Marcos tỹ rá 12:1-44
12 Kỹ tóg ag kanhrãn kỹ ag mỹ: “kejẽn ũ tóg uva krãn mũ. Pénĩn tóg rón mũ, kã ki tóg kũm mũ, uva jẽgmĩ jafã han jé. Ki tóg pãjó han mũ gé,” he mũ. “Kỹ tóg ũ tỹ ki rĩr tĩ ag mré to jykrén kar kỹ tĩ mũ, ga ũ ra, ag tỹ ti jo ki rĩr jé.
2 Ti tỹ kejẽn kanẽn kỹ tóg ag mỹ, ti mỹ rãnhrãj tĩ ũ jẽnẽg mũ, ag tỹ ti mỹ uva vẽnh kãpãm jé.
3 Hã ra ag tóg ti kãgmĩg mũ sir. Ti mrãnmrãn ag tóg mũ sir. Kỹ ag tóg ti mỹ: “ha tĩg,” he mũ sir, ti mỹ nén ũ nĩm mẽ kã.
4 Kỹ tóg ag mỹ ti mỹ rãnhrãj tĩ ũ jẽnẽ mãn mũ gé sir, kỹ ag tóg ti krĩ ki tãnh mũ sir, ti to é he kỹ.
5 Kỹ tóg ag mỹ ũ jẽnẽ mãn mũ gé sir, hã ra ag tóg ti tén mũ gé sir. Ti mỹ rãnhrãj tĩ kar to ag tóg jũ mũ, ũ mrãnmrãn ag tóg, ũ tén ag tóg.
6 Kỹ hã ra ũ tóg kén mũ. Hã ra ti kósin vẽ. Ti fe pẽ vẽ hã ra. Kỹ tóg vãhã ag mỹ ti jẽnẽg mũ sir. “Hẽn ri ke mũn ag inh kósin kamẽg mũ,” he tóg.
7 Ti tỹ tá jun kỹ ag tóg jagnẽ mỹ: “kejẽn ẽkré kar vỹ tỹ ti tũ nĩnh mũ, ha vem nĩ. Mũ nỹ, ti tén jé, ti tũ tag tỹ tỹ ẽg tũ nỹ jé,” he mũ.
8 Kỹ ag tóg ti kãgmĩ kỹ ti tén mũ sir. Ró pãte ag tóg ti fón mũ sir,” he tóg.
9 “Kỹ ẽkré tỹ tũn mũ ẽn hẽ ri kenh ke mũ? Jun jé tóg ke mũ, ti mỹ rãnhrãj tĩ ag kãgtén jé. Kỹ tóg ẽkré ki rĩr tĩ ũ ag mỹ finh ke mũ, ti tũ ti,” he tóg.
10 Kỹ tóg ag mỹ: “Topẽ vĩ rá tag to jykrén nĩ, ha mẽ,” he mũ. “Pó fón ag tóg, pó tỹ ĩn han tĩ ag. Ag mỹ tóg kórég ja nĩ. Hã ra Topẽ tóg pó ẽn hã tỹ ĩn nũna han mũ.
11 Topẽ tỹ há vẽ, hã kỹ tóg ẽg mỹ e tĩ, ẽg tỹ ven kỹ, he tóg, Topẽ vĩ tỹ rán kỹ nĩ ki,” he tóg ag mỹ.
12 Kỹ ag tóg ki kanhró nỹtĩ. Ag kato tóg tag tó ja nĩ. Hã kỹ ag tóg ti se sór mũ. Hã ra ag tóg vẽnh e ẽn kamẽg mũ. Kỹ ag tóg ti ség tũ nĩ. Ti ré kỹ ag tóg mũ mũ sir.
Ẽg tỹ imposto kajãm ke
13 Hã ra ag tóg ti to Fariseu ũ ag jẽgnẽg mũ gé sir, pãꞌi tỹ Herodes mré ke ũ ag ke gé, ag tỹ ti vĩ to ti se jé.
14 Ag tỹ ti tá junjun kỹ ag tóg ón kỹ ti mỹ: “Senhor, ã jykre kuryj nĩ ki kanhró ẽg nỹtĩ,” he mũ. “Vẽjykre pir hã han ã tóg tĩ, vẽnh kar mỹ. Hã kỹ ã tóg Topẽ japry to ẽg kanhrãn há han tĩ. Mỹ há nỹꞌ, ẽg tỹ governo mỹ jãnkamy nĩm ke tiꞌ, imposto kajãm ke tiꞌ?
15 Ẽg mỹ hỹn nĩm mũꞌ, vó mỹ vó?“ he ag tóg. Hã ra Jesus tóg ag jykre régre nỹtĩn ki kanhró nĩ. Kỹ tóg ag mỹ: “ãjag ne tóg ón kỹ inh ki jẽmẽ sór mũꞌ,” he mũ. “Inh mỹ jãnkamy jun, sỹ ve jé,” he tóg.
16 Kỹ ag tóg ti mỹ ũ jun mũ sir. Kỹ tóg: “ũ jiji nỹ kã nĩ? Ũ kãgrá nỹ kã nĩ?“ he mũ. Kỹ ag tóg ti mỹ: “pãꞌi mág tỹ imperador kãgrá vẽ,” he mũ.
17 Kỹ tóg ag mỹ: “kỹ pãꞌi mág mỹ ti tũ nĩm nĩ, hã ra Topẽ mỹ ti tũ nĩm nĩ gé,” he mũ. Kỹ ti vĩ tóg ag mỹ e tĩ. Ag tỹ nén ũ to ti senh ke mũ vég tũ ag tóg nĩ.
Ẽg tỹ ẽg ter ja tá vỹn kenh ke
18 Kỹ Saduceu ag tóg ti tá junjun mũ gé, ti ki jẽmẽ jé. Hã ra Saduceu ag tóg: ẽg ter ja tá ẽg vỹn kenh ke tũ nĩ,” he tĩ. Kỹ ag tóg ti mỹ:
19 “Senhor, Moisés tóg ẽg mỹ vẽjykre tag nĩm ja nĩ, ha mẽ,” he mũ. “Ẽg mỹ tóg: ã régre tỹ ti krẽ tũ ra ter kỹ ti prũ fi tỹ prũg nĩ, ã tỹ ã régre mỹ ã krẽ han jé, fi ki, he ja nĩ,” he ag tóg.
20 “Kỹ ũ tỹ jagnẽ mré pafa ja tỹ 7 (ke) ag vỹ nỹtĩ ja nĩgtĩ. Ag kãke tóg prũg mũ, hã ra tóg ti kósin tũ ra ter mũ sir.
21 Kỹ ti jãvy tóg fi tỹ prũg mũ, hã ra tóg ti kósin tũ ra ter mũ gé sir. Kỹ ti jãvy ũ vỹ fi tỹ prũg mũ gé.
22 Hã ra ag kar tóg fi kósin tũ ra kãgter kãn mũ sir, ag kãke ti nón, ũ tỹ 7 (ke) ẽn ag. Kejẽn fi tóg vãhã ter mũ gé sir.
23 Kỹ fag kãgter ja tá vỹnvỹn ke kỹ fi hỹn mén tỹ 7 (ke) nĩnh mũ vẽ. Ag kar vỹ fi tỹ prũg ja nĩgtĩ. Hã kỹ tóg vẽnh mỹ nỹ, ag tỹ: rĩr mãn jé ẽg tóg ke mũ, hen kỹ,” he ag tóg.
24 Hã ra tóg ag mỹ: “ãjag pijé Topẽ vĩ tỹ rán kỹ nĩ ki kanhró nỹtĩꞌ,” he mũ, “Topẽ jykre ki kagtĩg ãjag nỹtĩ. Hã kỹ ãjag tóg kygnẽ ja nĩ.
25 Ẽg tỹ ẽg ter ja tá vỹn ke kỹ ẽg tóg tỹ Topẽ tỹ jẽgnẽ jafã ag ri ke nỹtĩnh mũ, kanhkã tá. Kỹ ẽg prũg ke tũ nĩ. Mén ke tũ fag nĩ gé,” he tóg.
26 “Topẽ vĩ ũ to jykrén nĩ. Topẽ tóg vãnh pũr kã ki Moisés mỹ: “Abraão vỹ iso: Topẽ, he tĩ, Isaque ke gé, Jacó ke gé,” he ja nĩ. Kãgter ag huri, hã ra Topẽ tóg: “tỹ inh ag Topẽ nĩ,” he ja nĩ, ag kãgter mũ ra.
27 Hã kỹ ag tóg rĩnrĩr nỹtĩ mỹr. Topẽ vỹ tỹ ũn rĩnrĩr nỹtĩ ag hã kri ke nĩ,” he tóg, Saduceu ag mỹ. Kỹ ag tỹ ti mỹ ne tónh ke tóg tũ tĩ.
Topẽ tỹ ẽg jyvẽn kãfór
28 Hã ra Topẽ vĩ to ẽg kanhrãn tĩ ũ tóg tá jun mũ gé sir. Kỹ tóg Jesus tỹ Saduceu ag mỹ tó há han ja ẽn mẽg mũ. Hã kỹ tóg: “Topẽ tỹ ẽg jyvẽn tỹ hẽ nỹ hỹn ti tỹ ẽg jyvẽn kar kãfór nỹnh mũꞌ?“ he mũ.
29 Kỹ tóg ti mỹ Moisés tỹ ag jyvẽn ja tó mũ, hã vỹ: “ha mẽ, povo tỹ Israel! Ẽg pãꞌi vỹ tỹ Topẽ nĩ, ẽg pãꞌi vỹ tỹ ũn pir nĩ.
30 Topẽ to, ẽg jóg mág to há tãvĩ nỹtĩm nĩ! Ti ki ge há han nĩ! Ti to jykre pir nỹtĩm nĩ, krĩ pir! Ti to tar nỹtĩm nĩ! Ũ tỹ kãfór nỹn hã vẽ,” he mũ.
31 “Kỹ ũ tóg hã ri ke nĩ gé, hã vỹ: ãjag régre ki rĩr há nỹtĩm nĩ, ãjag tỹ vẽnh ki rĩr há han ri ke, he mũ. Ti tỹ ẽg jyvẽn ũ pijé tag kãfór nĩꞌ,” he tóg,
32 Kỹ Topẽ vĩ to ẽg kanhrãn tĩ ẽn tóg ti mỹ: “ke tóg tĩ. Ã tỹ ke há vẽ. Pir ti nĩ, Topẽ ti, ũ pijé ti ri ke nĩꞌ,” he mũ.
33 “Ẽg jé ti to fe há nỹtĩ, ẽg jé ti to krĩ há nỹtĩ gé, jykre pir ke gé. Ẽg jé ti to tar nỹtĩ gé. Ẽg jé ẽg régre ki rĩr há nỹtĩ gé, ẽg tỹ vẽnh ki rĩr há han ri ke,” he tóg. “Tag tóg ti tỹ ẽg jyvẽn kãfór nĩ. Ẽg tỹ Topẽ mỹ nén ũ pũn kãfór tóg nĩ gé,” he tóg.
34 Kỹ tóg ti tỹ tó há nĩ ve kỹ ti mỹ: “Tó há han ã, kỹ ki króm kãn sórm nĩ,” he mũ. Kar kỹ ũ tóg Jesus ki jẽmẽ mãn tũ nĩ sir. Ti kamẽg ag tóg mũ sir.
Cristo tỹ tỹ Davi krẽꞌkrẽ nĩ ra ti kãfór nĩ
35 Kỹ Jesus tóg Topẽ ĩn krẽm ag kanhrãn kỹ ag mỹ: “Topẽ vĩ to ẽg kanhrãn tĩ ag tóg: Cristo vỹ tỹ vãsỹ ẽg pãꞌi mág tỹ Davi krẽꞌkrẽ ag kã ũ nĩ,” he mũ. “To há han ag tóg.
36 Hã ra Davi vỹ Cristo to: Topẽ vỹ inh Senhor mỹ: “nĩ ra ver, inh pẽgja tá,” he ja nĩ. “Sỹ ver ã kato vãsãnsãn mũ ag sigsenh ke vẽ, he ja tóg nĩ, Topẽ kuprĩg tỹ ti krĩn kỹ.
37 Hã kỹ Davi tóg Cristo to: inh Senhor vẽ, he ja nĩ. Ti tỹ tỹ ti krẽꞌkrẽ nĩ ra ti mỹ tỹ ti kri ke nĩnh ke mũ vẽꞌ?“ he tóg. Hã ra ag tỹ ti mỹ ne tónh ke tóg tũ tĩ. Ti vĩ tag tóg vẽnh kar mỹ há nỹ.
Ón kỹ Topẽ vĩ to ẽg kanhrãn tĩ ag jagtar ke
38 Kỹ tóg: “ón kỹ Topẽ vĩ to ẽg kanhrãn tĩ ag kamẽg nĩ,” he mũ. “Kur kaja e rĩnh (ka)mẽ ag nỹtĩ. Kỹ tóg vẽnh kar tỹ ag to: pãꞌi mág ag vẽ, hen kỹ ag mỹ sér tĩgtĩ,” he tóg.
39 “Ẽg tỹ vẽnh kanhrãn jafã krẽm ag tóg vẽnh kãpãm kỹ nỹtĩgtĩ. Fénhta ki ag tóg jẽn vén tĩ, ag tỹ tỹ ũn mág nỹtĩn kỹ,” he tóg.
40 “Hã ra ag tóg ũn mén ter ja fag tũ mãn kãn tĩ. Fag tũ mãn kãn kỹ ag tóg ón kỹ Topẽ mré vĩ mág han mũgtĩ, ẽg tỹ ag to: “ũn há vỹ tỹ ag nỹtĩ,” he jé. Hã to ag vẽsỹrénh mág tãvĩ han ke mũ,” he tóg, Jesus ti.
Ũn jagtar fi tỹ fi tũ vin kãn
41 Kỹ tóg kejẽn Topẽ ĩn tá jãnkamy vin jafã ra hã nĩ mũ. Kỹ tóg ag tỹ kã ki nén vin mũ vég mũ sir. Ũn riko ag tóg jãnkamy mág tỹ kã ki vin mũ.
42 Kỹ ũn jagtar fi vỹ tá jun mũ gé, ũn mén ter ja fi. Hã ra fi tóg jãnkamy kãsir régre hã vin mũ sir, hã vỹ: 1 centavo, he mũ.
43 Kỹ tóg ti mré mũ tĩ ag jé prẽr kỹ ag mỹ: “ve ra ha. Ũn riko tỹ vin kãfór han fi tóg, fi tũ sĩ hã ra,” he mũ. “Tỹ nén ũ tũ fi tóg nĩ. Fi mén vỹ hur ter.
44 Kỹ fi tóg fi tũ vin kãn ja nĩ, fi jẽn mré hã. Jãvo ũn riko ag vỹ ag tũ ke hã tỹ Topẽ mỹ vin mág tĩ. Hã ki fi tóg ag tỹ nĩm kãfór han, fi tỹ nĩm sĩ pẽ han mũ ra. Ki hã sóg tó mũ mỹr,” he tóg.
