Roma tá ke ag mỹ carta 5:1-21
5 Kỹ tóg ẽg mỹ vẽnh pãte fón mũ sir, ẽg tỹ Jesus Cristo ki ge kỹ nỹtĩn kỹ. Kỹ ẽg tóg jatun mỹ nỹtĩ, Topẽ tỹ ẽg to jũ mãn tũ nĩn kỹ, ẽg Senhor tỹ Jesus Cristo tugrĩn.
2 Ti hã tugnĩn Topẽ tóg ẽg jagãgtãn tĩ. Tag tugrĩn ẽg tar nỹtĩ sir. Kỹ tóg ẽg mỹ sér tĩ gé. Topẽ vỹ ẽg tỹ ũn mág han ke mũ. Ti tỹ tỹ ũn mág nĩ ẽn ri ke. Kỹ tóg ẽg mỹ sér tĩnh mũ sir.
3 Ver ẽg tóg ti jagy vég tĩ, tag ki. Hã ra tóg ẽg mỹ sér tĩ gé, ẽg tỹ ti jagy vég mũ ra. Ẽg tỹ ti jagy vég mũ tag ne ẽg tar han ke mũꞌ, komẽr hã.
4 Ẽg tar nỹtĩn kỹ ẽg ti tovãnh sór ke tũ ki kanhró nỹtĩ sir. Ẽg tỹ ti tovãnh sór tũ nĩn kỹ ẽg tóg Topẽ tỹ ẽg mỹ nén tó ja kar venh ke mũ, ti tỹ ẽg mỹ nén ũ há ven ke ẽn ti, tá.
5 Ẽg pijé venh ke tũ nĩꞌ. Ẽg mỹ tóg ti kuprĩg jẽnẽ huri, ti tỹ tỹ ẽg jagrẽ nĩ jé. Ẽg jagrẽ tag vỹ ẽg mỹ: “Topẽ vỹ ã to há nĩ,” he tĩ. Ti hã tugrĩn ẽg ki kanhró nỹtĩ, ẽg tỹ Topẽ tỹ ẽg mỹ nén tó ja ẽn venh ken ki.
6 Jykre pãno ẽg nỹtĩ. Krój ẽg nỹtĩ. Hã ra Cristo ne ẽg jagfy ter ja nĩgtĩꞌ.
7 Ti jãvo ẽg tóg jagnẽ jagfy ter ke tũ nĩ. Ũn jykre há jagfy ter ke tũ ẽg nĩ.
8 Ẽg jãvo Cristo vỹ ẽg jagfy ter ja nĩ, ẽg tỹ tỹ Topẽ vĩ mranh jafã nỹtĩ ra. Hã ki ẽg ki kanhró nỹtĩ, Topẽ tỹ ẽg to há tãvĩ nĩ ti.
9 Kỹ Topẽ tóg ẽg mỹ vẽnh pãte fón mũ sir, Jesus tỹ ẽg jagfy ter ja tugnĩn, ti kyvénh tugrĩn. Kỹ tóg Topẽ tỹ vẽnh kar to jũnh ke kurã ẽn ki ẽg kren han ke mũ gé, ha mẽ.
10 Ẽg tỹ ver ti kato tẽ nỹtĩ ra Topẽ kósin tóg ẽg jagfy ter, kỹ Topẽ tóg ẽg to há nĩ. Ẽg to jũ mãn tũ ti nĩ. Kỹ tóg kurã ẽn kã ẽg kren han ke mũ gé, ti rĩr jẽn kỹ, ti kósin ti.
11 Kurã ẽn kã tóg ẽg kren han ke mũ, hã ra tóg ũri ẽg to há nĩ gé. Kỹ tóg ẽg mỹ sér tĩ. Ẽg Senhor tỹ Jesus Cristo tugnĩn ke vẽ. Ti hã ne Topẽ tỹ ẽg to há nĩnh ke hanꞌ. Ti hã ne Topẽ tỹ ẽg to jũ tỹ tũꞌ he mũꞌ.
Adão mré Jesus
12 Ha vé, ũn pir vỹ Topẽ vĩ mranh vén. Kỹ Topẽ vĩ mranh vỹ kã nĩ nĩ sir. Ti vĩ mranh tugrĩn tóg ter ja nĩ gé. Ũ tỹ ti vĩ mranh vén ja ẽn ri ke ẽg nỹtĩ. Topẽ vĩ mranh kãn ja ẽg tóg nĩ gé. Kỹ ẽg tóg kãgter kãn ke mũ gé, Topẽ vĩ mranh kỹ.
13 Topẽ tỹ ẽg jyvẽn to hã ag tóg ti vĩ mranh ja nĩgtĩ gé. Hã ra ag tóg vẽjykre kórég to: “Topẽ vĩ mranh vẽ,” he ja tũ nĩ ver, ag tỹ Topẽ tỹ ẽg jyvẽn ẽn mẽ ja tũ nĩn kỹ, Moisés tỹ Topẽ vĩ rán ja to hã.
14 5:14-15 Ge ra ag tóg kãgter ja nĩ, ẽn to. Adão vỹ ter, ti nón ke ag vỹ kãgter, Moisés mur to hã. Adão ne Topẽ tỹ ti mỹ ka kanẽ to: “ko tũg nĩ,” he ja ẽn ko ja nĩgtĩꞌ. Ti nón ke ag vỹ Topẽ vĩ mranh gé, hã ra ag pijé Adão tỹ Topẽ vĩ mranh ja ẽn ri ke hynhan ja nĩgtĩꞌ. Ge ra ag tóg kãgter kãn. Kỹ ẽg ũri kãgter tĩ gé, ẽg tỹ ũn ve nón Topẽ vĩ mranh kỹ.
Jãvo ti nón ke ẽn, Jesus ẽn hã vỹ ẽg mỹ vẽjykre há nĩm ke mũ. Ti tugnĩn Topẽ vỹ ũn e tãvĩ jagãgtãn ke mũ sir. Ẽg mỹ tóg nén tỹ hẽn ri ke hynhan ke mũ sir. Kỹ tóg presente há tãvĩ ri ke nĩ sir. Kỹ Jesus tỹ ẽg mỹ vẽjykre há nĩm mũ ẽn vỹ ũn ve tỹ ẽg mỹ vẽjykre kórég nĩm ja ẽn kãfór nĩ.
15 Ha vé 5:14
16 Ũn pir tỹ Topẽ vĩ mranh vén ẽn tugnĩn ẽg kãgter kãn ke mũ. Topẽ vĩ mranh pir tugrĩn tóg ẽg vóg kónãn kãn ke mũ. Hã ra tóg ẽg mỹ presente ri ke han sór mũ ha. Ẽg jagãgtãn tóg tĩ, ẽg tỹ ti vĩ mranh tỹ hẽn ri ke han ja ra, kỹ tóg ẽg mỹ vẽnh pãte fón mũ gé sir.
17 Ũn pir tỹ Topẽ vĩ mranh vén ja tugnĩn ẽg kar vỹ kãgter kãn ke mũ. Hã ra tóg ũn pir ũ tugrĩn ẽg jagãgtãn ke mũ ha, kỹ tóg ẽg mỹ vẽnh pãte fón mũ. Kỹ tóg ẽg kugrynh ke mũ. Ẽg mỹ presente ri ke han hã vẽ. Kỹ ẽg tóg rĩnrĩr mãn ke mũ gé. Kỹ ẽg tóg tá tỹ ũn mág nỹtĩnh mũ sir, ũn pir tugnĩn, hã vỹ: Jesus Cristo, he mũ.
18 Hỹ, ũn pir tỹ Topẽ vĩ mranh vén ja tugrĩn Topẽ tóg ẽg vóg kónãn kãn ke mũ sir. Ri ke ti nĩ, Jesus tỹ ẽg kren han mũ ti. Ũn pir tỹ Topẽ vĩ ki króm kãn tugnĩn Topẽ tóg ẽg kar jagãgtãn ke mũ sir. Kỹ tóg ẽg mỹ vẽnh pãte fón ke mũ, ẽg kãgter mãn tũ nĩ jé, ẽg kuprĩg ti.
19 Ũn pir tóg Topẽ vĩ han ja tũ nĩ. Kỹ ẽg kar vỹ Topẽ vĩ mranh tĩ sir, ti nón. Kar kỹ ũn pir vỹ Topẽ vĩ han kãn ja nĩgtĩ. Kỹ Topẽ tóg ti tugrĩn ẽg mỹ vẽnh pãte fón kãn ke mũ gé sir.
20 Kỹ Topẽ tóg Moisés tỹ ẽg jyvẽn ja nĩgtĩ. Hã kỹ tóg rán ja nĩ. Kỹ ẽg tóg ti vĩ mẽ kỹ ẽg tỹ Topẽ vĩ mranh e han ja ẽn ki kanhrãn mũ sir. Ẽg tỹ ti vĩ mranh e tãvĩ han mũ ra Topẽ tóg ẽg jagãgtãn kãfór han mũ gé sir,
21 ti tỹ ẽg jykre kugrynh jé sir. Nũgme ki ẽg tóg vár kãn ke mũ vẽ, ẽg tỹ Topẽ vĩ mranh to. Jagy ti nĩ. Hã ra Topẽ tóg ẽg jagãgtãn kãn ke mũ. Kỹ tóg ẽg kugrynh ke mũ. Kỹ ẽg rĩr krỹg ja tũ venh ke mũ. Topẽ tỹ ẽg jagãgtãn hã vẽ. Ẽg Senhor tỹ Jesus Cristo tỹ ẽg jagfy ter ja tugrĩn ken hã vẽ.
