João tỹ ẽg tỹ nén venh ke mũ rá 18:1-24
18 Kar kỹ sóg Topẽ tỹ jẽnẽ jafã ũ vég mũ gé. Kanhkã tá tóg kãtére mũ. Tar pẽ tóg jẽ. Jẽngrẽ tóg jẽ gé. Kỹ ti jẽngrẽ tóg kurã han mũ, ẽprã.
2 Ẽn vỹ prẽr mũ. “!..Kókén kỹ ti nỹ ha..!“ he tóg mũ, prẽr kỹ. “!..Babilônia vỹ kókén kỹ nỹ, ẽmã mág ẽn ti..!“ he tóg. “!..Japo ag, vẽjagrẽ kórég ag vỹ tá ẽmã nỹtĩ ha..! Sẽsĩ kavéj kar, ũn kórég kar vỹ tá nỹtĩ ha, ẽmã jy ró ẽn kã ki..!
3 !..Ẽprã ke kar vỹ ẽmã ẽn jykre han ja nĩgte..! Kỹ tóg ag tỹ vinho kron mág ri ke ti ne..! ẽmã ẽn jykre ti..! Ẽprã pãꞌi ag vỹ tá vẽjykre han ja nĩgte..! Kỹ tóg ũn tỹtá kórég fi mré nỹ ri ke nĩ, ag jykre kórég ti..! Nén ũ vẽne he tĩ ag vỹ ẽmã ẽn tugrĩn riko nỹtĩ ja nĩgte..! “ he tóg, prẽr kỹ, Topẽ tỹ jẽnẽ jafã ti.
4 Kỹ sóg kanhkã tá vẽnh vĩ ũ mẽg mũ gé. Ũ tỹ Topẽ ki ge kỹ nỹtĩ ag mỹ tóg: “mũ jé ha,” he mũ. “Ẽmã tá kãpam nĩ, ke tũ nĩ mũ ra ãjag tóg ag mré Topẽ vĩ mranh ke mũ. Kỹ Topẽ tóg ag mré ãjag vóg kónãn ke mũ gé, ti tỹ ẽmã kókén ken kỹ,” he tóg.
5 “Topẽ vỹ ag jykre pãno ve kãn. Kỹ tóg kã jatu tũ nĩ. Ag tỹ Topẽ vĩ mranh vỹ e tãvĩ nỹtĩ. Kỹ ti pãnfĩ tóg kanhkã pétẽm mũ, ag tỹ Topẽ vĩ mranh pãnfĩ ti.
6 Ag tỹ ãjag mỹ nén han ja ẽn ri ke han nĩ, ag mỹ,” he tóg. “Ag tỹ ãjag mỹ ti kórég pir han kỹ ag mỹ ti kórég régre han nĩ, vẽnh kato. Ãjag mỹ ag tóg kron jafã kórég ven tĩ. Ag mỹ kron jafã kórég régre ven nĩ.
7 Sĩnvĩ ja ag nỹtĩ. Tỹ nén ũ mág ja ag nỹtĩ. Ag jagtar han nĩ. Ũ tỹ nén ũ mág tũ ag jagtar han nĩ gé, ag mré. “Ũn mág vỹ tỹ ẽg nỹtĩ,” he ag tóg mũ. “Ũ pijé ẽg jagtar han ke mũꞌ,” he ag tóg mũ.
8 Hã ra ag tóg vãhã jagtar ke mũ. Vẽsỹrénh jé ag tóg ke mũ. Kỹ tóg ag tỹ vẽnh kaga jagy han ri ke nĩ sir. Kurã pir ki ag tóg tag ve kãn ke mũ. Kỹ ag tóg pĩ ki kãgter ke mũ. Topẽ hã vỹ, ag vóg kónãn ke mũ, pãꞌi mág ti, “ he tóg, ũ tỹ kanhkã tá vĩ mũ ti, ũ tỹ Topẽ ki ge kỹ nỹtĩ ag mỹ.
9 Kỹ ẽprã pãꞌi ag vỹ, ẽmã nĩja venh ke mũ. Ẽmã ki ke ag mré tóg ag mỹ sér nĩ ja nĩgtĩ. Ag mré ag tóg nén ũ kar vigve ja nĩgtĩ. Kỹ tóg ag tỹ fag mré nỹ ri ke nĩ ja nĩ, ag tũ mág ẽn ti. Ẽmã pũr nĩja ve kãn jé ag tóg ke mũ ha. Kỹ ag tóg kygfỹnh ke mũ. Jagtar jé ag tóg ke mũ.
10 Kuvar há tá ag tóg nỹtĩnh ke mũ, ag kanẽ jur kỹ. Kỹ ag tóg jagtar kỹ: “jagy tãvĩ tóg tĩ,” henh ke mũ sir. “Éhé tãvĩn ja ti nĩ, ẽmã tỹ Babilônia tag ti. Tar pẽ ja ti nĩ. Hã ra ag tóg óra pir ki ti kókén kãn,” he jé ag tóg ke mũ, pãꞌi ag.
11 Kỹ nén ũ vẽne he tĩ ag vỹ jagtar kỹ kygfỹnh ke mũ gé. Tá ag tóg nén ũ tỹ hẽn ri ke ve ja nĩgtĩ,
12 ouro ti, prata ti, pó sĩnvĩ ti, pérola ti, kur tỹ seda ti, kur kusũg ti, ka kaja e ti, ka sĩnvĩ tỹ nén han mũ ti, ferro tỹ nén han mũ ti, ferro kusũg tỹ nén han mũ ti, pó tỹ mármore tỹ nén han mũ ti,
13 canela ti, vẽjẽn ger há ti, ka jẽnjo pũn kỹ ger há tỹ incenso ti, ka jẽnjo pũn kỹ ger há tỹ mirra ti, vẽnh mĩ tĩn jafã ti, vinho ti, azeite ti, farĩnh ti, trigo ti, monh ti, carneiro ti, kãvãru ti, karósa ti, ũn gré ag, ũn tỹtá fag mré hã. Tag kar tỹ ag tóg negocio hynhan mũ ja nĩgtĩ, hã ra tóg tũ tĩ ha.
14 Kỹ ag tóg jagtar kỹ tag tónh ke mũ, ha mẽ. “Nén kar ve ja ẽg tóg nĩgtĩ, ẽmã tá, kỹ tóg ẽg mỹ sér nĩ ja nĩgtĩ. Ẽg tũ mág ẽn tóg tũꞌ he kãn. Ve mãn ke tũ ẽg tóg nĩ ha, nén ũ kar ẽn ti,” he jé ag tóg ke mũ.
15 Kỹ ag tóg kuvar há tá nỹtĩnh mũ. Ẽmã ẽn tá negocio han to ag tóg vẽnh han ja nĩgtĩ, hã kỹ tóg ag mỹ e tĩ. Tãtá nỹtĩn kỹ ag tóg jũrũn ke mũ, ag tỹ ẽmã tá ke ag jagtar ve kỹ. Kygfỹ jé ag tóg ke mũ, vẽsỹrénh jé ag tóg ke mũ.
16 Kỹ ag tóg: “jagy tãvĩ tóg nĩ,” henh ke mũ. “Há tãvĩ ja ag nỹtĩ, ẽmã tag ki ke ja ag. Kur sĩnvĩ rĩnh ja ag tóg nĩgtĩ, kur kusũg, kur kusũg sá. Ouro rĩnh ja ag tóg nĩgtĩ, pó sĩnvĩ ke gé, pérola ke gé.
17 Óra pir ki ag tóg tũꞌ he kãn ja nĩ, ag tỹ nén ũ kar mré hã,” he jé ag tóg ke mũ gé, nén ũ vẽne he nỹtĩgtĩ ag.
18 Kỹ barco to pãꞌi ag vỹ nỹtĩnh ke mũ gé, barco ki rĩr tĩ kar ag, ũ tỹ goj kri rãnhrãj mũ kar ag ke gé. Tãtá nỹtĩ kỹ ag tóg ẽmã nĩja ẽn ve kỹ prẽnprẽr ke mũ sir. “Ẽmã ẽn ri ke ve mãn ke tũ ẽg tóg nĩ ha,” he jé ag tóg ke mũ.
19 Kỹ ag tóg ga funfur tỹ vẽnh kri vãm ke mũ sir, ag mỹ e tĩn kỹ. Kygfỹ jé ag tóg ke mũ, vẽsỹrénh jé ag tóg ke mũ. “Jagy tãvĩ tóg tĩ,” he jé ag tóg ke mũ. “Há tãvĩ ja ag nỹtĩ, ẽmã tag ki ke ja ag. Vẽnh kar vỹ ag tũ mãn kỹ vẽnh hynhan ja nĩgtĩ,” he jé ag tóg ke mũ gé, goj kri mũgtĩ ag.
20 “Kanhkã tá nỹtĩ karꞌ. Mỹ sér nỹtĩm nĩ. Topẽ ki ge kỹ nỹtĩ karꞌ, apóstolo karꞌ, Topẽ vĩ tó tĩ karꞌ, mỹ sér nỹtĩm nĩ. Tũꞌ he kãn ag huri, ẽmã ẽn tá ke kar ag. Topẽ vỹ hur ag vóg kónãn, ag tỹ ãjag vóg kónãn ja tugrĩn.“
21 Kỹ Topẽ tỹ jẽnẽ jafã tar ũ tóg pó mág vãg mũ. Pó tỹ kra ri ke ti nĩ. Kỹ tóg goj nig ki fón mũ, jũ kỹ, kỹ tóg: “isỹ pó fón mũ tag ri ke ti nĩnh mũ, ẽmã tỹ Babilônia kókén ti,” he mũ. “Kókén kãn kỹ tóg nĩ. Ũ tóg ve mãn ke tũ nĩ ha, ẽmã ti.
22 Kã ki ag tóg harpa kyn mãn ke tũ nĩ ha. Tỹnh mãn ke tũ ag nĩ ha. Vãn tỹ vãkyr ẽn kyn mãn ke tũ ag nĩ ha, trombeta ti ke gé. Vãkyr mẽ mãn ke tũ ẽg nĩ ha, ẽmã tỹ Babilônia tá. Ũ tóg tá rãnhrãj mãn ke tũ nĩ ha. Ũ tóg tá nĩ mãn ke tũ nĩ ha.
23 Ũ tóg tá néj grug mãn ke tũ nĩ ha. Ũ tóg tá vẽnh prũg to fénhta han mãn ke tũ nĩ gé. Há tãvĩ ja ag nỹtĩ, tá nén ũ kar vẽne he tĩ ẽn ag. Kỹ vẽnh kar vỹ ag vĩ jẽmẽ ja nĩgtĩ. Povo kar krĩn kónãn ja ag tóg nĩgtĩ. Kujá tỹ ẽg mỹ ón tĩ ẽn ri ke han ja ag tóg nĩgtĩ.
24 Topẽ vĩ tó tĩ ag kãgtén ja ag tóg nĩgtĩ, ẽmã ẽn tá ke ag, Topẽ ki ge kỹ nỹtĩ ag ke gé. Ẽn hã tá tóg vẽnh ven ja nĩ, ag tỹ ũn kãgtén mũ kar kyvénh ti. Hã kỹ ag tóg ag kar kyvénh kajãm kãn ke mũ,” he tóg mũ, Topẽ tỹ jẽnẽ jafã tar ẽn ti.
