Lucas tỹ rá 10:1-42
10 Kỹ Jesus tóg ũ tỹ 70 (ke) ag vin mũ gé sir, ag tỹ ti jo mũ jé. Ũn régre tĩnꞌ, ũn régre tĩnꞌ he tóg. Ag mỹ tóg: “ẽmã kar mĩ Topẽ vĩ kãmén mũjẽg,” he mũ. Ag nón tóg ra tĩg sór mũ gé.
2 Kỹ tóg ag mỹ: “ũ tỹ mẽ ja tũ ag tóg inh mỹ ẽkré ri ke nỹtĩ,” he mũ.“Kejẽn ẽg jakré tóg éhé nỹgtĩ, hã ra ag pipir nỹtĩ, ũ tỹ krenh ke mũ ag. Ge ti nĩgtĩ, inh vĩ ti. Ũn e ag tóg inh ki ge sór mũ nĩ, hã ra ũ tỹ ag mỹ tónh ke tóg tũ tĩ. Hã kỹ Topẽ mré vĩm nĩ, ti tỹ ũ tỹ ag mỹ tónh ke mũ ag jẽgnẽ jé,” he tóg.
3 “Ha mũjẽg. Ha vé, mé krẽ vỹ vẽnh jy nĩgãn ki kagtĩg nỹtĩ, mĩg tỹ ag mãn sór kỹ. Mé krẽ ẽn ri ke ãjag nỹtĩ. Ge ra sóg ãjag jẽgnẽg mũ. Kỹ Topẽ vỹ ãjag jy nĩgãn mũ,” he tóg.
4 “Kỹ ãjag mũn kỹ sako ma mũ tũg nĩ, jãnkamy tũ ke gé. Pẽn né vẽnh kafã gé mũ tũg nĩ gé. Kỹ ãjag tỹ ũ ven kỹ ti mỹ: “ã mỹ há?” he tũg nĩ gé. Jatun mỹ mũm nĩ.
5 Kejẽn ãjag tóg ẽmã ũ tá junjun ke mũ. Kỹ ãjag tỹ tá ĩn ũ ra ge kỹ ĩn ẽn krẽm ke fag mỹ: “Topẽ jé ãjag ki rĩr, kỹ ãjag jé krĩ kuprã nỹtĩ,” hem nĩ,” he tóg.
6 “Kỹ tá ke ũ tỹ inh ki rã kỹ tóg krĩ kuprã nĩ sir, ti tỹ tỹ Topẽ kósin nĩn kỹ. Tá ke ũ tỹ inh ki rã jãvãnh nĩn kỹ tóg krĩ kuprã nĩnh ke tũ nĩ sir. Ti jãvo ãjag tóg krĩ kuprã nỹtĩnh mũ sir inhhã.
7 Ãjag tỹ ĩn ra ge mũ ẽn hã krẽm nũgnũr hem nĩ. Fag tỹ ãjag mỹ nén nĩm mũ ẽn hã kom nĩ gé. Ũn rãnhrãj mũ ẽn tóg ti kaja venh ke mũ, hã kỹ ag tóg ãjag jẽn ke mũ sir, vẽnh kaja jé. Ðn ũ ra ge tũg nĩ, ẽmã ẽn tá.
8 Ãjag tỹ ẽmã ũ tá junjun kỹ ĩn pir krẽm nỹtĩm nĩ. Ag tỹ ãjag mỹ nén nĩm mũ hã kom nĩ.
9 Ũn kaga ag tỹ háꞌ hem nĩ. Ag mỹ: “Topẽ vỹ tỹ ãjag pãꞌi nĩnh mũ, ũri,” hem nĩ.
10 Kejẽn ẽmã ũ tá ke ag tóg ãjag mỹ: “kãgejẽg ra,” he jãvãnh nỹtĩnh mũ. Kỹ ẽmã ẽn fĩn rãm kỹ ag mỹ tag tóm nĩ, ha mẽ:
11 “ha vé, ẽg pẽn nug hã kykũgkũg ẽg tóg mũ, ãjag tỹ ẽg kavénh tũ nĩ jé,” hem nĩ. “Ge ra ẽg tóg ãjag mỹ tó mũ, ẽg tỹ ãjag mỹ nén tónh kãmũ jan ti, hã vỹ: “Topẽ vỹ tỹ ẽg pãꞌi nĩnh mũ, ũri,” he mũ,” hem nĩ ag mỹ,” he tóg.
12 “Ha mẽ, kurã tỹ ẽgno kã ag tóg vẽsỹrénh ke mũ, ag tỹ ãjag vĩ mẽ jãvãnh nỹtĩn kỹ. Ẽmã tỹ Sodoma tá ke ag vẽsỹrénh kãfór han jé ag tóg ke mũ, ha vem nĩ,” he tóg.
Jesus tỹ ũ ag mỹ vĩ kónãn
13 Kỹ tóg: “sỹ ẽmã tỹ Corazim ki ke ag mỹ tag tó sór vẽ, ẽmã tỹ Betsaida ki ke ag mỹ ke gé,” he mũ. “Kórég ve jé ãjag tóg ke mũ,” he tóg. “Ẽg tỹ nén han vãnh tỹ hẽn ri ke hynhan isóg ãjag mỹ, hã ra ãjag tóg ãjag jykre tugvãnh sór tũ nĩgtĩ,” he tóg. “Ẽmã tỹ Tiro tá, ẽmã tỹ Sidom tá sóg ẽg tỹ nén han vãnh ẽn hynhan ja tũ nĩ. Sỹ tá hynhan ra ag tóg ag jykre kórég tugvãnh ke mũ vẽ, vãsỹ,” he tóg. “Ag jykre pãno to ag jykrén ke mũ vẽ, kygfỹ jé ag tóg ke mũ vẽ, ag mỹ ti e tĩnh mũ vẽ, sỹ ag mỹ tó ra. Ag jãvo ãjag tóg to jykrén sór tũ pẽ nĩꞌ,” he tóg.
14 “Tiro tá ke ag vỹ vẽsỹrénh kãn ke mũ, kurã tỹ ẽgno ẽn kã, Sidom tá ke ag ke gé, ag jykre pãno to. Ag vẽsỹrénh kãfór han jé ãjag tóg ke mũ, ha vem nĩ,” he tóg.
15 Kỹ tóg: “sỹ ẽmã tỹ Cafarnaum ki ke ag mỹ tag tó sór vẽ gé, ha mẽ,” he mũ. “Ũri tóg ver ãjag mỹ sér tĩ. “Kanhkã ve jé ẽg tóg ke mũ,” he ãjag tóg tĩ, ón kỹ. Hã ra ãjag tóg nũgme ki vár ke mũ,” he tóg.
16 Kỹ tóg ti mré ke ag mỹ: “ũ tóg ãjag vĩ mẽ sór mũ, ha vem nĩ,” he mũ. “Kỹ tóg sir inh vĩ mẽg mũ. Ũ tóg ãjag vĩ mẽ sór ke tũ nĩ, ha vem nĩ. Kỹ tóg inh vĩ mẽ sór ke tũ nĩ gé. Ti tỹ inh vĩ mẽ sór tũ nĩn kỹ tóg ũ tỹ inh jẽnẽg mũ ẽn vĩ mẽ sór ke tũ nĩ gé sir, Topẽ vĩ ti,” he tóg.
Ũ tỹ 70 (ke) ag tỹ Jesus to vỹnvỹn ke
17 Kejẽn ag tóg ti to vỹnvỹn ke mũ, kỹ ag tóg ti mỹ vĩ sér han mũ sir. “Senhorꞌ,” he ag tóg mũ. “Ã jiji tó kỹ ẽg tóg vẽjagrẽ kórég ag mỹ vĩ, kỹ ag tóg ẽg vĩ ki hã han,” he ag tóg mũ.
18 Kỹ tóg: “vãsỹ inh Japo vé, ti tỹ kanhkã tá kãtére kỹ,” he mũ. “Ti fĩn rãm sóg, hã kỹ sóg ti fón. Tỹ tóg ta tỹ kómkóm ke ri ke nĩ ja nĩ.
19 Ti kri ke vỹ tỹ inh nĩ. Ha vé, ãjag to sóg vãsãn mũ, pỹn tỹ ãjag kókég tũ nĩ jé, ãjag tỹ ti sãn mũ ra, pỹn kakrã ke gé, Nén-Kórég kar ag ke gé. Ũ vỹ ãjag kókén ke tũ pẽ nĩ gé.
20 Hã ra tag to mỹ há nỹtĩ tũg nĩ ver. Tag vỹ tỹ nén ũ tũ nĩ ver. Vẽjagrẽ kórég vỹ ãjag vĩ han, vẽnh kuprĩg ke gé. Hã ra tag to mỹ sér nỹtĩ tũg nĩ. Nén ũ vỹ ha pẽ nĩ, hã vỹ: ãjag jiji vỹ kanhkã tá ránrán kỹ nỹtĩ, he mũ, Topẽ livro ki, ãjag tỹ tá junjun jé,” he tóg.
Jesus tỹ mỹ sér nĩ
21 Kỹ tóg ti mỹ sér tĩ, óra ẽn kã. Topẽ kuprĩg tỹ ti krĩn kỹ tóg: “jógꞌ,” he mũ. “Tỹ ã tóg kanhkã tãn ag kãfór kar nĩ, kar ã tóg tỹ ẽprã ke ag kãfór nĩ gé,” he tóg. “Inh mỹ tóg há tĩ, ã tỹ nén han mũ ti. Ũ tỹ: “ki kanhró mág inh nĩ,” he mũ ag mỹ ã tóg ã jykre ven ja tũ nĩ. Ũ tỹ ki kagtĩg ag hã mỹ ã tóg ã jykre nĩm ja nĩ. Kỹ tóg há tãvĩ nĩ, jógꞌ,” he tóg.
22 Kỹ tóg ti mré mũ tĩ ag mỹ: “inh jóg tóg inh mỹ tovãnh kãn, ti tỹ nén han ja kar ti,” he mũ. “Kỹ ũ pijé ti kósin ki kanhró nĩꞌ. Inh jóg hã ne inh ki kanhró nĩꞌ. Kỹ ũ pijé ijóg ki kanhró nĩ géꞌ. Inh hã ne ti ki kanhró nĩꞌ. Hã kỹ sóg ãjag mỹ ti kãmén jé kãtĩ mũ. Isỹ ũn kuprẽg mũ ag hã mỹ sóg ti kãmén tĩ,” he tóg.
23 Kỹ tóg vyr mỹ ti mré mũ tĩ ag mỹ: “ãjag hã ne Topẽ jykre vég mũꞌ,” he mũ. “Sér pẽ ti tĩ.
24 Ki hã sóg tó mũ, ha mẽ. Ũ tỹ hẽn ri ke ag vỹ inh ve sór tãvĩ ja nỹtĩgtĩ, vãsỹ. Hã ra ag tóg inh mur ke jo kãgter kãn. Topẽ vĩ tó tĩ ag ja vẽ, pãꞌi mág ag ja vẽ, hã kỹ ag tóg ãjag tỹ nén vég mũ ve sór tãvĩ ja nỹtĩgtĩ. Hã ra ag tóg ve ja tũ nĩ. Mẽ ja tũ ag tóg nĩ gé, ãjag tỹ ũri nén mẽg mũ ti. Ãjag hã ne mẽg mũ inhhãꞌ,” he tóg.
Jesus tỹ ẽg tỹ jagnẽ jagãgtãn ke kãmén
25 Kỹ vãhã Topẽ vĩ to ẽg kanhrãn tĩ ũ vỹ, ag kã mĩ jẽgnẽ mũ. Ti tỹ ón kỹ Jesus ki jẽmẽ sór vẽ. Kỹ tóg ti mỹ: “Senhorꞌ,” he mũ. “Inh hỹn vẽjykre tỹ ne han mũ, isỹ rĩr krỹg ja tũ ve jé?” he tóg.
26 Kỹ tóg ti mỹ: “ne nỹ hỹn rán kỹ nĩ, Topẽ vĩ ki?” he mũ. “Topẽ jykre tỹ ne han jé ã ke mũ, hỹnꞌ? To ke há ã tóg nĩ, ha inh mỹ tó,” he tóg.
27 Kỹ tóg: “Topẽ vỹ tỹ, ẽg kri ke nĩ, kỹ ti hã to há nĩm nĩ, ti ki rã há han nĩ, ti to jykre pir nĩm nĩ, ti to tar nĩm nĩ. Kỹ ã régre kar ki rĩr há han nĩ gé, ã tỹ vẽnh ki rĩr há han ri ke. Topẽ tỹ ẽg mỹ nén tó mũn hã vẽ,” he tóg.
28 Kỹ tóg: “hỹ, ki hã ã tóg tó mũ,” he mũ. “Tag han ra, kỹ ã tóg rĩr krỹg ja tũ venh ke mũ,” he tóg.
29 Hã ra tóg ti mỹ há tũ nĩ, Jesus vĩ ti. Hã kỹ tóg ti mỹ: “kỹ ũ nỹ tỹ inh régre nĩ?” he mũ.
30 Kỹ tóg ti mỹ: “Judeu ũ tóg nĩgtĩ. Hã ra tóg Jerusalém tá kãtĩg kỹ ẽmã tỹ Jericó ra tĩ mũ. Ẽpry kri ũn jykre kórég ag tóg, ti jo vãjig mũ, bandido ag. Kỹ ag tóg, ti kãgmĩ kỹ, ti kur nũnh kãn kỹ ti mrãnmrãn mũ. Ti tén kren ag tóg mũ, kỹ ag tóg ẽpry fyr tá ti fón kar kỹ mũ mũ sir, ti tũ mãn kãn kỹ.
31 Ti tỹ tá nỹ ra ũ tóg, ẽpry ẽn jagma kãtĩ mũ. Topẽ tũ ki rĩr tĩ ag kã ũ vẽ. Kỹ tóg ti vég mũ. Hã ra tóg ti venh rã sór tũ nĩ. Ẽmĩn jagma tóg tĩ mũ.
32 Kỹ vãhã ũ tỹ Topẽ ĩn ki rĩr tĩ ag kã ũ tóg ẽpry jagma kãtĩ mũ gé. Tá jun kỹ tóg ti vég mũ gé, hã ra tóg ti venh rã sór tũ nĩ gé. Ẽmĩn jagma tóg tĩ mũ gé sir.
33 Kỹ vãhã Samaria tá ke ũ tóg ẽpry jagma kãtĩ mũ gé. Kỹ tóg tá jun kỹ ti vég mũ.
34 Kỹ tóg inhhã ti kygtãg mũ sir. Azeite mré vinho tỹ tóg, ti mỹ to tĩn mũ. Ti kur ũ tỹ tóg ti pãg mũ sir. Kỹ tóg ti mẽg kri ti nĩm kỹ ti ra ma tĩ mũ. Kỹ tóg ag tỹ ĩn krẽm nũgnũr jafã tá jun mũ sir. Tá tóg ti ki rĩr mũ.
35 Tỹ vaj kỹ tóg tĩg mãn sór mũ, kỹ tóg ũ tỹ ĩn ki rĩr mũ ẽn mỹ jãnkamy régre vin mũ, kỹ tóg ti mỹ: “ti ki rĩr há han nĩ,” he mũ. “Jãnkamy tag tỹ ã mỹ tá krỹg tũ nĩn kỹ sóg ã mỹ kajãm mãn mũ, sỹ vỹn ken kỹ,” he tóg.
36 Kỹ tóg: “ũn tãgtũ ag vỹ ti ve ja nĩ. Kỹ ag kã ũ tỹ hẽ nỹ tỹ ag tỹ ũn vóg kónãn mũ ẽn régre ja nĩ? Ha to jykrén kemaꞌ,” he tóg.
37 Kỹ tóg: “ũ tỹ ti jagãgtãn mũ ẽn vỹ tỹ ti régre ja nĩ,” he mũ, ũ tỹ ón kỹ ti ki jẽmẽg mũ ẽn mỹ.
Kỹ tóg ti mỹ: “hỹ, tó há han ã,” he mũ. “Kỹ ẽn ri ke han nĩ. Ũn vẽsỹrénh mũ ag jagãgtãn nĩ, ti ri kén,” he tóg, Jesus ti.
Jesus tỹ Maria fi mré Marta fag venh tĩg
38 Kejẽn tóg ti mré mũ tĩ ag mré ẽmã sĩ ũ tá jun mũ. Tá Marta fi tóg nĩ nĩ. Kỹ fi tóg Jesus mỹ: “inh mré kãmũjẽg, inh ĩn mĩ,” he mũ.
39 Kỹ fi jãvy fi vỹ nĩ gé, hã vỹ: Maria, he mũ. Ẽn fi vỹ ti rã hã nĩ kỹ ti vĩ jẽmẽg nĩ nĩ.
40 Hã ra Marta fi tóg ag mỹ vẽjẽn han to vẽnh kutãn mũ.
Kỹ Marta fi tóg ti mỹ: “Senhorꞌ,” he mũ. “Rãnhrãj mág han tĩ sóg nĩ, hã ra fi tóg nĩ nĩ. Fi mỹ ké, fi tỹ inh mré vẽjẽn ki rĩr jé,” he fi tóg mũ.
41 Hã ra tóg fi mỹ: “krĩ kufy ã tóg nĩ, nén ũ tũ to, hã ra fi tóg inh vĩ jẽmẽg nĩ nĩ,” he mũ. “Vẽjẽn to vẽnh kutãn tũg nĩ.
42 Nén pir hã ne há nĩꞌ, hã vỹ: inh vĩ, he mũ. Maria fi vỹ inh vĩ hã jẽmẽ sór mũ. Kỹ sóg fi mỹ: “ha nén ũ han,” he sór tũ nĩ. Nén ũ há kuprẽg fi tóg, fi tỹ inh vĩ jẽmẽ sór kỹ,” he tóg.
