Lucas tỹ rá 22:1-71
22 Ẽn kã fénhta tóg kakó tĩ sir, ẽmĩ jãgja tũ konh ke ti. Fénhta ẽn jijin hã vỹ: Páscoa, he mũ.
2 Kỹ Topẽ tũ to pãꞌi ag vỹ ẽg kanhrãn tĩ ag mré Jesus to jykrén mũ. Ag tỹ ti tén sór vẽ. Hã ra ag tóg povo kamẽg mũ.
Judas tỹ pãꞌi ag mỹ Jesus ven sór
3 Ẽn kã Judas Iscariotes he mũ ẽn vỹ Satanás tỹ ti jagrẽ vég mũ sir, Jesus tỹ ũn vin mũ ag kã ũ ẽn ti.
4 Kỹ tóg Topẽ tũ to pãꞌi ag venh tĩ mũ sir. Ti tỹ ag mỹ Jesus ven sór vẽ, ag tỹ ti se jé.
5 Kỹ tóg ag mỹ sér pẽ tĩ sir. Kỹ ag tóg ti mỹ jãnkamy tó mũ.
6 Kỹ tóg: “he,” he mũ. Kỹ tóg to jykrén mũ, ag mỹ: “ha ti kãgmĩ,” henh ke to. Ag tỹ vẽnh kar vatánh tá ti se sór vẽ.
Pedro tỹ João mré fénhta tỹ Páscoa han
7 Kỹ tóg ẽmĩ jãgja tũ ẽn konh ke kurã tá krỹg mũ sir. Kurã ẽn ki ag tóg mé sĩ tãnh tĩ, ag tỹ kurã tỹ Páscoa kã ko jé.
8 Kỹ tóg Pedro jẽnẽg mũ, João mré. Kỹ tóg ag mỹ: “ha fénhta kãn mũjẽg,” he mũ.
9 Kỹ ag tóg ti mỹ: “kỹ ẽg hẽ tá mé tãnh mũ hỹnꞌ?“ he mũ.
10 Kỹ tóg ag mỹ: “ẽmã ẽn tá ãjag tóg ũ venh mũ. Goj vyn kỹ tóg tĩnh mũ. Ẽn hã nón mũm nĩ,” he mũ. “Ti ĩn tá junjun kỹ ti nón gem nĩ.
11 Kỹ tá nĩ ẽn mỹ: “ẽg Senhor vỹ ã mỹ vẽnh vĩ jẽnẽg mũ,” hem nĩ. “Inh hỹn hẽ tá ovelha konh ke mũ, inh mré mũ tĩ ag mré?“ he ti, ẽg Senhor ti,” hem nĩ. “Mỹ ki vẽnh kánkán jafã tũꞌ?“ hem nĩ.
12 Kỹ tóg ãjag mỹ, krogrog tỹ kynhmỹ nỹ ẽn ven ke mũ sir. Éhé ti nĩ, kỹ mesa to nỹtĩ jafã vỹ tá nỹtĩ gé. Ẽn tá ti kãn nĩ ẽg mỹ,” he tóg.
13 Kỹ ag tóg mũ kỹ tá mé tãnh mũ sir.
Santa Ceia
14 Kỹ tóg ag tỹ konh ke óra tá krỹg mũ. Kỹ tóg, ti tỹ ũn vin ja ag mré tá nĩ nĩ.
15 Kỹ tóg ag mỹ: “sỹ ovelha tag konh hapẽ tóg tĩ vẽ ãjag mré, inh vẽsỹrénh ke to hã,” he mũ.
16 “Hã ra sóg ko mãn ke tũ nĩ ha, ha vem nĩ. Topẽ tỹ tỹ ẽg pãꞌi nĩ vỹ vẽnh ven ke mũ. Ẽn kã sóg ko mãn ke mũ, kejẽn,” he tóg.
17 Kỹ tóg kópa vãg mũ sir. To tóg Topẽ mré vĩ mũ, kỹ tóg ag mỹ: “ha kron,” he mũ. “Ha vẽnh kãpãm,” he tóg.
18 “Tag kron mãn ke tũ inh nĩ ha, ke gé, ha vem nĩ. Topẽ tỹ tỹ ẽg pãꞌi nĩnh ke ẽn hã kã sóg kron mãn ke mũ, ha vem nĩ,” he tóg.
19 Kỹ tóg ẽmĩ mãg mũ sir. To tóg Topẽ mré vĩ mũ. Kupãn kỹ tóg ag mỹ kãnhkrég mũ. Kỹ tóg ag mỹ: “inh hã vẽ,” he mũ. “Ãjag jagfy sóg vẽnh fẽg ke mũ. Kỹ inh mĩ ẽkrén nĩ, ãjag tỹ ẽmĩ tag konh ken kỹ,” he tóg.
20 Ag tỹ ko kar kỹ tóg kópa vãg mũ gé. Kỹ tóg ag mỹ: “kópa ki jẽ tag vỹ tỹ inh kyvénh ri ke nĩ,” he mũ. “Ãjag jagfy tóg inh ki kãkutẽnh mũ. Inh jykre tãg to ken hã vẽ, isỹ inh kyvénh tugrĩn ãjag mỹ vẽnh pãte fón jé,” he tóg.
21 “Hã ra ãjag kã ũ tóg inh vatánh tá isónh ke mũ, inh kato tẽ ag mỹ. Inh mré tóg mesa tag to nĩ nĩ.
22 Tĩg jé sóg ke mũ, isỹ tỹ ẽprã ke fi kósin nĩn kỹ. Vãsỹ Topẽ tóg to jykrén ja nĩ, hã kỹ sóg tĩg mũ. Hã ra tóg ũ tỹ isónh ke mũ ẽn mỹ vĩ kónãn tãvĩ han ke mũ, Topẽ ti,” he tóg.
23 Kỹ ag tóg jagnẽ mỹ: “ẽg kã ũ tỹ hẽ nẽ hỹnꞌ?“ he mũ sir.
Ũ tỹ hẽ nẽ tỹ ũn mág nĩ
24 Ẽn kã ag tóg jagnẽ kãfór nĩ sór mũ. Hã kỹ ag tóg jagnẽ to jũ mũ.
25 Kỹ Jesus tóg ag mỹ: “fóg ag pãꞌi ag vỹ ag krẽm ke ag mỹ vĩ tar han tĩ, kỹ ag tóg ũ tỹ ag kãfór ag mỹ: “ẽg jóg,” he tĩ, ti tỹ ag mỹ vĩ tar han mũ ra,” he mũ.
26 “Ag ri ke han tũg nĩ. Ãjag mỹ tỹ ũn mág nỹtĩ sór mũꞌ? Kỹ tỹ ũn kãsir ri ke nỹtĩm nĩ, jagnẽ mré,” he tóg. “Ũ tỹ inh jykre ki tỹ pãꞌi nĩn kỹ tóg tỹ ti krẽm ke ag camarada ri ke nĩnh ke mũ, ag ki rĩr kỹ.
27 Kejẽn ẽg tóg mesa to nỹtĩ, kỹ ũ tóg mesa ki rĩr tĩgtĩ. Ũ tỹ hẽ nỹ hỹn mesa ki rĩr tĩꞌ? Ag patrão mỹꞌ, ti camarada mỹ vóꞌ? Ti camarada vỹ ki rĩr tĩgtĩ. Jo sóg ãjag ki rĩr tĩgtĩ, ãjag camarada ri ke.
28 Ãjag hã ne inh mré mũgtĩꞌ. Isovãnh ja tũ pẽ ãjag tóg nỹtĩ. Isỹ nén ũ jagy vég mũ ẽn ve kãn ãjag tóg tĩ, inh mré.
29 Inh panh vỹ isỹ pãꞌi han ke mũ, kỹ sóg ãjag tỹ pãꞌi han ke mũ gé, ti kóm,
30 ãjag tỹ inh mré jẽn jé tá. Kỹ ãjag tóg ãjag nĩgja kri nĩgnĩ kỹ nỹtĩnh mũ, ãjag tỹ povo tỹ Israel ag jykre tugnỹm jé, povo tỹ 12 (ke) ẽn ag,” he tóg, Jesus ti.
Jesus tỹ Pedro mỹ tó
31 Kỹ tóg Pedro mỹ: “SimãoA078, SimãoA078,” he mũ. “Satanás vỹ ãjag to vĩ, Topẽ mỹ. Ti tỹ ãjag jykre ve sór vẽ. Trigo tỹ ẽg tóg peneira ki kãkag tĩ, ẽg tỹ ti fár pan jé. Ẽn ri ke han jé tóg ke mũ, ãjag tỹ, Satanás ti.
32 Hã ra sóg hur ã jagfy vĩ, ã tỹ inh ki rã tovãnh pẽ han tũ nĩ jé. Kỹ ã tóg kejẽn ã jykre si to jykrén mãn ke mũ, ã tỹ inh jykre hã han jé. Ẽn kã ã tóg ã mré ke ag jyvẽn kỹ ag tỹ tarꞌ henh ke mũ,” he tóg.
33 Hã ra Pedro tóg ti mỹ: “ã mré sóg se kỹ jẽnh mũ, ã mré sóg ter ke mũ gé,” he mũ.
34 Hã ra tóg: “vó,” he mũ. “Ha vé, ũri ã tóg iso: “ti ki kagtĩg sóg nĩ,” he tãgtũ han ke mũ, galo kyr ke to hã, ha vem nĩ,” he tóg.
Jesus tỹ ag mỹ ti jagy tĩnh ke tó
35 Kỹ tóg ag kar mỹ: “ãjag jẽgnẽ ja inh nĩ. Kỹ ãjag tóg nén ũ ma mũ ja tũ nĩgtĩ, bolsa tũ, pẽn né tũ. Ẽn kã ãjag mỹ jagtar ja nĩgtĩꞌ?“ he mũ. Kỹ ag tóg: “vó,” he mũ.
36 Kỹ tóg ag mỹ: “hã ra tóg ũri ke tũ nĩgtĩ,” he mũ. “Hã kỹ ãjag jãnkamy ma mũjẽg, ãjag bolsa ma mũjẽg. Ãjag tỹ nén ũ tũ nỹtĩn kỹ ãjag kur vẽne hem nĩ, rógro kajãm jé sir.
37 Nén ũ tóg iso rán kỹ nĩ, hã vỹ: ag mỹ tóg tỹ ũn jykre pãno nĩ, he mũ. Sỹ vãhã tag venh ke vẽ ha. Sỹ iso nén rán kỹ nĩ ẽn ve kãn ke vẽ ha, vãhã,” he tóg.
38 Kỹ ag tóg ti mỹ: “rógro régre vỹ ki nỹtĩ,” he mũ. Hã ra tóg ag mỹ: “hã tũ vẽ,” he mũ.
Jesus tỹ ti panh mré vĩ
39 Kỹ tóg ag mré ti tĩg jafã ẽn ra tĩ mũ sir, hã vỹ: pãnónh tỹ Oliveiras, he mũ.
40 Tá jun kỹ tóg ag mỹ: “ẽg tỹ nén jagy venh ke nẽ ha. Topẽ mré vĩ, ãjag tỹ ti vĩ mranh tũ nĩ jé,” he mũ.
41 Kỹ tóg tĩg sĩ han mũ, kỹ tóg ti jakrĩ tỹ jẽ kỹ Topẽ mré vĩ mũ sir.
42 Kỹ tóg: “panhꞌ, mỹ ã tỹ inh vẽsỹrénh ke tag tỹ tũꞌ he jãvãnh? Hã ra isỹ ã mỹ nén to vĩ mũ tag han tũg nĩ. Ã tỹ nén han ke mũ ẽn hã han nĩ,” he mũ.
43 Kỹ Topẽ tỹ jẽnẽ jafã ũ vỹ ti mỹ vẽnh ven mũ sir, kanhkã tá, kỹ tóg ti tar han mũ.
44 Hã ra tóg ti ter ke to kanẽ jur mũ, hã kỹ tóg Topẽ mré vĩ mãnꞌ, vĩ mãnꞌ, he mũ. Kỹ ti kãrãn vỹ kyvénh mũ sir, kỹ tóg ga kri nãgꞌ nãgꞌ he mũ.
45 Kỹ tóg ti mré mũ tĩ ag to kãtĩ mũ. Hã ra ag tóg nũgnũr nỹtĩ nĩ. Krónhꞌ krónhꞌ ke ja ag tóg nĩ, ag fe kaj tugrĩn.
46 Kỹ tóg ag mỹ: “ãjag ne tóg nũgnũr nỹtĩ nĩꞌ. Nĩgnĩ ra, Topẽ mré vĩ, ãjag tỹ ti vĩ mranh tũ nĩ jé, ãjag tỹ nén ũ jagy ve kỹ,” he mũ.
Ag tỹ Jesus se
47 Ti tỹ ver tỹ vẽmén jẽ ra ũn e ag tóg junjun mũ sir, Judas mré, ũ tỹ 12 (ke) ag kã ũ ẽn ti. Ti tỹ ag tatĩn kãtĩg hã vẽ, ag tỹ ti se jé. Kỹ tóg sir Jesus to grẽn ke kỹ ti ki nhun ke mũ.
48 Kỹ tóg ti mỹ: “Judasꞌ,” he mũ. “Ã ne tóg inh ki nhun ke kỹ iso: “ti hã vẽ,” he mũꞌ, inh kato tẽ ag mỹ,” he tóg.
49 Kỹ ti mré mũ ag tóg ti mỹ: “ẽg mỹ rógro tỹ ag fynh ke tũꞌ?“ he mũ.
50 Kỹ ag kã ũ tóg porisa ũ fynh mũ. Ti nĩgrẽg tỹ tóg rãm ke mũ, ti pẽgja tá. Topẽ tũ to pãꞌi krẽm ke ũ vẽ.
51 Hã ra tóg: “ag vóg tũg ra, há ti nĩ,” he mũ. Kỹ tóg ti nĩgrẽg mãn kỹ to tỹ grẽn ke mũ sir.
52 Pãꞌi tỹ hẽn ri ke ag vỹ tá junjun ja nĩ, Topẽ tũ to pãꞌi ag, kófa ag ke gé. Ag kar tỹ ti senh kãmũ ja vẽ. Kỹ Jesus tóg ag mỹ: “ãjag ne tóg rógro génh kỹ iso kãmũ mũꞌ, ka kyv génh kỹ ke géꞌ,” he mũ. “Inh pijé tỹ bandido nĩꞌ,” he tóg.
53 “Kurã kar ki sóg Topẽ ĩn krẽm ãjag mré nĩ ja nĩgtĩ, hã ra ãjag tóg tá ise sór ja tũ nĩ, ãjag tỹ ag kamẽg kỹ. Hã ra tóg ũri jun, ãjag kurã ti, Japo tỹ ti tỹ nén han sór mũ ẽn han jé, ãjag tỹ. Jykre ki kuty ti nĩ,” he tóg.
Pedro tỹ Jesus to ón
54 Kỹ ag tóg ti ség mũ sir. Ag tỹ ti pére mũ kỹ ag tóg Topẽ tũ to pãꞌi mág ĩn tá junjun mũ.
Hã ra Pedro vỹ kuvar há tá ag nón kãtĩ mũ.
55 Ðn vãso tá soldado ag tóg pĩ grug mũ, kỹ ag tóg tugtón nỹtĩ nĩ. Kỹ Pedro vỹ ag mré tón nĩ nĩ.
56 Kỹ pãꞌi camarada ũ fi vỹ tá ti vég mũ. Kỹ fi tóg ti tugnỹm kỹ ag mỹ: “inh mỹ ti mré tĩ tĩ ũ vẽ,” he mũ.
57 Hã ra Pedro tóg: “vó,” he mũ. “Ti ki kagtĩg sóg nĩ, jỹ,” he tóg.
58 Kar kỹ ũ tóg ti tugnỹm mũ gé, kỹ tóg ti mỹ: “ag kã ũ vỹ tỹ ã nĩ,” he mũ. Hã ra tóg ti mỹ: “inh hã tũ vẽ, vỹ,” he mũ gé.
59 Tag kar kỹ, óra pir tũg kỹ hẽn ri ke mũn, ũ tóg ti tugnỹm mũ gé. Kỹ tóg tá nỹtĩ ag mỹ: “ha vé, Galiléia tá ke vỹ tỹ ti nĩ,” he mũ. “Inh mỹ tóg tỹ ti mré ke ũ nĩ,” he tóg mũ gé.
60 Hã ra Pedro tóg ti mỹ: “inh pijé ti ki kanhró nĩ, vỹꞌ. Ã tỹ ne tó nẽ?“ he mũ. Ti tỹ ver tỹ vẽmén nĩ ra galo vỹ kyr mũ sir.
61 Kỹ ẽg Senhor vỹ vẽsỹjãm Pedro ki ẽvãnh mũ. Kỹ Pedro vỹ to jykrén mũ, ẽg Senhor tỹ ti mỹ: “iso ã tóg: “ti ki kagtĩg sóg nĩ,” he tãgtũ han ke mũ, galo kyr ke to hã,” he ja ẽn mĩ.
62 Kỹ tóg tá kãkutẽ mũ, kỹ tóg fỹ mág han mũ sir.
Ag tỹ Jesus vóg kónãn
63 Kỹ ũ tỹ Jesus ség mũ ag vỹ ti to é he mũ. Ti tãnh ag tóg mũ gé.
64 Ti kanẽ pãg kỹ ag tóg ti kakã ki tãnh kỹ ti mỹ: “ã mỹ ẽg kã ũ tỹ hẽ nỹ ã tãnh?“ he mũ. “Ã tỹ nén kar ki kanhró nĩn kỹ ã hỹn ki kanhró nĩ,” he ag tóg ti mỹ.
65 Gen kỹ ag tóg ti mỹ vĩ kónãn tỹ hẽn ri ke han mũ, ti to é he kỹ.
Pãꞌi ag tỹ Jesus ki jẽmẽ
66 Tỹ vaj kỹ kófa kar ag tóg vẽnh mãn mũ, Topẽ tũ to pãꞌi ag mré hã, Topẽ vĩ to ẽg kanhrãn tĩ ag mré hã. Ag vẽnh mãn kỹ ag tóg ti jé prẽr kỹ ag rĩnja tá ti fẽg mũ, ag tỹ ón kỹ ti jykre ve jé. Ag tỹ ti tén sór vẽ.
67 Hã kỹ ag tóg ti mỹ: “ã mỹ tỹ Cristo nĩ?“ he mũ. “Ha ẽg mỹ tó,” he ag tóg. Kỹ tóg ag mỹ: “ãjag pijé inh vĩ kri fig tĩꞌ, isỹ ãjag mỹ tó mũ ra,” he mũ.
68 “Isỹ ãjag ki jẽmẽ sór mũ ra ãjag tóg inh mỹ tó tũ nĩgtĩ gé. Kỹ ãjag tóg isovãnh tũ nĩ gé,” he tóg.
69 “Hã kỹ ẽprã ke fi kósin vỹ Topẽ pẽgja tá nĩnh ke mũ ha. Topẽ vỹ tar nĩ. Sỹ ti pẽgja tá nĩnh ke vẽ ha,” he tóg.
70 Kỹ ag kar tóg ti mỹ: “kỹ ã mỹ tỹ Topẽ kósin nĩ?“ he mũ. Kỹ tóg ag mỹ: “ki hã ãjag tóg tó mũ,” he mũ. “Inh hã vẽ,” he tóg ag mỹ.
71 Kỹ ag tóg: “ti ki ẽg tóg nén ũ jẽmẽ mãn ke tũ nĩ ha,” he mũ. “Ti jẽnky ki kãkutẽ mẽ ẽg tóg huri. Topẽ to vĩ kónãn ti huri. Ti ter ke vẽ ha,” he ag tóg mũ sir.
