Lucas tỹ rá 2:1-52
2 João mur kar kỹ ga kri pãꞌi mág tỹ Augusto vỹ kejẽn vẽnh vĩ jẽnẽg mũ, vẽnh kar tỹ ag jiji ránrán mũ jé. Ti ga ki ke kar ag mỹ tóg vẽnh vĩ ẽn jẽgnẽg mũ.
2 Ag tỹ vãhã vẽjykre tag han. Cirênio vỹ tỹ ga tỹ Síria kri pãꞌi tỹ governador nĩ, Augusto tỹ vẽnh vĩ jẽnẽg mũ ẽn kã.
3 Kỹ ag tóg mũ kãn mũ, ag jógjóg ve ag jamã ja ẽn ra, ag tỹ tá ag jiji ránrán jé.
4 2:4-5 Kỹ José tóg tĩ mũ gé, ti prũnh ke fi mré, Maria fi. Ẽmã tỹ Nazaré tá fag tóg pa mũ. Kỹ fag tóg ga tỹ Judéia ra mũ mũ, ẽmã tỹ Belém ra, Davi jamã ja ra. Davi krẽꞌkrẽ vẽ, José ti. Kỹ ti prũnh ke fi vỹ ti mré tĩ mũ, hã ra fi tóg kufy jagy nĩ.
5 Ha vé 2:4
6 Fag tỹ tá nỹtĩ ki fi tóg fi kurã pétẽm mũ.
7 Kỹ fi tóg fi kósin vég mũ sir. Gré ti nỹ, fi kósin ve tag ti. Kỹ fi tóg ti pãg kỹ koso kã kã ti fig mũ. Ðn vỹ funfór nỹtĩ, hã kỹ fag tóg vẽnh mẽg jo ĩn krẽm nỹtĩ ja nĩgtĩ.
Mé ki rĩr tĩ ag
8 Kuty ẽn kã ũ tỹ mé ki rĩr tĩ ag vỹ ag japỹ tá ag mẽg ki rĩr nỹtĩ.
9 Hã ra vãhã Topẽ tỹ jẽnẽ jafã vỹ ag mỹ vẽnh ven mũ, kanhkã tá. Topẽ tỹ jẽngrẽ vỹ ag kri rũm ke mũ. Kỹ ag tóg kamẽg kỹ jũrũn ke mũ sir.
10 Kỹ tóg ag mỹ: “inh kamẽg tũg ra,” he mũ. “Isỹ ãjag mỹ vẽnh vĩ há tónh ke vẽ, kỹ tóg ãjag mỹ sér tĩnh mũ. Kỹ vẽnh kar vỹ mẽnh ke mũ gé, povo kar, kỹ ag fe tóg mrin kenh mũ sir.
11 Ãjag krenkren han tĩ vỹ ũri mur, hã vỹ: Cristo, he mũ. Davi jamã ja tá tóg mur. Tỹ tóg ẽg Senhor nĩ ha mỹr.
12 Ha mũ jẽg, ãjag tỹ gĩr ẽn ve jé. Koso kã kã tóg pãg kỹ nỹ nĩ. Hã ki ãjag tóg ti ki kanhró nỹtĩnh mũ,” he tóg ag mỹ.
13 Kỹ ũ tỹ hẽn ri ke ag vỹ vãhã vẽnh ven mũ sir, kanhkã tá. Ẽn ag vỹ Topẽ mỹ vĩ há han mũ.
14 “Topẽ vỹ tỹ ũn mág pẽ nĩ,” he ag tóg mũ. “Kynhmỹ ti nĩ, vẽnh kar kãfór ti nĩ. Kỹ ẽprã ke ag vỹ jatun mỹ nỹtĩ, ag krĩ kusa tĩn kỹ, Topẽ tỹ ũ to há ag, fag mré hã,” he ag tóg mũ.
15 Kar ag tóg tũꞌ he mũ sir, ag tỹ kanhkã ra mũn kỹ.
Ag tỹ tũꞌ he kar kỹ ag tóg jagnẽ mỹ: “mũ nỹ, ẽg tỹ ti ve jé. Ẽg Senhor hã ne tóg ẽg mỹ vẽnh vĩ jẽnẽ,” he mũ.
16 Kỹ ag tóg fũrũnrũn mũ mũ sir. Ag tỹ tá junjun kỹ ag tóg Maria fi vég mũ, José ti ke gé, gĩr sĩ ti ke gé. Koso kã kã tóg pãg kỹ nỹ nĩ.
17 Hã kỹ ag tóg vẽnh kar mỹ kãmén mũ.
18 Kỹ tóg ag kar mỹ e tĩ sir, ge ra tóg ag mỹ sér tĩ.
19 Kỹ Maria fi tóg to jykrén mũ gé sir. Fi pijé kã jatun mũꞌ, to jykrén tãvĩ han fi tóg nĩ nĩ.
20 Kỹ ag tóg sir ag mẽg to vỹnvỹn ke mũ gé. Topẽ mỹ ag tóg vĩ há han mũ. “Ti hã ne tóg ẽg mỹ ti tỹ jẽgnẽ jafã ag tỹ vẽnh vĩ jẽnẽ ja nĩꞌ, hã kỹ ẽg tóg vé,” he ag tóg mũ sir.
Fag tỹ Jesus jijin
21 Kar kurã tỹ 8 (ke) vỹ tũg mũ. Kỹ tóg gĩr sĩ ẽn gré fár junun kym ke kurã pétẽm mũ sir. Kỹ fag tóg ti jijin kỹ ti mỹ: Jesus, he mũ. Topẽ tỹ jẽnẽ jafã vỹ ti jiji tag tó ja nĩ, ti mỹnh fi tỹ ver ti tỹ kufyg tũ ki.
Fag tỹ Topẽ mỹ Jesus ven
22 Kurã tỹ 40 (ke) tũg kỹ fi vãkre tóg tũꞌ he mũ. Moisés vỹ vãsỹ Judeu ag mỹ vẽjykre tag rán ja nĩ, fag tỹ gĩr ve kar kỹ vẽnh kykũnh ke ti.
23 Topẽ vĩ ki tag vỹ rán kỹ nĩ gé, hã vỹ: “Judeu fag kósin ve tỹ gré nỹn kỹ tóg tỹ ẽg Jóg Mág tỹ Topẽ tũ nỹ,” he mũ.
24 Hã kỹ José fag tóg Topẽ mỹ fag kósin ve ven sór mũ gé. Ti mỹ fag tóg nén ũ pũn sór mũ, hã vỹ: sórãg régre, ke tũ nĩ kỹ ton régre, he mũ.
Hã jé fag tóg Jerusalém ra mũ mũ.
25 Hã ra Jerusalém tá ũ tóg nĩ nĩ, ti jiji hã vỹ: Simeão, he mũ. Ũn jykre kuryj vẽ. Topẽ kamẽg tóg tĩ, ti kuprĩg tỹ tóg jagrẽ nĩ. Ti tỹ Israel ag krenkren han ke mũ ẽn jãvãnh tóg tĩgtĩ.
26 Kỹ Topẽ kuprĩg vỹ ti mỹ: “Cristo ve jé ã tóg ke mũ, ã ter ke to hã, Topẽ tỹ ti jẽnẽn kỹ,” he ja nĩgtĩ.
27 Topẽ kuprĩg tỹ ti krĩn kỹ tóg kejẽn Topẽ ĩn ra tĩ mũ. Ti tỹ tá jẽ ra fag tóg Jesus va kãmũ mũ, fag tỹ Topẽ mỹ sórãg pũn jé.
28 Simeão tỹ fag ve kỹ tóg Jesus vãg mũ sir, kỹ tóg ti to Topẽ mỹ vĩ há han mũ.
29 “Ẽg Jóg Mág,” he tóg. “Vãhã ã tóg inh jé prẽr ke mũ, kỹ sóg jatun mỹ tĩg ke mũ ha. Ã tỹ inh mỹ nén tó jan han ã tóg huri,” he tóg.
30 “Ũ tỹ ẽg krenkren han ke mũ tag ti ve inh huri, Cristo ti.
31 Vẽnh kar mỹ ã tóg ã tỹ ẽg krenkren han ke mũ tag ven huri.
32 Kỹ tóg ẽg mỹ jẽngrẽ ri ke nĩ. Kỹ povo kar vỹ ti jẽngrẽ tag venh ke mũ, fóg ag kar, kanhgág ag kar ke gé. Ẽg povo tỹ Israel tỹ ã tóg ũn mág han huri,” he tóg, Simeão ti, Topẽ mỹ.
33 Kỹ Jesus mỹnh fag vỹ ti vĩ mẽg mũ, kỹ tóg fag mỹ e tĩ, ti tỹ Jesus to nén tó mũ ẽn ti.
34 Kỹ Simeão vỹ fag mỹ vĩ há han mũ gé. “Topẽ vỹ ãjag ve há han mũ,” he tóg. Kỹ tóg fi mỹ: “ha vé, Israel tỹ hẽn ri ke ag vỹ ti tugrĩn mũ há han ke mũ, jãvo ũ tỹ hẽn ri ke ag vỹ ti tugrĩn mũ kónãn ke mũ gé. Kỹ ag tóg ti kato vĩnh ke mũ gé, Topẽ tỹ ti jẽnẽg mũ ra,” he mũ.
35 “Kỹ ã tóg ti tugrĩn vẽsỹrénh ke mũ,” he tóg fi mỹ. “Kỹ tóg rógro tỹ ã fe tỹ gynh ke ri ke nĩnh mũ, ã vẽsỹrénh ke ti,” he tóg.
36 Kỹ ũ fi tóg tá nĩ gé, fi jiji hã vỹ: Ana, he mũ. Topẽ vĩ tó tĩ ũ fi vẽ. Fanuel kósin fi vẽ. Kỹ fi jógjóg ve vỹ tỹ Aser nĩ. Kófa pẽ fi nĩ ha. Fi tỹ fi mén mré prỹg tỹ 7 (ke) han kar kỹ tóg ter ja nĩ.
37 Kỹ fi tóg vãhã prỹg tỹ 84 (ke) han mũ sir, mén tũ nĩ ki. Kurã kar ki fi tóg Topẽ ĩn hã krẽm nĩgtĩ. Tá fi tóg Topẽ tũ han nĩgtĩ. Ti mré fi tóg vẽmén tĩ, nén ũ ko mẽ kã.
38 Ẽn fi vỹ Simeão tỹ Topẽ ĩn krẽm Jesus va jẽ ra: “inh mỹ tóg há tĩ, sỹ ti ven kỹ,” he mũ gé, Topẽ mỹ. Kar kỹ fi tóg vẽnh kar mỹ gĩr sĩ ẽn kãmén mũ, ũn krenkren sór mũ ag mỹ, Jerusalém tá.
Fag tỹ Nazaré ra vỹnvỹn ke
39 Kỹ fag tóg Moisés tỹ vẽnh kykũnh to nén rán ja ẽn han kãn mũ sir. Kar kỹ fag tóg sir fag jamã ra vỹnvỹn ke mũ, Nazaré ra.
40 Kỹ gĩr tóg mog mũ sir. Komẽr hã tóg tar jẽ sir. Kỹ tóg vẽnh kanhrãn há han mũ. Topẽ vỹ ti ve há han mũ gé.
Jesus tỹ ti pir mỹ Topẽ ĩn tá nĩ
41 Prỹg kar ki fag tóg Jerusalém ra mũ tĩ, fénhta tỹ Páscoa ve jé. Fag jykre vẽ.
42 Jesus tỹ 12 (ke) anos han kỹ tóg fag mré tĩ mũ gé.
43 Fénhta tỹ tũꞌ hen kỹ fag tóg vỹnvỹn ke mũ. Hã ra tóg Jerusalém tá nĩ nĩ.
44 Fag tỹ ti vég tũ nĩn kỹ fag tóg: “ti hỹn ẽg jo vyr, ẽg mré kãmũ mũ fag mré,” he mũ. Kỹ fag tóg kurã ẽn ki mũ mũ, jatun mỹ. Hã tỹ kuty tá fag tóg ti jãvãnh mũ, fag to há kar fag kãmĩ.
45 Hã ra fag tóg ti vég tũ nĩ. Kỹ fag tóg tỹ vaj kỹ Jerusalém ra vỹnvỹn ke mãn mũ gé.
46 Vãhã fag tóg tá ti vég mũ. Topẽ ĩn krẽm tóg nĩ nĩ, ẽg kanhrãn tĩ ag mré. Ag vĩ mẽg tóg nĩ nĩ, kỹ tóg ag ki jẽmẽg mũ gé.
47 Ti vĩ tóg vẽnh kar mỹ e tĩ. To jykrén há han tóg mũ. Kỹ ẽg kanhrãn tĩ ag tóg ti mré vẽmén nỹtĩ nĩ.
48 Ti mỹnh fag tỹ ti ve kỹ tóg fag mỹ e tĩ gé sir. Kỹ fi tóg ti mỹ: “inh kósinꞌ,” he mũ. “Ã tỹ tag kã ne han nĩ nẽ? Ã jóg mré sóg ã jãvãnh to kanẽ jur,” he fi tóg, ti mỹ.
49 Hã ra tóg fi mỹ: “ãjag ne tóg inh jãvãnh ja nĩꞌ,” he mũ. “Inh panh pẽ ĩn krẽm sóg nĩ nĩ mỹr, kỹn mỹ ãjag mỹ vẽnh mỹ?” he tóg.
50 Hã ra tóg fag tỹ to jykrén tũ tĩ.
51 Kỹ tóg fag mré Nazaré ra tĩ mũ. Tá tóg jatun mỹ fag mré nĩ nĩ sir. Fag tỹ ti mỹ nén tó mũ han tóg mũ. Hã ra ti mỹnh fi pijé nén kar ẽn kã jatun mũꞌ.
52 Kỹ tóg mog mũ sir. Krĩ há tãvĩ tóg nĩ. Topẽ vỹ ti ve há han mũ gé. Kỹ ti jykre tóg vẽnh kar mỹ há nĩ sir.
