ke. Kỹ goj kã mĩ mũ kar vỹ kãgter ke mũ.
4 Kỹ Topẽ tỹ jẽnẽ jafã ũ tóg ti pénky ki nĩ ẽn kujẽg mũ gé. Pénky tãgtũ vẽ sir. Goj kãsir kar ki tóg kujẽg mũ, goj nĩhỹg ja kar ki ke gé. Kỹ tóg tỹ vẽnh kyvénh kar nỹtĩ ha, goj kar ti.
5 Kỹ ũ tỹ goj ki rĩr tĩ ẽn tóg: “ũn há vỹ tỹ ã nĩ,” he mũ, Topẽ mỹ. “Vãsỹ ã tóg nĩ ja nĩgtĩ. Kỹ ã tóg ũri nĩ gé,” he tóg mũ. “Vẽjykre há han kỹ ã tóg nĩ nĩ.
6 Ũ tỹ ã ki ge kỹ nỹtĩ ag kãgtén ag tóg, ũ tỹ ã vĩ tó tĩ ag mré hã. Kỹ ã tóg ag mỹ vẽnh kato vẽnh kyvénh nĩm mũ sir, ag tỹ kron jé. Ag tỹ, ag tỹ ag kãgtén ja kajãm hã vẽ,” he tóg.
7 Kỹ sóg vẽnh vĩ ũ mẽg mũ gé, Topẽ mỹ nén ũ pũn jafã tá, kỹ tóg: “Topẽ vỹ tỹ ã nĩ. Pãꞌi vỹ tỹ ã nĩ. Vẽnh kar kri ke vỹ tỹ ã nĩ,” he mũ. “Kuryj ti nĩ, ã jykre ti. Kỹ ã tóg ki hã tó tĩ. Kỹ ã tóg ki hã ag vóg kónãn tĩ gé,” he tóg mũ.
8 Kỹ Topẽ tỹ jẽnẽ jafã ũ tóg ti pénky ki nĩ ẽn kujẽg mũ gé. Pénky tỹ 4 (ke) vẽ sir. Rã ki tóg ti tũ kujẽg mũ. Kỹ rã tóg vẽnh kar kri hupũn jagy han mũ. Kỹ ag jagtar mũ.
9 Kỹ ag tóg kugpũr mũ sir, vẽnh kar, rỹ jagy tỹ. Kỹ ag tóg Topẽ to vĩ kónãn mũ sir, ti tỹ ag vóg kónãn tugrĩn. Ge ra ag tóg ag jykre tovãnh sór tũ nĩ. Topẽ mỹ ag tóg vẽnh vin sór tũ nĩ.
10 Kỹ Topẽ tỹ jẽnẽ jafã ũ tóg ti tũ kujẽg mũ gé. Pénky tỹ 5 (ke) vẽ sir. Mĩg ẽn nĩgja kri tóg kujẽg mũ. Kỹ tóg kuty nỹ, mĩg ẽn krẽm ke kar ag mỹ. Kỹ tóg vẽnh kar mỹ e tãvĩ tĩ. Kaga jagy han ag tóg mũ, ag fugfóm to. Kỹ ag tóg ag kaga jagy tugrĩn ag nũnẽ kyprãg mũ.
11 Kỹ ag tóg Topẽ tỹ kanhkã tá nĩ ẽn mỹ vĩ kónãn mũ, ag kaga to, ag tỹ ti jagy vég mũ kar to. Ge ra ag tóg ag jykre kórég tovãnh sór tũ nĩ.
12 Kỹ Topẽ tỹ jẽnẽ jafã ũ tóg ti tũ kujẽg mũ gé. Pénky tỹ 6 (ke) vẽ sir. Goj tỹ Eufrates ki tóg kujẽg mũ. Kỹ tóg gym ke kãn mũ. Hã kỹ pãꞌi tỹ rã jur ja tá kãmũ ẽn ag tóg kãmũ mũ. Kỹ goj tỹ gym ke ja ẽn vỹ tỹ, ag japry nỹ ha.
13 Kỹ sóg vẽnh kuprĩg tãgtũ vég mũ. Hã ra tóg tỹ pépo ve nỹtĩ, vẽnh kuprĩg ag. Ũ tóg mĩg fẽr ẽn jẽnkã tá kãkutẽ mũ. Ũ tóg goj kã tá mĩg ẽn jẽnkã tá kãkutẽ mũ. Ũ tóg ón kỹ Topẽ vĩ tó tĩ ẽn jẽnkã tá kãkutẽ mũ gé.
14 Japo ag vẽ, hã ra ag tóg ẽg tỹ nén han vãnh hynhan mũ. Kỹ ag tóg ẽprã ke to pãꞌi kar ag mré vẽmén mũ gé, ag tỹ vẽnh génh ke to vẽnh mãn jé, Topẽ tỹ ag mỹ kurã nĩm ja ẽn ki. Topẽ hã ne tỹ ũn mág nĩꞌ.
15 “Ha vé, ãjag tỹ nén ũ péju tĩ ẽn kãtĩg ri ke ti nĩnh mũ, inh kãtĩg mãn ke ti. Ãjag nũgnũr tũ nĩn kỹ tóg há tĩ, ãjag kur kynkar kỹ nỹtĩn kỹ. Kỹ mỹ sér nỹtĩm nĩ. Kỹ ãjag tóg kator nỹtĩnh ke tũ nĩ. Mỹꞌãgꞌãg ke tũ ãjag nĩ, ũ ag tỹ ãjag vég mũ ra,” he tóg, ẽg Senhor ti, ẽg mỹ.
16 Japo tag ag vỹ pãꞌi kar tỹ vẽnh mãn han mũ, ẽmã tỹ Armagedom tá. Hebreu vĩ ki ẽmã ẽn jiji vẽ.
17 Kỹ Topẽ tỹ jẽnẽ jafã ũ tóg ti tũ kujẽg mũ gé. Pénky tỹ 7 (ke) hã vẽ. Kanhkã krẽm tóg kujẽg mũ. Kỹ Topẽ ĩn kã tá, nĩgja sĩnvĩ ẽn tá vẽnh vĩ tóg mẽ há ti. Kỹ tóg: “nén kar tóg kar kãn kỹ nỹ ha,” he mũ.
18 Kỹ ta tóg, kómkóm ke mũ. Tỹrỹr he tóg mũ gé. Kỹ ga vỹ ragra ke jagy han mũ gé. Ga tỹ ragra ke tỹ ge ve ja tũ ẽg tóg nỹtĩ. Ẽg tỹ ga mĩ mũn kỹ tóg, ragra ke tỹ ge han ja tũ nĩ.
19 Ẽmã mág ẽn tóg vẽnh kãpóv kỹ nỹ ha, vẽnh kãpóv tãgtũ. Kỹ ga kar mĩ ẽmã tóg kókén kỹ nỹtĩ nĩ. Topẽ pijé ẽmã tỹ Babilônia kã jatu ja nĩgtĩꞌ. Ẽmã ẽn ki ke ag to tóg jũ jagy han mũ, Topẽ ti. Hã kỹ tóg ag vóg kónãn jagy han mũ. Kỹ tóg ẽg tỹ vinho kron ri ke nĩ.
20 Kỹ goj vãso kar tóg tũ tĩ ha ke gé. Pãnónh kar tóg tũ tĩ gé.
21 Kỹ nãfy tóg vár mũ gé. Éhé tãvĩ ti nỹtĩ, nãfy ẽn ti. Ũn pir tóg quilo tỹ hẽn ri ke nĩ. Ẽprã tóg vár mũ. Kỹ ẽprã ke ag tóg Topẽ mỹ vĩ kónãn mũ gé sir, nãfy tag to, ti jagy tãvĩ nĩn kỹ.
