Roma tá ke ag mỹ carta 10:1-21
10 Inh kanhkãꞌ, isỹ inh mré ke tỹ Judeu ag krenkren venh há tãvĩ tóg tĩ, hã jé sóg Topẽ mré vẽmén tĩ.
2 Topẽ vĩ han jé ag tóg vãsãnsãn mũgtĩ. Hã ra ag tóg ki kagtĩg nỹtĩ, kỹ ag tóg ẽg tỹ nén han ke tũ ẽn han tĩ.
3 Vẽsóg ki ag tóg vẽjykre kuryj to vãsãn sór tĩ. Hã ra ũ tỹ ẽg mỹ vẽjykre kuryj nĩm sór mũ vỹ tỹ Topẽ ti nĩ. Tag ve sór tũ ag nỹtĩ, Topẽ tỹ ẽg mỹ nĩm ke tag. Hã kỹ ag tóg Topẽ kato vãsãnsãn mũ.
4 Cristo vỹ hur kãtĩg. Kỹ ẽg tóg ti ki ge kỹ nỹtĩn kỹ ti mỹ há nỹtĩ ha. Ẽg tỹ Topẽ tỹ vãsỹ ẽg jyvẽn ki króm tugnĩn ke pijéꞌ. Jesus Cristo ki rã tugrĩn ke vẽ.
5 Ha vé, Moisés vỹ vãsỹ Topẽ jykre to tag rán, ha mẽ. “Ũ tỹ vẽjykre kuryj han kãn mũ vỹ rĩr nĩnh ke mũ, ũ tỹ ge vỹ rĩr krỹg ja tũ venh ke mũ, ti tỹ Topẽ tỹ ẽg jyvẽn mũ ẽn ki króm kãn tugnĩn,” he ja tóg nĩ, Moisés ti. Hã ra ẽg tóg ki króm kãn ki kagtĩg nỹtĩ, ẽg tỹ ki króm kãn sór mũ ra.
6 Ẽg tỹ Jesus ki rã tugrĩn ẽg tóg Topẽ mỹ há nỹtĩ. Kỹ ẽg tóg: “ũ nỹ hỹn kanhkã ra tĩg mũ, Cristo pére kãtĩg jé?“ henh ke tũ pẽ nĩ. Mur kỹ ti nĩ ha.
7 Kỹ ẽg: “ũ nỹ hỹn vẽnh kuprĩg ag jamã ra tĩg mũ, Cristo rĩn mãn jé?“ henh ke tũ pẽ nĩ gé. Rĩr mãn kỹ ti nĩ ha.
8 Tag tó jé ẽg tóg ke mũ, ha mẽ: “jagy tũ ti nĩ, Topẽ vĩ ti. To jykrén há ti nĩ. Kãnhmar ẽg tóg tónh ke mũ. Kãnhmar ẽg tóg to jykrén ke mũ, Topẽ vĩ to,” he jé ẽg tóg ke mũ.
Topẽ vĩ tag hã tó sóg tĩ. “Jesus Cristo ki rã tugnĩn ẽg krenkren ke mũ,” he sóg tĩ.
9 Ẽg krenkren jé ẽg tóg Jesus to: “ẽg Senhor vỹ tỹ ti nĩ,” henh ke mũ. Kỹ ẽg tóg ẽg fe tỹ ti ki rãnh ke mũ gé. Topẽ tỹ ti ter kar kỹ ti rĩn mãn ja tag kri ẽg nĩm ke mũ. Kỹ ẽg tóg kri fi kỹ krenkren ke mũ sir.
10 Ẽg tỹ ẽg fe tỹ ti ki rã kỹ ẽg tóg ti mỹ há nỹtĩ. Ẽg tỹ vẽnh kar mỹ ti kãmén kỹ ẽg krenkren ke mũ sir.
11 Hã kỹ tag tóg rán kỹ nĩ, ha mẽ: “ẽg tỹ ti ki ge kỹ ẽg tóg ẽg tỹ nén ve sór mũ ẽn venh ke mũ,” he ja tóg nĩ, Topẽ vĩ rán ki.
12 Vẽnh kar mỹ ke vẽ sir, vẽnh vĩ tag, Judeu ag mỹ, kar kỹ fóg ag mỹ, kanhgág ag mỹ ke gé, fag kar mỹ ke gé. Tỹ tóg ẽg kar Senhor nĩ mỹr. Kỹ tóg, ẽg kar tỹ ti mỹ nén ũ to vĩn kỹ, ẽg mỹ nĩm ke mũ gé sir.
13 Tag hã vỹ rán kỹ nĩ gé, ha mẽ: “ẽg tỹ ẽg Senhor mỹ: inh kren han nĩ, hen kỹ tóg ẽg krenkren han ke mũ, ẽg kar,” he ja tóg nĩ, Topẽ vĩ tỹ rán kỹ nĩ ki.
14 Ẽg tỹ ti ki ge tũ nỹtĩ ra ẽg tóg: “inh kren han nĩ,” he ki kagtĩg nỹtĩnh mũ vẽ. Ẽg tỹ ti vĩ mẽ ja tũ nỹtĩ ra ẽg tóg ti ki ge ki kagtĩg nỹtĩnh mũ vẽ. Ũ tỹ ẽg mỹ ti vĩ tó tũ nĩ ra ẽg ti vĩ mẽnh ke tũ nĩ vẽ.
15 Topẽ tỹ ag jẽgnẽg tũ nĩ ra ag tóg ẽg mỹ ti vĩ tónh ke tũ nĩ vẽ. Hã kỹ tag tóg rán kỹ nĩ, ha mẽ. “Ũ tỹ ẽg mỹ Topẽ vĩ sér ma kãmũ mũ ag junjun kỹ tóg ẽg mỹ sér pẽ tĩ,” he ja tóg nĩ, Topẽ vĩ tỹ rán kỹ nĩ ki. Topẽ tỹ ti vĩ tó tĩ ag jẽgnẽ to ken hã vẽ.
16 Hã ra ũ ag tóg kri fi jãvãnh nỹtĩ gé, ag tỹ mẽg mũ ra, Topẽ vĩ sér ti. Isaías vỹ ag to Topẽ mỹ tag tó ja nĩ. “Ẽg jóg mágꞌ, inh vĩ mẽ jãvãnh ag nỹtĩ,” he ja tóg nĩ.
17 Hã kỹ ẽg tóg, ẽg tỹ ti vĩ mẽ há han kar kỹ ti ki rã tĩ. Ẽg tỹ Cristo kãme mẽ kỹ ẽg ti ki rã tĩ.
18 Kỹ ãjag hỹn inh mỹ: “Judeu ag mỹ mẽ ja tũ nĩ, hã kỹ ag mỹ ti ki ge ja tũ nĩ?“ he sór mũ, ãjag tỹ inh carta tag ve kỹ. Vó, mẽ kỹ ag nỹtĩ vẽ. Tag vỹ rán kỹ nĩ, ha mẽ: “ga kar mĩ ag tóg mẽ ja nĩgtĩ, ã vĩ ti. Ga fyr tá tóg jun gé, ã vĩ ti,” he ja ti nĩ, Topẽ vĩ rá ki.
19 Kỹ ãjag hỹn inh mỹ: “kỹ Judeu ag mỹ to jykrén há han ki kagtĩg nỹtĩ, ag tỹ mẽg mũ ra?“ he sór mũ. Vó, ag tỹ to jykrén sór kỹ ag tóg to jykrén mũ vẽ. Moisés vỹ ẽg mỹ tag kãmén, ha mẽ: “Topẽ tóg fóg mré kanhgág to: isũ tũ ag vẽ ver,” he ja nĩ. “Hã ra sóg ag tỹ isũ han sór mũ, ãjag tỹ ag ve kỹ inh ki rã to én jé, fag mré hã,” he tóg. “Fóg mré kanhgág ag vỹ ãjag mỹ krĩ tũ nỹtĩ. Hã ra sóg ag to há nĩ sór mũ, ãjag tỹ ag tugrĩn jũgjũ jé, he tóg, Topẽ ti,” he ja tóg nĩgtĩ, Moisés ti, Judeu ag mỹ.
20 Kỹ Isaías tóg tag tó mũ gé, fóg ag to, kanhgág ag to, ha mẽ. “Ũ ag tóg inh jãvãnh ja tũ nĩgtĩ. Hã ra ag tóg inh vĩ jẽmẽg mũ ha. Topẽ hẽ ri ke tĩ? he ja tũ ag nĩgtĩ. Hã ra sóg ag mỹ inh vĩ jẽnẽg mũ ha, he tóg, Topẽ ti,” he ja ti nĩ gé. Pãꞌi ag kamẽg vãnh nĩn kỹ tóg Judeu ag mỹ fóg ag mré kanhgág ag tỹ Topẽ ki genh ke tó ja nĩ, Isaías ti.
21 Kỹ tóg Judeu ag to: “kurã kar ki sóg ãjag mỹ: kunĩg, he tĩ. Hã jé sóg ãjag mỹ inh nĩgé ven tĩ, ãjag tỹ gĩr mỹ ãjag nĩgé ven ẽn ri ke. Hã ra ãjag tóg inh vĩ mẽ jãvãnh nỹtĩꞌ. Inh vĩ kafãn kónãn ãjag tóg mũ mỹrꞌ,” he ja tóg nĩ, Isaías ti.
