Lucas tỹ rá 11:1-54
11 Kejẽn tóg Topẽ mré vĩ mũ. Ti tỹ Topẽ mré vẽmén kar kỹ ti mré mũ tĩ ag tóg ti mỹ: “Senhorꞌ,” he mũ. “Ẽg kanhrãn nĩ, ẽg tỹ Topẽ mré vĩ há nỹtĩ jé, João tỹ ti mré mũ tĩ ag kanhrãn ri ke,” he ag tóg.
2 Kỹ tóg ag mỹ:“Topẽ mré vĩ kỹ tag tóm nĩ, ha mẽ,” he mũ.“Ẽg jóg mág, ã jiji tó ẽg tóg tĩ.Kỹ vẽnh kar jé ã tỹ tỹ ũn mág nĩ vé.Ẽg jé kãnhmar ã tỹ tỹ ẽg pãꞌi nĩ vé.
3 Ẽg mỹ ẽg jẽn ti nĩm, ẽg tỹ kurã kar ki ko tĩ ẽn ti.
4 Kỹ ẽg mỹ vẽnh pãte fón nĩ, ẽg tỹ ã vĩ mranh ja ti, hã jé ẽg tóg ẽg tỹ jagnẽ to jũ tỹ jagnẽ mỹ vẽnh pãte fón ke mũ gé.Kỹ ẽg tỹ ã vĩ mranh sór kỹ ẽg kren han nĩ, ẽg tỹ mranh tũ nĩ jé,” hem nĩ,” he tóg.
5 Kỹ tóg ag mỹ, ẽg tỹ Topẽ mré vẽmén ke ũ kãmén mũ. Kỹ tóg: “kejẽn ũ tóg nĩgtĩ,” he mũ. “Kuty si há tá tóg ti régre ĩn tá jun mũ. Kỹ tóg ti régre mỹ: “inh mỹ ã jamĩ tãgtũ nĩm,” he mũ.
6 “Inh mré ke ũ vỹ jun. Kór há tá tóg kãtĩg. Hã ra sỹ ti mỹ ne han ke tóg tũ tĩ,” he tóg.
7 Kỹ tóg ti mỹ: “hã ra sóg nỹ nĩ. Kỹ inh krẽ ag tóg nũgnũr nỹtĩ ha ke gé,” he mũ. “Jãnkã vỹ nĩfénh kỹ jẽ ha. Hã kỹ tóg vẽnh mỹ tĩ,” he tóg.
8 Hã ra tóg sir to vĩ mãnꞌ, to vĩ mãnꞌ he mũ. Hã kỹ tóg nĩ kỹ ti mỹ nĩm mũ sir. Ti régre vẽ. Ge ra tóg ti mỹ nĩm ke tũ nĩ vẽ. Hã ra tóg ti tỹ ti mỹ to vĩ mãnꞌ, to vĩ mãnꞌ he tugrĩn ti mỹ nĩm mũ sir,” he tóg.
9 “Ha mẽ, Topẽ mỹ nén kar to vĩm nĩ, kỹ tóg ãjag mỹ han mũ sir. Ãjag tỹ ti mỹ nén to vĩ mũ ẽn jãvãnh nĩ, kỹ ãjag tóg venh ke mũ sir. Ti mré vĩ kỹ ẽg tỹ ti jãnkã tỹ tórón tórón ke ri ke han nĩ, kỹ tóg ãjag mỹ ti nón ri ke han mũ, ti tỹ ãjag mỹ ãjag tỹ nén to vĩ mũ ẽn han kỹ.
10 Hỹ, hã vẽ. Ãjag tỹ ti mỹ nén ũ to vĩn kỹ tóg ãjag mỹ han ke mũ. Ãjag tỹ jãvãnh kỹ ãjag tóg venh ke mũ. Ãjag tỹ jãnkã tỹ tórón tórón ke ri ke han kỹ tóg ãjag mỹ nón ri ke han mũ.
11 Kejẽn ãjag kósin tóg ãjag mỹ pirã to vĩ mũ. Kỹ ãjag pijé ti mỹ pỹn nĩm ke mũꞌ. Pirã hã nĩm jé ãjag tóg ke mũ.
12 Kejẽn tóg ãjag mỹ garĩnh ovo to vĩ mũ. Kỹ ãjag pijé ti mỹ pỹn kakrã nĩm ke mũꞌ. Garĩnh ovo hã nĩm jé ãjag tóg ke mũ.
13 Jykre pãno ãjag nỹtĩ. Ãjag jykre pãno hã ra ãjag tóg ãjag krẽ mỹ nén ũ há nĩm tĩ. Ge ti nĩ gé, ãjag tỹ Topẽ mỹ nén ũ to vĩn kỹ. Nén ũ há hã nĩm jé tóg ke mũ. Hã ra tóg ãjag kãfór han tĩ, ẽg jóg tỹ kanhkã tá nĩ ti. Ãjag tỹ ti mỹ to vĩn kỹ tóg ti kuprĩg tỹ ãjag jagrẽ han ke mũ mỹr, Topẽ ti,” he tóg.
Jesus tỹ Japo kãfór nĩ
14 Kejẽn Jesus tóg ũ mỹ ti jagrẽ kórég kutẽm mũ. Ti vĩ vãnh han ja tóg nĩgtĩ, ti jagrẽ ti. Ti tỹ ti jagrẽ kutẽm kar tóg vĩ há nĩ sir. Kỹ tóg vẽnh kar mỹ e tĩ. Ag mỹ tóg sér tĩ sir.
15 Hã ra ũ ag tóg ti to: “jagrẽ kórég ti nĩ,” he mũ. “Nén-Kórég ag pãꞌi vỹ tỹ, ti jagrẽ nĩ, Satanás he mũ ẽn. Hã kỹ tóg Nén-Kórég ag pãꞌi jykre tỹ ag jagrẽ kórég pan tĩ,” he ag tóg ón kỹ.
16 Hã ra ũ ag tóg ón kỹ ti jykre ve sór mũ gé, kỹ ag tóg ón kỹ ti tỹ ẽg tỹ nén han vãnh han mũ ve sór mũ sir, ti tỹ ag mỹ kanhkã tá vẽjykre ven jé.
17 Hã ra tóg, ki kanhró nĩ. Hã kỹ tóg ag mỹ: “pãꞌi pir krẽm ke ag tỹ jagnẽ kato tẽn kỹ ag tóg, jagnẽ kãgtén kãn ke mũ,” he mũ. “Ðn pir krẽm ke fag tỹ jagnẽ kato tẽn kỹ fag tóg, jagnẽ kãgtén kãn ke mũ gé sir.
18 Ge ti nĩ, Nén-Kórég ag jykre ti. Nén-Kórég ag tỹ jagnẽ kato tẽn kỹ ag tóg, jagnẽ tỹ tũꞌ henh ke mũ gé. Hã kỹ tóg vẽnh mỹ nĩ, ãjag tỹ iso: “Satanás jykre tỹ tóg, Nén-Kórég ag pan tĩ,” he mũ ti,” he tóg.
19 “Ãjag mré ke ag to jykrén nĩ. Nén-Kórég ag pan ag tóg tĩ gé. Ag pijé Satanás jykre tỹ ag pan tĩꞌ. Topẽ jykre tỹ ag tóg ag pan tĩ mỹrꞌ. Ãjag tỹ tag to jykrén kỹ ãjag tóg inh jykre há ki kanhrãn ke mũ vẽ,” he tóg.
20 “Topẽ kuprĩg jykre hã tỹ sóg Nén-Kórég ag pan tĩ mỹr, ha mẽ. Isỹ ag pan kãn kỹ Topẽ tóg tỹ ẽg pãꞌi nĩnh mũ. Tag to jykrén nĩ,” he tóg.
21 “Ũ tỹ é he mẽ tóg ti tũ ki rĩr há han tĩ. Ti rógro vyn kỹ tóg ti ĩn ki rĩr tĩ sir, ũ tỹ ti tũ mãg tũ nĩ jé.
22 Kejẽn ũ tỹ ti tar kãfór nĩ ẽn tóg ti ĩn tá jun mũ. Kỹ tóg ti rógro vãg mũ. Ti tũ génh kãn tóg mũ gé sir. Ge ti nĩ. Ũ tỹ é he mẽ ri ke ti nĩ, Japo ti. Hã ra sóg ti tar kãfór nĩ. Hã kỹ sóg ag jagrẽ kórég pan tĩ,” he tóg.
23 “Ãjag tỹ tỹ inh mré ke tũ nỹtĩn hã kỹ ãjag tóg, inh kato tẽgtẽ mũ. Ãjag tỹ inh mré ẽprã ke ag tỹ Topẽ to kãmũ han kỹ tóg há tĩ vẽ, hã ra ãjag tóg, ag kãmũ kamẽg mũ,” he tóg, Jesus ti.
Vẽjagrẽ kórég tỹ vỹn kenh ke
24 Kỹ Jesus tóg: “kejẽn sóg, vẽjagrẽ kórég ũ kutẽm mũ,” he mũ. “Kỹ tóg ga kórég ra tĩ mũ. Goj venh ke tũ tóg nĩ, tá. Kỹ ti tỹ hẽ tá vẽnhkán ke tóg tũ tĩ. Kỹ tóg vãhã to jykrén mũ sir. “Inh jé hỹn sỹ ũ tá kãkutẽ ja ẽn ra tĩg mãn ha, sỹ ti kã ra rã mãn jé, he tóg mũ, ti jagrẽ ẽn ti.
25 Kỹ tóg ti venh kãtĩ mũ. Hã ra tóg sir krĩ há nĩ. Kỹ tóg ti mỹ ĩn há ri ke nĩ sir, ĩn prur, ĩn sĩnvĩ ri ke.
26 Kỹ tóg Nén-Kórég tỹ 7 (ke) ag mỹ tónh tĩ mũ sir. “Ha kãmũ jẽg,” he jé tóg ke mũ. Kỹ ag tóg sir ũ ẽn kã ra ge mũ, tỹ ag tóg ti jagrẽ nỹtĩ mãn mũ sir, isỹ ũn mỹ ti jagrẽ pir kutẽm ja ẽn ti. Hã kỹ tóg kórég tãvĩ nĩ sir. Ti jagrẽ kórég pir kutẽm ja inh nĩ vẽ, hã ra ũ tỹ 8 (ke) ag tóg tỹ ti jagrẽ nỹtĩ ha, ti tỹ inh ki rã tũ nĩn kỹ,” he tóg.
Topẽ tỹ ẽg ve há han ke
27 Kỹ ũ tỹ ti vĩ mẽg mũ ũ fi tóg prẽr mũ sir, fi tỹ ti vĩ tag mẽ kỹ. Ũn e ẽn ag kã kã fi tóg jẽ nĩ, kỹ fi tóg: “!..Topẽ vỹ ã mỹnh fi ve há han, fi tỹ ã han tugren, fi tỹ ã pafãm tugren..!” he fi tóg, prẽr kỹ.
28 Kỹ Jesus tóg fi mỹ: “hỹ,” he mũ. “Hã ra Topẽ vỹ ã ve há han ke mũ gé, ã tỹ ti vĩ mẽ kỹ ki króm kỹ,” he tóg.
Jesus tỹ ón kỹ milagre han ke tũ
29 Hã ra ũ tỹ hẽn ri ke ag tóg sir, tá junjun mũ, ti vĩ mẽ jé. Kỹ tóg fór tãvĩ tĩ. Kỹ Jesus tóg ag mỹ: “kórég ãjag nỹtĩ,” he mũ. “Ón kỹ ãjag tóg, nén han vãnh ve sór mũ. Venh ke tũ ãjag tóg nĩ. Nén ũ pir hã ve jé ãjag tóg ke mũ, hã vỹ: Jonas tỹ nén ve ja ẽn ri ke, he mũ,” he tóg.
30 “Jonas vỹ, ẽmã tỹ Nínive tá ke ag mỹ Topẽ vĩ tó ja nĩgtĩ, kỹ ag tóg ti vĩ mẽ há han ja nĩgtĩ. Ẽn ri ke han jé sóg ke mũ, ãjag mỹ. Tỹ sóg ẽprã ke fi kósin ẽn nĩ,” he tóg.
31 “Vãsỹ pãꞌi mág fi tóg, kanhkã fyr tá kãtĩg ja nĩgtĩ, fi tỹ pãꞌi mág tỹ Salomão vĩ mẽ jé. Salomão kãfór vỹ tỹ inh nĩ, hã ra ãjag tóg inh vĩ mẽ jãvãnh nỹtĩ, fi jãvo. Hã kỹ Topẽ tóg, kurã tỹ ẽgno ẽn kã ãjag mỹ vĩ kónãn ke mũ, fi ve kỹ, ha vem nĩ,” he tóg.
32 “Kỹ Topẽ tóg Nínive tá ke ag ve kỹ ãjag mỹ vĩ kónãn ke mũ gé, kurã tỹ ẽgno ẽn kã, ha vem nĩ. Nínive tá ke ag tỹ Jonas vĩ mẽ kỹ ag tóg ag jykre tugvãnh ja nĩgtĩ. Tỹ sóg Jonas kãfór nĩ, hã ra ãjag tóg ãjag jykre tugvãnh jãvãnh nỹtĩ, sỹ ãjag mỹ tó mũ ra,” he tóg.
Jẽngrẽ ri ke ẽg nỹtĩ
33 “Ẽg tỹ néj grug kỹ ẽg pijé, péju kỹ fẽg tĩꞌ. Ẽg pijé, kẽj krẽm fẽg tĩꞌ. Ti fẽg jafã kri ẽg tóg fẽg tĩ. Kỹ ẽg tóg ẽg tỹ ĩn kã ra kãge kỹ ve há han tĩ,” he tóg.
34 “Ẽg kanẽ hã tóg tỹ, ẽg tỹ ve jafã nĩ. Kỹ tóg ẽg jo kurã han tĩ. Ti há nĩn kỹ tóg ẽg jo kurã kar nĩ sir. Jãvo ẽg kanẽ kórég nĩn kỹ tóg, ẽg jo kuty kar nĩ sir. Kỹ tóg ge nĩ, ẽg jykre kórég ti. Ẽg kanẽ kórég ri ke ti nĩ. Ẽg jo tóg kuty han tĩ.
35 Kỹ vẽnh kanhrãn nĩ. Ke tũ nĩ mũ ra tóg, ãjag jo kuty ri ke nĩ. Vẽjykre kórég hã vẽ. Kỹ vẽjykre kórég han sór tũg nĩ.
36 Ãjag jo kurã nĩn kỹ tóg há tãvĩ nĩ. Ãjag jykre há tãvĩ nĩn kỹ tóg, ãjag jo kurã ri ke nĩ sir. Kỹ ãjag tóg sir néj gru ri ke nỹtĩ gé. Néj gru mág nĩn kỹ tóg ẽg kanẽ jo jẽngrẽ há han tĩ. Ge ẽg nỹtĩ, ẽg jykre há tãvĩ nĩn kỹ,” he tóg Jesus ti.
Jesus tỹ ũn jykre régre ag mỹ vĩ kónãn
37 Ti tỹ ag mré vẽmén kar kỹ Fariseu ũ tóg ti mỹ: “inh mré jẽn kãtĩg,” he mũ. Kỹ tóg ti mré tĩ mũ.
38 Hã ra Jesus tóg Judeu ag jykre han ja tũ nĩ. Judeu ag tóg ag jẽn jé vẽnh nĩpég tĩ. Kỹ tóg Fariseu ẽn mỹ e tĩ, Jesus tỹ vẽnh nĩpég tũ nĩn kỹ. Kỹ tóg to jykrén kónãn mũ sir.
39 Hã ra Jesus tóg ki kanhró nĩ, kỹ tóg ti mỹ: “Fariseu vỹ tỹ ãjag nỹtĩ,” he mũ. “Kỹ ãjag tóg kópa ven ja kupég tĩ, pénky ven ja ke gé, hã ra ti kã tá ke tóg kavéj nĩ. Kỹ ãjag jykre vỹ ge nĩ gé. Jykre há nỹtĩ ve ãjag tóg nĩ, hã ra ãjag tóg vẽjykre pãno kar han tĩ.
40 Krĩ tũ pẽ ãjag nỹtĩ. Ũ tỹ ẽg ven ja han mũ vỹ ẽg jykre han mũ gé mỹr. Ẽg jykre há nĩn kỹ ẽg ven ja vỹ há nĩ gé.
41 Ũ jagãgtãn ra, ãjag tỹ nén ũ tỹ. Vẽjykre há kar han ra, kỹ tóg ãjag tỹ nén ũ kar jãnhkri nĩ ri ke nĩ sir,” he tóg.
42 “Fariseuꞌ, Topẽ vỹ ãjag ve kónãn. Ón kỹ ãjag tóg Topẽ mỹ ãjag jakré tỹ dízimo han kãn tĩ. Ãjag jakré tỹ hortelã tỹ 10 nĩn kỹ ãjag tóg Topẽ mỹ ũn pir nĩm tĩ, ãjag jakré tỹ arruda tỹ ke gé, ãjag jakré kar tỹ mỹr. Hã ra ãjag tóg vẽjykre kuryj han tũ nĩ jãvo. Topẽ to há tũ ãjag tóg nỹtĩ, ti vĩ jẽmẽ jãvãnh ãjag tóg nỹtĩ. Ãjag tỹ ti tỹ ẽg jyvẽn ki króm mré hã ãjag jakré tỹ dízimo han kỹ tóg há tãvĩ tĩnh mũ vẽ. Hã ra ãjag tóg ki króm sór tũ nĩgtĩ,” he tóg.
43 “Fariseuꞌ, Topẽ vỹ ãjag ve kónãn. Vẽnh kanhrãn jafã krẽm ãjag tóg vẽnh kãpãm kỹ nỹtĩ, vẽnh kar tỹ ãjag to: ũn mãg ag vẽ, he jé. Ẽmã kuju tá ãjag tóg mũgtĩ, kỹ tóg vẽnh kar tỹ ãjag mỹ: “Ẽg kanhrãn tĩ, ã mỹ há?” hen kỹ ãjag mỹ sér tĩ.
44 Topẽ vỹ ãjag ve kónãn mỹr. Vẽnh kej si ri ke ãjag nỹtĩ, vẽnh kej to ró tũ ri ke. Vẽnh kar tóg kri mũ tĩ, kỹ ag tóg vẽnh vatánh tá vẽnh kavénh tĩ. Tag ri ke ãjag tóg nỹtĩ,” he tóg,
45 Kỹ Topẽ vĩ to ẽg kanhrãn tĩ ũ tóg ti mỹ: “ã tỹ Fariseu ag mỹ tag tó kỹ ã tóg ẽg to vĩ kónãn mũ gé, ag mré,” he mũ.
46 Kỹ tóg: “ón kỹ ẽg kanhrãn tĩꞌ,” he mũ. “Hỹ, Topẽ vỹ ãjag ve kónãn gé,” he tóg. “Vẽnh kar mỹ ãjag tóg vẽjykre kufy nĩm tĩ. Ti kufy jagy nĩn kỹ ãjag tóg han sór tũ nĩgtĩ. Ge ra ãjag tóg ag mỹ: “ki króm nĩ,” he tĩ.
47 Topẽ vỹ ãjag ve kónãn mỹr. Ãjag jógjóg ve ag vỹ Topẽ vĩ tó tĩ ag kãgtén. Jãvo ãjag tóg ón kỹ ag kej ki rĩr há han tĩ.
48 Hã ki ãjag tóg ãjag jógjóg ve ag tỹ ag kãgtén to: “há ti nĩ,” he tĩ.
49 Hã kỹ Topẽ vỹ ãjag to vĩ ja nĩ. Ki kanhró ti nĩ, hã kỹ tóg ãjag to vĩ kónãn ja nĩ, ha mẽ. “Inh vĩ tó tĩ ag jẽgnẽ jé sóg ke mũ, isỹ ũn vin mũ ag ke gé, ag tỹ ag mỹ inh vĩ tó jé. Hã ra ag tóg ag vóg kónãn ke mũ, ag kãgtén jé ag tóg ke mũ,” he ja tóg nĩ, Topẽ ti.
50 Ãjag jógjóg ve ag vỹ ag kãgtén kãn, hã ra tóg ãjag mỹ há tĩ, hã kỹ Topẽ vỹ, to ãjag vóg kónãn ke mũ. Ũ tỹ hẽn ri ke ag kãgtén ag tóg, ãjag jógjóg ve ag, Topẽ tỹ ẽprã ke ag han kar kỹ.
51 Abel kãke tóg ti tén. Kỹ ãjag jógjóg ve ag tóg ti nón ke ag kãgtén ja nĩgtĩ gé. Vãhã ag tóg Zacarias tén mũ gé, Topẽ ĩn krẽm, Topẽ mỹ nén ũ pũn jafã ẽn tá. Hã kỹ tóg, ãjag tỹ ag kãgtén ri ke nĩ. Kỹ ãjag tóg ag kãgter tag kajãm kãn ke mũ, ha vem nĩ,” he tóg.
52 “Ón kỹ Topẽ vĩ to ẽg kanhrãn tĩꞌ, Topẽ vỹ ãjag vóg kónãn ke mũ. Ũ tỹ Topẽ ki rã sór mũ ra ãjag tóg, ti mỹ tó há han tũ nĩgtĩ, ti tỹ ki rã tũ nĩn jé. Kỹ tóg, ẽg tỹ ũ jo ĩn nĩfénh ẽn ri ke nĩ,” he tóg.
53 Tag pãte tóg, hẽn ra tĩ mũ sir. Kỹ Topẽ vĩ to ẽg kanhrãn tĩ ag tóg, ti mré mũ kỹ ti tugnỹm tĩ, Fariseu ag ke gé. Ag tỹ ti vĩ to ti se sór vẽ.
54 Ón kỹ ag tóg ti ki jẽmẽg tĩ gé sir. Hã ra ag tóg ti vĩ mẽ há han tũ nĩ sir. Nén ũ pir hã to ag tóg jykrén mũ, hã vỹ: ti kãgmĩnh ke, he mũ.
