Hebreu ag mỹ carta 8:1-13
8 Ha mẽ, ẽg jagfy Topẽ tũ ki rĩr tĩ to pãꞌi mág vỹ nĩ nĩ. Topẽ pẽgja tá tóg nĩ nĩ, kanhkã tá.
2 Topẽ nĩgja pẽ tá tóg, ti tũ ki rĩr mũ. Ti nĩgja pẽ ẽn pijé tỹ ẽprã ke tỹ há nĩꞌ. Topẽ hã tỹ há vẽ. Ẽn tá tóg nĩ nĩ, ẽg jagfy.
3 Topẽ tũ to pãꞌi mág jykren hã vẽ, ha mẽ. Topẽ mỹ ag tóg nén ũ nĩ pũn tĩ, nén ũ ũ ke gé. Kỹ ẽg jagfy Topẽ tũ to pãꞌi mág tag vỹ, Topẽ mỹ nén ũ nĩm ke mũ gé, Jesus ti, hã vỹ: vẽnh fẽg, he mũ.
4 Ti tỹ ver tag mĩ ga kri mũ ag mré tĩ ra Topẽ tóg, ti mỹ vẽnh rãnhrãj tag nĩm ke tũ nĩ vẽ, ti tỹ Topẽ tũ ki rĩr jé. Ẽprã ũ tỹ Topẽ tũ ki rĩr mũ ag vỹ nỹtĩ ver, ũ tỹ Judeu ag jykre ki Topẽ tũ ki rĩr mũ ũ ag.
5 Topẽ ĩn krẽm ag tóg nén ũ nĩ pũn tĩ, Moisés tỹ ag mỹ vẽjykre nĩm kỹ. Topẽ hã vỹ ti mỹ tó ja nĩ, ti tỹ kur tỹ ĩn han jafã tỹ Topẽ mỹ ĩn han jé. Ti mỹ tóg: “ã mỹ sóg ã tỹ nén han ke mũ ẽn ven kãn huri,” he mũ. “Ã tỹ pãnónh kri nĩ ẽn kã sóg ã mỹ ven kãn. Sỹ ã mỹ nén ven mũ ẽn hã han nĩ,” he ja tóg nĩ, hã kỹ tóg han. Ðn ẽn krẽm ag tóg, ũri nén ũ ũ pũn tĩ, Judeu ag jykre ki, Topẽ tũ ki rĩr tĩ ag.
6 Hã kỹ Jesus rãnhrãj vỹ ẽprã ke ag rãnhrãj kãfór nĩ. Topẽ vỹ ẽg mỹ ti jẽnẽ, ti tỹ ẽg mỹ vẽjykre tãg nĩm jé. Kỹ tóg Moisés tỹ ẽg mỹ vẽjykre há nĩm ẽn kãfór nĩ. Kỹ tóg ẽg mỹ nén ũ há tãvĩ han ke mũ, Topẽ ti, Jesus tỹ ẽg mỹ vẽnh pãte fón ken kỹ.
7 Ti mỹ tóg pãgsĩ ja nĩ, ti tỹ Moisés mỹ vẽjykre nĩm ja ẽn ti. Hã kỹ tóg vẽjykre tãg han to jykrén ja nĩ.
8 Ti povo jykre ve kỹ tóg, ti mỹ kórég nĩ. Hã kỹ tóg: “Kãnhmar sóg povo tỹ Israel mỹ vẽjykre tãg nĩm ke mũ, Judá krẽꞌkrẽ ag mỹ ke gé,” he ja nĩ.
9 “Vẽjykre tãg tag vỹ isỹ ag jógjóg ve ag mỹ vẽjykre nĩm ja ẽn ri ke tũ nĩnh mũ. Ag mỹ sóg vẽjykre ũ nĩm ja nĩ gé, isỹ ga tỹ Egito tá ag kãpan kỹ. Ag nĩgé kãgmĩ kỹ sóg ag tatĩn tĩg ja nĩ, ag ga pẽ ra. Hã ra ag tóg, isỹ ag mỹ vẽjykre nĩm ja ẽn mranh. Hã kỹ sóg sir ag tugvãnh ja nĩ,” he tóg, ẽg jóg mág ti.
10 “Hã ra sóg vãhã ag mỹ vẽjykre tãg han sór mũ, povo tỹ Israel ag mỹ, ha mẽ,” he tóg. “Ag krĩ tỹ ag tóg isỹ ag jyvẽn mũ ẽn ki kanhrãn ke mũ. Kỹ ag tóg han sór ke mũ gé, ti tỹ ag fe kã kã nĩn kỹ. Ag Topẽ vỹ tỹ inh nĩnh mũ. Kỹ ag tóg tỹ inh krẽ nỹtĩnh ke mũ gé.
11 Kỹ ũ tóg ti mré ke ag kanhrãn mãn ke tũ nĩ ha. “Ẽg jóg mág vỹ ge nĩgtĩ, ge ti nĩgtĩ,” he mãn ke tũ ag nĩ ha, jagnẽ mỹ. Ag kar vỹ inh ki kanhró nỹtĩnh mũ, ũn kãsir ag, ũn mág ag ke gé, ẽn kã.
12 Ag tỹ inh vĩ mranh mũ hã ra sóg ge ra ag jagãgtãn ke mũ. Vẽnh pãte fón jé sóg ke mũ, ag tỹ inh vĩ mranh ja ẽn ti,” he ja tóg nĩ, Topẽ ti.
13 Kỹ, Topẽ tỹ vẽjykre tãg han kỹ vẽjykre ve ẽn vỹ, ti mỹ tỹ vẽjykre si nĩ sir. Hã ra nén ũ si kar ẽn vỹ kejẽn tũꞌ henh ke mũ, kãnhmar.
