Lucas tỹ rá 12:1-59
12 Hã ra ũ tỹ hẽn ri ke mil (ke) ag vỹ, vẽnh mãn kỹ nỹtĩ. Kỹ ag tóg, jagnẽ sãnsãn mũ sir. Kỹ Jesus tóg ag kanhrãn mũ. Ti mré mũ tĩ ag kanhrãn vén tóg mũ, kỹ tóg ag mỹ: “Fariseu ag jykre han sór tũg nĩ,” he mũ. “Ẽmĩ jãgja jafã ri ke ti nĩ, ag jykre ti. Hã kỹ tóg Topẽ mỹ kórég tãvĩ nĩ,” he tóg.
2 “Ẽg tỹ péju kỹ nén han mũ vỹ, vẽnh ven kãn ke mũ. Ẽg tỹ vẽnh kar vatánh tá nén to jykrén mũ vỹ, vẽnh ven kãn ke mũ, kurã tỹ ẽgno kã,” he tóg.
3 “Ãjag tỹ vẽnh kar vatánh tá vẽmén ja ẽn mẽ kãn jé ag tóg ke mũ, vẽnh kar. Ãjag tỹ kékén kỹ nén tó ja ẽn tó kãn jé ag tóg ke mũ, jamã há ra, ãjag tỹ ĩn kã tá nén tó ja ẽn. Hã kỹ vẽjykre régre han tũg nĩ,” he tóg.
Ẽg tỹ ẽprã pãꞌi ag kamẽg ke tũ
4 “Ha mẽ, iso há ãjag nỹtĩ. Pãꞌi ag tỹ kejẽn ẽg tén sór mũ ra ag kamẽg tũg nĩ. Ag tỹ ẽg tén kar kỹ ag tóg, ẽg tỹ hẽ ri kenh ke tũ nĩ sir. Hã kỹ ag kamẽg tũg nĩ.
5 Ãjag mỹ sóg tónh ke mũ ha, ãjag tỹ ũn kamẽg ke ti, hã vỹ: Topẽ, he mũ. Ti hã ne ẽg tén kar kỹ nũgme ki ẽg vãm ki kanhró nĩꞌ, mỹr ha mẽꞌ. Kỹ ti hã kamẽg nĩ.
6 Sẽsĩ tỹ 5 (ke) kato ag tóg jãnkamy pir nĩm tĩ, ag tỹ ko jé. Hã ra Topẽ pijé ag kã jatun mũꞌ. Ag ki rĩr tóg nĩ nĩ.
7 Ẽg ki rĩr tóg nĩ gé. Ẽg tỹ nén vég mũ kar ki kanhró tóg nĩ. Hã kỹ tóg, ẽg gãnh nĩkrén kãn ja nĩ gé. Sẽsĩ kãfór ãjag tóg nỹtĩ, Topẽ mỹ. Ãjag kã mĩ ũn pir tóg sẽsĩ e kãfór nĩ. Hã kỹ ag kamẽg tũg nĩ, ũ tỹ ẽg tén sór mũ ag,” he tóg.
Ẽg tỹ Jesus kãmén ke
8 “Hã kỹ sóg ãjag mỹ tag tó mũ. Ẽprã ke ag mỹ: “tỹ sóg ti mré ke nĩ,” hem nĩ, iso. Ag kamẽg tũg nĩ. Kỹ sóg ãjag tónh ke mũ gé, Topẽ tỹ jẽgnẽ jafã ag mỹ, kurã ẽn kã, ãjag tỹ tỹ inh mré ke nỹtĩ ti. Tỹ sóg ẽprã ke fi kósin nĩ, mỹr, ha mẽ.
9 Ãjag tỹ ẽprã ke ag mỹ inh kãmén tũ nĩn kỹ sóg ãjag kãmén ke tũ nĩ gé, Topẽ tỹ jẽgnẽ jafã ag mỹ, ãjag tỹ iso: “ti ki kagtĩg sóg nĩ,” hen kỹ,” he tóg.
10 “Tỹ sóg ẽprã ke fi kósin nĩ. Ag tỹ iso vĩ kónãn mũ ra sóg ag mỹ vẽnh pãte fón sór mũ. Ag tỹ hã ra Topẽ kuprĩg to vĩ kónãn kỹ Topẽ tóg ag mỹ vẽnh pãte fón mãn ke tũ nĩ,” he tóg.
11 “Ãjag vin jé ag tóg ke mũ, pãꞌi ag mỹ, governador ag mỹ ke gé, ag tỹ ãjag sigse jé. Ẽg vẽnh kanhrãn jafã krẽm ag tóg ãjag ki jẽmẽ sór ke mũ, ãjag tỹ inh ki ge kỹ nỹtĩ ti, ha vem nĩ. Hã ra to krĩ kufy han tũg nĩ, ãjag tỹ ag mỹ inh kãmén ke ẽn to.
12 Topẽ kuprĩg hã vỹ ãjag kanhrãn ke mũꞌ, kurã ẽn kã. Hã kỹ ãjag tóg tónh ke mũ sir,” he tóg.
Ẽg tỹ nén ũ to én ke tũ
13 Kỹ ũn e ag kã mĩ ũ tóg Jesus mỹ: “Senhorꞌ,” he mũ. “Ẽg panh vỹ tóg ter. Kỹ inh kãke mré vĩm nĩ, ẽg tỹ ti tỹ nén kar tỹ vẽnh kãpãm jé,” he tóg.
14 Hã ra tóg ti mỹ: “vó,” he mũ. “Isũ pijéꞌ,” he tóg. “Inh pijé ã mỹ ã kuge ve sór mũꞌ. Inh pijé ã tũ tỹ vẽnh kãpãm sór mũꞌ,” he tóg.
15 Kỹ tóg ag kar mỹ: “ker nén ũ to én hẽꞌ,” he mũ. “Ẽg tỹ nén kar nĩ pijé ẽg rĩr han ke mũꞌ. Ẽg tũ mág nĩ tugrĩn ẽg pijé mũ há han ke mũꞌ,” he tóg.
16 Kỹ tóg ag mỹ: “vẽjykre há vỹ ge nỹnh mũ, ha mẽ,” he mũ. “Ũn riko tóg nĩ ja nĩgtĩ mỹr,” he tóg. “Ti japỹ vỹ nén kar kanẽ e han ja nĩgtĩ.
17 Kỹ tóg: “inh hỹn ne han mũ ha? Sỹ krẽm inh jakré kanẽ kar nĩm jé,” he mũ.
18 “Inh pãjó kókén jé sóg ke mũ, sỹ ti jẽgja ki ũn mág han jé, kỹ sóg krẽm isũ kar vin mũ, inh jakré kanẽ kar ti,” he tóg mũ, to jykrén kỹ.
19 “Kỹ sóg jatun mỹ nĩnh mũ sir. Isũ vỹ prỹg tỹ hẽn ri ke pétẽm mũ. Kỹ sóg rãnhrãj mãn ke tũ nĩ ha. Jatun mỹ sóg jẽg nĩnh ke mũ, kron sóg nĩnh ke mũ gé, inh mỹ sér tĩn kỹ,” he tóg, to jykrén kỹ, ũn riko ti.
20 Hã ra Topẽ tóg ti mỹ: “krĩ tũ ã nĩ,” he mũ. “Kuty tag kã ã tóg ter ke mũ ha. Kỹ ã tũ mág tag vỹ tỹ, ũ tũ nĩnh ke mũ ha? Ma tĩg ke tũ ã tóg nĩ,” he tóg ti mỹ, Topẽ ti,” he tóg.
21 “Ge tóg nĩ, ẽg tỹ ga kri nén ũ há ve sór kỹ. Ma mũnh ke tũ ẽg tóg nĩ, kanhkã ra. Ẽg tỹ kanhkã tá tũ mág nỹtĩnh ke tag hã ne há nĩꞌ,” he tóg.
Ẽg tỹ nén ũ to krĩ kufy han ke tũ
22 Kỹ tóg ti mré mũ tĩ ag mỹ: “ha vé,” he mũ. “Nén ũ to jykrén kỹ krĩ kufy han tũg nĩ,” he tóg, “vẽjẽn to, ke tũ nĩ kỹ kur to. Inh hỹn ne konh mũꞌ? Inh hỹn ne tunh mũꞌ? he tũg nĩ.
23 Topẽ tỹ ẽg han ja vẽ mỹr, ẽg tỹ ga kri mũ jé. Hã kỹ tóg ẽg jẽn ki rĩr ke mũ gé, ẽg kur ki ke gé.
24 Sẽsĩ to jykrén nĩ. Ag mỹ ẽkrãn tĩꞌ? Vó. Ag mỹ ag jakré kunũg tĩꞌ? Vó. Ag mỹ pãjó han tĩꞌ? Vó, ke tũ ag tóg nĩgtĩ. Ge ra Topẽ tóg ag jẽn tĩ. Jẽsĩ kãfór ãjag tóg nỹtĩ, Topẽ mỹ.
25 Kỹ ẽg tóg Topẽ tỹ ẽg jé prẽr kỹ mũnh ke mũ gé. Ẽg pijé mũnh ke tũ nĩꞌ. Ẽg tỹ to krĩ kufy han mũ ra ẽg tóg tĩg mũ.
26 Ẽg pijé ẽg krĩ kufy tugrĩn, ẽg krĩ há tugrĩn mũnh ke tũ nĩꞌ. Mũ jé ẽg tóg ke mũ, ti tỹ ẽg jé prẽr kỹ. Hã kỹ nén ũ ũ to krĩ kufy han tũg nĩ.
27 Ka fej to jykrén nĩ gé. Jatun mỹ tóg mog tĩ. Rãnhrãj tũ tóg nĩgtĩ, kur han tũ tóg nĩgtĩ. Hã ra tóg sĩnvĩ nỹtĩgtĩ. Kỹ pãꞌi mág tỹ Salomão ẽn kur tóg ri ke tũ nỹtĩ ja nĩgtĩ, ti sĩnvĩ ja ra. Ki hã sóg tó mũ mỹr.
28 Topẽ hã ne ka fej sĩnvĩ han tĩꞌ. Hã ra tóg kãnhmar kãgter tĩ. Ũri tóg há nỹtĩ, tỹ vaj kỹ tóg kógungur nỹtĩgtĩ. Topẽ tỹ ka fej sĩnvĩ han kỹ tóg ãjag kur ki rĩr ke mũ gé, ha vem nĩ. Kỹ ti to: “ti mỹ ẽg mỹ kur nĩm mũ vỹ?” he tũg nĩ.
29 “Inh hỹn ne konh mũꞌ, ũri?” he tũg nĩ gé. To krĩ kufy han tũg nĩ.
30 Topẽ ki ge tũ ag vỹ tag to jykrén mág tĩ. Hã ra ẽg jóg tỹ Topẽ vỹ ki kanhró nĩ, ẽg tỹ nén konh ke mũ ki, ẽg kur ti ke gé. Kỹ to krĩ kufy han tũg nĩ.
31 Topẽ tỹ tỹ ẽg pãꞌi nĩ ẽn hã ve jé vãsãnsãn nĩ. Tag hã to jykrén nĩ. Kỹ Topẽ vỹ ãjag mỹ ãjag tỹ nén ve sór mág mũ ẽn vin ke mũ sir,” he tóg.
Kanhkã tá ẽg tũ
32 “Kamẽg tũg nĩ, ãjag pipir nỹtĩ ra. Ẽg jóg tỹ Topẽ vỹ ãjag to há nĩ, hã kỹ tóg ãjag mỹ kanhkã ti ven sór mũ, ha mẽ.
33 Ãjag tỹ nén kar vin nĩ, ũn vẽsỹrénh mũ ag mỹ. Kỹ ãjag tóg kanhkã tỹ tỹ nén ũ mág nỹtĩnh mũ. Tá ãjag kuge tóg tũꞌ he mãn ke tũ nĩ. Tag ki ẽg tóg ẽg jãnkamy fón tĩ, nén ũ kar to. Tá tóg tũꞌ he jãvãnh nĩ, ẽg kuge ti. Tá ũ tóg péjunh kãtĩg ke tũ nĩ gé, tá ti ga tóg kagranh ke tũ nĩ gé.
34 Ãjag tỹ ga kri tỹ nén ũ mág nỹtĩn kỹ ãjag tóg ga kri mũ mág sór mũ. Ãjag tỹ hã ra kanhkã tỹ tỹ nén ũ mág nỹtĩ sór kỹ tag hã ne há nĩ,” he tóg.
Jesus kãtĩg mãn jãvãnh ke
35 “Ẽg kur tỹ ẽg tóg vẽsógfĩg tĩ, ẽg tỹ rãnhrãj há han jé. Ẽg néj grug ẽg tóg tĩ, kuty kỹ, ẽg tỹ ve há han jé. Ẽn ri ke han nĩ, ãjag tỹ inh kãtĩg mãn ke jãvãnh kỹ, nén ũ tỹ ãjag kutãn tũ nĩ jé, ãjag tỹ inh mré mũnh ke to.
36 Kỹ ãjag tóg tỹ ũ camarada ri ke nỹtĩ. Kejẽn ag patrão vỹ hẽn kã tá tĩg mũ, ti prũ ke ki fénhta mág han jé. Kỹ ti camarada ag vỹ ti tỹ tá vỹn ke jãvãnh nỹtĩ. Ag tỹ ti jãvãnh há han kỹ tóg há tĩ, ag nũgnũr tũ nĩn kỹ. Kỹ ag tóg kãnhmar ti tỹ jãnkã tỹ tórón tórón ke mẽnh mũ.
37 Hã ra tóg kejẽn jun mũ sir. Kỹ tóg sér tĩ, ti camarada ag tỹ ti jãvãnh nỹtĩn kỹ. Kỹ tóg ag mỹ vĩ há han ke mũ sir. Kỹ tóg vẽsóg fĩn kỹ ag mỹ: “nĩgnĩ ra ver, mesa to,” henh ke mũ sir. Kỹ tóg ti camarada ag mỹ vẽjẽn ven ke mũ, ag patrão ti. Ki hã sóg tó mũ,” he tóg.
38 “Hẽn ri ke mũn tóg meia noite ki jun ke mũ, hẽn ri ke mũn tóg galo kyr mũ ra jun ke mũ. Ti camarada ag tỹ ti jãvãnh nỹtĩn kỹ tóg ag mỹ vĩ há tãvĩ han ke mũ sir, ha vem nĩ,” he tóg.
39 “Kỹ tag to jykrén nĩ, ha mẽ. Inh kãtĩg mãn ke vỹ tỹ ũ tỹ nén ũ pigju tĩ kãtĩg ri ke nĩnh mũ. Ũ tỹ ti ĩn krẽm nĩ ẽn pijé ki kanhró nĩꞌ, ti kãtĩg ke ki. Ti tỹ ki kanhró nĩ ra tóg ti tỹ nén ki rĩr ke mũ vẽ, ti tỹ ti tũ mãg tũ nĩ jé. Hã ra tóg ki kagtĩg nĩ.
40 Ge ti nĩ, inh kãtĩg mãn ke ti. Ha vẽnh ki rĩr. Ẽprã ke fi kósin vỹ kãtĩg ke mũ, ãjag tỹ ti kãtĩg ke to jykrén tũ hã ra,” he tóg.
Ũn camarada kãme
41 Kỹ Pedro vỹ ti mỹ: “Senhorꞌ,” he mũ. “Ã tỹ ũ mỹ ke nẽ? Ã tỹ ũ tỹ ã ki ge tũ ag mỹ ke mỹ, ẽg mỹ ke mỹ vó?” he tóg.
42 Kỹ tóg: “kejẽn patrão tóg hẽn ra tĩg sór mũ. Kỹ tóg ti camarada ag kã ũ kuprẽg mũ, ti tỹ ti jo ag ki rĩr jé. Ũ tỹ ti rãnhrãj ki rĩr há han tĩ ẽn kuprẽg tóg mũ, ti tỹ ag mỹ vẽjẽn ven jé.
43 Ti tỹ ag ki rĩr há han kỹ ti patrão vỹ, ti mỹ vĩ há han ke mũ, ti kãtĩg mãn kỹ.
44 Ti tỹ tóg pãꞌi han ke mũ, ti tỹ ti tũ ki rĩr kãn jé sir. Ki hã sóg tó mũ mỹr, ha mẽ.
45 Ti camarada ẽn jykre kórég nĩn kỹ tóg vẽnh mỹ nĩ jãvo, ha mẽ. To jykrén kỹ tóg: ẽg patrão vỹ kãtĩg vãnh han mũ, he mũ. Kỹ tóg ti mré ke ag vóg kónãn mũ. Ag mrãnmrãn tóg mũ sir, fag ke gé. Kỹ tóg jatun mỹ jẽn mág han mũ. Ũn kronkron tĩ ag mré tóg kron kỹ pépév tĩ nĩ sir.
46 Kỹ ti patrão vỹ ti kãnhmỹ jun ke mũ, ha vem nĩ, ti tỹ ti jun ke kurã ki kagtĩg nĩn kỹ. Kỹ tóg ti vóg kónãn ke mũ gé sir. Kỹ tóg ti fón ke mũ, Topẽ vĩ mranh tĩ ag mré,” he tóg.
47 “Ti camarada ũ vỹ ti patrão kãtĩg ke jo ki rĩr há han tũ nĩgtĩ, ti patrão tỹ ti mỹ tó mũ ra. Ti vĩ ki tóg króm tũ nĩgtĩ. Kỹ tóg ti mrãnmrãn mág ke mũ.
48 Ũ tóg ti tỹ nén han ke mũ mẽ há han tũ nĩ. Kỹ tóg vẽjykre kórég han mũ gé. Kỹ ti patrão vỹ ti mrãnmrãn ke mũ gé. Ti mrãnmrãn sĩ han jé tóg ke mũ, jãvo.
Ũ tóg vẽnh kanhrãn mág han tĩ. Kỹ Topẽ tóg ti tỹ vẽjykre há han ẽn ve sór mũ,” he tóg.
Ũ tỹ Jesus tugrĩn ẽg kato tẽnh ke
49 Kỹ Jesus tóg: “ga kri inh mur, isỹ re pũr tĩg ri ke han jé,” he mũ, “hã vỹ: ũn e tỹ inh ki ge, he mũ. Sỹ re pũr tĩg ri ke ẽn venh há tóg tĩ, hã ra tóg ver grug tũ nĩ.
50 Ti grug to hã sóg vẽsỹrénh ke mũ. Iser ke vẽ, kỹ tóg inh mỹ e tĩ. Sỹ ve jãvãnh tóg tĩ vẽ,” he tóg.
51 “Ãjag hỹn iso: “vẽnh kar tỹ jagnẽ to há han jé tóg ke mũ,” he tĩ. Hã tũ vẽ. Ũ tỹ hẽn ri ke tỹ jagnẽ kato tẽgtẽ han jé sóg ke mũ, ha vem nĩ.
52 Ha vé, ĩn pir krẽm ke fag vỹ jagnẽ kato tẽnh ke mũ. Ũn tãgtũ fag vỹ ũn régre fag kato tẽgtẽnh ke mũ. Kar kỹ ũn régre ẽn fag vỹ ũn tãgtũ fag kato tẽgtẽnh ke mũ gé sir.
53 Jagnẽ kato fag tóg jagnẽ to jũgjũnh ke mũ. Ũ tóg ti kósin kato tẽnh ke mũ, kỹ ũ tóg kejẽn ti panh kato tẽnh ke mũ gé. Ũ fi vỹ fi kósin fi kato tẽnh ke mũ, kỹ ũ fi vỹ fi mỹnh fi kato tẽnh ke mũ gé. Kỹ ũ tóg ti má fi kato tẽnh ke mũ, kỹ fi tóg fi jamré kato tẽnh ke mũ gé sir. Ge ti nĩgtĩ,” he tóg.
Jesus jykre ki kanhrãn
54 Kỹ tóg vẽnh kar mỹ: “kanhkã ve kỹ ãjag tóg ta ki kanhró nỹtĩ,” he mũ. “Kanhkã góg tỹ tãtá kãtĩn kỹ ãjag tóg: “ta vỹ kutẽnh mũ,” he tĩ. Ki kanhró ãjag tóg nỹtĩgtĩ.
55 Kar ãjag tóg kãka ki kanhró nỹtĩ gé. “Tag tán kãtĩ mũ, kãka ti, kỹn jũ jagy han mũ, ha vem nĩ,” he ãjag tóg tĩ gé.
56 Ki kanhró ãjag tóg nỹtĩ, ta jykre ti, kãka jykre ti. Hã ra ãjag tóg inh jykre ki kanhrãnrãn sór tũ nĩ, sỹ ũri ãjag mỹ tó mũ tag ti. Kutu ãjag nỹtĩ,” he tóg.
Ẽg tỹ jagnẽ mỹ vẽnh pãte fón
57 “Kỹ ãjag tóg vẽjykre kuryj to jykrén tũ nĩ gé, ãjag tỹ jagnẽ mỹ vẽnh pãte fón jé, ãjag tỹ ver ga kri mũn kỹ.
58 Kejẽn ãjag tóg nén ũ tugrĩn jagnẽ to jũ mũ. Kỹ ãjag kã ũ tóg hẽn ri ke mũn pãꞌi mỹ tónh mũ sir. Ti tĩg ken jo ti mỹ: “inh mỹ vẽnh pãte fón,” hem nĩ. Ke tũ nĩ mũ ra pãꞌi vỹ ã jykre pãno venh ke mũ, kỹ tóg porisa mỹ: “ti se ra,” henh ke mũ. Kỹ tóg ã senh ke mũ sir.
59 Ha mẽ, tá ã kãnhmar kãkutẽ mãn ke tũ nĩ. Ã tỹ kajãm kãn kar kỹ ã hẽn ri ke mũn tá kãkutẽ mãn ke mũ sir,” he tóg.
