Ũrĩa andũ maugaga: Aira a Jehova matiĩtĩkĩtie ũhoro wa ndawa kana ũrigitani wa ndawa.

 Ũrĩa kũrĩ: Nĩ twethaga ũrigitani ũrĩa mwega biũ nĩ ũndũ witũ na famĩlĩ citũ. Rĩrĩa twagĩa mathĩna ma mwĩrĩ, tũthiaga kũrĩ mandagĩtarĩ arĩa marĩ na ũhoti wa gũthondekana kana gũthĩnjana matekũhũthĩra thakame. Nĩ tũkenaga tondũ njĩra cia ũrigitani nĩ ithiĩte na mbere kwagĩra. Ũrigitani ũtarahũthĩra thakame ũrĩa arwaru Aira a Jehova mathondeketwo naguo, rĩu nĩ ũrahũthĩrũo nginya harĩ andũ arĩa angĩ. Mabũrũri-inĩ maingĩ, rĩu mũrwaru o wothe no atue itua rĩa gwĩthema mathĩna marĩa maumanaga na gwĩkĩrũo thakame ta mĩrimũ ĩrĩa ĩgwatanagio kũgerera thakame, thakame kũregana na mwĩrĩ, na mahĩtia mangĩ mangĩkwo nĩ mũndũ.

 Ũrĩa andũ maugaga: Aira a Jehova metĩkĩtie atĩ wĩtĩkio no ũtũme mũndũ ahone.

 Ũrĩa kũrĩ: Tũtiĩtĩkĩtie atĩ mũndũ no ahonio nĩ wĩtĩkio.

 Ũrĩa andũ maugaga: Ũrigitani ũtarahũthĩra thakame nĩ ũrĩ goro mũno.

 Ũrĩa kũrĩ: Ũrigitani ũtarahũthĩra thakame nĩ ũhonokagia mbeca. a

 Ũrĩa andũ maugaga: Aira a Jehova aingĩ, nginya ciana, nĩ makuaga o mwaka nĩ ũndũ wa kũrega gwĩkĩrũo thakame.

 Ũrĩa kũrĩ: Ũhoro ũcio ndũrĩ na mũthingi. Mandagĩtarĩ nĩ mathondekaga mĩrimũ mĩnene ta ya gũthĩnjwo ngoro, mahĩndĩ na marũngo, kana gũcenjio kĩĩga mategwĩkĩra mũrwaru thakame. b Arwaru arĩa mathondekagwo mategwĩkĩrũo thakame, nginya ciana, mahonaga wega o ta arĩa mekagĩrũo thakame kana makahona wega makĩria kũmakĩra. c Ũrĩa kũrĩ nĩ atĩ, gũtirĩ mũndũ ũngiuga arĩ na ma atĩ mũrwaru nĩ egũkua aga gwĩkĩrũo thakame, kana ndegũkua ekĩrũo thakame.

 Gwĩkĩrũo thakame to ũhoro wa ũrigitani tu, no nĩ ũhutĩtie ũrata wa mũndũ na Ngai. Kĩrĩkanĩro Kĩrĩa Gĩkũrũ na Kĩrĩa Kĩerũ, cierĩ nĩ itũheete watho wa gwĩthema thakame. (Kĩambĩrĩria 9:4; Maũndũ ma Alawii 17:10; Gũcokerithia Maathani 12:23; Atũmwo 15:28, 29) Ningĩ Ngai onaga thakame ĩrũgamĩrĩire muoyo. (Maũndũ ma Alawii 17:14) Kwoguo twĩthemaga gwĩkĩrũo thakame nĩ ũndũ wa gwathĩkĩra Ngai, na ningĩ tondũ nĩ tũmũheete gĩtĩo arĩ we Mũheani wa muoyo.

 Kũrĩ hĩndĩ mandagĩtarĩ moonaga kũrega gwĩkĩrũo thakame, kana ũrigitani ũtarahũthĩra thakame, arĩ ũndũ mũũru, o na kana ta arĩ ũgwati, no mawoni macio nĩ macenjetie mĩaka-inĩ ya ica ikuhĩ. Kwa ngerekano, mwaka wa 2004 gĩcunjĩ gĩacabirũo ibuku-inĩ rĩa gĩthomo kĩa ũrigitani, kĩaugire atĩ “njĩra nyingĩ iria imenyekete arwaru Aira a Jehova magĩthondekwo, nĩ irĩhũthagĩrũo harĩ andũ othe mĩaka yũkĩte.” d Gĩcunjĩ kĩngĩ kĩrĩ ibuku-inĩ rĩtagwo Heart, Lung and Circulation kĩrĩa kĩaandĩkirũo mwaka wa 2010, kĩaugire atĩ “to Aira a Jehova magĩrĩirũo ‘gũthĩnjwo mategwĩkĩrũo thakame,’ no mandagĩtarĩ magĩrĩirũo kũhũthĩra njĩra ĩyo harĩ arwaru othe arĩa marathĩnjwo.”

 Mandagĩtarĩ aingĩ thĩinĩ wa thĩ rĩu mahũthagĩra njĩra cia kũhonokia thakame rĩrĩa marathondeka mĩrimũ mĩnene ũndũ mũrwaru ategwĩkĩrũo thakame. Njĩra ta icio nĩ irahũthĩrũo nginya mabũrũri-inĩ marĩa matarĩ na ũhoti mũnene wa kĩĩmbeca na nginya arwaru aingĩ arĩa matarĩ Aira a Jehova nĩ maugaga mathondekwo na njĩra icio.