Lucas tỹ rá 5:1-39
5 Kejẽn tóg goj nig mág tỹ Galiléia fyr tá Topẽ vĩ kãmén jẽ nĩ. Hã ra vẽnh e tãvĩ vỹ ti pénĩn nỹtĩ nĩ, kỹ ag tóg ti kutãn mũ sir.
2 Hã ra tóg goj fyr tá canoa régre vég mũ. Tỹ ũ tũn mũ ag tóg kãpa kỹ pirã kugmĩ jafã kupég nỹtĩ nĩ.
3 Kỹ tóg Simão canoa kã ra rã kỹ ti mỹ: “goj kuju kã tá tĩn sĩ han,” he mũ. Vãhã tóg kã kã nĩ kỹ jatun mỹ vẽnh e ẽn ag kanhrãn mũ sir.
4 Ag kanhrãn kar kỹ tóg Simão mỹ: “goj kuju ra tĩn, ti nig ja ra,” he mũ. “Tá ã rede tỹ goj ki fón, ã tỹ pirã kugmĩ jé,” he tóg.
5 Kỹ tóg ti mỹ: “kuty tag kã ẽg tóg rede tỹ ki fónꞌ, ki fónꞌ he ja nĩgtĩ vẽ. Hã ra ẽg tóg nén ũ kãgmĩ ja tũ nĩ. Hã ra sóg ã vĩ tugrĩn ki fón mãn ke mũ ha,” he mũ.
6 Ti tỹ ki fón kỹ tóg kugmĩ mág mũ. Fór tóg mũ, rede ti, kỹ tóg jaran ke mũ, ti kufy jagy tãvĩ nĩn kỹ.
7 Kỹ tóg ti régre ag mỹ: “kuri, ẽg mré ké!” he mũ, ti nĩgé tỹ ag mỹ ven kỹ. Kỹ ag tóg canoa régre ẽn fãn mũ, pirã tỹ. Hã kỹ tóg ki punpun ke kren mũ sir.
8 Kỹ tóg Simão mỹ e tĩ. Kỹ tóg Jesus krẽm grĩnh kỹ ti mỹ: “ã hỹn inh ré kỹ tĩg mũ ha. Topẽ vĩ mranh ja inh nĩgtĩ. Kórég inh nĩ,” he mũ.
9 Pirã e pẽ tỹ ge ve ja tũ ti nĩ. Hã kỹ Jesus jykre tóg ti mỹ e tĩ,
10 Zebedeu krẽ tỹ Tiago mré João mỹ ke gé. Simão mré ag tóg rãnhrãj mũgtĩ.
Simão tỹ ti mỹ: “ã hỹn inh ré kỹ tĩg mũ ha,” hen kỹ tóg ti mỹ: “vó, mũmẽg tũg nĩ,” he mũ.“Pirã kugmĩ há ã tóg nĩ. Ã kanhrãn jé sóg ke mũ, ã tỹ ẽprã ke ag tỹ inh ki ge han jé,” he tóg.
11 Kỹ ag tóg ag canoa tỹ nig fyr tá fi han kar kỹ, ag tũ tovãnh kãn kỹ Jesus mré mũ mũ sir.
Jesus tỹ ũn kaga kren vãnh tỹ háꞌ he
12 Kỹ tóg kejẽn ẽmã ũ tá nĩ nĩ. Hã ra ũ tỹ vẽnh kaga kren vãnh han kỹ nĩ ũ tóg ti tá jun mũ. Lepra he mũ ẽn tóg ti kri rũm ke kãn ja nĩ. Jesus krẽm grĩnh ke kỹ tóg ti mỹ: “ã mỹ isỹ háꞌ he sór tũ? To tar ã tóg nĩ,” he mũ.
13 Kỹ tóg ti nĩgé tỹ ti mẽg kỹ: “he,” he mũ. Kỹ ti kaga kren vãnh ẽn tóg háꞌ he mũ sir vẽsỹmér.
14 Kỹ tóg ti mỹ: “ker ũ mỹ tó hẽꞌ,” he mũ. “Topẽ tũ ki rĩr tĩ hã mỹ tóm nĩ. Kỹ Topẽ mỹ Moisés tỹ vãsỹ nén tó ja ẽn nĩm nĩ. Hã tugrĩn vẽnh kar vỹ ã tỹ háꞌ he mũ tag ki kanhrãn mũ,” he tóg.
15 Kỹ ti kãme tóg vẽnh kar kri rũm ke mũ. Kỹ ũ tỹ hẽn ri ke ag tóg ti vĩ mẽnh kãmũ mũ, ti tỹ ag tỹ háꞌ he jé gé.
16 Hã ra tóg ag ré kỹ ẽmã tũ ja ra tĩ mũ, Topẽ mré vẽmén jé.
Jesus tỹ ũn tĩg vãnh tỹ háꞌ he
17 Kejẽn tóg ag kanhrãn nĩ nĩ. Pãꞌi tỹ hẽn ri ke ag tóg ti vĩ mẽg nỹtĩ, Fariseu ag, Topẽ vĩ to ẽg kanhrãn tĩ ag, kuvar há tá ke ag, ga tỹ Galiléia tá ke ag, ga tỹ Judéia tá ke ag, Jerusalém tá ke ag ke gé. Hã ra Topẽ tóg ti tar han, hã kỹ tóg ũn kaga tỹ hẽn ri ke tỹ háꞌ he kãn mũ.
18 Kỹ vãhã ũ ag tóg ũn kãnhgrĩ vyn kỹ kãmũ mũ. Ag tỹ Jesus mỹ ti ven sór vẽ.
19 Hã ra tóg tá fór tãvĩ nĩ, kỹ ag tóg ti tá junjun tũ nĩ sir. Kỹ ag tóg ĩn to jãpry kỹ ti kri ĩn kunũg mũ. Ti nor ki ag tóg ti térem mũ, Jesus jẽ ẽn kukãm.
20 Kỹ tóg ag tỹ ti ki ge kỹ nỹtĩ vég mũ. Hã kỹ tóg ũn kãnhgrĩ mỹ: “ã tỹ Topẽ vĩ mranh ja ẽn tỹ tũꞌ he vẽ ha, vỹ,” he mũ.
21 Hã ra ti vĩ tóg pãꞌi ag mỹ e tĩ. Kỹ ag tóg ti to jykrén kónãn mũ. “Ti tỹ ne tó nẽ hỹnꞌ? Topẽ to vĩ kónãn vẽ mỹr. Topẽ hã ne ti pir mỹ ũ tỹ ti vĩ mranh mũ ẽn mỹ tỹ tũꞌ he há nĩnh mũꞌ,” he ag tóg mũ.
22 Hã ra tóg ag tỹ nén to jykrén mũ ki kanhró nĩ. Kỹ tóg ag mỹ: “ãjag tỹ ne jé iso jykrén kónãn nẽ?” he mũ.
23 “Ne nỹ ãjag mỹ vẽnh mỹ nỹ?” he tóg.“Ũn tĩg vãnh tag mỹ sóg: “ã tỹ Topẽ vĩ mranh ja ẽn tỹ tũꞌ he vẽ ha,” hé. Sỹ ti mỹ: “nĩ ra, tĩg ra,” henh ke vẽ gé. Hã ran mỹ ãjag mỹ vẽnh mỹ?” he tóg.
24 “Isỹ ãjag mỹ inh jykre ven sór vẽ. Tỹ sóg ẽprã ke fi kósin nĩ. Topẽ vĩ mranh tỹ vẽnh pãte fón ke tá sóg krỹg ke mũ. Hã ven jé sóg ke mũ ãjag mỹ,” he tóg. Hã kỹ tóg ũn kãnhgrĩ mỹ: “nĩ ra, ã kur gé tĩg, ã ĩn ra,” he mũ.
25 Kỹ tóg vãhã jẽgnẽ mũ sir. Ti kur gég tóg mũ, ag rĩnve. Ti ĩn ra tóg tĩ mũ, Topẽ mỹ vĩ há han kỹ, ũn kãnhgrĩ ja ẽn ti.
26 Kỹ tóg vẽnh kar mỹ e tãvĩ tĩ. Topẽ mỹ ag tóg vĩ há han mũ gé, “ẽg kãfór ti nĩ,” hen kỹ. “Ge ve ja tũ ẽg nỹtĩ,” he ag tóg mũ sir.
Jesus tỹ Levi jé prẽr
27 Kar kỹ tóg tĩg mãn mũ. Kỹ tóg ũ tỹ governo mỹ imposto kaja mãg tĩ vég mũ, ti jiji hã vỹ: Levi, he mũ. Ti rãnhrãj han tóg nĩ nĩ. Kỹ tóg ti mỹ: “inh mré kãtĩg,” he mũ.
28 Kỹ tóg jẽgnẽ kỹ ti mré tĩ mũ sir, ti tũ kar ré kỹ.
29 Kỹ Levi tóg ti mỹ fénhta mág han mũ. Kỹ ũ tỹ governo mỹ jãnkamỹ mãg tĩ ũ ag vỹ tá nỹtĩ gé, ag mré ke ũ ag ke gé.
30 Kỹ tóg pãꞌi ag mỹ kórég nĩ. Hã kỹ ag tóg ti mré mũ tĩ ag mỹ: “ãjag ne tóg governo mỹ jãnkamy mãg tĩ ag mré jẽg mũꞌ. Topẽ vĩ mranh tĩ ag vẽ,” he mũ.
31 Hã ra tóg ag mỹ: “hỹ, ag mré sóg jẽg mũ,” he mũ. “Hã mẽ, ũn kaga tũ ag vỹ médico venh mũ tũ nĩgtĩ. Ũn kaga ag hã vỹ ti venh mũ tĩ,” he tóg.
32 “Inh pijé ũ tỹ vẽjykre kuryj han mũ ag mỹ: ãjag jykre tovãnh ra, he sór tĩꞌ. Ũ tỹ Topẽ vĩ mranh tĩ ẽn ag hã mỹ sóg: ãjag jykre kórég tovãnh ra, he sór tĩ. Hã jé sóg ãjag mỹ vẽnh ven,” he tóg, Jesus ti.
Vãkre tãg
33 Kỹ Fariseu ag tóg ti mỹ: “João Batista mré mũ tĩ ag vỹ vãkrég tĩ, vẽjẽn ki. Kỹ ag tóg Topẽ mré vĩ mág han tĩ gé. Kỹ Fariseu mré ke ag tóg vãkrég tĩ gé. Jo ã mré mũ tĩ ag ne tóg vãkrég tũ nĩgtĩ. Jẽg ag tóg tĩ, kurã kar ki,” he ag tóg mũ.
34 Kỹ tóg ag mỹ: “hỹ,” he mũ. “Vẽnh prũg venh kãmũ mũ ag pijé vãkrég tĩꞌ. Fénhta vẽ mỹr, kỹ tóg vẽnh kar mỹ sér tĩ. Tỹ sóg, ũn prũg mũ ẽn ri ke nĩ, hã kỹ tóg, inh mré mũ tĩ ag mỹ sér tĩ,” he tóg.
35 “Hã ra tóg kejẽn jun mũ, inh kurã ti, ha vem nĩ. Kỹ ag tóg inh pére mũnh mũ. Ẽn kã hã ag tóg vãkrenh ke mũ,” he tóg.
36 Kỹ tóg fag mỹ: “inh jykre tãg vỹ, ge nỹnh mũ, ha mẽ,” he mũ. “Ẽg pijé, ẽg kur tãg kókég tĩꞌ, ẽg tỹ ẽg kur si jar kã nĩm jé. Ẽg tỹ jagnẽ mré ki sigse kỹ tóg ki par tũ nĩnh mũ,” he tóg.
37 Kỹ tóg ag mỹ: “vinho vỹ ge nĩgtĩ gé,” he mũ gé. “Ẽg pijé vinho tãg tỹ nén fár si tỹ sako há ki kujẽg tĩꞌ. Kunãnh kỹ tóg jar ke mũ, sako ti, kỹ vinho ẽn tóg tũꞌ henh ke mũ.
38 Vinho tãg tỹ sako tãg ki kujẽn ke vẽ mỹr,” he tóg. Ti tỹ ti jykre tãg tón hã vẽ. Hã ra tóg vinho kãjãg mũ ri ke nĩ.
39 Kỹ tóg ag mỹ: “ẽg pijé vinho si kron kar kỹ ũn tãg kron sór tĩꞌ,” he mũ gé. “Ti si hã tóg inh mỹ kron há nĩ, he ẽg tóg tĩ,” he tóg, ti jykre tãg tó kỹ. Hã ra ag jykre si tóg ag mỹ há nĩ, ũ tỹ ti vĩ mẽg mũ ag mỹ.
