Lucas tỹ rá 4:1-44

4  Jesus vỹ Topẽ kuprĩg tỹ jagrẽ nĩ. Hã kỹ tóg goj tỹ Jordão tá vỹn ke mũ, ti kype kỹ jẽn kỹ. Ti tĩg kỹ Topẽ kuprĩg vỹ ti krĩn mũ.  Kỹ tóg ẽmã tũ ja ra tĩ mũ sir, ga kórég ra. Tá tóg kurã tỹ 40 (ke) han mũ, ẽmã tũ ja tá. Kỹ Japo vỹ ti tỹ ti jóg vĩ mranh han sór mũ, hã ra Jesus tóg ke tũ nĩ. Jẽg tũ tóg nĩ, kurã tỹ 40 (ke) ki. Kỹ tóg kókĩr mũ sir.  Ti kókĩr nĩn kỹ Japo vỹ ti mỹ: “tỹ ã tóg Topẽ kósin nĩ mỹr. Hã kỹ pó tag tỹ ẽmĩ han nĩ, ã tỹ ko jé,” he mũ.  Kỹ tóg ti mỹ: “hã ra tag tóg rán kỹ nĩ, ha mẽ: “ẽmĩ tãvĩ jamẽn kỹ ẽg rĩnrĩr tũ nỹtĩ, Topẽ vĩ hã jamẽn kỹ ẽg rĩnrĩr nỹtĩ.” Hã kỹ tóg sỹ ti vĩ mranh jãvãnh tĩ, ẽmĩ to,” he mũ.  Kỹ tóg ti mré krĩ ra tãpry mũ. Kỹ tóg ti mỹ ga kar ven kãn mũ, ũ tỹ kri mũ kar ag ke gé.  Kỹ tóg ti mỹ: “isũ vẽ mỹr,” he mũ. Japo ti. “Ã mỹ sóg tovãnh kãn sór mũ, ã tỹ tỹ vẽnh kar tag ag pãꞌi jẽ jé. Kỹ nén sĩnvĩ tag kar vỹ tỹ ã tũ nĩnh mũ. Ũ tỹ han mũ ẽn tỹ inh mỹ: “té,” hen kỹ sóg isỹ ũn kuprẽg mũ ẽn mỹ nĩm tĩ sir.  Ã hã mỹ sóg tovãnh sór mũ ha, ã tỹ inh krẽm grĩnh ke kỹ inh mỹ: “Topẽ vỹ tỹ ã nĩ, hen kỹ,” he tóg.  Kỹ tóg ti mỹ: “tag vỹ rán kỹ nĩ, ha mẽ: “ẽg pãꞌi tỹ Topẽ hã krẽm ẽg tóg ẽg jakrĩ tỹ grĩnhꞌ ke tĩ, ti hã to ẽg tóg: Topẽ vẽ, he tĩ,” he tóg, Topẽ vĩ tỹ rán kỹ nĩ ki. Hã kỹ tóg sỹ mranh jãvãnh tĩ,” he tóg.  Kỹ tóg ti mré tĩg mãn mũ, Jerusalém ra. Tá ag tóg Topẽ ĩn to jãpry kỹ ti nĩno tá nỹtĩ nĩ. Kỹ tóg tá Jesus mỹ: “Topẽ kósin vỹ tỹ ã nĩ,” he mũ.“ Kỹ ki hũm nĩ. 10  Tag vỹ rán kỹ nĩ, ha mẽ: “ti tỹ jẽgnẽ jafã ag mỹ tóg tónh mũ, kỹ ag tóg ã ki rĩr ke mũ. 11  Ag nĩgé tỹ ag tóg ã kãgmĩnh ke mũ, kỹ ã tóg rỹj ke tũ nĩ. Ã pẽn vỹ rỹj ke tũ nĩ gé,” he tóg, Topẽ vĩ tỹ rán kỹ nĩ ki. Kỹ jatun mỹ hũm nĩ,” he tóg. 12  Kỹ tóg ti mỹ: “kỹ tag vỹ rán kỹ nĩ gé, ha mẽ,” he mũ. “Topẽ mỹ: ã mỹ ã tỹ nén tó ja ẽn han mũ vỹ? he tũg nĩ,” he tóg mũ gé, Topẽ vĩ tỹ rán kỹ nĩ ki. Hã kỹ sóg hũm ke tũ nĩ,” he tóg. 13  Kỹ Japo vỹ ti tỹ nén tónh ke mũ ẽn tó kãn ja nĩ, hã kỹ tóg Jesus tovãnh mũ ver, ti tỹ kejẽn ti mré vĩ mãn jé, kurã ũ kã. Jesus tỹ Galiléia tá ag kanhrãn 14  Kỹ tóg tĩ mũ sir, Topẽ kuprĩg tỹ ti krĩn kỹ. Ga tỹ Galiléia ra tóg tĩ mũ. Kỹ vẽnh kar tóg ti kãme mẽ kãn mũ sir, ga ẽn tá ke kar ag. 15  Kỹ tóg ag kanhrãn mũ sir, ag vẽnh kanhrãn jafã krẽm. Kỹ ti vĩ tóg ag mỹ e tĩ. Hã kỹ ag tóg ti to vĩ há han mũ sir. Jesus tỹ Nazaré ra vỹn ke 16  Kỹ tóg Nazaré tá jun mũ gé, ti tỹ hẽ tá mog ja ẽn tá. Kỹ tóg ti tỹ nén han tĩ ẽn han mũ. Vẽnh kán ke kurã ki tóg culto venh tĩ mũ. Tá tóg sir jẽgnẽ mũ, Topẽ vĩ rá to ke jé. 17  Kỹ ag tóg ti mỹ Isaías tỹ rá jun mũ. Kỹ tóg livro kavãn kỹ to ke kỹ tag tó mũ, ha mẽ: 18  “Topẽ kuprĩg vỹ inh krĩn mũ. Inh jagrẽ vẽ mỹr. “Ũn jagtar ag mỹ inh vĩ tóm nĩ,” he tóg inh mỹ. Inh jẽnẽg tóg mũ, isỹ ũn sigse kỹ nỹtĩ ag kygvãn jé, isỹ ũn kyvó ag tỹ ẽvãnh há han jé, isỹ ag tỹ ũn vóg kónãn mũ ag ki rĩr há han jé, ag jatu nỹtĩ jé, 19  isỹ vẽnh kar mỹ: ũri ẽg jóg mág vỹ ẽg kren han sór mũ, he jé,” he tóg, Isaías ti, vẽnh rá ẽn ki. Hã to tóg ke mũ. 20  To ke kar kỹ tóg ũ tỹ ki rĩr tĩ ẽn mỹ nĩm mãn mũ. Kỹ tóg nĩ mũ sir. Hã ra vẽnh kar tóg ti ki ẽvãnh mũ, ti vĩ mẽ jé. 21  Kỹ tóg: “vãsỹ rán kỹ nĩ tag mẽ ãjag tóg,” he mũ. “Ũri ke vẽ. Inh hã to tóg tag rán ja nĩ, Isaías ti,” he tóg. 22  Kỹ tóg ag mỹ e tĩ sir. “Ki hã tóg tó mũ,” he ag tóg mũ. Kỹ ag tóg ti to: “José kósin vẽ mỹr, ẽg mré ke ẽn, hã ra tóg ẽg kãfór nĩ sór mũ,” he mũ. 23  Kỹ Jesus tóg ag mỹ: “ãjag hỹn iso jykrén kónãn sór mũ,” he mũ. “Médico mỹ ẽg tóg: kur vẽsỹ háꞌ hé,” he tũ nĩgtĩ. Ãjag hỹn inh mỹ: ẽmã tỹ Cafarnaum tá ã tóg ũn kagyga ag tỹ háꞌ hé, kỹ kur tag ki ẽg tỹ háꞌ he gé, ã tỹ vẽnh kar tỹ háꞌ he sór nĩn kỹ, he sór mũ,” he tóg. 24  Kỹ tóg ag mỹ: “ti jamã tá ke ag tóg Topẽ vĩ tó tĩ to é he tĩꞌ,” he mũ. “Hã kỹ ãjag tóg iso é he tĩ gé. 25  Ha mẽ. Elias to jykrén nĩ. Ti tỹ ga kri tĩ mũn kã Topẽ tóg ti mỹ ta kutẽ vãnh han ke tó ja nĩgtĩ. Kỹ ta tóg kutẽ vãnh han mũ, prỹg tãgtũ kri kysã tỹ 6 (ke) ki. Kỹ tóg prỹg tĩ sir, ga ẽn mĩ, vẽjẽn tóg tũꞌ he mũ sir. 26  Kỹ tóg Elias jẽnẽ, ti tỹ ẽmã tỹ Sarepta ra tĩg jé, Sidom to hã. Tá fóg ũ fi tóg nĩ nĩ, ũn mén ter ja fi. Fi hã mré tóg jẽg mũ sir. Topẽ tỹ fi hã to ti jẽnẽ ja vẽ, ti tỹ fi kren han jé. Elias jamã tá fag tóg e ja nỹtĩgtĩ gé, ũn mén ter ja fag. Hã ra Topẽ tóg fóg ẽn fi hã to ti jẽnẽ ja nĩgtĩ,” he tóg. 27  “Kỹ Eliseu to jykrén nĩ gé, vãsỹ Topẽ vĩ tó tĩ ẽn to. Ti tỹ ga kri tĩ mũn kã ũ tỹ vẽnh kaga kren vãnh han mũ ag tóg e ja tĩgtĩ gé. Hã ra ag tóg ti mỹ to vĩ ja tũ nĩgtĩ, ti tỹ ag tỹ háꞌ hen jé. Kuvar há tá fóg tóg kãtĩg ja nĩgtĩ, Naamã ti, ga tỹ Síria tá. Kỹ ẽn hã ne Eliseu mỹ to vĩ kỹ háꞌ he ja nĩgtĩ, inhhã. Ge ãjag tóg nỹtĩgtĩ, iso,” he tóg. 28  Kỹ ũ tỹ ti vĩ mẽg mũ ag fe tóg gỹm ke mũ sir, Jesus to. 29  Jẽgjẽg nẽgnẽ kỹ ag tóg ti pãnfón kãpa mũ sir. Ag tỹ kãgnó ki ti fón sór vẽ, ti tỹ ki kutẽ kỹ ter jé sir. Nazaré vỹ pãnónh tá nĩ, ag jamã ti. 30  Hã ra Jesus tóg ag fĩn rãm kỹ ag ré kỹ tĩ mũ. Ti tỹ ag tóg hẽ ri ke tũ nĩ sir. Ti vĩ kri ag tóg fi jãvãnh nỹtĩ, ti jamã tá ke ag. Jesus tỹ vẽjagrẽ kórég kutẽm 31  Kỹ tóg Cafarnaum ra tĩ mũ. Tá jun kỹ tóg vẽnh kán ke kurã ki ag kanhrãn mũ. 32  Kỹ ti vĩ tóg ag mỹ e tĩ. Vẽnh kar vĩ kãfór ti nĩ. 33  Hã ra ũn jagrẽ kórég tóg tá nĩ nĩ. Kỹ tóg prẽr kỹ: 34  “ha mẽ, ã tỹ ẽg tỹ hẽ ri kenh ke nẽ, NazaréJesusA078?” he mũ. “Ã mỹ ẽg tũg sór mũꞌ? Ã ki kanhró sóg nĩ. Ã pir mỹ ã tóg tỹ Topẽ mré ke nĩ. Ti tũ pẽ vỹ tỹ ã nĩ,” he tóg. 35  Hã ra tóg vĩ tar han kỹ: “vĩ tũg ra!” he mũ. “Ti tovãnh ra!” he tóg. Kỹ ti jagrẽ kórég ẽn tóg ti ter tĩ han kỹ ti ki kutẽ mũ sir. Ti kókég tũ tóg nĩ. 36  Kỹ tóg vẽnh kar mỹ e pẽ tãvĩ tĩ sir. Jagnẽ mỹ ag tóg: “ne nẽ hỹn?” he mũ. “Vẽjagrẽ kórég ag mỹ tóg vĩ tĩ, kỹ ag tóg ki ke tĩ, ti kamẽg kỹ. Ti hỹn tỹ ag kri ke nĩ,” he ag tóg mũ sir. 37  Kỹ ti kãme tóg vẽnh kar kri rũm ke kãn mũ sir, ga ẽn tá. Jesus tỹ ũn kagyga e ag tỹ háꞌ he 38  Kỹ tóg vẽnh kanhrãn jafã ẽn ki kutẽ kỹ Simão Pedro ĩn ra tĩ mũ. Hã ra ti má fi vỹ kaga kỹ nỹ nĩ. Rỹg jagy han kỹ fi tóg nỹ nĩ. Kỹ ag tóg ti mỹ fi tó mũ. 39  Kỹ tóg fi mỹ: “rỹg mãn tũg nĩ,” he mũ. Kỹ fi rỹ ẽn tóg tũꞌ he mũ sir. Kỹ fi tóg vẽsỹmér nĩ kỹ ag ki rĩr mũ sir. 40  Rã tỹ pun ke kar kỹ ag tóg ũn kagyga ag tatĩ kãmũ mũ. Kỹ tóg ti nĩgé tỹ ag mẽgmẽ kỹ ag tỹ hágháꞌ he kãn mũ. 41  Vẽjagrẽ kórég pan kãn tóg mũ gé, ag to jũ kỹ. Ag panh ke to hã ag tóg prẽr tĩ, kỹ ag tóg: “Topẽ kósin vỹ tỹ ã nĩ,” he tĩ. Ti ki kanhró ag tóg nỹtĩ, ti tỹ tỹ Cristo nĩ ti. Hã ra tóg ag mỹ: “vĩ tũg ra,” he mũ. Jesus tỹ Topẽ vĩ tó 42  Tỹ vaj kỹ Jesus tóg ẽmã tũ ja ra tĩ mũ, vẽnh péju kỹ. Kỹ vẽnh kar tóg ti jãvãnh kãn mũ. Vãhã ag tóg ti vég mũ. Kỹ ag tóg ti mỹ: “ẽg ré kỹ tĩ tũg nĩ,” he mũ. 43  Hã ra tóg: “vó, ẽmã ũ tá sóg ag mỹ Topẽ vĩ tónh ke mũ gé,” he mũ. “Hã jé Topẽ tóg inh mỹ: ha ag mỹ vẽnh ven, he ja nĩ,” he tóg. 44  Kỹ tóg ga tỹ Judéia mĩ tĩ mũ sir. Tĩg kỹ tóg ag mỹ Topẽ vĩ tó mũ sir, ag vẽnh kanhrãn jafã krẽm.

Mer ki vẽnh rá sĩ