Mateus tỹ rá 14:1-36
14 Kỹ kejẽn pãꞌi mág tỹ Herodes vỹ mẽg mũ, Jesus kãme ti.
2 Kỹ tóg ti camarada ag mỹ: “João Batista hỹn, ãjag tỹ inh mỹ ũ tó mũ ẽn ti,” he mũ. “Ti hỹn rĩr mãn, sỹ ti tén kar kỹ, hã kỹ tóg milagre tỹ hẽn ri ke hynhan tĩgtĩ,” he tóg, Herodes ti, Jesus to.
3 Herodes vỹ João se ja nĩ, Herodias fi tugnĩn. Ti jãvy tỹ Filipe prũ ja fi vẽ, hã ra tóg fi tỹ prũg mũ, Herodes ti. Hã kỹ João tóg ti mỹ:
4 “ã hã ne tóg, ã mré ke prũ fi tỹ prũg mũꞌ,” he ja nĩ. “Fi ki ã tóg Topẽ vĩ mranh mũ,” he tóg, João ti, Herodes mỹ.
5 Kỹ Herodes tóg ti tén sór mũ, hã ra tóg vẽnh kar kamẽg mũ. Vẽnh kar tóg João to: “Topẽ vĩ tó tĩ ũ vẽ,” he tĩ.
6 Hã ra tóg kejẽn Herodes mur ja kurã tá krỹg mũ. Kỹ fénhta ẽn kã Herodias fi kósin fi vỹ ag jo vẽnh grén mũ sir, ti mré jẽg mũ ag jo. Kỹ tóg Herodes mỹ sĩnvĩ nĩ.
7 Kỹ tóg fi mỹ: “ã tỹ nén to vĩ mũ kar nĩm jé sóg ke mũ ã mỹ, sỹ ke há vẽ,” he mũ.
8 Kỹ fi tóg fi mỹnh fi mỹ tó mũ. Kỹ fi mỹnh fi tóg, fi krĩn mũ, fi tỹ João krĩ to vĩ jé. Kỹ fi tóg: “inh mỹ ũri João Batista krĩ tỹ pénky kã kã nĩm,” he mũ.
9 Kỹ tóg ti mỹ e tĩ sir, ti tỹ ti tén jé. Hã ra tóg fi mỹ: “sỹ ke há vẽ,” he ja nĩ, kỹ ti mré jẽg mũ ag vỹ mẽ kãn ja nĩ. Kỹ tóg fi mỹ: “he,” he mũ sir.
10 Kỹ tóg soldado ũ jẽnẽg mũ, ti tỹ João krĩ kym jé. Hã ra João tóg vẽse ja kã kã nĩ nĩ.
11 Kỹ tóg ti krĩ kym mũ sir. Pénky kã kã nĩm kỹ tóg, fi mỹ nĩm mũ, tytãg fi mỹ, ti krĩ ti. Kỹ fi tóg fi mỹnh fi mỹ ma tĩ mũ.
12 Kỹ ti mré mũ tĩ ag tóg, ag tỹ mẽ kỹ ti vyn kãmũ mũ, vẽnh kej tá ti péju jé. Ti péju kar kỹ ag tóg Jesus mỹ tónh mũ mũ.
Jesus tỹ ũn e jẽn
13 Jesus tóg, ti tỹ João ter mẽ kỹ tá kãkutẽ mũ, canoa kãmĩ. Kỹ tóg ẽmã tũ ja ra tĩ mũ sir, ti pir mỹ nĩ jé. Hã ra vẽnh e ẽn ag tóg ti tĩg mẽg mũ. Kỹ ag tóg ti nón mũ mũ, ag pẽn kã, ẽmã kar tá kãmũ kỹ.
14 Kỹ Jesus tóg kafã ũ tá vag ke mũ, kỹ tóg tá ũn e ẽn ag vég mũ sir, ti nón kãmũ mũ ẽn ag. Kỹ ag tóg ti mỹ jagtar nỹtĩ. Ag jagãgtãn kỹ tóg, ag kã mĩ ũn kagyga ag tỹ háꞌ he mũ sir.
15 Hã ra tóg rãké nỹ sir, kỹ ti mré mũ tĩ ag tóg ti mỹ: “rãké ti nỹ ha,” he mũ. “Tag mĩ tóg ẽmã tũ tĩ. Kỹ tóg ã tỹ ag jẽgnẽnh há tĩ, ag tỹ ẽmã ũ ra mũ jé, vẽjẽn kũpra he jé,” he ag tóg mũ.
16 Hã ra Jesus tóg ag mỹ: “ha inhhã ag jẽn, kỹ ag tóg hẽ ra mũnh ke tũ nĩ,” he mũ.
17 Kỹ ag tóg ti mỹ: “hã ra tóg tũ tĩ, vẽjẽn tĩ,” he mũ. “Ẽmĩ tỹ 5 (ke) hã vỹ ki nỹtĩ, pirã régre ke gé,” he ag tóg.
18 Kỹ tóg ag mỹ: “inh mỹ ma kãmũ jẽg ge,” he mũ.
19 Kỹ tóg ũn e ẽn ag mỹ tó mũ, ag tỹ re tá nĩgnĩ kỹ nỹtĩ jé. Kỹ tóg ẽmĩ tỹ 5 (ke) ẽn mãg mũ, pirã régre ẽn ke gé. Kỹ tóg kanhkã ki ẽvãnh mũ sir. Vẽjẽn ẽn to tóg Topẽ mré vĩ mũ sir. Kỹ tóg vãhã ẽmĩ kénh kỹ ti mré mũ tĩ ag mỹ vin mũ sir, ag tỹ kãnhkrén jé, ũn e ẽn ag mỹ.
20 Kỹ vẽnh kar tóg ko kãn kỹ funfór mũ sir. Hã ra tóg kén mũ. Kẽj tỹ 12 (ke) fãn ag tóg mũ, ti ke tỹ.
21 Ẽmĩ ko mũ ẽn ag tóg tỹ ũn tỹ 5 mil (ke) ag nỹtĩ, ũn tỹtá mré tó tũ, fag krẽ mré tó tũ, hã ra fag tóg tá e nỹtĩ gé mỹr, ha mẽ.
Jesus tỹ goj nig mág kri tĩg
22 Kỹ tóg ti mré mũ tĩ ag mỹ tó mũ, ag tỹ canoa kã mĩ mũ jé, ag tỹ ti jo kafã ũ ra mũ jé. “Isỹ ver ũn e tag ag mỹ: ha mũjẽg, henh ke vẽ,” he tóg ag mỹ.
23 Ag mũ kar kỹ tóg, ti pir mỹ krĩ ra tãpry mũ, Topẽ mré vĩ jé. Ti tỹ tá nĩ ra tóg kutyg mũ sir.
24 Kỹ canoa tóg goj nig mág ẽn kã mĩ tĩ mũ sir, kafã ũ ra. Nig fyr tóg kuvar gy nĩ. Kãka vỹ ag kato tẽ mũ gé, hã kỹ ag tóg mũ kónãn mũ. Kỹ goj tóg krém krém ke sa nĩ, kỹ tóg ag kutãn mũ, goj ti.
25 Hã ra Jesus tóg kurã ke ra ag to kãtĩ mũ, goj kri tĩg kỹ, ti pẽn kã.
26 Kỹ ti mré mũ tĩ ag tóg ti vég mũ, ti tỹ goj kri tĩg kỹ, kỹ ag fe tóg jũrũn ke mũ. “Vẽnh kuprĩg vẽ,” he ag tóg mũ. Ti kamẽg kỹ ag tóg vẽkrẽnkrẽr mũ sir.
27 Hã ra Jesus tóg ag mỹ: “inh kamẽg tũg nĩ, inh hã vẽ, jũrũn ke tũg nĩ,” he mũ.
28 Kỹ Pedro tóg ti mỹ: “ã hã mỹꞌ? Kỹ inh mỹ tó, isỹ ã to tĩg jé, goj kri tĩg kỹ,” he mũ.
29 Kỹ Jesus tóg ti mỹ: “kunĩg ge,” he mũ. Kỹ Pedro tóg canoa ki kãkutẽ kỹ goj kri tĩ mũ sir, Jesus to.
30 Ti tỹ goj kri tĩg kỹ tóg vãhã, kãka ki ẽvãnh mũ, kỹ tóg mũmẽg mũ sir. Mũmẽg kỹ tóg goj ki pun ke kỹ ter kren mũ. Kỹ tóg prẽr mũ. “Senhor, inh kren han nĩ,” he tóg.
31 Kỹ Jesus tóg vẽsỹmér ti kãgmĩg mũ. Kỹ tóg ti mỹ: “inh ki rã há han tũ ã tóg nĩ, vỹ,” he mũ. “Ã hã ne tóg: inh mỹ tá jun mũ vỹ? he mũꞌ, hã kỹ ã tóg ki pun ke kren mũ,” he tóg.
32 Kỹ ag tóg canoa kã ki ge mũ sir. Kỹ kãka ẽn tóg tũꞌ he mũ sir, vẽsỹmér.
33 Kỹ tóg ag mỹ há tĩ. Kỹ ag tóg Jesus ki ge há han kỹ ti mỹ: “Topẽ kósin vỹ tỹ ã nĩ, mỹr,” he mũ.
Jesus tỹ Genesaré tá jun
34 Kỹ ag tóg kafã ũ tá junjun mũ sir, ga tỹ Genesaré tá.
35 Tá ke ag tóg, ag tỹ Jesus ve kỹ ti ki kanhrãn mũ. Kỹ ag tóg vẽnh kar mỹ vẽnh vĩ jẽgnẽg mũ sir, ag tỹ ũn kagyga ag tatĩ kãmũ jé, Jesus to.
36 Kỹ ag tóg Jesus mỹ to vĩ mũ, ag tỹ ti kur tóv mẽ jé. Kỹ ũ tỹ ti kur mẽg mũ ag tóg háꞌ he kãn mũ sir.
