Roma tá ke ag mỹ carta 14:1-23
14 Ũ tóg krój nỹtĩ ver. Tope jykre ũ tóg ver ag mỹ jagy tĩ, ag tỹ ti ki ge kỹ nỹtĩ ra. Ũ tỹ ge tovãnh tũg nĩ. Ag mỹ: “ẽg mré Topẽ vĩ mẽnh kãtĩg nĩ,” hem nĩ. Ag mỹ komẽr hã vĩm nĩ, ag tỹ kygnẽ kỹ.
2 Ũ tóg nén kar ko tĩ, jãvo ũ tóg nén ũ nĩ ko vãnh nĩ, kỹ tóg ẽkré hã ko tĩ. “Vẽnh kãgrá tỹ topẽ mỹ ag tóg pũn ja nĩ, nén ũ nĩ ẽn ti. Hã kỹ sóg ko sór tũ nĩ,” he ag tóg tĩ, ũn krój ag.
3 Hã ra ãjag kã mĩ ũ ag tóg ge ra ko tĩ, vẽnh kãgrá tỹ ag mỹ tỹ nén ũ tũ nĩn kỹ. Ãjag tỹ ko kỹ ũ tỹ ko vãnh ẽn to é he tũg nĩ. Kỹ ãjag tỹ ko vãnh nĩn kỹ ũ tỹ ko mũ ẽn to: “ti kórég han ti tĩ,” he sór tũg nĩ gé. Vẽjẽn to jagnẽ mỹ vĩ tũg nĩ. Ã mré tóg Topẽ ki rã kỹ jẽ gé, ũ tỹ ko mũ ti, kỹ ti to vĩ tũg nĩ.
4 Jesus mỹ rãnhrãj tĩ vỹ tỹ ẽg nỹtĩ, ẽg kar. Hã kỹ tóg vẽnh mỹ tĩ, ẽg tỹ jagnẽ to vĩ sór kỹ. Ũ tỹ ẽg mỹ vĩnh ke mũ vỹ tỹ ẽg Senhor ti nĩ, ẽg tỹ tỹ ti tũ nỹtĩn kỹ. Hã ra ẽg kar vỹ há nỹtĩnh ke mũ, kurã ẽn kã, ha vem nĩ, ẽg Senhor tỹ ẽg tar han kỹ.
5 Ũ tóg vẽnh kán ke kurã to: “kurã kórég,” he tĩ, kurã ũ to ke gé. Jãvo ũ tóg kurã kar to: “kurã há,” he tĩ gé. Há kar ti nỹtĩ, ãjag tỹ kurã han mũ ti. Kỹ ãjag tỹ nén to jykrén mũ ẽn hã han nĩ.
6 Ẽg kar vỹ ẽg Senhor jykre mĩ mũ sór mũ. Hã kỹ ũ tóg kurã kórég han sór tĩ, ti jykre mĩ tĩ jé. Jãvo ũ tóg kurã kórég han vãnh nĩ, ti jykre mĩ tĩ jé gé. Há kar ti nĩ.
Kỹ ũ tỹ nén ũ kar ko mũ vỹ ge nĩ gé. Ẽg Senhor jykre mĩ tĩ hã jé tóg ko tĩ gé. Jãvo ũ tóg nén ũ nĩ ko vãnh nĩ. Ẽn vỹ ẽg Senhor jykre mĩ tĩ hã jé ko vãnh nĩ gé. Há kar ti nĩ, ẽg tỹ nén ũ nĩ ko mũ ti, ẽg tỹ ko vãnh ti ke gé.
7 Ẽg pijé ẽg jykre han ke mũꞌ, ẽg tỹ ga kri mũn kỹ. Kỹ ẽg ter ken kỹ ẽg pijé ẽg jykre ki ter ke mũ géꞌ.
8 Ẽg tỹ ga kri mũn kỹ ẽg tóg ẽg Senhor jykre hã han ke mũ. Ti tũ han hã jé ẽg tóg ga kri mũ nĩ. Kỹ ẽg ter ken kỹ ẽg tóg ti jykre hã ki ter ke mũ géꞌ. Ẽg Senhor tỹ Jesus Cristo tũ kar vỹ tỹ ẽg nỹtĩ.
9 Ẽg tỹ tỹ ti tũ nỹtĩ hã jé tóg ter ja nĩ. Hã jé tóg rĩr mãn ja nĩ gé. Ti tỹ tỹ ẽg Senhor nĩ hã jé tóg ter ja nĩ, vẽnh kar pãꞌi, ũn rĩnrĩr mũ ag pãꞌi, ũn kãgter mũ ag pãꞌi ke gé.
10 Kỹ ãjag tỹ hẽ ri ken kỹ jagnẽ to vĩ sór nẽ? Ãjag tỹ hẽ ri ken kỹ jagnẽ to é he nẽ? Topẽ hã vỹ ẽg jykre ve kãn ke mũ, ẽg kar, ti tỹ ẽg jé prẽr ken kỹ.
11 Hã kỹ tag tóg rán kỹ nĩ, ha mẽ. “Rĩr inh jẽ nĩ,” he tóg, ẽg Senhor ti. “Vẽnh kar vỹ inh krẽm grĩnh kenh ke mũ, ha vem nĩ. Vẽnh kar vỹ inh mỹ: ũn mág vỹ tỹ ã nĩ, henh ke mũ, he ti, Topẽ ti,” he tóg, Topẽ vĩ tỹ rán kỹ nĩ ki.
12 Ẽg kar vỹ Topẽ rĩnja tá nỹtĩnh ke mũ, kỹ tóg ẽg jykre tugnỹm ke mũ. Ẽg hã ki tóg jẽmẽnh ke mũ, ẽg tỹ nén han ja ẽn to.
13 Hã kỹ jagnẽ to vĩ mãn tũg nĩ.
Ẽg tỹ jagnẽ to fen ke
Jagnẽ to: “kórég ti nĩ,” he mãn tũg nĩ. Ãjag tỹ nén ũ han ken kỹ: “isỹ tag han kỹ inh régre mỹ inh ve kỹ Topẽ vĩ mranh ke tũ nĩ vỹ?” he jé ẽg tóg ke mũ.
14 Tag ki kanhró inh nĩ, ha mẽ: vẽjẽn pijé ẽg kavénh tĩꞌ. Jesus tỹ tón hã vẽ. Nén ũ tũ vẽ, vẽjẽn ti. Ẽg tỹ ko jafã tãvĩ vẽ. Hã ra ũ tóg nén ũ nĩ to: “vẽnh kãgrá mỹ ag tóg pũn ja nĩ, vẽnh mẽg ẽn nĩ ti. Hã kỹ sóg ko kỹ Topẽ vĩ mranh tĩ,” he tĩ. Ũ tỹ tag tó mũ jykre kavénh ti tĩ, ti tỹ ge ra kon kỹ.
15 Inh mỹ tóg tỹ Topẽ vĩ mranh tũ nĩ, isỹ nén ũ nĩ ko tag ti. Hã kỹ sóg ko mũ sir. Kỹ inh régre ũ tóg isỹ ko ve kỹ ko sór mũ gé sir. Hã ra tóg ti hã mỹ Topẽ vĩ mranh ri ke nĩ. Kỹ tóg ko kỹ isugrĩn Topẽ vĩ mranh mũ sir. Kỹ tóg nũgme ki kutẽnh ke mũ sir. Kỹ tóg isỹ inh jẽn tugnĩn ti tén ri ke nĩ sir, Cristo tỹ ũn jagfy ter ja ẽn ti.
16 Kỹ tag han sór tũg nĩ, ũ tỹ ãjag tỹ nén han mũ to ãjag to vĩ tũ nĩ jé. Há ti nĩ vẽ, ãjag tỹ kon kỹ. Hã ra ũ tỹ ãjag jẽn to ãjag to vĩn kỹ ko sór tũg nĩ.
17 Topẽ tỹ tỹ ẽg Senhor nĩn kỹ ẽg jẽn tóg tỹ nén ũ tũ nĩ ha mỹr. Kỹ tóg ẽg tỹ nén ũ nĩ ko tũ ra ẽg mỹ tỹ nén ũ tũ nĩ. Nén ũ ũ to ẽg jykrén ke mũ ha, hã vỹ: vẽjykre kuryj, he mũ, vẽjykre kusa, vẽjykre sér, Topẽ kuprĩg tỹ mỹr, ẽg jagrẽ tãg tỹ, he tóg.
18 Ẽg tỹ gen kỹ Cristo jykre han kỹ tóg Topẽ mỹ há tĩ ha, ẽg jykre ti. Kỹ tóg ẽg mré ẽprã ke ag mỹ há tĩ gé sir, ha vem nĩ.
19 Kỹ ẽg jé jagnẽ krĩ kuprãg hã to jykrén. Ẽg jé jagnẽ tar han sór.
20 Kỹ tóg ẽg tỹ nén ũ nĩ ko to ẽg régre tỹ tỹ prãnh ke han kỹ kórég nĩ. Vẽjẽn kar vỹ há nĩ. Hã ra ũ tóg vẽjẽn ũ to jykrén kónãn sór mũ, ti tỹ to Topẽ vĩ mranh kỹ. Ti tỹ ge ra kon kỹ tóg tỹ prãnh ke mũ sir.
21 Kỹ tóg kórég nĩ, ẽg régre tỹ ẽg tugnĩn Topẽ vĩ mranh kỹ. Hã jé nén ũ nĩ ko tũg nĩ, ã régre tỹ to tỹ prãnh kenh mẽ tĩn kỹ. Ti rĩnve goj fa kron tũg nĩ gé. Nén ũ tỹ ã régre tỹ Topẽ vĩ mranh han ẽn tovãnh kãn nĩ.
22 Ã tỹ nén ũ to: “kórég tũ ti nĩ,” hen kỹ Topẽ hã mỹ tóm nĩ. Hã ra ã régre rĩnve han tũg nĩ, ti tỹ ã mỹ há nĩ ra, ã régre tỹ ã tugnĩn Topẽ vĩ mranh tũ nĩ jé. Ã tỹ Topẽ tỹ ã mỹ nén tó mũ hã han kỹ tóg há nĩ, kỹ ã tóg jatu nĩ, ha vem nĩ.
23 Ũ tóg ko tĩ, hã ra tóg ti tỹ ko kỹ: “isỹ Topẽ vĩ mranh mỹ vỹ?“ he mũ sir. Ti tỹ ge ra kon kỹ tóg to krĩ kufy nĩ sir. Kỹ tóg Topẽ vĩ mranh mũ sir. Ẽg tỹ ti ki ge kỹ nỹtĩn kỹ ẽg tóg ti tũ hã han sór mũ sir. Ẽg tỹ nén ũ to: “tag han kỹ inh mỹ ti vĩ mranh mũ vỹ?“ hen kỹ ẽg han ke tũ nĩ. Ke tũ nĩ mũ ra ẽg ti vĩ mranh mũ.
