Tiago tỹ carta 4:1-17
4 Ãjag hã ne tóg jagnẽ to jũgjũ nỹtĩꞌ. Hẽ ri ken kỹ hỹnꞌ? Ãjag tỹ nén ũ vẽnhmỹ han sór nỹtĩn kỹ, hã kỹ ãjag tóg jagnẽ to krĩ rỹ nỹtĩ. Jykre pãno ãjag tóg nỹtĩ mỹr, kỹ ãjag tóg vẽjykre há kato tẽ nỹtĩ sir.
2 Nén ũ to én kỹ ãjag tóg mãn sór mũ, hã kỹ ãjag tóg vég tũ nĩ mỹr. Hã kỹ ãjag tóg jagnẽ kãgtén sór mũ sir, jagnẽ tỹ nén ũ mãn jé. Jagnẽ tỹ nén ũ to én kỹ ãjag tóg jagnẽ kato tẽgtẽ tĩ, ãjag tỹ Topẽ mỹ to vĩ tũ nĩn kỹ.
3 Ãjag tỹ ti mỹ to vĩ ra ãjag tóg venh ke mũ vẽ, hã ra ãjag tóg to vĩ há han tũ nĩgtĩ gé, hã kỹ tóg ãjag mỹ han tũ nĩgtĩ sir. Ti mỹ ãjag tóg to vĩ mũ, ãjag tỹ nén to én mũ ẽn mãn jé. Hã ra tóg ti mỹ tỹ ũ nỹ, hã kỹ tóg ãjag mỹ han tũ nĩ sir, Topẽ ti.
4 Ẽg tỹ Topẽ ki rã kar kỹ vẽjykre pãno to én kỹ ẽg tóg ti kato tẽ mũ sir. Ũn tỹtá kórég fi ri ke ẽg nỹtĩ, ẽg tỹ gen kỹ. Fi mén kavénh fi tóg tĩ, ũ to én kỹ. Ẽg tỹ ẽprã vẽjykre to én kỹ ẽg tóg Topẽ kato tẽ mũ sir. Tag to jykrén mág nĩ.
5 “Topẽ kuprĩg vỹ tỹ ẽg jagrẽ nĩ. Kỹ tóg ẽg ki rĩr mũ sir. Kỹ ẽg tỹ nén ũ vẽnhmỹ to há nĩn kỹ tóg fe kaj nĩ, Topẽ kuprĩg ti,” he tóg, Topẽ vĩ rá ki. Kỹ tag to jykrén nĩ.
6 Hã ra Topẽ kuprĩg tóg ẽg tar han tĩ, ẽg tỹ nén ũ vẽnhmỹ han sór tũ nĩ jé. Kỹ tóg tag tó mũ sir, ha mẽ: “Topẽ vỹ ũ tỹ: “ũn mág vỹ tỹ inh nĩ,” he mũ ẽn ag to kórég nĩ, hã ra tóg ũ tỹ: “nén ũ tũ vỹ tỹ inh nĩ,” he mũ ẽn ag jagãgtãn tĩ,” he tóg, ti vĩ rá ki.
7 Hã kỹ Topẽ mỹ: “he,” hem nĩ, ti tỹ ãjag krĩn kỹ. Japo mỹ: “nejé,” hem nĩ, ti tỹ ãjag krĩn sór kỹ. Kỹ tóg ãjag tovãnh ke mũ sir, ãjag tỹ ti mỹ: “nejé,” hen kỹ.
8 Topẽ mré vĩ kỹ nỹtĩm nĩ, kỹ tóg ãjag to há nĩ sir. Ãjag mré ti nĩ nĩ, ẽg jóg mág ti. Ti vĩ mranh tĩ vỹ tỹ ẽg nỹtĩ. Kỹ ti vĩ mranh tovãnh nĩ. Jykre régre ẽg nỹtĩ gé. Kỹ vẽjykre pir han kỹ nỹtĩm nĩ, hã vỹ: Topẽ jykre, he mũ.
9 Ãjag tỹ Topẽ vĩ mranh kỹ mỹ jagy nỹtĩm nĩ. Vẽsỹrénh nĩ, fỹm nĩ, ny mãn tũg nĩ. Fe kaj nỹtĩm nĩ. To krĩ kufy nỹtĩm nĩ. Mỹ sér tũ nỹtĩm nĩ, ãjag tỹ Topẽ vĩ mranh kỹ.
10 Ẽg Senhor mỹ: “kórég inh nĩ, isỹ vẽjykre pãno han kỹ,” hem nĩ. Kỹ ti hã vỹ ãjag mỹ vĩ há han ke mũ sir, kỹ ãjag fe vỹ mrin kenh ke mũ sir.
Jagnẽ to vĩ kónãn ke tũ
11 Inh kanhkãꞌ, jagnẽ to vĩ kónãn tũg nĩ. Ãjag tỹ jagnẽ to vĩ kónãn kỹ ãjag tóg Topẽ jykre to vĩ kónãn mũ sir. Kỹ ãjag tóg to: “nén ũ tũ vẽ,” he mũ sir, Topẽ tỹ ẽg mỹ vẽjykre nĩm ja ẽn to. Ãjag tỹ hã ra ti jykre to vĩ kónãn kỹ ãjag tóg ki króm ke tũ pẽ nĩ sir.
12 Ũ tỹ ẽg mỹ ti jykre nĩm mũ ẽn vỹ pir nĩ. Kỹ tóg ẽg jykre tugnỹm ke mũ gé sir. Ti hã tóg: “ẽn vỹ kren ke mũ, ẽn vỹ kren ke tũ nĩ,” henh ke mũ, ti pir mỹ, Topẽ ti. Hã kỹ tóg vẽnhmỹ nỹ, ãjag tỹ jagnẽ to vĩ kónãn kỹ.
Vẽsỹ ũn mág han sór ke tũ
13 Ãjag kã mĩ ũ tóg vẽsóg ki ag tỹ nén to jykrén mũ han sór tĩ, Topẽ ki jẽmẽ sór tũ nĩn kỹ. “Hẽn ri ke mũn sóg vaj kỹ ẽn ra tĩ mũ, ke tũ nĩ kỹ vaj ũn kỹ,” he ãjag tóg tĩ. “Ẽmã ẽn ra sóg tĩg mũ. Tá sóg prỹg pir tũg mũ. Kỹ sóg negociar henh ke mũ, sỹ riko nĩ jé,” he ãjag tóg tĩ mỹr.
14 Hã ra ãjag pijé ãjag tỹ nén venh ke mũ ki kanhró nỹtĩꞌ, ha mẽ. Ẽg hỹn ne venh ke mũ, vaj kỹ? Haꞌ. Ki kagtĩg ẽg nỹtĩ. Ẽg mỹ vaj kỹ ter ke tũ nĩ vỹ? Haꞌ. Krũj ri ke ẽg nỹtĩ. Ve sĩ han ẽg tĩ. Ẽg tỹ ki ẽvãnh mãn mũ ra tóg tũꞌ he mũ sir. Ge ẽg nỹtĩ. Kãnhmar ẽg tóg tũꞌ he tĩ, ẽg ter kỹ.
15 Ãjag tỹ nén ũ han ke to jykrén kỹ Topẽ mĩ ẽkrén nĩ, ũ tỹ ẽg mỹ ẽg ter ke kurã tónh ke mũ ẽn mĩ. “Sỹ nén han ke mũ mỹ ti mỹ há nĩ vỹ?“ hem nĩ.
16 Hã ra ãjag tóg vẽsỹ ũn mág han sór mũ, ãjag tỹ: “tag han jé sóg ke mũ,” hen kỹ. Há tũ ti nĩ, ẽg tỹ vẽsỹ ũn mág han sór kỹ.
17 Kỹ tag tóg vẽnhmỹ nỹ gé, sỹ tónh ke mũ tag, ha mẽ. Kejẽn ẽg tóg nén ũ há to jykrén tĩ, ẽg tỹ han jé. Hã ra ẽg tóg han tũ nĩgtĩ. Kỹ ẽg tỹ Topẽ vĩ mranh ũ vẽ gé sir, ẽg tỹ nén ũ há han sór mũ ra han tũ nĩn kỹ.
