Lucas tỹ rá 23:1-56
23 Hã ra tá ke kar ag vỹ Jesus pére mũ mũ, fóg tỹ pãꞌi tỹ Pilatos mỹ.
2 Tá ag tóg ti mỹ: “vẽnh kar krĩn kónãn tóg tĩ, ag tỹ vẽjykre há tovãnh jé,” he mũ. “Kỹ tóg ẽg mỹ: “pãꞌi mág tỹ imperador mỹ imposto nĩm tũg nĩ,” he tĩ gé. Kỹ tóg vẽso: “tỹ inh Cristo nĩ, pãꞌi mág ti,” he tĩ gé,” he ag tóg mũ.
3 Kỹ Pilatos tóg ti mỹ: “ã mỹ tỹ Judeu ag pãꞌi mág nĩꞌ?“ he mũ. Kỹ tóg ti mỹ: “ki hã ã tóg tó mũ,” he mũ.
4 Kỹ Pilatos tóg ag kar mỹ: “ti tỹ nén ũ kórég han ja vég tũ sóg nĩ,” he mũ.
5 Hã ra ag tóg ti tovãnh jãvãnh pẽ nỹtĩ. Kỹ ag tóg ti mỹ: “hã ra tóg vẽnh kar krĩ rỹ han tĩgtĩ,” he mũ. “Ga tỹ Judéia kar mĩ tóg tĩg ja nĩ, ga tỹ Galiléia mĩ ke gé, tag mĩ ke gé. Tĩg kỹ tóg vẽnh kar krĩn kónãn tĩgtĩ,” he ag tóg.
Herodes tỹ Jesus ki jẽmẽ
6 Kỹ Pilatos tóg: “ti mỹ tỹ Galiléia tá ke nĩꞌ?“ he mũ.
7 Kỹ ag tóg ti mỹ: “hỹ,” he mũ. Hã ra Herodes vỹ tỹ ga tỹ Galiléia tá pãꞌi mág nĩ. Hã kỹ Pilatos tóg ti hã mỹ ti jẽnẽg mũ. Ẽn kã tóg Jerusalém tá nĩ gé, Herodes ti.
8 Kỹ tóg Herodes tá jun mũ sir. Ti tỹ ti ve kỹ tóg ti mỹ sér tĩ. Ti tỹ ti ve sór ja vẽ. Ti kãme mẽ ja tóg nĩ, hã kỹ tóg ti ve sór ja nĩgtĩ. “Hẽn ri ke mũn tóg nén han vãnh han ke mũ, sỹ ve jé,” he tóg.
9 Ti tỹ tá jun kỹ tóg ti ki nén tỹ hẽn ri ke jẽmẽ sór mũ, hã ra tóg ti mỹ vĩ tũg mũ.
10 Hã ra pãꞌi ag vỹ tá nỹtĩ nĩ, kỹ ag tóg ti kato vĩ mág han mũ sir, Topẽ vĩ to ẽg kanhrãn tĩ ag ke gé. Hã ra Jesus tóg ag mỹ vĩ tũg mũ gé.
11 Kỹ Herodes vỹ ti to é he mũ gé, ti mré ke kar ag ke gé, kỹ ag tóg ti nyg mũ. Kur kupri pẽ tỹ tóg ti kri fón mũ, ón kỹ. Kỹ tóg Pilatos mỹ ti jẽnẽ mãn mũ sir.
12 Kurã ẽn kã Pilatos vỹ Herodes mỹ vĩ há han mũ. Jagnẽ to háꞌ he mãn ag tóg mũ. Ag tỹ Jesus venh ke jo ag tóg jagnẽ kato tẽ ja nĩgtĩ.
Ag tỹ Jesus tén sór
13 Kỹ Pilatos vỹ pãꞌi ag jé prẽr mũ sir.
14 Kỹ tóg ag mỹ: “ãjag ne inh mỹ ti fẽgꞌ,” he mũ, “kỹ ãjag ne ti to: “vẽnh kar krĩn kónãn tóg tĩ,” he mũꞌ. Ãjag rĩnve sóg ti ki jẽmẽ huri, hã ra sóg ve ja tũ nĩ, ãjag tỹ ti to nén tó ja ti. Nén ũ kórég han ja tũ tóg nĩ.
15 Kỹ Herodes vỹ vég tũ nĩ gé. Sỹ ti mỹ ti jẽnẽ ja vẽ, ãjag ke gé. Hã ra tóg inh mỹ ti jẽnẽ mãn mũ gé. Ẽg hẽ ri ken kỹ ti tén mũ hỹnꞌ? Sỹ ki kagtĩg tóg tĩ.
16 Hã kỹ sóg ti mrãnmrãn kar ti tovãnh ke mũ,” he tóg.
17 Fénhta tỹ Páscoa ki tóg ag mỹ vẽse pir tovãnh tĩ, prỹg kar ki. Ti jykre vẽ. Hã kỹ tóg: “Jesus tovãnh jé sóg ke mũ,” he mũ.
18 Hã ra vẽnh kar ag tóg vãhã prẽnprẽr mũ sir. “!..Ti tén ra..!“ he ag tóg mũ. “!..Barrabás tovãnh ra..!“ he ag tóg.
19 Barrabás vỹ vẽnh génh to se kỹ jẽ nĩ. Ẽmã tá tóg vẽnh génh han ja nĩgtĩ, ẽn kã tóg ũ tén ja nĩgtĩ, hã to tóg se kỹ jẽ nĩ.
20 Kỹ Pilatos vỹ ag mỹ vĩ mãn mũ. Ti tỹ Jesus tovãnh sór vẽ.
21 Hã ra ag tóg prẽnprẽr kỹ: “!..krunh to ti sã, krunh to ti sã..!“ he mũ.
22 Kỹ tóg ag mỹ vĩ tãgtũ han mũ gé. “Ti kórég tỹ ne han ti? Sỹ vég tũ tóg tĩ. Ti tỹ ne to ter ke nẽ? Sỹ ki kagtĩg tóg tĩ. Hã kỹ sóg ti mrãnmrãn kar kỹ ti tovãnh ke mũ,” he tóg.
23 Hã ra ag tóg prẽnprẽr tãvĩ han mũ sir, hã kỹ ag tóg ti kutãn mũ. Ti mỹ ag tóg: “!..krunh to ti sã..!“ he tãvĩ han mũ. Kỹ tóg ag prẽnprẽr to ag mỹ han sór mũ sir.
24 To tóg jykrén mũ, kỹ tóg ag mỹ: “he,” he mũ, ag tỹ ti kutãn to.
25 Kỹ tóg ũ ẽn kavãg mũ sir, ũ tỹ vẽnh génh to se kỹ jẽ ẽn ti, ũ tỹ ũ tén ja ẽn ti. Kỹ tóg ag mỹ Jesus ti fẽg mũ sir, ag tỹ ti ki ag tỹ nén han sór mũ ẽn han jé.
26 Kỹ ag tóg ti pére mũ mũ, krunh to ti sa jé.
Jesus tỹ krunh to sa
Ag mũn kỹ ag tóg ũ kãtĩg vég mũ. Ẽpỹ tá tóg kãtĩ mũ. Ti jijin hã vỹ: Cirene tá Simão, he mũ. Ti kri ag tóg Jesus krunh ti fig mũ, ti tỹ ti jé va tĩg jé, ti nón.
27 Kỹ ũ tỹ hẽn ri ke ag vỹ Jesus nón mũ mũ, ũn tỹtá fag ke gé. Ẽn fag vỹ vẽsỹrénh mũ. Kygfỹ mág han fag tóg mũ sir.
28 Hã ra Jesus tóg vẽsỹjãm ẽvãnh kỹ fag mỹ: “Jerusalém tá keꞌ,” he mũ. “Ijé kygfỹ tũg nĩ,” he tóg. “Vẽjé kygfỹm nĩ, ãjag krẽ jé kygfỹm nĩ,” he tóg.
29 “Ha vé, kurã kórég pẽ vỹ jun ke mũ, ãjag mỹ. Ẽn kã ũ ag tóg: “ũn kurĩ fag mỹn pãgsĩ nĩnh mũ, fag tỹ fag krẽ ter vég tũ nĩn kỹ,” henh mũ. “Ũn krẽ tũ fag mỹn pãgsĩ nĩnh mũ, ũ tỹ gĩr pygfãm tũ fag mỹ ke gé,” he jé ag tóg ke mũ.
30 Ẽn kã ag tóg pãnónh mỹ: “inh kri tỹ tam ké,” henh ke mũ gé, kỹ ag tóg sór mỹ: “inh péju ra, vẽnh krẽm,” henh ke mũ gé.
31 Ẽg kato tẽ ag tỹ ka tánh gỹn kỹ ag hỹn ka tóg tovãnh ke tũ pẽ nĩ. Ka tánh ẽn ri ke sóg nĩ. Jo ãjag tóg ka tóg ri ke nỹtĩ. Hã kỹ ãjag tóg inh vẽsỹrénh kãfór venh ke mũ, ha vem nĩ,” he tóg. Jerusalém fĩn rãm kỹ tóg ke mũ.
32 Ag tỹ Jesus pére mũn kỹ ag tóg ũn régre ag pére mũ mũ gé, ũn jykre pãno ag. Ag tỹ ka to ag sanh ke vẽ gé.
33 Kỹ ag tóg pãnónh tá junjun mũ sir, ti jijin hã vỹ: Krĩ Kuka, he mũ. Tá ag tóg krunh to ti sãg mũ sir. Ũn jykre pãno ag tỹ ag tóg krunh to ag sãg mũ gé, ti kóm, kỹ ũ vỹ ti pẽgja tá sa, jo ũ vỹ ti jakãnh tá sa.
34 Kỹ Jesus vỹ: “panhꞌ, ag mỹ vẽnh pãte fón nĩ,” he mũ. “Ag pijé ki kanhró nỹtĩꞌ, ag tỹ nén han mũ tag ki,” he tóg.
Kỹ soldado ag tóg ti kur tỹ jagnẽ mỹ vẽnh ken mũ, to ag tóg joga he mũ sir.
35 Kỹ vẽnh e ag vỹ tá vég nỹtĩ. Hã ra pãꞌi ag tóg ti nyg mũ. Kỹ ag tóg jagnẽ mỹ: “ũ ag krenkren han ja tóg nĩgtĩ,” he mũ. “Cristo jé vẽnh kren han, Topẽ tỹ ti fẽg ja nĩn kỹ, ti tỹ ti kuprẽg ja nĩn kỹ. Hã ra tóg vẽnh kren han ki kagtĩg nĩ,” he ag tóg mũ, ti to é he kỹ.
36 Kỹ soldado ag vỹ ti nyg mũ gé. Ti rã hã nỹtĩ kỹ ag tóg ti mỹ vinagre ven mũ sir.
37 Kỹ ag tóg ti mỹ: “ã mỹ tỹ Judeu ag pãꞌi mág nĩꞌ?“ he mũ. “Vẽnh kren han ra, ã tỹ tỹ pãꞌi nĩn kỹ,” he ag tóg mũ, ti to é he kỹ.
38 Hã ra ag tóg ti to rán ja nĩ, ti tỹ krunh to sa ẽn ti. Ti to rán hã vẽ, hã vỹ: “Judeu ag pãꞌi mág hã vẽ,” he mũ. Ti kri tóg krunh to rán kỹ sa.
39 Kỹ ti kóm krunh to sa ũ tóg ti to é he mũ gé, ũn jykre pãno ẽn. Kỹ tóg ti mỹ: “ã mỹ tỹ Cristo nĩ?“ he mũ. “Vẽnh kren han ra, kỹ ẽg krenkren han nĩ gé,” he tóg mũ.
40 Hã ra ti kóm krunh to sa ũ tóg ti mỹ vĩ jũ han mũ. Ti mỹ tóg: “kỹ ã mỹ Topẽ kamẽg tũ?“ he mũ. “Vẽsỹrénh ã tóg mũ gé, ti kóm.
41 Ẽg tỹ ẽg tỹ nén han ja kajãm vẽ jãvo. Ẽg jykre pãno to ẽg vẽsỹrénh nỹtĩ nĩ. Ẽg jãvo tóg jykre kuryj nĩ. Ti pijé nén ũ kórég han ja nĩꞌ,” he tóg.
42 Kỹ tóg Jesus mỹ: “Senhorꞌ, inh ki ẽkrén nĩ, ã tỹ tỹ pãꞌi ki rãn kỹ,” he mũ.
43 Kỹ tóg ti mỹ: “ha mẽ, ũri ã tóg inh mré ẽmã há ẽn tá nĩnh mũ, Paraíso he mũ ẽn tá, kanhkã tá. Ki hã sóg tó mũ,” he mũ, Jesus ti.
Jesus ter
44 Kejẽn rã tóg ẽg nĩno kã sa nĩ sir. Hã ra tóg kutyꞌ he mũ sir, ga kar mĩ hã. Kuty ẽn tóg óra tãgtũ han mũ.
45 Hã ra Topẽ ĩn krẽm kur mág pẽ vỹ jãnkã kã sa nĩ. Ẽn vỹ jaran ke mũ. Kuju mĩ tóg jaran ke kãtére mũ sir, fĩn rãm kãn tóg mũ.
46 Kỹ Jesus vỹ prẽr mág pẽ han mũ. Kỹ tóg: “!..panhꞌ..!“ he mũ. “!..Sỹ ã mỹ vẽnh fẽg vẽ, inh kuprĩg ti..!“ he tóg. Tag tó kar tóg hun ke mũ sir.
47 Hã ra fóg tỹ capitão tóg ti ter vég mũ. Kỹ tóg Topẽ mỹ vĩ há han mũ. “Vẽnh vĩ ja vẽ, ũn há ja vẽ,” he tóg mũ.
48 Kỹ vẽnh e ẽn vỹ ti ter vég mũ gé. Kỹ ag tóg ag tỹ nén han ja to jykrén mũ sir. Vãhã tóg ag mỹ e tĩ. “Topẽ hỹn ẽg tỹ hẽ ri kenh mũ ha, ẽg tỹ ti tén kỹ?“ he ag tóg mũ sir. Tag tó kỹ ag tóg ag ĩn ra vỹnvỹn ke mũ.
49 Hã ra ti to há ag vỹ ti vég nỹtĩ nĩ, kakó ki, ũn tỹtá fag ke gé. Galiléia tá ke fag tóg ti mré kãmũ ja nĩgtĩ gé. Ti ter ve kãn fag tóg mũ sir.
Ag tỹ vẽnh kej tá Jesus fi
50 Kỹ ũ tóg tá nĩ gé, vẽnh jyvẽn tĩ ũ. Ti jiji hã vỹ: José, he mũ. Tỹ tóg ẽmã tỹ Arimatéia tá ke nĩ, ga tỹ Judéia tá. Jykre kuryj tóg nĩ, jykre há.
51 Ti pijé ag tỹ Jesus tén ke to jykrén mũ ẽn kã: “he,” he ja nĩgtĩꞌ. Topẽ tỹ tỹ ẽg pãꞌi nĩnh ke ve sór tóg mũ gé.
52 Ẽn vỹ Pilatos venh tĩ mũ. Kỹ tóg ti mỹ Jesus to vĩ mũ, ti ter kar kỹ.
53 Kỹ tóg krunh to ti kãtérem mũ. Kỹ tóg kur há tỹ ti pãg mũ sir. Kỹ tóg pãró nor kã ki vẽnh kej ẽn tá ti fig mũ. Vẽnh kej tãg vẽ, ag pijé ver kã kã ũ fi ja nĩgtĩꞌ.
54 Hã ra sexta-feira vẽ sir. Vẽnhkán ke kurã ki tóg rã ha, sábado ki.
55 Kỹ ũn tỹtá fag vỹ ag nón mũ mũ, ti kej ve jé, ag tỹ ti finh mũ ja tá. Ti mré Galiléia tá kãmũ ja ẽn fag vẽ.
56 Ve kar kỹ fag tóg kyrãgrã kỹ nén ger há han mũ sir, ti tãg jafã ti, ti to tĩn jé. Hã ra fag tóg vẽnhkán mũ ver, vẽnhkán ke kurã kã, Topẽ tỹ Judeu ag mỹ kurã nĩm ja ẽn ki króm jé.
