Hebreu ag mỹ carta 7:1-28
7 Melquisedeque ẽn vỹ tỹ pãꞌi mág nĩ ja nĩgtĩ, ẽmã tỹ Salém kri. Kỹ tóg Topẽ tũ ki rĩr nĩ ja nĩgtĩ gé, ũ tỹ vẽnh kar kri ke nĩ ẽn tũ ki. Abraão vỹ pãꞌi tỹ 4 (ke) ẽn mré vẽnh génh han ja nĩ. Ti tỹ ag kãgtén kar kỹ Melquisedeque ẽn vỹ, ti kato tẽ, kỹ tóg ti mỹ: “Topẽ vỹ ã ve há han. Kỹ tóg ã ve há han mãn ke mũ gé,” he mũ.
2 Kỹ Abraão vỹ ti mỹ dízimo ẽn nĩm mũ sir Ti tũ tỹ 10 (ke) kar ki tóg ũn pir nĩm mũ sir, Melquisedeque mỹ, ti tỹ ũn kato tẽ mũ ẽn ag tũ mãn ja tỹ. Ti jiji to ken hã vẽ, hã vỹ: vẽjykre kuryj to pãꞌi, he mũ, hã vỹ: Melquisedeque, he mũ. Kỹ tóg tỹ, ẽmã tỹ Salém to pãꞌi nĩ, hã vỹ: ũn krĩ kuprã ẽn ag pãꞌi, he mũ.
3 Panh tũ ti nĩ, mỹnh tũ ke gé, jógjóg ve tũ ti nĩ gé. Ũ ki mur ja tũ ti nĩ, kỹ tóg ter ja tũ nĩ gé. Topẽ kósin ri ke ja ti nĩ. Topẽ tũ ki rĩr kỹ tóg nĩ nĩ, ti kurã vỹ krỹg ja tũ nĩ, Melquisedeque kurã ti.
4 Pãꞌi mág pẽ vẽ, hã kỹ Abraão vỹ ti mỹ ti tũ tỹ dízimo nĩm ja nĩ gé. Hã ki ẽg tóg ki kanhró nỹtĩ, ti tỹ Abraão kãfór nĩ ti, Melquisedeque ti.
5 Ũ tỹ Israel ag kã mĩ dízimo mãg tĩ ag vỹ tỹ Levi krẽ nỹtĩ, ũ tỹ Topẽ tũ ki rĩr tĩ ẽn ag. Ag mré ke ag ki ag tóg dízimo ẽn mãg tĩ, ag kar tỹ tỹ Abraão krẽꞌkrẽ nỹtĩ ra.
6 Hã ra Melquisedeque pijé tỹ Abraão mré ke nĩ ja nĩgtĩꞌ. Ge ra Abraão tóg ti mỹ dízimo ẽn nĩm ja nĩ. Kỹ tóg ti mỹ: “Topẽ jé ã ve há han,” he mũ gé, Topẽ tỹ Abraão mré vẽmén kỹ ti mỹ: “ã kófa ra ã kósin ke mũ,” he kar kỹ.
7 Kỹ tóg Abraão kãfór nĩ, Melquisedeque ti, ti tỹ ti mỹ: “Topẽ jé ã ve há han,” hen kỹ. Ti kri ke vỹ tỹ ti jẽ.
8 Levi krẽꞌkrẽ ẽn ag vỹ tỹ ẽprã ke nỹtĩ gé, ũ tỹ ag mré ke ki dízimo mãg tĩ ẽn ag. Hã ra Melquisedeque vỹ ter ja tũ nĩ nẽji, hã kỹ tóg rán kỹ nĩ, Topẽ vĩ ki. Ũn ter ke tũ ẽn vỹ Abraão ki dízimo mãn ja nĩ, hã vỹ: Melquisedeque, he mũ.
9 Kỹ, Abraão tỹ ti mỹ dízimo nĩm ẽn kã tóg ti krẽꞌkrẽ tỹ Levi jagfy ti mỹ nĩm ja nĩ gé. Hã kỹ ag tóg ag mré ke ag ki dízimo végꞌ he ja nĩgtĩ gé sir.
10 Abraão tỹ ti mỹ dízimo nĩm ẽn kã Levi vỹ, mur ja tũ nĩ ver, hã kỹ ti jógjóg ve tỹ Abraão vỹ ti jagfy dízimo nĩm ja nĩ. Nĩm kar kỹ tóg kejẽn Levi vovo han mũ sir, Melquisedeque tỹ ti mré vẽmén kar kỹ.
11 Topẽ tỹ Levi krẽꞌkrẽ ag mỹ: “isũ ki rĩrm nĩ,” he mũ ẽn kã tóg ag mỹ tag to vẽjykre nĩm ja nĩgtĩ gé. Ag hã tỹ ki rĩr há han ke vẽ vẽ. Hã ra ag tóg ki rĩr kãn jã tũ nĩ. Hã kỹ Topẽ tóg ũ tỹ ki rĩr ke mũ ũ jẽnẽ ja nĩ, ũ tỹ Melquisedeque ri ke ẽn, hã vỹ: Jesus Cristo, he mũ. Ag tỹ ki rĩr há han ja nĩ ra Topẽ hỹn ti jẽnẽnh ke tũ nĩ vẽ.
12 Kỹ, Jesus tỹ Topẽ tũ ki rĩr kỹ Topẽ vỹ, ti mỹ tag to vẽjykre tãg han ja nĩ gé.
13 7:13-14 Hã kỹ tóg ki rĩr nĩ nĩ sir. Ti pijé tỹ, Levi krẽꞌkrẽ ag kã ũ nĩꞌ. Judá krẽꞌkrẽ ag kã ũ vỹ tỹ ti nĩ. Ge ra tóg Topẽ tũ ki rĩr mũ. Judá krẽꞌkrẽ ũ tóg ki rĩr ke tũ nĩ vẽ. Kỹ Moisés tóg, ag to nén ũ tó ja tũ nĩ gé, ti tỹ Topẽ tũ ki rĩr ke tag rán kỹ. Hã ra Jesus tóg Topẽ tũ ag ki rĩr jẽ. Topẽ tỹ ti mỹ vẽjykre tãg nĩm hã vẽ.
Jesus tỹ Melquisedeque ri ke nĩ
14 Ha vé 7:13
15 Levi krẽꞌkrẽ ag vỹ, Topẽ rãnhrãj han kãn ki kagtĩg ja nỹtĩgtĩ. Hã kỹ Topẽ tóg, ti tũ ki rĩr ke mũ ũ jé prẽr, ũ tỹ Melquisedeque ri ke ẽn, hã vỹ: ẽg Senhor tỹ Jesus, he mũ.
16 Kỹ ti pijé ẽprã ke ag jykre ri ke han kỹ Topẽ tũ ki rĩr mũꞌ. Kỹ ẽprã ke ũ vỹ: “ha ki rĩr,” he ja tũ nĩ gé. Topẽ tỹ ti mỹ nén tó jan hã vẽ. Ter mãn ke tũ ti nĩ ha, hã kỹ tóg ki rĩr há han mũ ha, Jesus ti.
17 Ti to tag tóg rán kỹ nĩ, Topẽ vĩ tỹ rán kỹ nĩ ki, ha mẽ: “isũ ki rĩr jé ã tóg ke mũ. Tũꞌ henh ke tũ pẽ ti nĩ, ã tỹ isũ ki rĩr nĩ ti, Melquisedeque tỹ isũ ki rĩr nĩ ẽn ri ke,” he ja ti nĩ.
18 Tag tó kỹ tóg, Moisés jykre ẽn tỹ tũꞌ he mũ, ti krój nĩn kỹ, ti tỹ ẽg há han mãn ki kagtĩg nĩn kỹ.
19 Hỹ, Moisés jykre ẽn vỹ ẽg tar han ki kagtĩg ja nĩgtĩ. Kỹ ẽg ti jykre han sór mũ ra kanhkã tá jun ke tũ nĩ. Vãhã Topẽ tóg, ẽg mỹ vẽjykre tãg nĩm ja nĩ, hã vỹ: Jesus jykre, he mũ. Kỹ ẽg tóg Jesus hã tugrĩn Topẽ nĩgja tá junjun ke mũ.
20 Moisés tỹ Levi krẽꞌkrẽ ag mỹ: “Topẽ tũ ki rĩrm nĩ,” he mũ ra tóg: “tũꞌ henh ke tũ ti nĩ, ãjag tỹ ki rĩr ti,” he ja tũ nĩ.
21 Hã ra Topẽ tóg, Jesus hã mỹ: “isũ ag ki rĩr jé ã tóg ke mũ. Tũꞌ henh ke tũ ti nĩ, ã tỹ ag ki rĩr nĩ ẽn ti,” he ja nĩ. “Sỹ ke há vẽ,“ he ja tóg nĩ, ẽg jóg mág ti, ti kósin hã mỹ.
22 Hã kỹ Jesus jykre vỹ Moisés jykre kãfór nĩ, ti tỹ ẽg mỹ vẽjykre tãg nĩm mũ tag.
23 Moisés jykre ẽn ki Topẽ tũ ki rĩr tĩ ag vỹ, e ja nỹtĩgtĩ. Ag kã ũ ter kỹ ag tóg jagnẽ jẽgja kã ũ fẽgꞌ he ja nĩgtĩ, ti tỹ Topẽ mỹ ti tũ ki rĩr jé.
24 Hã ra Jesus vỹ, ter mãn ke tũ nĩ inhhã. Topẽ tũ ki rĩr tóg nĩ nĩ, ũ tóg ti jẽgja kã jẽnh ke tũ nĩ.
25 Hã kỹ tóg, ti tỹ ũn ki rĩr nĩ ẽn ag krenkren han tĩ, ũ tỹ ti tugrĩn Topẽ jamã tá junjun ke mũ ẽn ag kar. Rĩr tóg nĩ nĩ, kỹ tóg ẽg jagfy Topẽ mré vẽmén tĩ. Kurã krỹg ja tũ ti nĩ.
26 Ẽg to ti há nĩ, ti tỹ ẽg jagfy Topẽ tũ ki rĩr nĩn kỹ. Topẽ kósin vỹ tỹ ti nĩ. Kygnẽ ja tũ pẽ ti nĩ. Nén ũ kórég venh ke tũ ẽg nĩ, ti ki. Topẽ vĩ mranh tĩ ag mré ke tũ vẽ. Kỹ tóg tỹ, kanhkã tãn kar ag kri ke nĩ gé sir, ũri.
27 Ẽprã Topẽ tũ ki rĩr tĩ ag vỹ, ag tỹ Topẽ vĩ mranh ja tugrĩn, ti mỹ nén ũ pũn vén tĩ. Kar kỹ ag tóg ag mré ke ag jagfy Topẽ mỹ nén ũ pũn tĩ gé sir. Jesus vỹ Topẽ vĩ mranh ja tũ nĩ inhhã. Hã kỹ tóg, ti tỹ vẽnh fẽg pir ẽn ki ẽg tỹ Topẽ vĩ mranh e ja ẽn tỹ tũꞌ he kãn.
28 Moisés tỹ: “Topẽ tũ ki rĩr,” hen kỹ tóg ũ tỹ kygnẽ mág kỹ nỹtĩ ag mỹ ke ja nĩgtĩ, ag tỹ tỹ ẽprã ke nỹtĩn kỹ. Hã ra Topẽ tóg vẽjykre tãg han kỹ ti kósin mỹ: “ã hã ne ki rĩr ke mũ,” he ja nĩ. “Sỹ ke há vẽ,” he ja tóg nĩ.
