Tito mỹ carta 3:1-15
3 Ag mỹ: “pãꞌi vĩ jẽmẽm nĩ, “ hem nĩ. “Ag vĩ ki króm nĩ. Ag tỹ nén ũ há to: han nĩ, hen kỹ han sórm nĩ, vẽsỹmér,” hem nĩ.
2 “Ũ to vĩ kónãn tũg nĩ,” hem nĩ ag mỹ. “Ũ vĩ kafãn tũg nĩ. Vẽnh kar mỹ vĩ há han nĩ. Vẽnh kar mỹ komẽr hã vĩm nĩ,” hem nĩ ag mỹ.
3 Ha vé, vãsỹ ẽg tóg kórég ja nỹtĩgtĩ gé. Ki kagtĩg ja ẽg nỹtĩgtĩ. Ti vĩ mranh ja ẽg tóg nĩgtĩ gé. Vãgfor mũ ja ẽg tóg nĩgtĩ, kỹ ẽg tóg ũ tỹ ón kỹ ẽg mỹ vẽjykre tó mũ ẽn vĩ han ja nĩgtĩ gé.
4 Vãhã ẽg tóg ki kanhró nỹtĩ, Topẽ tỹ ẽg jagãgtãn kỹ, ẽg kren han tĩ ti. Ti tỹ ẽg to há nĩ mẽ ẽg tóg vãhã.
5 Ẽg pijé vẽjykre kuryj han ja nĩgtĩꞌ. Hã ra tóg ge ra ẽg jagãgtãn ja nĩgtĩ, hã kỹ tóg ẽg kren han mũ sir. Ẽg han mãn ja tóg nĩ, ẽg kygpe kỹ nỹtĩn kỹ. Ti kuprĩg tỹ tóg ẽg han mãn, kỹ ẽg tãg nỹtĩ ha.
6 Ẽg mỹ tóg ti kuprĩg jẽnẽ, ti tỹ tỹ ẽg jagrẽ nĩ jé. Jesus Cristo hã tugrĩn tóg ti jẽnẽ, ẽg kren han tĩ ẽn hã tugrĩn.
7 Hã kỹ tóg ẽg mỹ vẽnh pãte fón mũ sir. Ti tỹ ẽg jagãgtãn hã vẽ. Kỹ tóg ẽg mỹ ti tũ tovãnh sór mũ. Hã tó ja ti nĩ. Rĩr krỹg ja tũ ve jé ẽg tóg ke mũ.
8 Tag vỹ ki hã ke nĩ. Hã kỹ vẽnh kar mỹ tóm nĩ. Ag jyvẽn to krónh ke tũg nĩ. Ũ tỹ Topẽ ki ge mũ ag jyvẽn há han nĩ, ag tỹ vẽjykre há hã han sór jé. Kỹ ag tóg tag hã to vãsãn ke mũ.
9 Judeu ũ ag tóg véké ón kỹ vẽmén sór tĩ. Tag jẽmẽ sór tũg nĩ. Jagnẽ vĩ kafãn ag tóg tĩ. Kỹ ag tóg Topẽ tỹ vãsỹ ẽg jyvẽn tĩ ẽn to jagnẽ vĩ kafãn mũ gé. Tag kar vỹ ẽg mỹ nén ũ há han ke tũ nĩ. Nén ũ tũ vẽ, tag ti.
10 Ũ tỹ vyr mỹ vẽjykre han sór kỹ ti mỹ: “ke tũg ra,” hem nĩ. “Ke tũg ra,” he régre han nĩ, ti tỹ kãnhmar ã vĩ jẽmẽg tũ nĩn kỹ. Tag pãte ti tovãnh nĩ, ti tỹ mẽ jãvãnh nĩn kỹ.
11 Ti jykre vỹ pãno tãvĩ nĩ. Topẽ vĩ mranh ti tĩ. Topẽ vỹ ũ tỹ ge to: “kórég ti nĩ,” he tĩ.
Tito tỹ nén han ke ti
12 Kejẽn sóg ã mỹ Artemas jẽnẽ sór mũ, ke tũ nĩ kỹ Tíquico ti. Ti tỹ ã tá jun kỹ vẽsỹmér inh kukãm kãtĩg, ẽmã tỹ Nicópolis ra. Tá sóg kusa fĩn rãm ke mũ.
13 Zenas ki rĩr há han nĩ gé, advogado ẽn ti, kar kỹ Apolo ti ke gé. Kỹ, ag tỹ mũ mãn ken kỹ ag mỹ jãnkamy vin nĩ, ti tỹ ag mỹ tũꞌ he tũ nĩ jé.
14 Kỹ, ẽg mré ke kar ag jyvẽn há han nĩ, ag tỹ vẽnh rãnhrãj há to tar nỹtĩ jé. Kỹ ag tóg ũn jagtar ag mỹ vin ke mũ gé, ag tỹ nén ũ vẽnh kãpãm kỹ. Tag ne há nỹnh mũꞌ. Ẽg tỹ Topẽ jykre han to ken hã vẽ.
15 Inh mré nỹtĩ kar ag vỹ ã mĩ ẽkrég tĩ. Kỹ ẽg mré Jesus ki ge mũ kar ag mỹ: “ãjag mĩ ti ẽkrég tĩ, Paulo ti,” hem nĩ, ẽg to há nỹtĩ kar ag mỹ.
Topẽ mỹ sóg to vĩ tĩ, ti tỹ ãjag tar han kãn jé.
Hã vẽ.
