Lucas tỹ rá 18:1-43
18 Kỹ tóg ag kanhrãn mũ, ag tỹ kurã kar ki Topẽ mré vẽmén jé, to krónh ke tũ nĩ jé. Kỹ tóg:
2 “kejẽn pãꞌi tóg nĩgtĩ, ẽmã ũ tá,” he mũ. “Topẽ kamẽg vãnh tóg nĩ, ti jykre pãno nĩn kỹ. Kỹ tóg ti mré ke ag kamẽg vãnh pẽ nĩgtĩ gé. Kórég pẽ ti nĩgtĩ.
3 Ẽn jamã tá ũ fi tóg nĩgtĩ gé, ũn mén ter ja fi. Ẽn fi vỹ kejẽn ti mỹ: “inh lograr he sór mũ ẽn ag jo inh ki rĩr,” he mũ.
4 Hã ra tóg mẽ jãvãnh nĩ. Jatun mỹ tóg nĩ nĩ, kysã tỹ hẽn ri ke ki. Kỹ fi tóg ti tá jun tỹ hẽn ri ke han mũ gé. To krónh ke tũ fi nĩ. Kỹ tóg kejẽn to jykrén mũ. “Topẽ kamẽg vãnh inh nĩgtĩ,” he tóg.“Ũ kamẽg vãnh inh nĩgtĩ gé.
5 Hã ra fi tóg isovãnh tũ pẽ nĩ. Kurã kar ki fi tóg inh mỹ to vĩnh kãtĩ mũ. Kỹ inh hỹn fi jy nĩgãn mũ ha, ke tũ nĩ mũ ra fi tóg ijũ han ke mũ, fi tỹ inh venh kãtĩg to krónh ke tũ nĩ kỹ, ha vem nĩ,” he tóg, pãꞌi kórég ti,” he tóg.
6 Kỹ tóg ag mỹ: “ti vĩ jẽmẽ ra,” he mũ. “Jykre pãno ti nĩ, hã ra tóg fi tỹ ti mỹ vĩ e ẽn to fi kren han sór mũ,” he tóg.
7 “Hã kỹ Topẽ vỹ ãjag krenkren han ke mũ gé. Ãjag kuprẽg ja tóg nĩ mỹr, kỹ ti mré vẽmén nĩ. Kurã ki ti mré vĩm nĩ, kuty tá ke gé. Ãjag kren han tũ nĩ ve ti nĩ, kejẽn.
8 Hã ra tóg ãjag krenkren han ke mũ, kãnhmar, ha vem nĩ. Ki hã sóg tó mũ,” he tóg. “Hã ra ag mỹ ẽprã ke fi kósin ẽn kãtĩg mãn kỹ ti mré mũ sór mũ vỹ?“ he tóg.
Ẽg tỹ: “tỹ inh ũn há nĩ,” henh ke tũ
9 Ũ tỹ ti vĩ mẽg mũ ẽn ag kã mĩ ũ ag tóg vẽso: “tỹ ẽg tóg ũn há nỹtĩ,” he tĩ. “Jo ũ ag ne kórég nỹtĩꞌ, inhhã,” he ag tóg tĩ. Ẽn ag kanhrãn sór tóg mũ. Kỹ tóg ag mỹ:
10 “kejẽn Fariseu ũ tóg nĩgtĩ,” he mũ. “Topẽ ĩn ra tóg tĩ mũ, tá ti mré vĩ jé. Ti mré ũ tóg ra tĩ mũ gé, ũ tỹ governo mỹ jãnkamy mãg tĩ ti. Ti mré vĩ sór tóg mũ gé.
11 Kỹ Fariseu tóg: “Topẽ,” he mũ. “Inh mỹ tóg há tĩ, isỹ jykre kórég tũ nĩn kỹ. Ũ ag tóg nén ũ péju tĩ, ũ ag tóg nén ũ vẽnh mỹ han tĩ inhhã, jãvo inh pijé han tĩꞌ. Ag prũ tũ fag mré ag tóg nỹgnỹ tĩ. Kỹ governo mỹ jãnkamy mãg tĩ tag ti vỹ kórég nĩ gé, inhhã.
12 Ag jãvo sóg vẽjykre há han tĩ. Semana kar ki sóg vãkre régre han tĩ, jẽg tũ nĩn kỹ. Isũ kar tỹ sóg dízimo han tĩ, ã mỹ,” he tóg, Fariseu ti, Topẽ mỹ.
13 Hã ra governo mỹ jãnkamy mãg tĩ ẽn tóg kuvar há tá jẽ nĩ, mỹꞌãg kỹ. Kỹ tóg kanhkã ki ẽvãnh tũ nĩ gé. Ti fe kri tóg kãgmĩg mũ, kỹ tóg: “Topẽ,” he mũ gé. “Ã vĩ mranh inh mỹr. Ã mỹ inh jagãgtãn ke tũ hã ra?“ he tóg.
14 “Ha mẽ, Topẽ vỹ ti mỹ vẽnh pãte fón, hã kỹ tóg jatun mỹ vyr. Jãvo tóg Fariseu ẽn mỹ vẽnh pãte fón tũ nĩ. Ge ti nĩgtĩ. Ẽg tỹ vẽso: “há inh nĩ,” hen kỹ Topẽ tóg ẽg mỹ vẽnh pãte fón ke tũ nĩ. Ẽg tỹ hã ra vẽso: “jykre kórég inh nĩ,” hen kỹ Topẽ vỹ ẽg to há nĩ, kỹ tóg ẽg tỹ ũn mág han ke mũ gé sir, ẽg jykre kurynh kỹ,” he tóg, Jesus ti.
Jesus tỹ gĩr to há
15 Kỹ fag tóg gĩr tatĩ kãmũ mũ ti to, ti tỹ ag.kri ti nĩgé fi jé. Hã ra ti mré mũ tĩ ag tóg fag to jũ mũ.
16 Hã ra tóg fag jé prẽr kỹ ag mỹ: “gĩr mỹ vĩ tũg nĩ,” he mũ. “Fag tỹ iso kãmũ kamẽg tũg nĩ,” he tóg. “Ũ tỹ ge hã vỹ tỹ ẽg Senhor tỹ Topẽ tũ nỹtĩ,” he tóg.
17 “Sỹ ke há vẽ. Gĩr ag vỹ iso há nỹtĩ. Ũn kãsir tag fag ri ke nỹtĩm nĩ, ke tũ nĩ mũ ra ãjag tóg Topẽ tỹ tỹ ẽg pãꞌi nĩ venh ke tũ nĩ mỹr,” he tóg.
Ũn riko ag
18 Kỹ kejẽn pãꞌi ũ tóg ti mỹ: “Senhorꞌ, há ã tóg jẽ,” he mũ. “Sỹ rĩr krỹg ja tũ venh há tóg tĩ. Sỹ ve jé inh hỹn vẽjykre há tỹ ne han ke mũ?“ he tóg.
19 Kỹ tóg ti mỹ: “inh mỹ: “há ã tóg jẽ,” he sór tũg nĩ. Ẽg pijé há nỹtĩꞌ. Topẽ hã ne ti pir mỹ há nĩꞌ,” he mũ.
20 “Topẽ tỹ nén to ẽg jyvẽn mũ ẽn ki kanhró ã tóg nĩ, hã vỹ: ã prũ tũ fi mré nỹ tũg nĩ, ũ tén tũg nĩ, nén ũ péju tũg nĩ, ũ to ón tũg nĩ, ã nỹ mré ã jóg kamẽg nĩ, he mũ,” he tóg.
21 Hã ra tóg: “tag kar ki sóg króm kãn, isĩn kã,” he mũ.
22 Kỹ tóg ti mỹ: “nén ũ pir vỹ tũ nĩ ver,” he mũ. “Ã tũ vãm kãn nĩ, ã tỹ ũn jagtar ag mỹ vin jé, jãnkamy ti. Kỹ ã tóg kanhkã tá tũ mág nĩnh mũ sir. Kar kãtĩg nĩ, ã tỹ inh mré tĩg jé,” he tóg.
23 Kỹ tóg ti mỹ vẽnh mỹ tĩ, ti riko pẽ nĩn kỹ.
24 Hã ra Jesus tóg ti mỹ vẽnh mỹ ẽn ki kanhrãn mũ. Kỹ tóg ti mré mũ tĩ ag mỹ: “jagy ti nỹ, ũn riko tỹ Topẽ tỹ tỹ ẽg pãꞌi nĩ venh ke ti,” he mũ.
25 “Kãvãru pãnĩ sór vỹ préj nor fĩn kutẽnh ke tũ nĩ,” he tóg. “Ti tỹ fĩn kutẽ há nĩ ra tóg há tĩ vẽ, ũn riko tỹ Topẽ tỹ tỹ ẽg pãꞌi nĩ venh ke ti,” he tóg.
26 Kỹ ti vĩ mẽg mũ ag tóg jagnẽ mỹ: “kỹ ũ hỹn kren ke tũ pẽ nĩ,” he mũ.
27 Kỹ tóg ag mỹ: “ẽprã ke ag vỹ tá junjun ke tũ nĩ vẽ,” he mũ. “Hã ra Topẽ hã tóg ẽg tỹ tá junjun han ke mũ,” he tóg.
28 Kỹ Pedro vỹ: “ha vé, ẽg tỹ nén ũ kar ré kỹ ẽg tóg ã mré mũ mũ,” he mũ.
29 Kỹ tóg ag mỹ: “sỹ ke há vẽ. Ũ tóg kejẽn ti jamã ré kỹ tĩ mũ, ti prũ fi, ti kãke, ti jãvy, ti han mũ fag, ti krẽ ré kỹ tóg tĩ mũ, Topẽ tỹ tỹ ẽg pãꞌi nĩ tugrĩn, ti tỹ ti vĩ ki króm jé,” he mũ.
30 “Ẽn vỹ tóg sir vẽnh kaja jé nén kar ẽn venh ke mũ, ag jẽgja kã, ga kri, kar kỹ tóg vãhã sir ẽg rĩr krỹg ja tũ venh ke mũ gé sir, kanhkã tá,” he tóg.
Jesus tỹ ti ter ke tó mãn
31 Kỹ tóg ũ tỹ 12 (ke) ag jé prẽr mũ, vyrmỹ. “Ha vé, Jerusalém ra ẽg mũnh mũ, kỹ sóg tá ve kãn ke mũ, vãsỹ Topẽ vĩ tó tĩ ag tỹ iso nén rán ja ẽn ti,” he tóg.
32 “Fóg ag mỹ ag tóg inh fẽg ke mũ, Jerusalém tá, ha vem nĩ, ag tỹ iso é he jé, ag tỹ inh vóg kónãn jé, ag tỹ iso sug jé gé,
33 ag tỹ inh mrãnmrãn jé. Ag tỹ isén ke vẽ. Hã ra sóg kurã tãgtũ tũg kỹ rĩr mãn ke mũ, ha vem nĩ,” he tóg.
34 Hã ra ag tóg ti vĩ tag to jykrén tũ nĩ. Ti vĩ tóg ag mỹ vẽnh mỹ tĩ. “Ti tỹ ne tó nẽ hỹnꞌ?“ he ag tóg mũ sir.
Jesus tỹ ũn kyvó tỹ háꞌ he
35 Ag mũn kỹ ag tóg Jericó to hã mũ nĩ. Hã ra ũn kyvó tóg ẽpry kri nĩ nĩ. “Inh mỹ jãnkamy nĩm,” he tóg tĩ, vẽnh kar mỹ.
36 Ẽn vỹ vẽnh kar tỹ ẽpry jagma mũ mẽg tĩ. Kỹ tóg ag mỹ: “ũ nẽ?“ he mũ.
37 Kỹ ag tóg ti mỹ: “Jesus vẽ, Nazaré tá ke ẽn vẽ,” he mũ.
38 Kỹ tóg prẽr mũ sir. “!..Jesusꞌ..! !..Davi krẽꞌkrẽꞌ..! !..Ijagãgtãn ra..!“ he tóg mũ.
39 Kỹ ti jãmĩ mũ ag vỹ ti mỹ vĩ jũ han mũ, “mẽ kã nĩ nĩ,” hen kỹ. Hã ra tóg prẽr mãnꞌ, prẽr mãnꞌ he mũ. “!..Davi krẽꞌkrẽꞌ..! !..Ijagãgtãn ra..!“ he tóg.
40 Kỹ Jesus tóg krỹg he kỹ: “ti jé prẽr,” he mũ. Ti tỹ ti ki jun kỹ tóg ti mỹ:
41 “inh ã tỹ hẽ ri kenh mũ?“ he mũ. Kỹ tóg: “sỹ venh há tóg tĩ,” he mũ.
42 Kỹ tóg ti mỹ: “he, ha tã mĩ vé,” he mũ. “Ã tỹ inh ki rã kỹ ã háꞌ henh ke mũ,” he tóg.
43 Kỹ tóg vẽsỹmér ẽvãnh háꞌ he mũ sir. Ti hã mré tóg tĩ mũ sir. Topẽ mỹ tóg vĩ há han mũ. Kỹ tóg vẽnh kar mỹ há tĩ. Topẽ mỹ ag tóg vĩ há han mũ gé sir.
