Hihi Mũndũ no Athuure Gũtiga Gũkorũo Arĩ Mũira wa Jehova?

THAAKA

Ĩĩ. Mũndũ no atige gũkorũo arĩ Mũira wa Jehova na njĩra ici igĩrĩ:

Na njĩra ya kuuga atĩ nĩ arenda gũtiga. Mũndũ no auge na kanua kana na njĩra ya kwandĩka marũa atĩ we ndarenda gũkorũo arĩ Mũira wa Jehova rĩngĩ.
Na njĩra ya ciĩko. Mũndũ no eke ũndũ ũronania atĩ we ndarenda gũkorũo arĩ Mũira wa Jehova rĩngĩ. (1 Petero 5:9) Kwa ngerekano, mũndũ no athiĩ ndini-inĩ ĩngĩ na atue itua atĩ arenda gũikara kuo.—1 Johana 2:19.

Ĩ angĩkorũo mũndũ ndahunjagia kana agoka ũthathaiya-inĩ wanyu? Hihi nĩ muonaga mũndũ ta ũcio ta atigĩte gũkorũo arĩ Mũira wa Jehova?

Aca. Mũndũ ũtigĩte kũnyitanĩra na ithuĩ kana akeyeheria, nĩ ngũrani na mũndũ ũrĩ na wĩtĩkio ũtarĩ na hinya. Kaingĩ, andũ arĩa matigaga kũhunjia kana makaaga kũnyitanĩra na ithuĩ ũtungata-inĩ, matikoragwo matigĩte gũkorũo marĩ Aira a Jehova, no kaingĩ nĩ ngoro makoragwo makuĩte. Handũ ha gũtiganĩria andũ ta acio, nĩ tũgeragia mũno kũmateithĩrĩria na kũmomĩrĩria. (1 Athesalonike 5:14; Judasi 22) Angĩkorũo mũndũ ta ũcio nĩ arabatara ũteithio, athuri a kĩũngano nĩ moyaga ikinya rĩa mbere rĩa kũmũteithia kĩĩroho.—Agalatia 6:1; 1 Petero 5:1-3.

O na kũrĩ ũguo, mũndũ angĩtua itua rĩa gũtiga gũkorũo arĩ Mũira wa Jehova, athuri a kĩũngano matimũtindĩkagĩrĩria atige gũtua itua rĩu. O mũndũ nĩwe wĩtuagĩra itua rĩa ndini ĩrĩa ekũrũmĩrĩra. (Joshua 24:15) Twĩtĩkĩtie atĩ andũ arĩa mathathayagia Ngai, magĩrĩire gwĩka ũguo meyendeire kuuma ngoro.—Thaburi 110:3; Mathayo 22:37.