Balei Ngi Jynjar, Ngi Tymmen, bad Ngi Ïap?
Ngi long kum ki khun jong U Blei, na kata ka daw um kwah ïa ngi ban jynjar. Hynrei ngi don shibun pat ki jingjynjar. Balei ka long kumne?
Ngi Jynjar Namar ki Briew Banyngkong
“Kat kumba da uwei u briew ka pop ka la bsut sha ka pyrthei, bad da kata ka pop ka jingïap, bad kumta kata ka jingïap ka la wan hap ha ki bynriew baroh phar.”—ROM 5:12.
Ha ka por ba U Blei u la thaw ïa U Adam bad ka Im, u la ai ïa ki ka met bad ka bor pyrkhat kaba janai. U la buh ïa ki ha ka paradais kaba khot ka kper Eden. U la ong ïa ki ba ki lah ban bam na baroh ki dieng kiba don ha ka kper, lait noh tang na uwei u dieng. U Adam bad ka Im ki la jied ban bam ïa u soh na uta u dieng ba la mana, bad kata ka la long ka pop. (Jenesis 2:15-17; 3:1-19) Hynrei, hadien ba ki la saitlah ïa U Blei, u la beh noh ïa ki na ka kper Eden, bad ka jingim jong ki ka la dap da ka jingeh. Hadien katto katne ki la ïoh khun, bad ka jingim na ka bynta ki khun ruh ka la long kaba jynjar. Baroh ki la tymmen bad ki la ïap. (Jenesis 3:23; 5:5) Ngi ïoh pang, ngi tymmen bad ngi ïap namar ba ngi hiar pateng na u Adam bad ka Im.
Ngi Jynjar Namar ki Mynsiem Bymman
“Ka pyrthei baroh kawei ka thiah khop hapoh uta uba sniew.”—1 ÏOANNIS 5:19.
La khot ïa uta “uba sniew” u Soitan. U dei u angel uba la ïaleh pyrshah ïa U Blei. (Ïoannis 8:44; Jingpynpaw 12:9) Hadien, kiwei ki angel ruh ki la ïa snoh kti lang bad u Soitan bad la tip ïa ki kum ki ksuid. Kine ki angel bymman ki pyndonkam ïa la ka bor ban thok bad shukor ïa u briew na u Nongthaw. Ki pynshlur ïa ki briew baroh ban leh ki kam kiba sniew. (Salm 106:35-38; 1 Timothi 4:1) U Soitan bad ki ksuid ki sngewtynnad ban pynjynjar ïa ki briew.
Ngi Jynjar Namar ki Jingleh la jong
“Kaei kaei ruh ba u briew u bet, ïa kata hi un ïoh ot ruh.”—GALATIA 6:7.
Ha bun ki liang, ngi jynjar namar ka pop ba hiar pateng na u Adam bad na ka daw jong u Soitan. Hynrei teng teng ki briew ki pynjynjar hi ïalade. Kumno? Haba ki leh ïa kiei kiei kiba sniew ne shim ïa ki rai kiba bakla, bunsien ki ïoh ïa ka bainong kaba sniew. Ha kawei pat ka liang, haba ki briew ki leh ïa kiei kiei kiba bha, bunsien ki ïoh ïa ka bainong kaba bha. Kum ka nuksa, u lok bad u kpa uba leh hok, uba trei shitom bad uba ieid ïa la ka ïing, u ïoh ïa ka bainong kaba bha bad ka longïing longsem kaba kmen. Hynrei uba khalai bad uba dih kyiad palat ne uba jaituh u lah ban pynduk ïalade bad ïa la ka ïing ka sem. Te ngi dei ban sngap ïa la u Nongthaw. U kwah ïa ngi ban ïoh shibun kiei kiei kiba bha kynthup ïa ka ‘jingsuk ba kyrhai.’—Salm 119:165.
Ngi Jynjar Namar Ngi Im ha “ki Sngi kiba Khatduh”
“Ha ki sngi kiba khatduh . . . , ki briew kin long kiba ieid tang ïalade, kiba ieid sbai, . . . kibym kohnguh ïa la ki kmie ki kpa, . . . kibym suidñiew, kiba runar, kibym ieid ïa kaba bha.”—2 TIMOTHI 3:1-5.
Mynta, bun ki briew ki long kumba la ïathuhlypa ha ka Baibl. Ka jinglong jong ki ka pynshisha ba ngi im ha ki “sngi kiba khatduh.” Ka Baibl ka la ïathuhlypa ruh ba ha ki sngi kiba khatduh kin don ki thma, ki jingduna bam, ki jumai kiba jur, bad ki jingpang. (Mathaïos 24:3, 7, 8; Loukas 21:10, 11) Bun ki briew ki ïap bad ki jynjar namar kine kiei kiei baroh.
