João tỹ ẽg tỹ nén venh ke mũ rá 9:1-21
9 Kỹ Topẽ tỹ jẽgnẽ jafã tỹ 7 (ke) ẽn ag kã ũ tóg trombeta kyn mũ gé. Trombeta tỹ 5 (ke) vẽ sir. Kỹ sóg krĩg vég mũ. Kanhkã tá tóg kãtére ja nĩ, ẽprã. Kỹ ag tóg ti mỹ nũgme nón jafã fig mũ, chave ti, krĩg ẽn mỹ.
2 Kỹ tóg nón mũ sir, nũgme ti. Hã ra nĩja tóg tá tũm tũm ke mũ, nĩja tar pẽ. Kỹ rã tóg kutyꞌ he mũ. Ga kri tóg kutyꞌ he kãn mũ.
3 Nĩja ẽn kã tá tóg vãhã kãpa mũ, tỹ ópã tỹ hẽn ri ke nỹtĩ ve ti. Hã ra tóg pỹn kakrã tar ri ke nỹtĩ, tỹ ópã nỹtĩ ve ẽn ti.
4 Ti pijé re ko tĩꞌ. Ti pijé ka féj ko tĩꞌ. Ti pijé ẽkré ko tĩ géꞌ. Ti tỹ ẽprã ke ag mỹ vẽnh kaga han kãtĩg vẽ. Ẽprã ke ũ ag tóg tỹ Topẽ tỹ rágrá tũ nỹtĩ, ag kakã ki. Ẽn ag tỹ ag mỹ vẽnh kaga han hã jé ag tóg junjun mũ, tỹ ópã nỹtĩ ve ẽn ag.
5 Ag pijé ẽprã ke ag kãgtén mũ hã raꞌ. Kysã tỹ 5 (ke) ki ag tóg ẽprã ke ag mỹ vẽnh kaga nĩm mũ. Ag tỹ ag vóg kỹ tóg pỹn kakrã tỹ ẽg tugtãn ri ke nĩ, ti kaga ti.
6 Kỹ ẽprã ke ag tóg kãgter sór mũ, ti kaga jagy to. Hã ra ag tóg kãgter ke tũ nĩ, kysã tỹ 5 (ke) ẽn ki. Ag kãgter sór mũ ra ag tóg kãgter ke tũ pẽ nĩ.
7 Ópã ẽn tóg tỹ kãvãru ve nỹtĩ. Kãvãru tỹ vẽnh génh mũnh ke ri ke tóg nỹtĩ. Ouro tỹ ag tóg krĩ tógfĩ nỹtĩ. Ag kakã vỹ ẽg kakã ri ke nĩ.
8 Ag gãnh vỹ fag gãnh téj ri ke nĩ gé. Ag jã vỹ mĩg jã ri ke nĩ.
9 Ag fár tóg tỹ ferro tỹ camisa ri ke nĩ. Ag fẽr tỹ rãnhrãnh he tóg mẽ há tĩ. Kỹ tóg kãvãru tỹ hẽn ri ke tỹ karósa tỹ hẽn ri ke nỹgnỹn ri ke nĩ, ag tỹ vẽnh génh mũnh ken kỹ.
10 Ag my kã tóg jẽ, ag préj ti, pỹn kakrã préj ri ke ti. Ag my tỹ ag tóg ẽprã ke ag vóg kónãn tĩ, kysã tỹ 5 (ke) ki.
11 Ũ tỹ nũgme ki rĩr tĩ ẽn, ũ tỹ Topẽ tỹ jẽnẽ jafã ri ke nĩ ẽn vỹ tỹ ag pãꞌi mág nĩ, ópã ẽn ag pãꞌi mág. Hebreu ag vĩ ki ti jiji vỹ: Abadom, he mũ, kỹ tóg Grego ag vĩ ki: Apolião, he mũ, hã vỹ: nén ũ kar kókég tĩ, he mũ, ẽg vĩ ki.
12 Nén jagy ve ve inh huri. Sỹ nén jagy régre venh ke nẽ ha.
13 Kỹ Topẽ tỹ jẽgnẽ jafã tỹ 7 (ke) ẽn ag kã ũ tóg trombeta kyn mũ gé. Trombeta tỹ 6 (ke) vẽ sir. Kỹ sóg vẽnh vĩ mẽg mũ. Topẽ mỹ nén ũ pũn jafã tỹ ouro tá tóg mẽ há tĩ, vẽnh vĩ ti, mesa ẽn péno tỹ 4 (ke) ki.
14 Vẽnh vĩ ẽn tóg ũ tỹ kyn mũ ẽn mỹ: “Topẽ tỹ jẽgnẽ jafã tỹ 4 (ke) ẽn kygvãn tĩg,” he mũ. “Ũ tỹ goj mág tỹ Eufrates tá sigse kỹ nỹtĩ ẽn ag kygvãn tĩg,” he tóg.
15 Kỹ tóg ũ tỹ 4 (ke) ẽn ag kygvãn tĩ mũ. Tá ag tóg jãvãnh nỹtĩ ja nĩgtĩ, ag tỹ ẽprã ke tỹ hẽn ri ke ag kãgtén jé. Topẽ vỹ ag mỹ ag tỹ kurã ki ag kãgtén ke mũ ẽn nĩm ja nĩ. Ẽprã ke vẽnh kãpóv tãgtũ ag kã ũn pir ag kãgtén kãn jé ag tóg ke mũ, Topẽ tỹ jẽgnẽ jafã tỹ 4 (ke) ẽn ag.
16 Ag krẽm soldado ag número mẽ inh, ũ tỹ kãvãru kri mũgtĩ ag. 200 mil (ke) ag nỹtĩ, ag krẽm soldado ag.
17 Kỹ sóg ag vég mũ, soldado tỹ kãvãru kri mũ mũ ag. Ferro tỹ ag camisa nỹtĩ. Kỹ ũ ag tóg kusũg nỹtĩ, pĩ kusũg ri ke. Ũ ag tóg tánh nỹtĩ. Ũ ag tóg mãréro nỹtĩ. Kãvãru krĩ vỹ mĩg krĩ ri ke nỹtĩ. Ag jẽnkã tá pĩ gru tóg kãkutẽ mũ, nĩja ke gé.
18 Tag tỹ ag tóg ẽprã ke ag kãgtén ke mũ, pĩ tỹ, nĩja tỹ, kãvãru ag.
19 Nén tỹ kãvãru jẽnkã tá kãkutẽ mũ ẽn vỹ ẽprã ke ag kãgtén ke mũ. Kãvãru ẽn my vỹ tóg tỹ pỹn ve nĩ, pỹn krĩ. Ẽn tỹ ag tóg ẽprã ke ag kókén ke mũ gé.
20 Ẽprã ke ũ ag tóg hã ra krenkren ke mũ ver. Ag kãgtén kãn ke tũ ag tóg nĩ ver. Kỹ ũn krenkren mũ ag pijé Nén-Kórég ag tovãnh mũꞌ. Vẽnh kãgrá tovãnh tũ ag nỹtĩ, pó tỹ vẽnh kãgrá ẽn, ka tỹ vẽnh kãgrá ẽn ke gé. Ver ag tóg tag kar to: “Topẽ vỹ tỹ ti nĩ,” he tĩ gé. Ag tỹ vẽsóg ki vẽnh kãgrá hynhan mũ ra tóg ag mỹ tỹ Topẽ nĩ ve nĩ, ti kanẽ tũ ra, ti nĩgrẽg nor tũ ra, ti tĩg vãnh hã ra.
21 Ag pijé ag jykre tovãnh sór mũꞌ, ẽprã ke krenkren mũ ẽn ag. Jagnẽ kãgtén ag tóg mũgtĩ. Kujá jykre han ag tóg mũgtĩ. Ag prũ tũ fag mré ag tóg nỹgnỹ mũgtĩ. Fag mén tũ ag mré fag tóg nỹgnỹ mũgtĩ gé. Jagnẽ tỹ nén ũ pigju ag tóg mũgtĩ gé, ẽprã ke ag.
