Hebreu ag mỹ carta 9:1-28
9 Topẽ tỹ ag mỹ vẽjykre ve ẽn nĩm kỹ tóg ag mỹ ag tỹ nén han ke ẽn kãmén ja nĩ. Ag tỹ ti ĩn han ke tó ja ti nĩ. Kar kỹ tóg ag tỹ ti ĩn krẽm ti mré vẽmén ke tó ja nĩ gé, ag tỹ ti mỹ nén ũ pũn ke ti ke gé.
2 Kỹ ag tóg, kur tỹ ĩn ẽn han, ti tỹ tỹ Topẽ ĩn jẽ jé. Hã ra tóg vẽnh kãpãm kỹ nĩ, kỹ ag tóg ĩn vãfynyn nĩg vén kỹ nĩ ẽn to: “Topẽ mré vĩ jafã,” he tĩ. Ẽn tá mesa kri vela tỹ kri vin jafã vỹ jẽ, kar kỹ mesa tỹ kri ẽmĩ vin jafã ẽn ke gé.
3 Tag pãte jãnkã ũ vỹ nĩ gé, jãnkã tỹ kur. Kỹ ẽn pãte ĩn vãfynyn ũ vỹ nĩ gé, ũn sĩ. Ẽn to ag tóg: “Topẽ nĩg jafã,” he tĩ.
4 Tá tóg Topẽ mỹ kri nén ũ pũn jafã nĩ, ouro tỹ há ti. Kri ag tóg nén ũ ger há pũn tĩ, ouro ẽn kri. Kar kỹ Topẽ caixa vỹ tá nỹ gé. Ti to tĩr vỹ tỹ ouro nĩ. Ẽn kã kã ouro tỹ pénky ki, kanhkã tá vẽjẽn vỹ nĩ, Topẽ tỹ ag mỹ ẽmĩ jẽnẽ ẽn ti, ag tỹ ga kórég mĩ mũn kỹ. Kar kỹ Arão vãtó vỹ kã kã nỹ gé, ti kãtó tỹ féj mũ ẽn ti. Kar kỹ Moisés tỹ Topẽ tỹ ẽg jyvẽn mũ ránrán ja ẽn vỹ kã ki nỹtĩ gé, caixa ẽn kã ki. Pó régre ki tóg ránrán ja nĩ.
5 Kỹ Topẽ tỹ jẽgnẽ jafã régre ag kãgrá vỹ nỹtĩ gé, caixa ẽn kri. Querubim he mũ ẽn vẽ, ũ tỹ Topẽ rĩnja tá nỹtĩ ẽn. Fẽr ag nỹtĩ, kỹ ag fẽr tóg krỹg he kỹ nỹtĩ. Ag fẽr fẽnja krẽm Topẽ vỹ ẽg mỹ vẽnh pãte fón tĩ, ẽg tỹ ti vĩ mranh ja ti. Hã ra sóg tag kãmén kãn sór tũ nĩ ver.
6 Kỹ tóg vãfynyn régre nĩ, ĩn tỹ kur ẽn ti, Topẽ tũ ẽn ti. Ti vãfynyn ve ki ag tóg kã ra ge tĩ, Topẽ tũ ki rĩr tĩ ag. Kurã kar ki ag tóg tá ag rãnhrãj han tĩ.
7 Ti vãfynyn ũ ẽn kã ra tóg rã pir hanꞌ he tĩ, prỹg kar ki, ag to pãꞌi mág ti, ti tãvĩ. Ag mẽg kyvénh ma tóg tĩ tĩ, Topẽ mỹ ven jé, Topẽ tỹ ti mỹ vẽnh pãte fón jé, povo kar mỹ ke gé, ag tỹ Topẽ vĩ mranh ja ẽn ti, ag tỹ mranh sór tũ ra mranh ja ẽn ti.
8 Topẽ kuprĩg vỹ, ẽg mỹ kãmén mũ, ũri, vẽjykre si ẽn ti. Kur tỹ ĩn vãfynyn vỹ ge nĩ, ha mẽ. Ti vãfynyn ve ẽn tỹ ver ĩn krẽm nĩn kỹ ẽg tóg ti vãfynyn ũ tá jun ke tũ nĩ ver, Topẽ nĩg jafã tá.
9 Ẽg tỹ ũri vég mũ tag ki kanhrãn jé, hã jé Topẽ tóg, vẽjykre tag han ja nĩgtĩ, ẽg tỹ to: tag ri ke ti nĩ, he jé. Topẽ ĩn ẽn tá ag tóg Topẽ mỹ nén ũ pũn tĩ, kỹ ag tóg ag mẽg tãnh kỹ pũn tĩ gé. Ag tỹ Topẽ mỹ sĩnvĩ nỹtĩ sór vẽ. Hã ra ag tóg ti mỹ pũn mũ ra sĩnvĩ tũ nỹtĩ, ag jykre tỹ ver kórég nĩn kỹ.
10 Kỹ ag tóg ag tỹ ti mỹ pũn há han jé, vẽjykre tỹ ge han tĩ gé, ha mẽ. Vẽjẽn to ag tóg jykrén tĩ, kỹ ag tóg vẽjẽn ũ to: “tag konh ke tũ ẽg nĩ, tag kron ke tũ ẽg nĩ,” he tĩ. Kỹ ag tóg goj tỹ vẽnh kype tỹ hẽn ri ke han tĩ gé. Tag ki vẽjykre kar vẽ, ẽprã. Kỹ Topẽ tỹ vẽjykre tãg han kỹ ẽn vỹ tóg tũꞌ he mũ sir.
Cristo tỹ ẽg jagfy ter
11 Vãhã Cristo vỹ kãtĩg, kỹ tóg tỹ ẽg jagfy Topẽ tũ to pãꞌi mág nĩ ha. Kỹ ti hã vỹ ẽg krenkren han mũ sir. Ti tỹ Topẽ ĩn kã ra rã mũ vỹ, ĩn si ẽn mág kãfór nĩ gé. Há tãvĩ ti nĩ. Ẽprã ke tỹ ĩn há pijéꞌ. Tag ki ĩn pijéꞌ. Kanhkã tá ke vẽ.
12 Kỹ, Jesus tỹ ẽn kã ra rã kỹ tóg rã pir han, Topẽ nĩg jafã pẽ ẽn kã ra, Topẽ tỹ ẽg mỹ vẽnh pãte fón jé. Kỹ ti pijé ti tỹ kã ra rã kỹ ag mẽg kyvénh ma vyrꞌ, cabrito ẽn, monh tãgy ẽn. Ti kyvénh hã tỹ tóg ẽg krenkren han huri, Jesus ti.
13 Ag tỹ Topẽ ĩn kã ra ge sór kỹ ag tóg Topẽ tũ ki rĩr tĩ ag mỹ: “ha ẽg to tỹ kó kó hé, ẽg mẽg kyvénh tỹ,” he tĩ. Kỹ ag tóg jãnhkri nỹtĩ sir, ag tỹ cabrito kyvénh tỹ ag to tỹ kó kó hen kỹ, ke tũ nĩ kỹ monh kyvénh tỹ. Ag tỹ ag jãnhkri han jan hã vẽ.
14 Hã ra Cristo vỹ, ti kyvénh hã tỹ ẽg jãnhkri pẽ han. Topẽ kuprĩg tỹ ti krĩn kỹ tóg Topẽ mỹ vẽnh fẽg. Kygnẽ ja tũ pẽ ti nĩ, hã kỹ tóg há kar nĩ. Kỹ ẽg tóg vẽjykre kórég han mãn ke tũ nĩ sir, ẽg tỹ ẽg jykre si tugrĩn ter ke mũ ẽn ti. Vãhã ẽg tóg Topẽ tũ han há nỹtĩ, ũn rĩr nĩ ẽn tũ ti.
Cristo tỹ ẽg mỹ vẽjykre tãg nĩm
15 Cristo vỹ, ẽg mỹ vẽjykre tãg nĩm. Ter ja tóg nĩ, Topẽ tỹ ẽg mỹ vẽnh pãte fón jé. Ti ter kar kỹ Topẽ tóg ũ ag kuprẽg, ag tỹ Topẽ tỹ kanhkã tá ẽg mỹ nén ven ke mũ ẽn ki kanhrãn jé. Jesus tỹ ẽg mỹ han hã vẽ.
16 Ũ tóg ti ter ke to hã: “iser kar kỹ ẽn vỹ isũ tag mãn ke mũ, jo ũ ẽn vỹ isũ ẽn mãn ke mũ gé,” he tĩ. Rán tóg tĩ, kỹ tóg tógfĩg tĩ, vẽnh rá ti. Kỹ ag tóg ag tỹ vẽnh rá ẽn ve sór mũ ra ti ter kar kỹ hã vég tĩ.
17 Ti tỹ ver ter tũ nĩn kỹ ag tóg vẽnh rá ẽn venh ke tũ nĩ. “Iser kar kỹ,” he tóg, hã kỹ ũ tóg ver ti tũ mãg tũ nĩ.
18 Ri ke ti nĩ, Topẽ tỹ ẽg mỹ vẽjykre nĩm ja ẽn ti, ti si mré hã. Ag mẽg ter kar kỹ ke ja vẽ.
19 Hã kỹ Moisés vỹ povo kar mỹ Topẽ tỹ ti mỹ nén tó ja ẽn kãmén, Topẽ tỹ nén to ag jyvẽn mũ ẽn ti. Ti tỹ ag mỹ kãmén kar kỹ tóg, monh tãgy tãnh kỹ ti kyvénh mãn ja nĩ, cabrito tãnh kỹ ke gé. Goj mãn kỹ tóg ki kujẽn ja nĩ gé, kỹ tóg tỹ kujãjãg mũ sir. Carneiro kyki kusũg mré hã tóg, tỹ kujãjãg mũ sir, re no mré hã. Kỹ tóg livro kri tỹ kó he mũ. Povo kar to tóg tỹ kó kó he mũ gé, ag tỹ jãnhkri kỹ nỹtĩ jé.
20 Ag to tỹ krig ke kar kỹ tóg ag mỹ: “Topẽ tỹ ẽg mỹ nén han ke mũ to vẽnh kyvénh hã vẽ,” he mũ, Moisés ti.
21 Kar kỹ tóg vẽnh kyvénh ẽn tỹ ĩn tỹ kur to tỹ krig ke mũ gé. Pénky kar to tóg tỹ kó he mũ gé, ag tỹ Topẽ tũ han jafã kar to.
22 Ha vé, ag tỹ vãsỹ Topẽ jykre ẽn ki nén ũ tỹ jãnhkriꞌ he sór kỹ ag tóg, nén ũ kyvénh hã tỹ jagnẽ jãnhkrig tĩ. Hã kỹ ẽg tóg ki kanhró nỹtĩ. Ag tỹ Topẽ vĩ mranh kỹ tóg, ag mỹ ag mẽg ter hã tugrĩn vẽnh pãte fónꞌ he ja nĩgtĩ.
Cristo tỹ ẽg jagfy ter pir han
23 Vẽjykre ẽn vỹ, kanhkã tá vẽjykre ri ke sĩ nĩ. Hã kỹ vẽnh mẽg kyvénh vỹ, nén kar ẽn jãnhkri han ja nĩgtĩ. Ẽg tỹ hã ra kanhkã ve jé tóg, há tũ nĩ, ẽg mẽg tỹ ẽg jagfy ter mũ ti. Ẽg mẽg vỹ, ẽg tỹ kanhkã tá jun han ki kagtĩg nĩ.
24 Cristo hã vỹ ẽg tỹ tá jun han ke mũ. Topẽ rĩnja tá tóg nĩ nĩ, Topẽ mré vẽmén jé, ẽg jagfy.
25 Kỹ ẽprã ke ẽn, ẽprã Topẽ tũ to pãꞌi mág ẽn tóg, prỹg kar ki ag tỹ ĩn vãfynyn to: Topẽ nĩgjafã, he mũ ẽn kã ra rã tĩ, ag mẽg kyvénh mãn kỹ. Hã ra Cristo vỹ vẽnh fẽg pir han.
26 Ti tỹ prỹg kar ki vẽnh fẽg ra tóg ter tỹ hẽn ri ke han ke mũ vẽ, Topẽ tỹ ga han kar kỹ. Hã ra tóg vãsỹ vẽnh ven ja tũ nĩ. Ũri, kurã tỹ ẽgno to hã tóg, vẽnh ven pir han, kỹ tóg vẽnh fẽg pir han, ti tỹ ẽg tỹ Topẽ vĩ mranh ẽn tỹ tũꞌ he jé, ti ter tugrĩn.
27 Ẽprã ke ag vỹ ter pir han tĩ gé. Ẽg ter kar kỹ Topẽ vỹ, ẽg jykre tugnỹm ke mũ.
28 Tag ri ke ti nĩ, Cristo tỹ vẽnh fẽg mũ ti. Vẽnh fẽg pir han tóg, ti tỹ ũn e tỹ Topẽ vĩ mranh tỹ tũꞌ he jé. Kejẽn tóg kãtĩg mãn ke mũ. Hã ra tóg, ẽg tỹ Topẽ vĩ mranh ja tugrĩn ter mãn ke tũ nĩ, ti kãtĩg mãn kỹ. Ẽg jé prẽr jé tóg kãtĩg ke mũ, ũ tỹ ti kãtĩg jãvãnh mũ ag jé.
