João tỹ ẽg tỹ nén venh ke mũ rá 19:1-21
19 Kỹ sóg kanhkã tá nén ũ mẽg mũ gé sir. Tỹ tóg ũ tỹ hẽn ri ke ag jãn mẽ nĩ. Jãn kỹ ag tóg: “Topẽ mỹ vĩ há han nĩ,” he mũ. “Topẽ ne ẽg krenkren han ki kanhró nĩꞌ. Ti hã ne tỹ ũn mág nĩꞌ. Ti hã ne tar jẽꞌ.
2 Ti tỹ nén han mũ vỹ kuryj kar nỹ. Ũn tỹtá kórég ẽn fi vóg kónãn tóg huri. Ẽprã ke kar kókén ja fi tóg nĩ, fi jykre pãno tỹ. Topẽ vỹ fi vóg kónãn, fi tỹ ti rãnhrãj han tĩ ag kãgtén ja nĩn kỹ,” he ag tóg, kanhkã tãn ag.
3 Kỹ ag tóg jãn mãn kỹ: “Topẽ mỹ vĩ há han nĩ,” he mũ gé. “Ẽmã ẽn pũr nĩja vỹ kanhkã ra tãpry mũ. Tũꞌ henh ke tũ ti nĩ, nĩja ẽn,” he ag tóg mũ gé.
4 Kỹ kófa tỹ 24 (ke) ẽn ag tóg mũg ke kãn mũ, nén nẽ tỹ 4 (ke) ẽn ag mré hã. Topẽ mỹ ag tóg: “Topẽ vỹ tỹ ã nĩ,” he mũ, ũ tỹ nĩgja sĩnvĩ kri nĩ ẽn mỹ. Kỹ ag tóg: “hã vẽ,” he mũ gé. “Topẽ mỹ vĩ há han nĩ,” he ag tóg mũ, jamã há ra.
Cordeiro vẽnh prũg
5 Kỹ nĩgja sĩnvĩ ẽn tá vẽnh vĩ tóg mẽ há tĩ gé. “Ũ tỹ Topẽ mỹ rãnhrãj tĩꞌ, ũ tỹ Topẽ kamẽg tĩꞌ, ũn mágꞌ, ũn kãsirꞌ,” he tóg. “Topẽ mỹ vĩ há han, ãjag kar,” he tóg, vẽnh vĩ ẽn ti.
6 Kỹ sóg ũ tỹ hẽn ri ke ag jãn mẽg mũ gé. Tỹ tóg sa krog vĩ mẽ tĩ. Tỹ tóg ta tỹ tỹrỹr he mẽ tĩ gé. Jãn kỹ ag tóg tag tó mũ, ha mẽ. “Topẽ mỹ vĩ há han nĩ,” he ag tóg. “Ũ tỹ nén ũ kar han ki kanhró nĩ ẽn tóg tỹ pãꞌi mág pẽ jẽ, ẽg pãꞌi mág ti, Topẽ ti.
7 Kỹ tóg ẽg mỹ sér tãvĩ tĩ. Vĩ sér han jé ẽg tóg ke mũ ha. “Tỹ ti ũn mág pẽ jẽ,” he jé ẽg tóg ke mũ gé. “Cordeiro tỹ vãhã prũg ke nẽ ha. Ti prũnh ke fi vỹ vẽnh kãn huri.
8 Fi kur kupri ẽn tu kỹ fi tóg jẽ nĩ, fi kur jẽngrẽ ẽn,” he ag tóg, ũn e ag, jãnjãn kỹ. Ũ tỹ Topẽ ki ge kỹ nỹtĩ kar ag to ken hã vẽ, hã vỹ: cordeiro prũnh ke, he mũ.
9 Kỹ Topẽ tỹ jẽnẽ jafã tóg inh mỹ: “inh vĩ tag rán nĩ,” he mũ. “Ũ tỹ hẽn ri ke ag tóg cordeiro prũg to fénhta konh ke mũ. Kỹ Topẽ vỹ ag kar ve há han mũ,” he tóg. Kỹ tóg: “Topẽ tỹ tón hã vẽ,” he mũ gé. “Hã ra Topẽ tóg ón vãnh nĩgtĩ,” he tóg, Topẽ tỹ jẽnẽ jafã ti.
10 Kỹ sóg ti krẽm mũg ke mũ, sỹ ti mỹ: “Topẽ vỹ tỹ ã nĩ,” he jé. Hã ra tóg inh mỹ: “ke tũg ra,” he mũ. “Topẽ mỹ rãnhrãj tĩ vỹ tỹ inh nĩ, ã ri ke, ã kanhkã ag ri ke.Ũ tỹ Jesus tỹ ki hã tó mũ ki króm mũ ẽn ag kar ri ke sóg nĩ,” he tóg. “Topẽ hã mỹ: Topẽ vỹ tỹ ã nĩ, hem nĩ,” he tóg inh mỹ, Topẽ tỹ jẽnẽ jafã ẽn ti.
Topẽ vĩ tó tĩ ag vỹ Jesus tỹ ki hã tó mũ ẽn hã kãmén tĩ.
Ũ tỹ kãvãru kupri kri nĩ
11 Kỹ sóg kanhkã nón kỹ nỹ vég mũ. Kãvãru kupri vỹ tá jẽ nĩ. Ũ tỹ ti kri nĩ jijin hã vỹ: “ũn ón vãnh, ũ tỹ nén ũ há to krónh ke vãnh,” he mũ. Ti hã vỹ jykre kuryj nĩ. Kỹ tóg ki hã tó tĩ gé. Nén ũ há hã to tóg vãsãn ti gé.
12 Ti kanẽ vỹ tỹ pĩ gru ve nĩ. Ti krĩ tógfĩ vỹ e nỹtĩ. Ti kri ti jiji tóg rán kỹ nĩ. Hã ra ũ pijé ti jiji ki kanhró nỹtĩꞌ. Ti hã vỹ ti pir mỹ ti jiji ki kanhró nĩꞌ.
13 Ti kur vỹ kyvénh nĩ. Ti to ag tóg: “Topẽ vĩ,” he tĩ.
14 Kanhkã tá soldado ag tóg ti nón kãmũ mũ. Kãvãru kupri kri ag tóg kãmũ mũ, kanhkã tãn ag, ti soldado ag. Kur kupri rĩnh kỹ ag tóg kãmũ mũ.
15 Ũ tỹ ag jo tĩ mũ ẽn jẽnkã tá rógro jã régre tóg kãkutẽ mũ. Rógro tag tỹ tóg povo kar ag tỹ hẽn ri kenh ke mũ. Tỹ ag kri jẽ kỹ tóg vẽjykre tar han ke mũ. Uva jẽgmĩ jafã tá tóg jẽgmĩnh ke mũ, uva ti, hã vỹ: Topẽ tỹ vẽnh kar to jũ jagy han mũ, he mũ.
16 Ti kur ki tag tóg rán kỹ nĩ, ha mẽ. “Pãꞌi kar ag kri pãꞌi,” he tóg, vẽnh rán ki. “Ũn mág kar ag kri ke,” he tóg mũ gé. Ti kre ki tóg rán kỹ nĩ gé.
17 Kỹ sóg Topẽ tỹ jẽnẽ jafã ũ vég mũ gé. Rã kri tóg jẽ nĩ. Kỹ tóg sẽsĩ kar jé prẽr mũ. Jamã há ra tóg ag mỹ: “!..kuneg..!“ he mũ. “!..Vẽnh mãn kãmũ jeg..!“ he tóg. “!..Topẽ fénhta konh kãmũ jeg..!
18 Pãꞌi kãgter konh kãmũ jeg..! Soldado to pãꞌi ag, soldado ag, kãvãru ag, ũ tỹ kãvãru kri mũgtĩ ag, ũ tỹ tỹ camarada nỹtĩ ag, ag patrão ag, ũn mág ag, ũn kãsir ag, ẽprã ke kar ag kãgter konh kãmũ jeg..!“ he tóg.
19 Kỹ sóg goj kã tá mĩg ẽn ve mãn mũ gé, ẽprã pãꞌi kar ag ke gé, ag soldado ag mré hã. Vẽnh mãn kỹ ag tóg nỹtĩ, ag tỹ ũ tỹ kãvãru kupri kri nĩ ẽn kato vãsãnsãn jé, ag tỹ ti krẽm ke ag kato vãsãnsãn mág han jé.
20 Kỹ ag tóg mĩg ẽn ség mũ, ũ tỹ ón kỹ Topẽ vĩ tó tĩ ẽn ag mré, ũ tỹ mĩg rĩnve nén ve vãnh tỹ hẽn ri ke hynhan ja ẽn ti. Ti tỹ milagre hynhan tugrĩn ag tóg ti vĩ kri nĩm ja nĩgtĩ, ũ tỹ ti rá tỹ ránrán kỹ nỹtĩ kar ag, ũ tỹ ti kãgrá to: “Topẽ vẽ,” he mũ kar ag. Kỹ ũ tỹ mĩg ẽn ség mũ ag tóg pĩ gru fir ki ti fón mũ, pĩ mág pẽ ki, ũ tỹ ón kỹ Topẽ vĩ tó tĩ ẽn ag mré. Ag rĩnrĩr ra ag tóg ki ag vãm mũ, pó tỹ enxofre pũr nĩja ri ke ẽn ki.
21 Ag soldado ag kãgtén ag tóg mũ gé sir, rógro tỹ, rógro tỹ ũ tỹ kãvãru kupri kri nĩ ẽn jẽnkã tá kãkutẽ mũ ẽn tỹ. Kỹ sẽsĩ kar ag tóg vẽnh fãn mũ sir, ũn kãgter mũ ag nĩ kon kỹ.
