Hebreu ag mỹ carta 5:1-14
5 Ẽprã ke tỹ Topẽ tũ to pãꞌi mág jykre vỹ ge nỹgtĩ, ha mẽ. Ti mré ke ag jagfy tóg vĩ tĩ, Topẽ mré. Kỹ tóg ag jagfy Topẽ mỹ nén ũ pũn tĩ gé. Kỹ tóg ag mẽg tãnh kỹ pũn tĩ gé, ag tỹ Topẽ vĩ mranh ja tugrĩn.
2 Hã ra tóg tỹ ẽprã ke nĩ gé, ag mré. Ag krój ri ke tóg nĩ gé. Hã kỹ tóg ag krój nỹtĩ ra ag jagãgtãn há han tĩ, ũ tỹ Topẽ vĩ mranh sór tũ ra mranh mũ ẽn ag.
3 Mranh tóg tĩ gé, Topẽ tũ to pãꞌi mág ẽn ti. Hã kỹ tóg ti tỹ mranh mũ ẽn to Topẽ mỹ tãnh kỹ pũn tĩ gé, ti mré ke ag tũ ẽn mré.
4 Hã ra tóg vẽso: “inh hỹn tỹ Topẽ tũ to pãꞌi mág nĩnh mũ,” henh ke tũ pẽ nĩ. Topẽ hã ne ũ to: “tag vỹ tỹ isũ ki rĩr to pãꞌi nĩnh mũ,” he tĩꞌ, ti tỹ vãsỹ Arão kuprẽg vén ẽn ri ke.
5 Hã kỹ Cristo vỹ vẽsóg ki tag to jykrén ja tũ nĩ gé. Ti pijé vẽsỹ pãꞌi han ja nĩgtĩꞌ. Vẽsỹ Topẽ tũ to pãꞌi mág han sór ja tũ tóg nĩgtĩꞌ. Topẽ hã ne Jesus mỹ: “inh kósin vỹ tỹ ã nĩ,” he ja nĩꞌ. “Ũri sóg ã mỹ: tỹ inh ã panh nĩ, he mũ,” he ja ti nĩ.
6 Kỹ tag tóg rán kỹ nĩ gé, Topẽ vĩ tỹ rán kỹ nĩ ki, ha mẽ: “isũ ki rĩr jé ã tóg ke mũ. Tũꞌ henh ke tũ ti nĩ, ã tỹ isũ ki rĩr nĩ ti, Melquisedeque tỹ isũ ki rĩr mũ ẽn ri ke,” he ja ti nĩ gé, Cristo mỹ, Topẽ ti.
7 Jesus vỹ, ti tỹ ga mĩ tĩg kỹ jagtar nĩn kỹ Topẽ mỹ to vĩꞌ, to vĩꞌ he ja nĩgtĩ, ti tỹ ti kren han jé, ti ter tũ nĩ jé. Kỹ tóg fỹ gé, Topẽ mré vẽmén kỹ. Vẽsỹrénh jagy han tóg. Kỹ Topẽ vỹ ti vĩ jẽmẽ ja nĩ, ti tỹ ti mỹ to vĩn kỹ.
8 Topẽ kósin vỹ tỹ ti nĩ, hã ra tóg ti jagtar tugrĩn Topẽ tỹ nén tó mũ ki kanhrãn kãn ja nĩ, ti tỹ Topẽ vĩ hã han jé.
9 Ti tỹ vẽnh kanhrãn kãn kỹ tóg ẽg kren han ki kanhró nĩ gé sir. Ẽg jagfy tóg ter ja nĩ, kỹ tóg ẽg kren han mũ, ẽg tỹ ti vĩ ki króm kỹ.
10 Topẽ vỹ ti mỹ: “inh mỹ isũ ag ki rĩrm nĩ. To pãꞌi mág vỹ tỹ ã nĩ, Melquisedeque ẽn ri ke,” he ja nĩ. Hã kỹ tóg tỹ pãꞌi nĩ, Jesus ti.
Ẽg tỹ ti to krónh kenh ke tũ
11 Sỹ ãjag mỹ tag kãmén kãn sór mũ ra tóg jagy tĩ. Kỹ ãjag tóg mẽ há han tũ nĩgtĩ gé. Ãjag pijé krĩ há nỹtĩ verꞌ.
12 Ãjag tỹ ũ ag kanhrãn ke vẽ vẽ, ãjag tỹ vãsỹ Topẽ vĩ mẽ ja nỹtĩn kỹ. Hã ra ãjag tóg ver ki kagtĩg nỹtĩ. Ãjag kã ũ tỹ ãjag mỹ Jesus kãmén vén ja ẽn tó mãn kỹ tóg há nỹnh mũ vẽ.
13 Gĩr kãsir ri ke ãjag nỹtĩ, ãjag tỹ Jesus kãme ẽn ki kanhrãn kãn tũ nĩn kỹ ver. Leite hã kron ag tóg tĩ, ag tỹ ver kãsir nỹtĩn kỹ.
14 Ẽg tỹ to jykrén há han kỹ ẽg tóg ũn sanh há ri ke nỹtĩ. “Tag vỹ há nĩ, tag vỹ há tũ nĩ. Tag vỹ kuryj nĩ, jãvo tag vỹ kygnẽ kỹ nĩ,” he jé ẽg tóg ke mũ, ẽg tỹ ki kanhrãn há han kỹ.
