Lucas tỹ rá 21:1-38
21 Kỹ tóg Topẽ ĩn tá jẽ kỹ tã mĩ ẽvãnh kỹ ũn riko ag vigvég mũ. Jãnkamy vin jafã ki ag tóg ag tũ vin tĩ. Topẽ mỹ ag tóg vin mág tĩ.
2 Kỹ ũn mén ter ja fi vỹ tá jun mũ gé sir. Tỹ nén ũ tũ fi tóg nĩ, hã ra fi tóg jãnkamy kãsir régre vin mũ, Topẽ mỹ.
3 Kỹ tóg fi to: “ve ra ha,” he mũ. “Ũn riko tỹ vin kãfór han fi tóg, fi tũ sĩ hã ra. Tỹ nén ũ tũ fi tóg nĩ. Fi mén vỹ hur ter.
4 Kỹ fi tóg fi tũ vin kãn ja nĩ, fi jẽn mré hã. Jãvo ũn riko ag vỹ ag tũ ke hã tỹ Topẽ mỹ vin mág tĩ. Hã ki fi tóg ag tỹ nĩm kãfór han, fi tỹ nĩm sĩ pẽ han mũ ra. Ki hã sóg tó mũ mỹr,” he tóg.
Topẽ ĩn kókén kỹ nĩnh ke
5 Ẽn kã ũ ag tóg Topẽ ĩn to vĩ há han mũ. “Sĩnvĩ pẽ ti jẽ,” he ag tóg mũ. “Ti pó ve ra ha. Mág ti nỹtĩ. Ti sĩnvĩ tóg e nỹtĩ gé,” he ag tóg.
6 Kỹ tóg: “mỹ ãjag mỹ sĩnvĩ?“ he mũ. “Kejẽn tóg kókén kãn kỹ nỹnh mũ, ha vem nĩ, kỹ pó vỹ jagnẽ kri nỹtĩ mãn ke tũ nĩ ha. Gũm ke kãn jé tóg ke mũ, tag ti,” he tóg.
Vẽnh jagtar to rã
7 Kỹ ag tóg ti mỹ: “kurã tỹ ne kã ke nẽ hỹnꞌ?“ he mũ. “Ẽg hỹn hẽn ri ken kỹ ti kurã ki kanhró nỹtĩnh mũ? Topẽ hỹn ne han vén ke mũ, ẽg tỹ kurã ẽn ki kanhró nỹtĩ jé?“ he ag tóg.
8 Kỹ tóg ag mỹ: “ker ũ vĩ jẽmẽ hẽꞌ,” he mũ. “Ũ tỹ hẽn ri ke ag vỹ ón kỹ ijiji tónh kãmũnh mũ. “Cristo vỹ tỹ inh nĩ. Inh kurã vỹ hur jun,” he jé ag tóg ke mũ. Ag nón mũ tũg nĩ.
9 Jagnẽ kato vãsãnsãn mũ ag tỹ vẽnh génh mẽgmẽ jé ãjag tóg ke mũ. Kamẽg tũg nĩ hã ra. Vẽnh génh tỹ hẽn ri ke han jé ag tóg ke mũ, kurã tỹ ẽgno to hã. Ti kurã kã ke pijéꞌ,” he tóg.
10 Kỹ tóg ag mỹ: “povo ag tỹ jagnẽ kato vãsãnsãn ke vẽ, pãꞌi krẽm ke ag tỹ pãꞌi ũ krẽm ke ag to jũnh ke vẽ,” he mũ.
11 “Ga tỹ ragrag ke jagy tỹ hẽn ri ke han ke vẽ gé, ẽn kã. Kỹ vẽjẽn tóg tũꞌ henh ke mũ gé. Vẽnh kaga kórég vỹ vẽnh vinven ke mũ, ẽn kã sir. Nén ũ vẽnh mỹ vỹ vẽnh vinven ke mũ gé, kanhkã tá, kỹ vẽnh kar vỹ kanẽ junjur ke mũ,” he tóg.
12 “Tag to hã ag tóg ãjag sigsenh ke mũ gé. Ãjag vóg kónãn jé ag tóg ke mũ gé. Vẽnh kanhrãn jafã krẽm ag tóg ãjag jykre vigvenh ke mũ gé. Pãꞌi mág ag mỹ ag tóg ãjag venven ke mũ, pãꞌi tỹ governador ag mỹ ke gé, ãjag tỹ ijiji tó ja tugrĩn.
13 Ãjag tỹ inh vĩ tó jé, hã jé ag tóg ãjag tỹ genh ke mũ.
14 Ẽn kã ãjag tỹ nén ũ tónh ke to jykrén tũg nĩ, to krĩ kufy han tũg nĩ gé.
15 Inh hã vỹ ãjag vĩ han ke mũ. Inh jykre nĩm jé sóg ke mũ ãjag mỹ, ãjag tỹ ag mỹ tó há han jé. Kỹ tóg ag tỹ ãjag vĩ kafãn sór mũ ra ag mỹ vẽnh mỹ tĩnh mũ, ãjag kato tẽ ag tỹ ne tónh ke tóg tũ tĩnh mũ, ha vem nĩ.
16 Ẽn kã ãjag han mũ ẽn vỹ ãjag senh ke mũ, ãjag mré pafa mũ ag ke gé, ãjag mré ke ag ke gé, ãjag to há kar ag mỹr. Ãjag kã mĩ ũ ag kãgtén jé ag tóg ke mũ gé, ha vem nĩ.
17 Vẽnh kar vỹ ãjag to kórég tãvĩ nỹtĩnh mũ, ijiji tugrĩn.
18 Hã ra ãjag véké vẽsỹrénh ke tũ nĩ, ãjag gãnh pir vỹ fagrĩnh mỹ kutẽnh ke tũ nĩ, ha vem nĩ.
19 To tar nỹtĩm nĩ, ãjag vẽsỹrénh ke to, kỹ ãjag tóg rĩr krỹg ja tũ ẽn venh ke mũ,” he tóg, Jesus ti.
Jerusalém kókén kỹ nỹnh ke
20 “Kejẽn soldado ag tóg Jerusalém jy nỹtĩnh mũ, ag tỹ ẽmã ẽn kókén jé. Ãjag tỹ tag ve kỹ ãjag tóg ki kanhró nỹtĩnh mũ. Ag tỹ ti kókén kãn ke kurã vỹ jun ke mũ, kurã ẽn kã.
21 Kỹ vẽnh pigjunh mũm nĩ, pãnónh ra, ãjag tỹ Judéia ki nỹtĩn kỹ. Ãjag tỹ ẽmã tá nỹtĩn kỹ pétẽm nĩ, vãnh kã ra. Ãjag tỹ vãnh kã tá nỹtĩn kỹ ẽmã ra mũ tũg nĩ.
22 Topẽ tỹ ag vóg kónãn ke kurã vẽ sir, ag jykre kórég to, hã kỹ tóg vãsỹ rán kỹ nĩ. Vẽnh rá ẽn ve jé ãjag tóg ke mũ, kurã ẽn kã.
23 Kỹ ũn kufy fag vỹ vẽsỹrénh mág han ke mũ, kurã ẽn kã, gĩr pygfãm mũ fag ke gé. Ẽprã ke ag vẽsỹrénh mág tãvĩ han ke vẽ, Topẽ tỹ povo tag to jũ jagy han ke vẽ, kurã ẽn kã.
24 Ãjag kã mĩ ũn e tãvĩ kãgter ke vẽ, rógro tỹ. Kỹ ãjag kã mĩ ũ ag vỹ sigse kỹ mũnh mũ, povo kar kãmĩ. Kỹ Jerusalém vỹ kókén kãn kỹ nĩnh ke mũ. Fóg ag vỹ sãnsãn ke mũ, ãjag jamã ti. Kejẽn fóg ag tỹ tũꞌ henh ke kurã vỹ jun ke mũ gé hã ra,” he tóg, Jesus ti.
Topẽ kósin kãtĩg mãn ke
25 “Kurã ẽn kã rã vẽnh mỹn ke vẽ, kysã ti ke gé, krĩg ti ke gé. Kỹ ga kri mũ ag vỹ kamẽgmẽg kãn ke mũ. Kanẽ junjur mág jé ag tóg ke mũ, povo kar ẽn ag. Kỹ goj vỹ krém kenh mũ, goj kafã tũ vỹ jũnh ke mũ, ti kurã jun kỹ.
26 Kỹ ẽprã ke ag fe vỹ vo kónãn ke mũ, ag tỹ jũrũn ke vỹ ag kãgtén ke mũ, ag tỹ ag tỹ nén ve ja tũ ẽn ven kỹ. Ẽg tỹ kanhkã tá nén vég tũ kar ẽn vỹ ragrag ke kãn mũ mỹr, ha mẽ.
27 Kỹ vãhã vẽnh kar vỹ inh kãtĩg venh ke mũ. Kanhkã góg kã mĩ sóg kãtĩg ke mũ. Kỹ sóg tar nĩnh mũ, inh ve vỹ kókov nĩnh mũ. Ãjag tỹ tag ve kỹ ãjag tóg isỹ tỹ ẽpra ke fi kósin nĩ ẽn ki kanhró nỹtĩnh mũ,” he tóg, Jesus ti.
Ka tỹ figueira
28 “Ãjag tỹ isỹ ãjag mỹ nén tó mũ ẽn ve sĩ han kỹ ãjag kanẽ nĩm nĩ, ti tỹ ãjag mỹ sér pẽ tĩn kỹ. Isỹ vãhã ãjag krenkren han ke vẽ sir, isỹ kurã ẽn kã jun kỹ,” he tóg.
29 Kỹ tóg ag mỹ: “inh kãtĩg mãn ke vỹ ge nỹnh mũ, ha mẽ,” he mũ. “Ka tỹ figueira to ki kanhrãn nĩ, ka ũ to ke gé,” he tóg.
30 “Ti pẽ tánh kỹ, ti féj tãg han kỹ ẽkré tygtánh kurã tóg kakó tĩ sir.
31 Ẽn ri ke ti nĩ, ãjag tỹ inh kãtĩg mãn ke kurã ki kanhró nỹtĩ ti. Ãjag tỹ sỹ ãjag mỹ nén tó ja ẽn ve kỹ inh kãtĩg ke tóg kakó tãvĩ tĩ ha,” he tóg.
32 Sỹ ke há vẽ, hã kỹ sóg tag tó mũ, ha mẽ. Ũ tỹ nén kar ẽn vég mũ ag vỹ inh kãtĩg mãn ke venh ke mũ, ũri, ag kãgter ke to hã,” he tóg.
33 “Kanhkã vỹ tũꞌ henh ke mũ, ga ti ke gé. Jãvo inh vĩ vỹ tũꞌ henh ke tũ nĩ,” he tóg, Jesus ti.
Ẽg tỹ vẽnh ki ẽmẽnh ke
34 “Vẽnh ki ẽmẽ, ãjag tỹ fénhta tãvĩ to vẽnh kutãn tũ nĩ je, vẽnh kanhir e to ke gé. Kỹ vẽjẽn to krĩ kufy han tũg nĩ gé, kur to, tag ki nén ũ kar to. Ke tũ nĩ mũ ra inh kãtĩg mãn ke kurã ẽn vỹ ãjag vatánh tá jun ke mũ.
35 Ãjag tỹ to vẽnh kãn kỹ nỹtĩ tũ nĩn kỹ tóg ãjag mỹ sẽsĩ tỹ ẽgje tỹ sa ri ke nĩ. Vẽnh vatánh tá tóg tỹ sa tĩ. Ge ti nĩnh mũ, inh kãtĩg mãn ke ti. Ga kri mũ ag kar vatánh tá sóg jun ke mũ.
36 Hã kỹ ãjag kanẽ nĩm nĩ, nũr sór tũg nĩ. Inh kãtĩg ke kã jatu to ken hã vẽ, hã vỹ: nũr, he mũ. Topẽ mré vĩ to krónh ke tũg nĩ, ãjag tỹ nén ũ jagy ẽn vég mũ ra tar nỹtĩ jé. Kỹ ãjag tóg ẽprã ke fi kósin rĩnja tá nỹtĩnh ke mũ sir. Mỹꞌãg ke tũ ãjag nĩn sir, isỹ vẽnh kar jykre tugnỹm ke kurã ẽn kã,” he tóg, Jesus ti.
37 Hã ki tóg kurã kar ki Topẽ ĩn krẽm ag kanhrãn tĩ. Kutyg kỹ tóg ẽmã tá kãkutẽ kỹ pãnónh tỹ Oliveiras ra tĩ tĩ, tá nur jé.
38 Ti tỹ tỹ vaj kỹ Topẽ ĩn tá jun mãn kỹ ag tóg tá ti vĩ jẽmẽnh kãmũ tĩ, ũ tỹ hẽn ri ke ag.
