Ka Pyrthei Bathymmai Kaba La Jan!
U Blei u la thaw ïa ka pyrthei khnang ba ki briew kin ïoh ban im junom ha ka. (Salm 37:29). U la buh ïa u Adam bad ka Im ha ka kper Eden kaba itynnad, bad u la ai ha ki bad ha ki pateng jong ki ïa ka kam ban peit bad ban sumar ïa ka pyrthei.—Jenesis 1:28; 2:15.
Mynta ka pyrthei kam long shuh kumba U Blei u la thmu. Hynrei ka jingthmu jong U Blei kam ju kylla. Kumno U Blei un pyndep ïa ka jingthmu banyngkong jong u? Ha ki lynnong kiba la dep ngi la ïohi ba U Blei un ym pynduh ïa ka pyrthei, hynrei un ailad ïa kito kiba leh ïa ka mon jong u ban shong sah ha ka. Ynda U Blei u la pyndep ïa ki jingthmu jong u, ka pyrthei kan long kumno?
Tang kawei ka sorkar
Shen ynda ka sorkar jong U Blei kan synshar ïa ki briew baroh, ka pyrthei kan dap da ka jingkmen, ha kaba ki briew kin ïa im lang ha ka jingsuk bad kin leh ïa ki kam kiba bha bad kiba sngewhun. U Blei u la jied ïa u Jisu ban synshar ïa ka pyrthei. Bun ki nongsynshar mynta kim phikir ïa ki briew. Hynrei u Jisu pat u pher na ki namarba un ïai leh tang ïa kaei kaba bha na ka bynta ki briew. Ka jingsynshar jong u kan long da ka jingieid bad un long u syiem uba bha, uba sbun bad uba isynei.—Isaïah 11:4.
Ka jingïatylli ki jaidbynriew
Ha ka pyrthei bathymmai ki briew kin ym don ka jingïapher jaidbynriew ne ka jingisih iwei ïa iwei. Ki briew baroh kin ïatyllilang. (Jingpynpaw 7:9, 10) Baroh kiba im ha ka pyrthei kin ieid ïa U Blei bad ïa la ki paramarjan. Kin ïatreilang ban pyndep ïa ka jingthmu banyngkong jong U Blei ban peit bad sumar ïa ka pyrthei.—Salm 115:16.
Ka mariang kaba janai
Ynda ka Hima U Blei kan synshar ïa ka pyrthei, u Nongthaw un tehlakam ïa ka jinglong jong ka mariang khnang ba kan long kaba biang. (Salm 24:1, 2) Haba u Jisu u la pynjai jai ïa ka ’erïong kaba jur u la pynpaw ïa kaei kaba u lah ban leh da ka bor jong U Blei. (Markos 4:39, 41) Hapoh ka jingsynshar jong u Jisu, yn ym don mano mano ruh kiban sheptieng ïa ka bor jong ka mariang. Ka Hima jong U Blei kan wanrah ïa ka jingsuk hapdeng ki briew bad ki mrad bad ngin ym pynjot shuh ïa ka mariang.—Hosia 2:18.
Ka jingkoit jingkhiah ba janai bad ka bam ka dih kyrhai
Baroh ki briew kin don ha ka jingkoit jingkhiah ba janai. Yn ym don kiban pang, kiban tymmen, ne kiban ïap. (Isaïah 35:5, 6) Kum ha ka kper Eden, ka pyrthei bathymmai kan long kaba khuid bad kaba itynnad, bad ka khyndew ruh kan long kaba seisoh bad ka bam ka dih kan dap kyrhai. (Jenesis 2:9) Kum ha ka por jong ki briew U Blei mynshuwa, baroh kiban don ha Paradais kin ïoh ban “bam ïa la u kpu haduh ban da kdang.”—Lebitikos 26:4, 5.
Ka jingsuk bad ka jingshngaiñ bashisha
Hapoh ka jingsynshar jong ka sorkar U Blei, ki briew baroh kin im ha ka jingsuk bad kin leh bha iwei ïa iwei. Yn ym don shuh ki thma, ki jingleh donbor, bad baroh kin ïoh ïa kaei kaba ki donkam. Ka Baibl ka kular: “Kin ïa shong uwei uwei baroh hapoh la u dieng waiñ bad hapoh la u dieng dumbur, te ym don u ban pynsheptieng ïa ki.”—Mikah 4:3, 4.
Ka ïing la jong bad ki kam ba sngewhun
Baroh kin don la ka jong ka ïïng. Kin ym donkam ban tieng ïoh duh noh ïa ka. Ki kam kiba ngin trei kin long kiba sngewhun. Kumba ka Baibl ka ong, kito kiban im ha ka pyrthei bathymmai kin ym “trei lehnohei.”—Isaïah 65:21-23.
Ka jinghikai kaba biang tam
Ka Baibl ka kular: ‘Ka pyrthei kan dap da ka jingtip ïa U Jehobah.’ (Isaïah 11:9) Ki nongshong shnong jong ka pyrthei bathymmai kin ïoh jinghikai na u Nongthaw ba stad jong ki, U Jehobah; bad kin tip ruh shaphang ki jingthaw baitynnad jong u. Kin ym pyndonkam ïa la ka jingstad ban shna ïa ki tiar ïaleh thma ne ban pynmynsaw ïa kiwei pat ki briew. (Isaïah 2:4) Pynban, kin sa nang ban im ha ka jingsuk bad kiwei, bad kumno ban sumar ïa ka pyrthei.—Salm 37:11.
Ka jingim bymjukut
U Blei u la thaw janai bha ïa ka pyrthei khnang ba ngi lah ban im ka jingim kaba kmen man la ka sngi. Ka jingthmu jong u ka long ba ki briew kin im junom ha ka pyrthei. (Salm 37:29; Isaïah 45:18) Ban pynurlong ïa ka jingthmu banyngkong jong u, U Blei un sa “nguid tylli ïa ka jingïap junom.” (Isaïah 25:8) Ka Baibl ka kular ruh ba ‘ka jingïap kan ym don shuh, lymne ka jingsngewsih, lymne ka jingïam ne ka jingpang kan ym don shuh.’ (Jingpynpaw 21:4) U Blei un sa ailad ïa ki briew baroh ban im junom—ïa kito kiba un pyllait im na ka jingshah pynjot jong kane ka pyrthei bymman, bad ïa kito kiba un pynmihpat ha ka pyrthei bathymmai.—Ïoannis 5:28, 29; Kam 24:15.
Da ki phew lak ngut ki briew ki la sdang ban pynkhreh lypa mynta ban im hapoh ka jingsynshar jong ka Hima U Blei kaba la jan. Wat la ki long ki bym janai, ki pyrshang lypa naduh mynta ban im ha ka rukom kaba U Blei u kwah ïa ki briew ban im ha ka pyrthei bathymmai. Kumno? Da kaba ïoh jinghikai shaphang U Blei Jehobah bad u Jisu Khrist.—Ïoannis 17:3.
Wad shuh shuh kumno phi lah ban lait im na ka jingshah pynjot jong kane ka pyrthei bymman bad ban ïoh im ha ka pyrthei bathymmai kaban sa wan. Pdiang ïa ka jingïasyllok Baibl ka bym donkam ban siew bad iwei na ki Nongsakhi U Jehobah, da kaba pyndonkam ïa ka kot, Ka Jingim Kaba Kmen Shi Junom!
You May Also Like
KA KUTPHIRA
Ka Hima U Blei Kan Leh Aïu?
U Jisu u tip ba dei tang ka Hima U Blei kaba lah ban weng ïa ki jingeh jong ka pyrthei. Kaei ba kane ka Hima ka la leh khnang ban pynkhlaiñ ïa ka jingshaniah jong ngi ha ka?
