Lucas tỹ rá 19:1-48
19 Kỹ tóg ẽmã tỹ Jericó ki rã kỹ fĩn rãm kỹ tĩg sór mũ.
2 Hã ra ũ tóg tá nĩ nĩ, ti jiji hã vỹ: Zaqueu, he mũ. Governo mỹ jãnkamy mãg tĩ ag pãꞌi vẽ. Kỹ tóg riko tãvĩ nĩ.
3 Ẽn tóg Jesus ve sór mũ. Hã ra tóg rur jẽ, hã kỹ tóg vẽnh e ag tugrĩn ti vég tũ nĩ.
4 Hã kỹ tóg ti jy vẽnhvãg tĩ mũ, kỹ tóg ka tỹ krén to tãpry mũ, ti tỹ kri nĩg kỹ ti ve jé.
5 Kỹ tóg ka ẽn tá jun mũ. Kỹ tóg kri ẽvãnh kỹ ti vég mũ. Kỹ tóg ti mỹ: “Zaqueuꞌ,” he mũ. “Kur kãtére to fũrũn. Isỹ ã ĩn krẽm nũr ke vẽ,” he tóg.
6 Kỹ tóg tére tỹ mrãnh ke mũ sir. Jesus mỹ tóg: “mũ jé ha,” he mũ. Ti mỹ tóg sér tĩ, Jesus tỹ ti ĩn krẽm nũr sór kỹ.
7 Hã ra vẽnh e ẽn tóg Jesus to jũ kỹ ti mỹ: “Topẽ vĩ mranh tĩ vẽ, hã ra tóg ti ĩn krẽm nũr sór mũ,” he mũ.
8 Kỹ tóg ti ĩn krẽm nĩ nĩ. Kỹ Zaqueu tóg vẽso jykrén kỹ ti mỹ vẽnh kãmén mũ. “Ha vé, isũ kuju vin jé sóg ke mũ, ũn jagtar ag mỹ. Ũ ag lograr he ja sóg nĩgtĩ, ag tũ ki, hã ra sóg ag mỹ ti kãfór nĩm sór mũ ha. Sỹ jãnkamy pir ki ũ lograr he jan ki sóg ti mỹ ũ tỹ 4 (ke) vin sór mũ,” he tóg mũ.
9 Kỹ tóg ti mỹ: “ũri ã tóg kren ke mũ, ã mré ke fag mré hã. Abraão krẽꞌkrẽ vỹ tỹ ã nĩ gé,” he mũ.
10 “Tỹ sóg ẽprã ke fi kósin nĩ. Ũn vãfor mũ ẽn jãvãnh jé sóg kãtĩg, sỹ ag krenkren han jé, ũn jykre pãno ẽn,” he tóg.
Jãnkamy kãme
11 Hã ra ũn e ag tóg ti vĩ mẽg mũ. Jerusalém to hã tóg nĩ, hã kỹ ag tóg ti to: “Topẽ tỹ tỹ ẽg pãꞌi nĩ hỹn vẽnh ven ke mũ, ti tỹ tá jun kỹ,” he mũ. Kỹ tóg ag mỹ.“hã tũ vẽ,” he sór mũ. Hã kỹ tóg:
12 “kejẽn pãꞌi tóg nĩgtĩ,” he mũ. “Ẽn tóg ga ũ ra tĩg sór mũ, kór há ra, tá ke ag tỹ ti tỹ pãꞌi mág han jé. Tag pãte tóg tá vỹn ke sór mũ.
13 Ti tĩg ke to hã tóg ti camarada tỹ 10 (ke) ag mỹ jãnkamy pir nĩmꞌ nĩmꞌ he mũ. Ag mỹ tóg: “ha inh mỹ tỹ rãnhrãj,” he mũ. “Kejẽn sóg vỹn kenh mũ, kỹ sóg ãjag rãnhrãj tugnỹm ke mũ, ti,” he tóg. Kar tóg tĩ mũ sir.
14 Hã ra ti krẽm ke ũ ag vỹ ti to há tũ nỹtĩ. Kỹ ag tóg ti nón vẽnh vĩ jẽnẽg mũ. “Ã tỹ ẽg kri tỹ pãꞌi nĩn kỹ tóg vẽnh mỹ nĩ. Ẽg tỹ tag ve jãvãnh tóg tĩ,” he ja ag tóg nĩgtĩ.
15 Kejẽn tóg, vẽsỹ pãꞌi mág han kỹ vỹn ke mũ. Kỹ tóg ti camarada ag jé prẽr mũ sir, ti tỹ ũn mỹ jãnkamy vin ja ẽn ag.
16 Kỹ ũ tóg ti tá jun kỹ ti mỹ: “jãnkamy pir nĩm ã tóg. Hã ra sóg kri ũ tỹ 10 (ke) gỹjỹ hé,” he mũ.
17 Kỹ tóg: “jykre há tãvĩ ã tóg nĩ,” he mũ. “Nén sĩ ki rĩr há han ã tóg, hã kỹ ã tóg ẽmã tỹ 10 (ke) ki rĩr ke mũ ha,” he tóg.
18 Kỹ ũ tóg ti mỹ: “jãnkamy pir nĩm ã tóg, hã ra sóg kri ũ tỹ 5 (ke) gỹjỹ hé,” he mũ gé.
19 Kỹ tóg ti mỹ: “ẽmã tỹ 5 (ke) ki rĩr jé ã tóg ke mũ ha,” he mũ gé.
20 Kỹ ũ tóg: “ha vé, ã tũ ti,” he mũ. “Inh krĩ pãgja kã ki vin kỹ sóg kri tógfĩn kỹ nĩm han.
21 Ã kamẽg ja inh nĩ, ã vĩ tar to. Ã tỹ nén vin ja tũ ẽn mãn sór ã tóg tĩ. Ã tỹ nén krãn ja tũ kunũnh sór ã tóg tĩ,” he tóg.
22 Kỹ tóg ti mỹ: “ã vĩ tóg ã jykre pãno han mũ, ha mẽ,” he mũ.“Inh mỹ vĩ tar han tĩꞌ? Inh mỹ sỹ nén vin ja kãfór mãn sór tĩꞌ? Inh mỹ sỹ nén krãn ja tũ kunũnh sór tĩꞌ?
23 Kỹ ã tỹ ne jé inh jãnkamy tỹ banco tá nĩm ja tũ nĩ nẽ? Ã tỹ tá nĩm han ra sóg ti juro venh ke mũ vẽ, kỹ sóg isũ kãfór mãn ke mũ vẽ,” he tóg.
24 Kỹ tóg tá nỹtĩ ag mỹ: “ti nĩgã ti tũ mã,” he mũ. “Ũ tỹ jãnkamy tỹ 10 (ke) mãn ja ẽn mỹ nĩm, ti tũ pir ti,” he tóg mũ sir.
25 Kỹ ag tóg ti mỹ: “mẽꞌ. Hã ra tóg tũ mág nĩ ha,” he mũ.
26 Kỹ tóg: “hỹ,” he mũ. “Hã kỹ sóg tó mũ. Ũn tũ mág vỹ mãn mãn ke mũ. Ũ tũ sĩ nĩ ẽn tũ mãn kãn jé ag tóg ke mũ gé,” he tóg.
27 “Kỹ inh kato tẽ mũ ag tatĩ kãmũm nĩ, ũ tỹ iso: “ti tỹ ẽg kri tỹ pãꞌi jẽn kỹ tóg ẽg mỹ kórég nĩ,” he mũ ẽn ag. Ag kãgtén ra, inh rĩnve,” he tóg, pãꞌi ti,” he tóg.
Jesus tỹ Jerusalém tá jun
28 Kar tóg tá kãkutẽ kỹ ẽmã tỹ Jerusalém ra tĩ mũ.
29 Kỹ tóg ẽmã tỹ Betfagé to hã jun mũ, ẽmã tỹ Betânia tá, pãnónh tỹ Oliveiras he mũ ẽn tá. Tá jun kỹ tóg ti mré mũ tĩ régre ag mỹ:
30 “ẽmã ẽn ra mũm nĩ, ẽg jo ẽmã nĩ ẽn ra,” he mũ. “Tá junjun kỹ ãjag tóg burrica fi kósin venh mũ. Kri nĩ ja tũ tóg jẽ ver. Ẽn kavãn kỹ ti pére kãmũm nĩ,” he tóg.
31 “Hẽn ri ke mũn ag tóg ãjag mỹ: “ãjag tỹ ne jé ti kavãn nẽ?“ henh mũ. Kỹ ag mỹ: “ẽg Senhor vỹ ti ve sór mũ,” hem nĩ,” he tóg.
32 Kỹ ag tóg mũ mũ. Ti tỹ ag mỹ tó mũ ve kãn ag tóg mũ sir.
33 Kỹ ag tóg ti kavãg mũ. Kỹ tỹ ũn mẽg mũ ag tóg ag mỹ: “ãjag tỹ ne jé burrica kósin tag kavãn nẽ?“ he mũ.
34 Kỹ ag tóg: “ẽg Senhor vỹ ti ve sór mũ,” he mũ.
35 Kỹ ag tóg ti pére kãmũ kỹ ag kur tỹ ti kri vin mũ, Jesus tỹ kri nĩ jé.
36 Ti tĩg kỹ ag tóg ag kur kugjén mũ sir, ẽpry jagma.
37 Gen kỹ ag tóg, pãnónh tỹ Oliveiras to re kỹ Jerusalém to hã mũ nĩ sir.
Kỹ vãhã ag kar ẽn tóg Topẽ mỹ vĩ há han mũ, jamã há ra, fag mré hã. Jesus tỹ nén han mũ ve ja ag tóg nĩgtĩ. Hã kỹ ag tóg ẽn mĩ ẽkrén kỹ Topẽ mỹ vĩ há han mũ sir.
38 “!..Sér tóg tĩ, ẽg mỹ..!“ he fag tóg mũ.“!..Ẽg Senhor vỹ ẽg ki jun..! !..ẽg jóg mág tỹ ti jẽnẽn kỹ..!“ he ag tóg. “!..Kanhkã tá ke ag mỹ tóg sér te..! !..Topẽ mỹ ẽg tóg vĩ há han sór mũ, kynhmỹ nĩ ẽn mỹ..!“ he ag tóg, prẽnprẽr kỹ.
39 Hã ra Fariseu ũ ag tóg tá nỹtĩ gé, vẽnh e ẽn kãmĩ. Kỹ ag tóg: “ã mré mũ tĩ ag mỹ: prẽnprẽr tũg ra, hé,” he mũ.
40 Hã ra Jesus tóg ag mỹ: “vó, ag prẽnprẽr tũ nĩ ra pó hỹn prẽnprẽr mũ vẽ, ag mỹn sér tĩnh mũ vẽ,” he mũ.
Jesus tỹ Jerusalém to fỹ
41 Gen kỹ ag tóg Jerusalem tá junjun mũ sir. Ẽmã ẽn ve kỹ tóg fỹ mũ.
42 “Jerusalém tá keꞌ,” he tóg. “Ki kanhrãn sór tũ ãjag tóg nĩ,” he tóg. “Ãjag tỹ ũri ki kanhrãn há tóg tĩ vẽ, hã ra ãjag tóg ke jãvãnh nỹtĩ. Ãjag tỹ ki kanhrãn ra ãjag tóg krĩ kuprã nỹtĩnh mũ vẽ, mỹr, ha mẽ. Hã ra ãjag tóg jẽmẽ sór tũ nĩ. Kutu ãjag tóg nỹtĩ.
43 Hã kỹ ãjag tóg vãhã kurã kórég pẽ venh ke mũ. Ãjag kato tẽ ag vỹ ãjag to ráránh ke mũ. Komẽr hã ag tóg ãjag to grẽngrẽn kenh ke mũ. Kỹ ag tóg ãjag ẽmã jy ró pénĩn vỹrỹn kenh ke mũ sir.
44 Ãjag tỹ tũꞌ he kãn jé ag tóg ke mũ, ãjag krẽ ke gé. Ãjag ĩn kókén kãn jé ag tóg ke mũ gé. Kỹ ĩn tỹ pó pijé jagnẽ kri nỹtĩnh mũꞌ. Kurã há ki ãjag tóg Topẽ vĩ mẽ jãvãnh nỹtĩ, ũri. Hã kỹ ãjag tóg ti kórég venh ke mũ,” he tóg. Fỹ pẽ han kỹ tóg tó mũ, ẽmã mĩ tĩg kỹ.
Jesus tỹ Topẽ ĩn tá ag pan
45 Kỹ tóg Topẽ ĩn tá jun kỹ ti jy ró kã ra rã mũ sir. Kỹ tóg ũ tỹ tá nén ũ vẽne he tĩ ag pan mũ.
46 “Topẽ vĩ rá to jykrén nĩ,” he tóg. “Inh ĩn jiji vỹ tỹ Topẽ mré vĩ jafã nĩ, hã ra ãjag tóg krẽm nén kar pigju mũgtĩ,” he tóg. Ag pan kỹ tóg ag mỹ tó mũ.
47 Hã ki tóg kurã kar ki ag kanhrãn mũ, Topẽ ĩn krẽm. Hã ra tóg Topẽ tũ to pãꞌi ag mỹ kórég nĩ, pãꞌi kar ag mỹ. Hã kỹ ag tóg ti tén ke to jykrén mũ sir.
48 Hã ra tóg ag mỹ ki króv tũ nĩ. Vẽnh kar mỹ tóg mẽ sér tĩ, ti vĩ ti, hã kỹ tóg vẽnh mỹ tĩ sir, pãꞌi ag tỹ ti tén sór mũ ra.
