Lucas tỹ rá 14:1-35
14 Kejẽn tóg vẽnhkán ke kurã tá krỹg mũ. Kỹ tóg Fariseu ag pãꞌi ũ ĩn krẽm nĩ nĩ, ti mré jẽn jé. Hã ra ag tóg tá ti tỹ rĩr mũ. “Ti mỹ vẽnhkán ke kurã ki rãnhrãj ke tũ?” he ag tóg mũ.
2 Hã ra ũn kaga ũ tóg tá jun mũ. Kãnhpar kãn kỹ tóg jẽ.
3 Kỹ Jesus tóg pãꞌi ag mỹ: “ẽg tỹ vẽnhkán ke kurã ki ũ tỹ háꞌ hen mỹ há nĩ, mỹ kórég nĩ, vó?” he mũ.
4 Hã ra ag tóg ti mỹ nén ũ tó tũ nĩ. Kỹ tóg ũn kaga ẽn vóg kỹ ti tỹ háꞌ he mũ. Kỹ tóg ti mỹ: “ha tĩg ge,” he mũ.
5 Kỹ tóg ag mỹ: “kejẽn ãjag kósin ũ tóg goj ki kutẽnh mũ, ke tũ nĩ kỹ ãjag mẽg tỹ monh,” he mũ. “Vẽnhkán ke kurã ki tóg ki kutẽnh mũ, hẽn ri ke mũn. Kỹ ãjag tóg ti kunũnh ke mũ gé,” he tóg.
6 Kỹ ag tỹ ti mỹ ne tónh ke tóg tũ tĩ sir.
Fénhta to vẽjykre
7 Hã ra tóg ti mré jẽg nỹtĩ ag tỹ jẽn vén sór vég mũ, ag tỹ tỹ ũn mág nỹtĩ jé. Hã kỹ tóg ag mỹ:
8 “kejẽn ũ tóg ãjag kógfyn mũ, ãjag tỹ ti prũg ke to fénhta ve jé,” he mũ. “Kỹ ti fénhta kã jẽn vén sór tũg nĩ. Hẽn ri ke mũn ã kãfór nĩ ũ tóg tá jun mũ.
9 Kỹ fénhta ki rĩr mũ ẽn tóg ã mỹ: “toreg verꞌ. Ti jẽn kar kỹ hã ã tóg jẽn ke mũ,” henh ke mũ. Kỹ tóg ã mỹꞌa tĩnh mũ sir, ha mẽ.
10 Kỹ ã tỹ fénhta venh tĩg kỹ mẽ kã nĩm nĩ ver. Kỹ fénhta ki rĩr mũ vỹ ã mỹ: “ha jẽn vén, fag mré,” henh ke mũ. Kỹ ã pijé mỹꞌãg ke mũꞌ,” he tóg.
11 “Hã kỹ tóg ũ tỹ ag kãfór nĩ sór mũ térem ke mũ, vẽsỹkã, Topẽ ti, ha vem nĩ. Jãvo tóg ũ tỹ: “tỹ inh ũn sĩ nĩ,” he mũ ẽn jãnfyn ke mũ, ha vem nĩ,” he tóg, Jesus ti.
Ẽg tỹ ũn jagtar ag jagãgtãn
12 Kỹ tóg ũ tỹ ti kógfyn mũ ẽn mỹ kãmén mũ gé. Ti mỹ tóg: “ã tỹ fénhta han sór kỹ ũn riko ag mỹ tó sór tũg nĩ, ã mré ke fag mỹ, ã kãke ag mỹ, ã jãvy ag mỹ. Ã rã nỹtĩ ag mỹ tó tũg nĩ gé,” he mũ. “Ã tỹ ũn riko ag mỹ tó kỹ ag tóg vẽnh kaja jé ã mỹ fénhta han sór mũ gé. Kỹ ã tóg ã fénhta kaja ti vég mũ sir, ẽprã.
13 Ã tỹ fénhta han sór kỹ ũn kaga kỹ rãnhrãj vãnh ag mỹ tóm nĩ, ũn kãnhgrĩ ag mỹ, ũn kyvó ag mỹ.
14 Ã tỹ tag han kỹ Topẽ vỹ ã ve há han ke mũ, ha vem nĩ. Ã mỹ ag tóg fénhta han ke tũ nĩ, ag tỹ tỹ nén ũ tũ nỹtĩn kỹ. Kỹ ã tóg ã rĩr mãn kỹ ti kaja venh ke mũ, Topẽ tỹ ũn jykre kuryj kar ag rĩnrĩn mãn ke kurã ẽn kã,” he tóg.
Fénhta mág to vẽjykre
15 Kỹ tóg tá ti mré jẽg nĩ ũ mỹ mẽ há tĩ, ti vĩ tag ti. Kỹ tóg ti mỹ: “ũ tỹ Topẽ tỹ tỹ ẽg pãꞌi nĩ vég mũ mỹn hỹn sér pẽ tĩnh mũ, ũ tỹ tá fénhta vég mũ ẽn mỹ,” he mũ.
16 Kỹ tóg ti mỹ: “hỹ, kanhkã tá fénhta vỹ ge nĩnh mũ, ha mẽ,” he mũ. “Kejẽn ũ tóg nĩgtĩ. Fénhta mág han sór tóg mũ, kỹ tóg ũ tỹ hẽn ri ke ag mỹ tó ja nĩ, ti tỹ fénhta han ke to hã.
17 Ti fénhta kurãn kã tóg ti camarada jẽnẽg mũ, ti tỹ ũn kógfyn kỹ nỹtĩ ag mỹ: “ha kãmũjẽg, kar kỹ tóg nĩ ha,” he jé.
18 Hã ra ag tóg ve sór tũ nĩ, ag kar ti. Ũ tóg ti mỹ: “ga kajãm inh, hã kỹ sóg venh tĩ mũ ver. Ũri tóg inh mỹ vẽnh mỹ tĩ,” he mũ.
19 Kỹ ũ tóg ti mỹ: “monh gé sóg, monh tỹ 5 (ke) régre,” he mũ gé. “Kỹ sóg ag venh tĩ mũ ver,” he tóg mũ gé sir.
20 Kỹ ũ tóg ti mỹ: “ũri sóg prũg mũ ha, hã kỹ tóg vẽnh mỹ tĩ,” he mũ gé.
21 Kỹ ti camarada tóg ti mỹ tónh kãtĩ mũ. Kỹ tóg jũ mũ. Ti mỹ tóg: “ẽmĩn mág ra tĩg, ẽpry kãsir ra ke gé, ẽmã kar ki,” he mũ. “Kỹ ũn jagtar ag tatĩ kãtĩg, ũn kãnhgrĩ ag, ũn kyvó ag, ũn tĩg vãnh ag ke gé,” he tóg.
22 Kỹ tóg tĩg mãn mũ. Tá vỹn ke kỹ tóg ti mỹ: “ke kãn inh huri. Hã ra tóg fór tũ nĩ ver, fénhta jo ĩn ti,” he mũ.
23 Kỹ ti patrão tóg: “vẽsỹkã tĩg mãn ge,” he mũ. “Vãnh kã mĩ tĩg, ẽmã kãsir pẽ kã mĩ ke gé, ẽpry ra, ẽmĩn jagma,” he tóg. “Ag kutãn nĩ, fénhta jo ĩn fór jé,” he tóg.
24 Hã kỹ sóg ãjag mỹ ke mũ. Ũ mỹ sóg tó vén ja nĩ, hã ra ag tóg inh fénhta venh ke tũ pẽ nĩ,” he tóg. Jesus tỹ Fariseu ag mré jẽn kỹ ag mỹ kãmén hã vẽ.
Ẽg tỹ ẽg jykre tovãnh
25 Kejẽn ũn e ag tóg ti nón mũ mũ. Kỹ tóg ag jé vĩrĩn ke kỹ ag mỹ:
26 “ũ tỹ inh mré tĩg pẽ han sór mũ jé inh hã to há kãfór nĩ, ti han mũ fag kri, ti prũ fi kri, ti krẽ kri, ti kãke ag kri, ti jãvy ag kri, ti ve fag kri, vẽnh kri ke gé, mỹr, ha mẽ,” he mũ. “Ke tũ nĩ mũ ra tóg inh mré kãtĩg ke tũ nĩ, kỹ tóg tỹ inh mré ke nĩnh ke tũ nĩ gé.
27 Ha vé, ag tỹ inh krunh tỹ inh kri fi kỹ sóg tĩg ke mũ, ag tỹ to isa kỹ isén jé, ha vem nĩ. Vẽnh nenh ke tũ sóg nĩ. Ũ tỹ inh ri ke han sór tũ nĩn kỹ tóg inh mré kãtĩg ke tũ nĩ, kỹ tóg tỹ inh mré ke nĩnh ke tũ nĩ gé,” he tóg.
28 “Ũ tỹ ĩn mág han sór mũ to jykrén. Ti jãnkamy nĩkrén vén jé tóg ke mũ. Kỹ tóg ĩn kaja to jykrén ke mũ gé sir. Ti tỹ ti mỹ há nĩn kỹ tóg vãhã ĩn han sór ke mũ.
29 Ti tỹ to hã to jykrén há han tũ nĩn kỹ tóg vẽnh mỹ tĩ. Kỹ tóg ĩn jẽg ken ki kũm kỹ ti krogrog han ke mũ sir. Ti tỹ ti krogrog han mũ ra ti jãnkamy tóg tũꞌ henh ke mũ, kỹ tóg tovãnh ke mũ sir. Kỹ ti mré ke ag tóg ti to vĩ kỹ ti nynh mũ sir.
30 Ti to ag tóg: “ĩn mág han sór tóg mũ vẽ, hã ra tóg to jykrén há han ja tũ nĩ, hã kỹ tóg kar tũ nĩ,” henh ke mũ,” he tóg.
31 “Kar kỹ pãꞌi mág to jykrén nĩ gé. Pãꞌi ũ tỹ ti mré vẽnh génh han sór kỹ tóg ti krẽm ke ag nĩkrén vén ke mũ gé sir, vẽnh génh ke to hã. “10 mil (ke) ẽg nỹtĩ,” he jé tóg ke mũ. “Ẽg mỹ ag tỹ hẽn ri kenh mũ vỹ? 20 mil (ke) ag nỹtĩ. Ag mỹ ẽg tỹ tũꞌ he kãn ke tũ nĩ vỹ?” he jé tóg ke mũ.
32 Kỹ tóg pãꞌi ũ ẽn mỹ vẽnh vĩ jẽnẽnh mũ, ti tỹ kór há tá nĩ hã ra. Kỹ tóg ti mỹ: “inh ã mỹ ne nĩm mũ, ã tỹ isovãnh jé?” henh ke mũ,” he tóg.
33 “Hã kỹ inh mré mũ pẽ han ke to jykrén nĩ. Iso há kãfór nỹtĩm nĩ, ãjag tũ kar kri. Ke tũ nĩ mũ ra ãjag pijé inh mré mũ pẽ han mũꞌ,” he tóg.
Sa to vẽjykre
34 “Sa vỹ há nĩ. Hã ra ti kãhór nĩn kỹ ẽg tỹ ne tỹ tỹ kajãꞌ he mãn ke tóg tũ tĩ,” he tóg.
35 “Ti kãhór nĩn kỹ tóg kórég nĩ. Fón ẽg tóg tĩ. Ẽg pijé ẽg japỹ ki ti fón tĩꞌ, ẽg jakré tỹ tóg háꞌ henh ke tũ nĩ gé. Ti fón pẽ han jé ẽg tóg ke mũ. Ri ke ãjag nỹtĩ, ãjag tỹ inh mré mũ pẽ han tũ nĩn kỹ. Jẽmẽ há han nĩ, sỹ ãjag mỹ nén tó mũ tag ti,” he tóg.
